وزیر صحت خیبر پختونخوا خلیق الرحمان کی ہدایات پر پیرامیڈیکل ڈپلومہ امتحانات کی رول نمبر سلپس جاری

وزیر صحت خیبر پختونخوا خلیق الرحمان کی ہدایات کی روشنی میں فیکلٹی آف پیرامیڈیکل اینڈ الائیڈ ہیلتھ سائنسز (FPAHS) نے ڈپلومہ کورسز کے سالانہ امتحانات (مارچ 2026) کے لیے رول نمبر سلپس اپنی آن لائن ویب پورٹل پر اپ لوڈ کر دی ہیں۔فیکلٹی کی جانب سے جاری اعلامیے کے مطابق تمام متعلقہ پیرامیڈیکل کالجز کو ہدایت کی گئی ہے کہ وہ اپنے طلبہ کی رول نمبر سلپس فوری طور پر ڈاؤن لوڈ کر کے انہیں فراہم کریں۔ طلبہ کو بھی تاکید کی گئی ہے کہ وہ اپنی رول نمبر سلپس براہِ راست اپنے متعلقہ اداروں سے حاصل کریں تاکہ کسی قسم کی دشواری سے بچا جا سکے۔فیکلٹی کے مطابق صوبہ بھر سے تقریباً 36 ہزار 200 طلبہ ان امتحانات میں شرکت کریں گے، جو 31 مارچ سے 8 اپریل 2026 تک 23 مختلف کیٹیگریز میں منعقد ہوں گے۔امتحانات کے انعقاد کے لیے صوبہ بھر میں 55 امتحانی مراکز قائم کیے گئے ہیں۔چیف ایگزیکٹو آفیسر ڈاکٹر محمد رحمان آفریدی امتحانی عمل کی مجموعی نگرانی کریں گے، جبکہ امتحانات کے شفاف اور منظم انعقاد کے لیے تقریباً 500 اہلکار تعینات کیے گئے ہیں۔ سکیورٹی کے فول پروف انتظامات کو یقینی بنانے کے لیے تمام امتحانی مراکز پر پولیس اہلکار بھی موجود ہوں گے۔اس حوالے سےڈاکٹر محمد رحمان آفریدی نے مزید بتایا کہ فیکلٹی میں ایک مرکزی کنٹرول روم قائم کیا گیا ہے، جہاں سے امتحانی عمل کی مسلسل مانیٹرنگ کی جائے گی۔ انہوں نے واضح کیا کہ امتحانات کے دوران نقل یا کسی بھی قسم کی بدعنوانی کے خلاف زیرو ٹالرنس پالیسی اپنائی جائے گی۔وزیر صحت خلیق الرحمان نے متعلقہ حکام کو ہدایت کی ہے کہ امتحانات کے انعقاد میں شفافیت، میرٹ اور نظم و ضبط کو ہر صورت یقینی بنایا جائے۔ انہوں نے طلبہ پر زور دیا کہ وہ اپنی تمام تر توجہ امتحانات پر مرکوز رکھیں اور دیانتداری کے ساتھ امتحانی عمل میں حصہ لیں۔