مردان میں محکمہ ایکسائز کی بڑی کارروائی، 5 کلو آئس اور 12 کلو چرس برآمد

محکمہ ایکسائز، ٹیکسیشن و نارکوٹکس کنٹرول خیبرپختونخوا نے مردان میں ایک بڑی کارروائی کے دوران منشیات سمگلنگ کی کوشش ناکام بناتے ہوئے 5 ہزار گرام آئس اور 12 ہزار گرام چرس برآمد کرلی محکمہ ایکسائز سے موصولہ تفصیلات کے مطابق ماجد خان، ایکسائز اینڈ ٹیکسیشن آفیسر کاؤنٹر نارکوٹکس آپریشنز اور عاکف نواز، سرکل آفیسر کی نگرانی میں شکیل خان، ایس ایچ او تھانہ ایکسائز مردان کی سربراہی میں اجمل لودھی انسپکٹر نے دیگر نفری کے ہمراہ خفیہ اطلاع پر رنگ روڈ کے مقام پر کارروائی کی۔ اس دوران گاڑی نمبر RL-2561 کی تلاشی لینے پر اس سے 5000 گرام آئس اور 12000 گرام چرس برآمد کی گئی۔برآمد ہونے والی منشیات قبضے میں لے کر ملزمان کے خلاف قانونی کارروائی شروع کر دی گئی ہے جبکہ مزید تفتیش کیلئے مقدمہ درج کر لیا گیا ہے۔صوبائی حکومت کی منشیات کے خلاف زیرو ٹالرنس پالیسی کے تحت محکمہ ایکسائز کی صوبہ بھر میں کارروائیاں تسلسل کے ساتھ جاری ہیں، اور نوجوان نسل کو منشیات کے ناسور سے بچانے کیلئے ایسے عناصر کے خلاف بلاامتیاز کارروائی عمل میں لائی جا رہی ہے۔