وزیراعلیٰ علی امین خان گنڈاپور کی مدبرانہ کوششوں سے ضلع کرم میں امن قائم ہو چکا ہے، بیرسٹر ڈاکٹر سیف

وزیراعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ ضلع کرم میں وزیراعلیٰ علی امین خان گنڈاپور کی مدبرانہ کوششوں سے امن قائم ہو چکا ہے،علاقے کو بنکروں اور اسلحے سے پاک کر دیا گیا ہے۔ مجموعی طور پر دونوں فریقین کے تقریباً 979 بنکر تباہ کیے گئے ہیں۔علاقے کو مکمل طور پر اسلحے سے بھی پاک کیا گیا ہے۔انہوں نے کہا کہ86 دیہاتوں کو غیر مسلح کر کے اسلحہ اور گولہ بارود سرکاری تحویل میں لے لیا گیا ہے انہوں نے کہا کہ فریقین کے درمیان کشیدگی کی بڑی وجہ بنکرز اور اسلحہ تھے۔ بیرسٹر ڈاکٹر سیف نے کہا کہ دورانِ کشیدگی وزیراعلی نے اپنا ہیلی کاپٹر امدادی سرگرمیوں کے لیے مختص کر دیا تھا، ہیلی کاپٹر کی 338 پروازوں کے ذریعے 29,140 کلوگرام ادویات متاثرہ علاقے تک پہنچائی گئیں، اسی طرح مریضوں سمیت 9,290 افراد کو محفوظ طریقے سے پشاور اور دیگر علاقوں میں منتقل کیا گیا۔ علاقے میں اب ترقیاتی عمل تیزی سے جاری ہے، ٹل پاراچنار روڈ کی مرمت کے لیے 10 کروڑ روپے کی منظوری دی جا چکی ہے۔ 9.6 ارب روپے کی لاگت سے سڑک کی توسیع کا منصوبہ جاری ہے۔بازاروں کی تزئین و آرائش کے 728 ملین روپے کے منصوبے میں سے 300 ملین روپے سے زائد خرچ کیے جا چکے ہیں۔