شہباز شریف کا آئی ایم ایف سے آخری پروگرام لینے کا دعویٰ غلط ثابت ہوا۔ مشیر خزانہ خیبرپختونخوا مزمل اسلم

نئے آئی ایم ایف پروگرام میں حکومت عام لوگوں کے لیے کوئی رعایت حاصل کرنے میں ناکام رہی ٹیکس کی شرح میں کمی، رئیل اسٹیٹ یا پاور ٹیرف کی صورت میں کسی قسم کی رعایت نہیں دی گئی۔ مشیر خزانہ خیبرپختونخوا مزمل اسلم

مشیر خزانہ خیبرپختونخوا مزمل اسلم نے آئی ایم ایف پروگرام پر ردعمل دیتے ہوئے کہا ہے کہ شہباز شریف کا آئی ایم ایف سے آخری پروگرام لینے کا دعویٰ غلط ثابت ہوا انہوں نے کہا جب پاکستان نے جولائی 2024 میں آئی ایم ایف کا پروگرام حاصل کیا تب یہ دعویٰ شہباز شریف نے کیا تھا آج پاکستان نے 37 ماہ کے جاری EFF پروگرام کے ساتھ ایک اور متوازی 28 ماہ کا موسمیاتی پروگرام (RSF) لیا۔ مشیر خزانہ خیبرپختونخوا نے کہا کہ اہم بات یہ ہے کہ پہلا جائزہ مکمل ہو گیا ہے اور سٹاف لیول سطح پر معاہدہ ہو گیا ہے اور بری خبر یہ ہے کہ حکومت عام لوگوں کے لیے کوئی رعایت حاصل کرنے میں ناکام رہی۔ مزمل اسلم نے کہا کہ ٹیکس کی شرح میں کمی، رئیل اسٹیٹ یا پاور ٹیرف کی صورت میں کسی قسم کی رعایت نہیں دی گئی اور عوام کو موجودہ ابتر معاشی حالت کے ساتھ ہی رہنا ہے۔ مشیر خزانہ خیبرپختونخوا نے کہا کہ شہباز شریف کی حکومت اپنے دور اقتدار یعنی پی ڈی ایم2022 سے لے کر اب تک 3 سالوں کے مختصر عرصے میں آئی ایم ایف سے 4 پروگرام لے چکی ہے۔