خیبر پختونخوا حکومت کا صحت کے شعبے میں انقلابی قدم, بیرسٹر ڈاکٹر سیف

خیبر پختونخوا حکومت کا صحت کے شعبے میں انقلابی قدم, بیرسٹر ڈاکٹر سیف
عمران خان کے وژن کے مطابق خیبر پختونخوا حکومت نے صحت کے شعبے میں ایک اور انقلابی قدم اٹھایا ہے۔ وزیرِ اعلیٰ خیبر پختونخوا کی زیرِ صدارت اجلاس میں فیصلہ کیا گیا ہے کہ ٹرانسپلانٹ وامپلانٹ سروسز کو صحت کارڈ میں شامل کیا جائے گا۔ اس فیصلے کے تحت گردے، جگر اور بون میرو ٹرانسپلانٹ کے اخراجات حکومت برداشت کرے گی۔ اس کے علاوہ کوکلئیر امپلانٹ کی سہولت بھی مفت فراہم کی جائے گی۔بیرسٹر ڈاکٹر سیف نے بتایا کہ منشیات کے عادی افراد کی بحالی کو بھی جلد صحت کارڈ میں شامل کیا جائے گا۔ اس حوالے سے وزیرِ اعلیٰ نے محکمہ صحت کو ضروری ہدایات جاری کر دی ہیں۔مزید برآں، علاج، تحقیق اور صنعتی مقاصد کے لیے کینابیس پلانٹ کے استعمال سے متعلق قواعد کی منظوری بھی دے دی گئی ہے۔ مشیر اطلاعات بیرسٹر ڈاکٹرسیف نے کہا کہ صحت کے شعبے میں اصلاحات لانے اور عوام کو صحت کی مفت سہولیات فراہم کرنا خیبر پختون خوا حکومت کی ترجیحات میں شامل ہیں۔ خیبر پختون خوا حکومت عمران خان کے وژن کو عملی جامہ پہناکر صحت اور تعلیم کے شعبوں میں انقلابی اقدامات اٹھارہی ہے۔ مشیر اطلاعات نے کہا کہ خیبر پختونخوا واحد صوبہ ہے جو عوام کو صحت کی مفت سہولیات فراہم کررہی ہے۔