مشیر اطلاعات خیبرپختونخوا بیرسٹر سیف کا دارالعلوم حقانیہ اکوڑہ خٹک کا دورہ

وزیر اعلیٰ خیبرپختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے دارالعلوم حقانیہ اکوڑہ خٹک کا دورہ کیا۔ اس موقع پر ان کے ہمراہ صحافیوں سمیت محمد اسرار مدنی اور مولانا تحمید جان ازہری بھی موجود تھے۔دورے کے دوران دارالعلوم حقانیہ کے مختلف شعبہ جات، تعمیراتی منصوبوں، جامع مسجد مولانا عبدالحقؒ، ایوان شریعت ہال، اکیڈمک بلاک اور دیگر منصوبوں پر تفصیلی بریفنگ دی گئی۔ بیرسٹر ڈاکٹر سیف نے جدید مرکزی لائبریری، دفاتر، کمپیوٹر لیب، شعبہ تخصیصات اور درسگاہوں کا بھی معائنہ کیا۔اس موقع پر بیرسٹر سیف نے طلبہ سے خطاب کرتے ہوئے کہا کہ دارالعلوم حقانیہ نہ صرف خیبرپختونخوا بلکہ جنوبی ایشیا کا ایک اہم دینی ادارہ ہے۔ انہوں نے شیخ الحدیث مولانا عبدالحق ؒ اور مولانا سمیع الحق شہیدؒ کو خراج تحسین پیش کرتے ہوئے کہا کہ جامعہ حقانیہ کا علمی کردار پوری دنیا میں تسلیم شدہ ہے۔بیرسٹر سیف نے کہا کہ مذہبی اور مسلکی ہم آہنگی پرامن معاشرے کی بنیاد ہے اور اس حوالے سے دارالعلوم حقانیہ سمیت تمام مدارس پر بھاری ذمہ داری عائد ہوتی ہے۔ انہوں نے کہا کہ خیبرپختونخوا حکومت دارالعلوم حقانیہ کے کردار کو عزت و احترام کی نظر سے دیکھتی ہے اور اس باہمی تعلق کی قدر کرتی ہے۔بیرسٹر ڈاکٹر سیف نے مزید کہا کہ یہ علم اور دلیل کا دور ہے، اور ہمیں اپنی قوت استدلال اور علم کے ذریعے دنیا کو متاثر کرنا ہوگا۔ انہوں نے جامع مسجد مولانا عبدالحقؒ اور جدید اکیڈمک بلاک کو اسلامی طرز تعمیر کی منفرد مثال قرار دیا اور کہا کہ دارالعلوم حقانیہ کی تعلیمی کارکردگی کسی بھی اعلیٰ یونیورسٹی کے معیار کے سے کم نہیں۔اس موقع پر نائب مہتمم مولانا راشد الحق سمیع نے کرم میں شیعہ سنی تنازع کو پرامن طریقے سے حل کرنے میں مرکزی کردار ادا کرنے پر بیرسٹر ڈاکٹر سیف کو خراج تحسین پیش کیا۔ انہوں نے کہا کہ دارالعلوم حقانیہ نے ہمیشہ فرقہ واریت سے بالاتر ہوکر شیعہ سنی سمیت دیگر مسالک کے درمیان ہم آہنگی کے لیے کوششیں کی ہیں۔مولانا راشد الحق سمیع نے کہا کہ اسلام تکریم انسانیت کا درس دیتا ہے، اور اس درسگاہ کا بنیادی مقصد دعوت فکر و عمل کے ذریعے ایک پرامن اور مہذب معاشرے کی تشکیل ہے۔دورے کے موقع پر مولانا راشد الحق سمیع نے جامعہ حقانیہ کی مطبوعات اور اعزازی شیلڈ بھی بیرسٹر ڈاکٹر سیف کو پیش کیں۔