صوبے میں جنگلات کا فروغ اور جنگلی حیات کا تحفظ حکومت کی اولین ترجیح ہے، مشیر وزیراعلیٰ پیر مصور خان

وزیراعلیٰ خیبرپختونخوا کے مشیر برائے جنگلات، ماحولیات، جنگلی حیات و موسمیاتی تبدیلی پیر مصور خان کی زیر صدارت سول سیکرٹریٹ پشاور میں محکمہ جنگلات و جنگلی حیات کا ایک اعلیٰ سطحی بریفنگ اجلاس منعقد ہوا۔اجلاس میں سیکرٹری جنگلات و جنگلی حیات جنید خان، چیف وائلڈ لائف ڈاکٹر محسن فاروق، محکمہ جنگلات کے چیف کنزرویٹرز اور دیگر متعلقہ اعلیٰ حکام نے شرکت کی۔اجلاس کے دوران مشیر وزیراعلیٰ کو محکمہ جنگلات اور جنگلی حیات کے تحت جاری ترقیاتی منصوبوں، سالانہ ترقیاتی پروگرام، صوبے میں جنگلات کے رقبے میں اضافے، شجرکاری مہم اور نایاب جنگلی حیات کے تحفظ و فروغ کے لیے اٹھائے گئے اقدامات پر تفصیلی بریفنگ دی گئی۔اس موقع پر گفتگو کرتے ہوئے مشیر وزیراعلیٰ پیر مصور خان نے کہا کہ خیبرپختونخوا کے جنگلات اور جنگلی حیات صوبے کا قیمتی اثاثہ ہیں اور ان کا تحفظ حکومت کی اولین ترجیحات میں شامل ہے۔ انہوں نے کہا کہ صوبے میں گرین کور کے فروغ، ماحولیاتی تحفظ اور حیاتیاتی تنوع کے استحکام کے لیے مزید مؤثر اور دیرپا اقدامات اٹھائے جائیں انہوں نے ہدایت کی کہ تمام منصوبے مقررہ وقت کے اندر مکمل شفافیت کے ساتھ پایۂ تکمیل تک پہنچائے جائیں۔ مشیر وزیراعلیٰ نے جنگلات کی غیر قانونی کٹائی اور جنگلی حیات کے غیر قانونی شکار کے خلاف زیرو ٹالرنس پالیسی اپنانے پر زور دیتے ہوئے متعلقہ حکام کو سختی سے قوانین پر عملدرآمد یقینی بنانے کی ہدایت کی۔پیر مصور خان نے محکمے کی کارکردگی کو مزید مؤثر بنانے اور جدید ٹیکنالوجی کے استعمال کو فروغ دینے کی ضرورت پر زور دیتے ہوئے کہا کہ بانی چیئرمین عمران خان کے وژن کے مطابق جنگلات، ماحولیات اور جنگلی حیات کے شعبوں میں انقلابی اصلاحات متعارف کرائی جائیں گی۔انہوں نے واضح کیا کہ وزیراعلیٰ خیبرپختونخوا سہیل آفریدی کے کرپشن فری وژن کے تحت محکمہ میں شفافیت، احتساب اور میرٹ کو ہر صورت یقینی بنایا جائے گا اور کرپشن پر کسی قسم کا سمجھوتہ نہیں کیا جائے گا۔