مشیر اطلاعات خیبرپختونخوا بیرسٹر ڈاکٹر محمد علی سیف کا پنجاب کے اشتہاری بجٹ کی تحقیقات کا مطالبہ

وزیر اعلیٰ خیبر پختونخوا کے مشیر اطلاعات وتعلقات عامہ بیرسٹر ڈاکٹر سیف نے پنجاب کے اشتہاری بجٹ کی تحقیقات کا مطالبہ کرتے ہوئے کہا ہے کہ پنجاب کے غریب عوام کا پیسہ اشتہاروں پر لٹایا جا رہا ہے، یہ سپریم کورٹ کے فیصلے کی خلاف ورزی ہے۔سوال یہ ہے کہ پنجاب میں کیا مہنگائی اور بے روزگاری ختم ہو چکی ہے وہ کون سی کارکردگی ہے جس کی تشہیر کی جا رہی ہے، پیکا کالے قانون کے بعد عوام کے ٹیکسوں کے پیسے سے اخبارات اشتہارات میں بدل دئیے گئے ہیں، اخبار میں اب خبر نہیں اشتہار شائع ہونگے، بتایا جائے کتنے پیسے ایک فرد کی تشہیر پر خرچ ہوئے ہیں، یہ بھی تحقیقات ہونی چاہیے کہ سرکاری پیسہ کیوں لٹایا گیا، ذمہ داروں سے یہ پیسہ وصول کرکے قومی خزانے میں جمع کرایا جائے،انہوں نے کہا کہ سندھ اور پنجاب میں غیر منتخب حکومتوں کی کارکردگی اشتہاری ڈرامہ بازی تک محدود ہے، عوام کو نظر آ رہی ہے نہ انہیں محسوس ہو رہی ہے، مریم نواز شریف کی ”سرکاری پروموشن” کا مزاحیہ اشتہار فرسٹریشن کی انتہا ہے، عوام کا لیڈر بننے کے شوق میں یہ کردار مذاق بن چکے ہیں، سرکاری اشتہاروں کے ذریعے عوام کا پیسہ”دو غیر سیاسی بچوں ” کو زبردستی لیڈر بنانے پر لٹانا بدقسمتی ہے، بیرسٹر ڈاکٹرسیف نے کہا کہ چھبیسویں ترمیم نہ ہوتی تو شاید عدلیہ قومی وسائل کی لوٹ مار اور اپنے حکم کی خلاف ورزی کا نوٹس لے لیتی۔