خیبر پختونخوا کے مشیر برائے کھیل وامور نوجوانان تاج محمد خان ترند نے کہا ہے کہ ڈسٹرکٹ ہیڈ کوارٹر ہسپتال بٹگرام کو کیٹیگری بی میں اپ گریڈ کیا جا رہا ہے، جس کے لیے محکمہ خزانہ کے ساتھ مشاورت جاری ہے

خیبر پختونخوا کے مشیر برائے کھیل وامور نوجوانان تاج محمد خان ترند نے کہا ہے کہ ڈسٹرکٹ ہیڈ کوارٹر ہسپتال بٹگرام کو کیٹیگری بی میں اپ گریڈ کیا جا رہا ہے، جس کے لیے محکمہ خزانہ کے ساتھ مشاورت جاری ہے۔ ہسپتال کو کیٹیگری بی کا درجہ دلانا ہماری اولین ترجیح ہے۔انہوں نے مزید کہا کہ نگران دور میں ضلع بٹگرام کے ساتھ ناانصافی ہوئی اور محکمہ خزانہ سے ایس این ای واپس کی گئی جو علاقہ کے ساتھ زیادتی تھی۔ان خیالات کا اظہار انہوں نے اپنے دفتر سے جاری ایک بیان میں کیا۔تاج محمد خان ترند کا کہنا تھا کہ وہ بٹگرام کے عوام کے بے حد مشکور ہیں جنہوں نے انہیں اور ان کے خاندان کو عزت اور اعتماد دیا۔ انہوں نے اس عزم کا اظہارکیا کہ وہ اس اعتماد پر کبھی آنچ نہیں آنے دیں گے اور عوام کی توقعات اور امیدوں پر پورا اتریں گے۔انہوں نے مزید کہا کہ ہسپتال کو کیٹیگری بی کا درجہ ملنے سے بٹگرام کے عوام کو صحت کی بہتر اور مزید سہولیات میسر آئیں گی۔تاج محمد خان ترند نے کہا ہے کہ 31 مارچ تک بٹگرام کے تمام آر ایچ سیز (RHCs)، بی ایچ یوز (BHUs) اور سی ڈیز (CDs) میں ڈاکٹروں کی تعیناتی مکمل کر دی جائے گی۔انہوں نے اس عزم کا اظہار کرتے ہوئے کہا کہ عوام کو بنیادی صحت کی سہولیات کی فراہمی حکومت کی اولین ترجیح ہے اور موجود ہ خالی آسامیوں کو جلد از جلد پُر کیا جا رہا ہے تاکہ دور دراز علاقوں کے لوگوں کو بھی معیاری طبی سہولیات میسر آ سکیں۔