وزیرِ صحت خیبر پختونخوا خلیق الرحمان نے پیر کے روزرورل ہیلتھ سینٹر پُتوَر بالا، ورسک روڈ، پشاور کا دورہ کیا

وزیرِ صحت خیبر پختونخوا خلیق الرحمان نے پیر کے روزرورل ہیلتھ سینٹر پُتوَر بالا، ورسک روڈ، پشاور کا دورہ کیا۔ اس موقع پر ان کے ہمراہ ڈائریکٹر جنرل ہیلتھ ڈاکٹر شاہین آفریدی اور دیگر متعلقہ افسران بھی موجود تھے۔ دورے کے دوران صوبائی وزیرِ صحت نے بنیادی ہنگامی زچگی اور نوزائیدہ بچوں کی نگہداشت کے یونٹ اور نئے بلاک کا سنگِ بنیاد رکھنے کی تقریب میں شرکت کی۔ یہ یونٹ حمل، زچگی اور بعد از زچگی کے دوران پیش آنے والی پیچیدگیوں سے نمٹنے کے لیے جان بچانے والی طبی سہولیات فراہم کرے گا۔رورل ہیلتھ سینٹر پُتوَر بالا میں نئے بلاک کی توسیع اور تعمیر کا منصوبہ ہیومن کیپیٹل انویسٹمنٹ پراجیکٹ خیبر پختونخوا کے تعاون سے مکمل کیا جا رہا ہے۔ اس موقع پر پراجیکٹ ڈائریکٹر ایچ سی آئی پی ڈاکٹر بلال اورسابق رکنِ صوبائی اسمبلی محمود جان بھی صوبائی وزیرِ صحت کے ہمراہ تھے۔توسیعی منصوبے اور نئی عمارت کی تعمیر سے نئے بلاکس اور صحت کے مختلف یونٹس کے لیے اضافی جگہ میسر آئے گی جس سے صحت کی سہولیات میں توسیع اور مقامی آبادی کو بہتر طبی سہولیات کی فراہمی ممکن ہو سکیں گی۔ صوبائی وزیرِ صحت کو منصوبے کے دائرہ کار اور علاقے میں بنیادی صحت کی خدمات کو مضبوط بنانے سے متعلق اس کے متوقع اثرات پر تفصیلی بریفنگ دی گئی۔دورے کے دوران صوبائی وزیرِ صحت نے صحت مرکز کے مختلف شعبہ جات کا معائنہ بھی کیا جہاں مریضوں کو طبی سہولیات فراہم کی جا رہی تھیں۔ انہوں نے لیبارٹری، ایکس رے روم اور مائنر آپریشن تھیٹر کا بھی دورہ کیا جہاں ڈاکٹرز اور پیرا میڈیکل اسٹاف اپنی ذمہ داریاں انجام دے رہے تھے اور مریض موجود تھے۔صوبائی وزیرِ صحت نے میڈیکل سپرنٹنڈنٹ کو ہدایت کی کہ مریضوں کے لیے ادویات کی بلا تعطل دستیابی کو یقینی بنایا جائے اور اس بات پر زور دیا کہ بنیادی سطح کے صحت مراکز میں عوام کو طبی سہولیات کی فراہمی میں کسی قسم کی کوتاہی برداشت نہیں کی جائے گی۔ خلیق الرحمان نے کہا کہ محکمہ صحت کو پہلے ہی ہدایت جاری کی جا چکی ہے کہ نئے ڈاکٹرز اور پیرا میڈیکل سٹاف کی بھرتی کے عمل کو تیز کیا جائے تاکہ تمام بنیادی سطح کے صحت مراکز میں مطلوبہ افرادی قوت کی دستیابی یقینی بنائی جا سکے۔ انہوں نے مزید کہا کہ ان مراکز میں ضروری طبی آلات کی فراہمی کے لیے بھی اقدامات کیے جا رہے ہیں۔حکومت کے عزم کا اعادہ کرتے ہوئے صوبائی وزیرِ صحت نے کہا کہ محکمہ صحت بنیادی سطح پر صحت کے نظام کی بہتری اور بڑے اصلاحاتی اقدامات کے نفاذ پر توجہ مرکوز کیے ہوئے ہے۔ ان اصلاحات سے اضلاع کی سطح پر بنیادی صحت کی سہولیات فراہم ہوں گی، غریب اور مستحق مریضوں کو بروقت علاج میسر آئے گا اور بڑے ہسپتالوں پر بوجھ میں نمایاں کمی آئے گی۔انہوں نے مزید کہا کہ صوبائی حکومت اور محکمہ صحت ضرورت کے مطابق نئے بڑے ہسپتال قائم کرنے کے عمل میں بھی مصروف ہیں تاکہ پشاور کے سرکاری ہسپتالوں پر بڑھتے ہوئے دباؤ اور رش کو کم کیا جا سکے۔ صوبائی وزیرِ صحت نے اس امید کا اظہار کیا کہ آنے والی ہیلتھ پالیسی سے صحت کے نظام میں پائیدار بہتری آئے گی اور صوبے کے عوام جلد مثبت تبدیلیاں محسوس کریں گے۔