نیوٹریشن انٹرنیشنل کی وفد نے خیبر پختونخوا کے وزیر خوراک سے ملاقات کی، غذائیت کی اہمیت پر تبادلہ خیال

نیوٹریشن انٹرنیشنل کی گلوبل ڈائریکٹر کرسٹن جو اے این کی قیادت میں ایک وفد نے نگران صوبائی وزیر برائے خوراک، زراعت، لائیو سٹاک اور جنگلات خیبر پختونخوا آصف رفیق سے سول سیکرٹریٹ پشاور میں ملاقات کی، جہاں صوبے میں غذائیت کی صورتحال اور آگاہی کے فروغ کے حوالے سے تبادلہ خیال کیا گیا۔ نیوٹریشن انٹرنیشنل پاکستان اور خیبرپختونخوا کے اعلیٰ حکام بھی وفد میں شامل تھے۔ وفد نے نگراں صوبائی وزیر کو خیبرپختونخوا میں نیوٹریشن انٹرنیشنل کے جاری متوازن خوراک اور غذائیت کے منصوبوں پر بریفنگ دی اور اپنی کارکردگی سے آگاہ کیا۔ خیبرپختونخوا کے وزیر برائے خوراک، زراعت، لائیو سٹاک اور جنگلات آصف رفیق نے کہا کہ متوازن خوراک ہر فرد کی ضرورت ہے، اس سلسلے میں نومولود اور دودھ پلانے والی ماؤں کی غذائیت کا خیال رکھنے کے حوالے سے زیادہ سے زیادہ آگاہی دی جائے۔ انہوں نے کہا کہ خیبرپختونخوا کے سرکاری ہسپتالوں میں نومولود بچوں کے والدین اور حاملہ خواتین کو متوازن غذا کھانے کی ترغیب دی جاتی ہے تاکہ ایک صحت مند معاشرہ تشکیل پا سکے۔ نگراں وزیر آصف رفیق نے صوبہ خیبرپختونخوا میں مضر صحت اشیائے خوردونوش کے بروقت خاتمے اور اس کے خلاف قانونی کارروائیوں کا ذکر کیا تاکہ عوام کو صحت بخش اشیائے خوردونوش کی فراہمی کو ممکن بنایا جا سکے۔ انہوں نے متوازن غذا کی اہمیت کو اجاگر کرنے اور غذائیت کو فروغ دینے کے لیے نیوٹریشن انٹرنیشنل کی کاوشوں کو سراہا۔ وزیر خوراک اس کے طویل مدتی اور خیبر پختونخوا کے عوام کی بہتری کے لیے قانونی مضمرات پر محکمے کے ساتھ بحث کے بعد لازمی فوڈ فورٹیفیکیشن کے نفاذ اور لاگت کی منتقلی کے طریقہ کار کی منظوری کے لیے مسودہ بھیجیں گے۔