پی ٹی آئی کے تحریری مطالبات کے سامنے آنے پرجعلی حکومت اب بھاگنے کی تیاری میں ہے۔بیرسٹر ڈاکٹر سیف

وزیر اعلیٰ خیبر پختونخوا کے مشیر اطلاعات و تعلقات عا مہ بیرسٹر ڈاکٹر سیف نے کہا ہے کہ عوام میں غیر مقبول حکومت پی ٹی آئی کے تحریری مطالبات کے سامنے آنے پر اب بھاگنے کی تیاری میں ہے،جوڈیشل کمیشن کی تشکیل سے انکار حکومت کے غیر منتخب اور ناجائز ہونے کی دلیل ہے۔اپنے ایک بیان میں بیرسٹر ڈاکٹر سیف نے کہا کہ جعلی وفاقی حکومت عدلیہ، میڈیا اور اپوزیشن کا وجود ختم کرنے کے لیے نئے قانون لا رہی ہے، پارلیمنٹ کو ربڑ سٹیمپ بنا دیا گیا ہے لیکن میڈیا کے لئے کھودی گئی قبر میں غیر منتخب حکومت خود دفن ہو جائے گی۔ بیرسٹر ڈاکٹر سیف نے مزید کہا کہ سپیکر ایاز صادق کو اپنے غیر جمہوری کردار پر شرمندگی ضرور ہو گی۔ حکومت کے مذاکرات سے بھاگنے کامطلب اپوزیشن کو سڑکوں پر آنے کے لئے مجبور کرنا ہوگا۔ بیرسٹر ڈاکٹر سیف نے کہا کہ وزیراعظم شہباز شریف نالائق گورنر خیبرپختونخوا کو اسلام آباد میں گھر دے کر خیبرپختونخوا حکومت کے خلاف سیاسی مورچہ بنا رہے ہیں۔ شہباز شریف پیپلز پارٹی سے سوگنڈے بھی کھا رہے ہیں اور 100 ڈنڈے بھی۔