خیبر پختونخوا حکومت صنعتوں کو رعایتی نرخ میں بجلی اورنئی گیس پالیسی کے تحت رعایتی گیس بھی مہیا کرنے کے لئے تیارہے، مشیر خزانہ خیبرپختونخوا مزمل اسلم
وزیر اعلی خیبر پختونخوا کے مشیر خزانہ و بین الصوبائی رابطہ مزمل اسلم نے کہا ہے کہ وفاقی حکومت کی بجلی اور گیس سے متعلق ناقص پالیسی سے ملک میں بڑی صنعتوں کا نظام درہم برہم ہوچکا ہے اس صورتحال کو مدنظر رکھتے ہوئے خیبر پختونخوا حکومت صنعتوں کو رعایتی نرخ میں بجلی اورنئی گیس پالیسی کے تحت رعایتی گیس بھی مہیا کرنے کے لئے تیارہے۔ مشیر خزانہ خیبرپختونخوا مزمل اسلم نے ان خیالات کا اظہار اپنے دفتر سے جاری ہونے والے پیغام میں کیا۔ مزمل اسلم نے کہا کہ جو صنعتیں 8 سے 9 سینٹس میں بجلی کے حصول کے لئے خواہش مند ہیں بہت جلد خیبرپختونخوا ان کی خواہشات کو عملی جامہ پہنانے گا۔ مزمل اسلم نے کہا کہ ٹکسٹائل صنعت سمیت دیگر صنعتوں سے وابستہ سرمایہ کاروں کی خیبرپختونخوا میں صنعت سازی میں دلچسپی وزیر اعلی خیبر پختونخوا علی امین خان گنڈاپور کی حکومت پر اعتماد ہے۔ مشیر خزانہ نے کہا کہ خدمات کے شعبے سے منسلک کاروباروں کو بھی خیبرپختونخوا میں اپنا کاروبار اور فرنچائز شروع کرنے کے لئے خوش آمدید کہتے ہیں۔ مشیر خزانہ نے کہا کہ ایسے کاروباری افراد آئندہ بجٹ سے پہلے اپنی کاروباری تجاویز شئیر کریں ہر طرح کی سہولیات دینے کو تیار ہیں اور ہمارا مقصد خیبر پختونخوا اور پاکستان کی معیشت کو پیروں پر کھڑا کرنا ہے۔