وزیر اعلیٰ خیبرپختونخوا کے معاون خصوصی برائے ٹیکنیکل ایجوکیشن طفیل انجم نے وزیر اعلیٰ کے مشیر برائے انسداد بدعنوانی مصدق عباسی کے ہمراہ ادارہ ٹیکنیکل ایجوکیشن میں اصلاحات بارے اجلاس کی صدارت کی

وزیراعلی خیبرپختونخوا کے معاون خصوصی برائے ٹیکنیکل ایجوکیشن طفیل انجم نے کہا ہے کہ ٹیکنیکل ایجوکیشن میں اصلاحات وقت کی اہم ضرورت ہے، انہوں نے کہا ہے کہ فنی تعلیم کو دور جدید کے تقاضوں سے ہم آہنگ کرنے کے لئے عملی اصلاحات لا رہے ہیں تاکہ طلباء کو معیاری فنی تعلیم کی فراہمی ممکن ہوسکے۔ ان خیالات کا اظہار انہوں نے خیبرپختونخوا ٹیکنیکل ایجوکیشن اینڈ ووکیشنل ٹریننگ انسٹی ٹیوٹ میں اصلاحات کے حوالے سے اجلاس کی صدارت کرتے ہوئے کیا۔ اجلاس میں مشیر برائے انسداد بدعنوانی مصدق عباسی، سیکرٹری ٹیکنیکل ایجوکیشن عامر افاق، سپیشل سیکرٹری، ایم ڈی کے پی ٹیوٹا ودیگر اعلیٰ حکام نے شرکت کی ہے۔شراکاء اجلاس کو ٹیکنیکل ایجوکیشن اصلاحاتی ایجنڈے پر تفصیلی بریفننگ دی گئی ہے۔ اجلاس کو بتایا گیا ہے کہ طلباء کو جدید فنی تعلیم سے آراستہ کرنے کے لئے صوبہ بھر کے پولی ٹیکنیکل انسٹیٹیوٹ میں جدید دور کے تقاضوں کے عین مطابق فنی تربیتی کورسز فراہم کر رہے ہیں جبکہ عملی میدان میں طلباء کو اگے لے جانے کے لئے عملی تربیت بھی دی جا رہی ہے۔ اس موقع پر معاون خصوصی نے کہا ہے کہ طلباء کو جدید فنی تعلیم سے روشناس کرانا ہمارا مقصد ہونا چاہیئے، انہوں نے کہا کہ وزیراعلیٰ خیبرپختونخوا نے فنی تعلیم کو عام کرنے اور صوبے کے نوجوانوں کو آگے لانے کے لئے خصوصی احکامات جاری کئے ہیں، ہماری کوشش ہے کہ ان احکامات کی روشنی میں ہم اپنے نوجوان طبقے کو فنی تعلیم کے میدان میں عالمی سطح پر متعارف کرائیں، انہوں نے ہدایت کی کہ ٹیکنیکل ایجوکیشن میں دور جدید کے تقاضوں کے مطابق اصلاحات لائی جائیں اور طلباء کو وہ کورسز پڑھائے جائیں جن سے وہ ملکی اور عالمی سطح پر اپنے لئے روزگا ر حاصل کر سکیں۔ معاون خصوصی نے کہا ہے کہ اصلاحات کے ساتھ ساتھ ہم نے اپنے ادارے میں کرپشن کے عنصر کو ختم کرنا ہے اور میرٹ کی بنیاد پر تمام امور چلانے ہیں۔ اجلاس کے دوران مشیر برائے انسداد بدعنوانی مصدق عباسی نے کے پی ٹیوٹا کے اقدامات کو سراہا ہے اور کہا کہ وہ امید کرتے ہیں کہ یہ ادارہ اپنے تمام تر وسائل بروئے کار لاتے ہوئے فنی تعلیم کے فروغ کے لئے عملی اقدامات اٹھائے گا۔