کیپرا کی جانب سے کنزیومر ریوارڈز اسکیم کے تحت پہلی قرعہ اندازی کا انعقاد

خیبر پختونخوا ریونیو اتھارٹی (کیپرا) نے جمعہ کے روز کنزیومر ریوارڈز اسکیم کے تحت پہلی قرعہ اندازی کا انعقاد کیا۔قرعہ اندازی کے نتیجے میں مجموعی طور پر 50 خوش نصیب افراد کا انتخاب کیا گیا، جن میں سے ہر ایک کو 10 ہزار روپے انعام دیا جائے گا۔تفصیلات کے مطابق کنزیومر ریوارڈز اسکیم کا آغاز کیپرا نے رواں سال فروری میں خیبر پختونخوا کے چار اضلاع میں ہوٹلز اور ریسٹورانٹس کے شعبے میں کیا۔ اسکیم کے اجراء سے قبل کیپرا کی ٹیموں نے منتخب ہوٹلز اور ریسٹورنٹس میں اسٹینڈیز نصب کیں تاکہ صارفین کو آگاہی فراہم کی جا سکے کہ وہ خدمات حاصل کرنے کے بعد موصول ہونے والی انوائسز جمع کروا کر اسکیم میں حصہ لے سکتے ہیں۔15 فروری سے 15 مارچ 2026 تک موصول ہونے والی مجموعی طور پر 176 انوائسز کو قرعہ اندازی میں شامل کیا گیا۔ قرعہ اندازی ڈائریکٹر جنرل کیپرا محترمہ ارم ناز نے دیگر سینئر افسران کی موجودگی میں ڈیجیٹل اور شفاف انداز میں کی۔
اس موقع پر خطاب کرتے ہوئے ڈائریکٹر جنرل کیپرا محترمہ ارم ناز نے قرعہ اندازی میں کامیاب ہونے والے افراد کو مبارکباد دی اور کہا کہ یہ اسکیم مزید تین ماہ تک جاری رہے گی، جس کے دوران مزید تین قرعہ اندازیاں کی جائیں گی۔ ان کا کہنا تھا کہ اسیکم کی کامیابی پر اس کے اگلے مرحلے کا اغاز کیا جائے گا جس میں خیبر پختونخوا کے تمام اضلاع کو شامل کیا جائے گا۔ انہوں نے عوام سے اپیل کی کہ وہ اس اسکیم میں بڑھ چڑھ کر حصہ لیں اور انعام جیتنے کا موقع حاصل کریں۔
انہوں نے مزید کہا کہ شفافیت کو یقینی بنانے کے لیے کیپرا کے افسران، عملہ اور ان کے اہل خانہ کو اسکیم میں شرکت کی اجازت نہیں ہے۔آخر میں ڈائریکٹر جنرل نے شرکاء کا شکریہ ادا کیا کہ انہوں نے اپنی انوائسز جمع کروا کر اس اقدام کو کامیاب بنایا۔ انہوں نے کہا کہ پشاور، مردان، ایبٹ آباد اور ہری پور میں منتخب ہوٹلز اور ریسٹورنٹس کی خدمات حاصل کرنے والے صارفیناسٹینڈیز پر موجود کیو آر کوڈ اسکین کرکے اپنی انوائسز کی تصاویر شیئر کر کے اس اسکیم میں حصہ لے سکتے ہیں۔