برطانوی ہائی کمشنر محترمہ جین ماریئٹ نے چیف سیکرٹری خیبر پختونخوا شہاب علی شاہ سے پشاور میں ملاقات کی۔ ملاقات میں دوطرفہ تعلقات اور باہمی دلچسپی کے امور پر تبادلہ خیال کیا گیا۔

وزیر خوراک ظاہر شاہ طورو کی ہدایت پر محکمہ خوراک خیبرپختونخوا کی انسپکشن ٹیموں نے صوبہ بھر میں بڑے پیمانے پر کارروائیاں کرتے ہوئے ایک ہی دن میں 881 مختلف خوردنی اشیاء سے منسلک کاروباروں کی چیکنگ کی،گرانفروشی اور غیر معیاری اشیاء فروخت کرنے پر 45 افراد کو چالان کیا گیا، جبکہ 4 افراد کو موقع پر ہی گرفتار کرکے جیل بھیج دیا گیا۔ محکمہ خوراک نے مختلف کاروائیوں کے حوالے سے تفصیلات جاری کرتے ہوئے بتایا کہ قوانین کی خلاف ورزی پر 19 افراد کے خلاف مقدمات درج کرکے متعلقہ دکانداروں کیخلاف قانونی کارروائی کا آغاز بھی کردیا ہے۔اور چیکنگ کے دوران 160 جنرل اسٹورز، 78 نانبائیوں اور 144 قصابوں، 107 کباب و تکہ فروش، 58 دودھ فروش اور 85 پھل فروش کی انسپکشنز کی گئیں علاوہ ازیں، 50 فروٹ فروش، 15 مٹھائی و بیکری مالکان، 24 پکوڑہ فروش اور 22 ہوٹلوں کو بھی چیک کیا گیا۔محکمہ خوراک کے مطابق غیر معیاری خوراک کی فروخت اور سرکاری نرخ نامے سے تجاوز کرنے پر تقریباً 2 لاکھ 24 ہزار روپے کے جرمانے عائد کیے گئے۔ اس موقع پر وزیر خوراک خیبرپختونخوا ظاہر شاہ طورو نے متعلقہ حکام کو ہدایت دکی کہ صوبہ بھر میں گرانفروشوں اور غیر معیاری خوراک فروخت کرنے والوں کے خلاف کریک ڈاؤن مزید تیز کیاجائے۔ ان کا کہنا تھا کہ شہریوں کو معیاری خوراک اور سرکاری نرخوں پر اشیاء کی فراہمی یقینی بنائی جائے اور خلاف ورزی کرنے والے کاروباریوں کیخلاف سخت تادیبی کاروائی عمل میں لائی جائے.

خیبر پختونخوا کے وزیر برائے ریونیو اینڈ سٹیٹ نزیر احمد عباسی کی زیرصدارت ہری پور میں دیرینہ مخنیال مسئلے کو حل کرنے، کینتھلہ اور کوٹ جیندہ کے مواضعات میں زمین کے حصول کے حوالے سے ایک جائزہ اجلاس پشاور میں منعقدہوا۔ اجلاس میں وزیر اعلیٰ کے معاون خصوصی برائے موسمیاتی تبدیلی، جنگلات، ماحولیات و جنگلی حیات خیبرپختونخوا پیر مصور خان، ایس ایم بی آر خیبر پختونخوا، سیکرٹری موسمیاتی تبدیلی اور محکمہ جنگلات ماحولیات و جنگلی حیات خیبر پختونخوا، کمشنر ہری پور، ڈپٹی کمشنر ہری پور اور دیگر اعلیٰ حکام نے شرکت کی۔ اجلاس میں محکمہ ریونیو اور فارسٹ ریکارڈز کے حوالے سے زمینی مسائل کو حل کرنے، ریزرو جنگلات، گزارہ جنگلات اور نجی املاک کی واضح حد بندی کو یقینی بنانے پر غور کیا گیا۔ اجلاس کا مقصد تمام متعلقہ محکموں کے لئیقابل عمل ریکارڈ قائم کرنا تھا۔اجلاس کے شرکاء نے علاقے میں پائیدار ترقی کی ضرورت پر زور دیتے ہوئے جنگلات کی غیر قانونی کٹائی کو روکنے کے لیے ایک ریگولیٹری میکانزم کی تشکیل پر تبادلہ خیال کیا۔ مزید برآں، اجلاس میں کینتھلا اور کوٹ جیندہ میں زمین کے حصول کی ضرورت کا جائزہ لیا گیا۔اجلاس میں ڈپٹی کمشنر ہری پورنے دونوں معاملات پر ایک جامع رپورٹ پیش کی۔صوبائی وزیر برائے ریونیو اینڈ سٹیٹ نذیر احمد عباسی نے تمام ترقیاتی اقدامات میں ماحولیاتی تحفظ کو یقینی بنانے کی ہدایت کی انہوں نے قدرتی ماحول کی حفاظت کرنے والے متوازن نقطہ نظر کی ضرورت پر زور دیتے ہوئے مزید کہا کہ حکومت ماحولیاتی توازن کو برقرار رکھتے ہوئے ان اہم مسائل سے نمٹنے کے لیے پرعزم ہے اور اس بات کو یقینی بنارہی ہے کہ شہری توسیع ماحولیاتی تحفظ کے ساتھ ہم آہنگ ہوں۔ اجلاس میں مسائل کاطویل مدتی حل تلاش کرنے کا اعادہ کیا گیا تاکہ جنگلات کے ذخائر کی حفاظت ہو سکے۔

وزیراعلیٰ خیبرپختونخوا کے معاون خصوصی برائے کمیونیکیشن اینڈ ورکس محمد سہیل آفریدی کی زیر صدارت روڈ ایسٹ مینجمنٹ سسٹم (RAMS) سے متعلق ایک اعلیٰ سطحی اجلاس پشاور میں منعقد ہوا۔ جس میں سیکرٹری سی اینڈ ڈبلیو اور دیگر اعلیٰ حکام بھی موجود تھے۔ اجلاس کے دوران، معاون خصوصی نے صوبہ بھر میں سڑکوں کے بنیادی ڈھانچے کو موثر طریقے سے منظم کرنے میں آر اے ایم ایس RAMS کی اہمیت پر زور دیا۔ اور کہا کہ RAMS ایک جامع نظام ہے جو سی اینڈ ڈبلیو ڈیپارٹمنٹ کے ذریعے خیبر پختونخواہ میں سڑکوں کے نیٹ ورک کی نگرانی برقرار رکھنے کے لیے استعمال کیا جاتا ہیاور یہ سڑکوں کے منصوبوں کی بہتر منصوبہ بندی، دیکھ بھال اور پائیداری کو یقینی بناتا ہے۔ محمد سہیل آفریدی نے کہا کہ محکمہ سی اینڈ ڈبلیو سڑکوں، عمارتوں اور انفارمیشن ٹیکنالوجی کے شعبوں میں خدمات کو بڑھاتے ہوئیشہریوں کے معیار زندگی کو بہتر بنانے کے لیے پرعزم ہے۔ سی اینڈ ڈبلیو محکمے نے کئی تاریخی منصوبے شروع کیے ہیں، جن میں پشاور میں ارباب نیاز کرکٹ سٹیڈیم کی تعمیر بھی شامل ہے، جس نے ملکی اور بین الاقوامی میچوں کی میزبانی کی ہے۔ مزید برآں سوات موٹروے پختونخوا ہائی وے اتھارٹی کے تعاون سے ایک اہم بنیادی ڈھانچے کا منصوبہ تعمیر کیا ہیجو صوبے میں رابطے کو بہتر بنانے کے لیے حکومت کی لگن کا ثبوت ہے۔ معاون خصوصی نے متعلقہ حکام کو ہدایت کی کہ RAMS کو مزید مضبوط کیا جائے اور صوبہ بھر میں موثر روڈ مینجمنٹ اور انفراسٹرکچر کی ترقی کو یقینی بنانے کے لیے جدید ٹیکنالوجی سے استفادہ کیا جائے۔

چیف سیکرٹری خیبرپختونخوا شہاب علی شاہ کی زیر صدارت ایک اعلیٰ سطحی اجلاس میں اسپیشل انویسٹمنٹ فسیلیٹیشن کونسل کے تحت جاری ترقیاتی منصوبوں پر پیش رفت کا جائزہ لیا گیا۔ اجلاس میں صوبے میں اقتصادی ترقی اور سرمایہ کاری کے فروغ کے لیے حکومتی اقدامات پر تبادلہ خیال کیا گیا۔ چیف سیکرٹری نے ایس آئی ایف سی کو ایک انقلابی پلیٹ فارم قرار دیتے ہوئے کہا کہ اس کا مقصد سرمایہ کاری کے عمل کو آسان بنانا، مربوط حکمت عملی اختیار کرنا اور ملکی و غیرملکی سرمایہ کاری کو راغب کرنا ہے۔ انہوں نے تمام متعلقہ محکموں کو ہدایت کی کہ وہ درپیش چیلنجز کو فوری حل کریں اور منصوبوں، خاص طور پر پبلک پرائیویٹ پارٹنرشپ کے تحت جاری منصوبوں کی بروقت تکمیل کو یقینی بنائیں تاکہ پائیدار ترقی کو فروغ دیا جا سکے۔ اجلاس میں مختلف محکموں نے ایس آئی ایف سی فریم ورک کے تحت اپنے اقدامات پر بریفنگ دی۔ اس موقع پر بتایا گیا کہ محکمہ منصوبہ بندی و ترقیات میں ایک خصوصی یونٹ قائم کیا گیا ہے جو ایس آئی ایف سی منصوبوں کی نگرانی اور مؤثر عملدرآمد کو یقینی بنائے گا۔ اجلاس میں کلاؤڈ فرسٹ پالیسی اور ڈیجیٹل اکانومی انہانسمنٹ پروجیکٹ کے معاہدے پر پیش رفت کا بھی جائزہ لیا گیا۔ ان منصوبوں کو صوبے میں ڈیجیٹل ٹرانسفارمیشن کے کلیدی عوامل قرار دیا گیا۔ پشاور، سوات اور مردان میں اسپیشل ٹیکنالوجی زونز کے قیام پر بھی تبادلہ خیال کیا گیا، جبکہ متعلقہ حکام کو ہدایت کی گئی کہ وہ درپیش رکاوٹوں کو ترجیحی بنیادوں پر دور کریں۔ اجلاس میں ماحولیات، سیاحت، بنیادی ڈھانچے، توانائی، صنعت اور صحت کے شعبوں میں جاری منصوبوں پر بھی تفصیلی غور کیا گیا۔ چیف سیکرٹری نے زور دیا کہ ایس آئی ایف سی صوبے کی اقتصادی ترقی میں ایک گیم چینجر ثابت ہوگا۔ انہوں نے تمام محکموں کو ہدایت کی کہ وہ اپنی حکمت عملی کو کونسل کے اہداف کے مطابق ترتیب دیں اور سرمایہ کاری کو فروغ دینے کے لیے باہمی تعاون، جدت اور مؤثر گورننس کو یقینی بنائیں

خیبرپختونخوا فوڈ سیفٹی اینڈ حلال فوڈ اتھارٹی نے مردان ڈویژن میں مختلف کارروائیوں کے دوران ضبط شدہ غیر معیاری و مضر صحت خوراک کی بڑی مقدار واٹر اینڈ سینیٹیشن سروسز کمپنی (WSSC) مردان کی ڈمپنگ سائٹ پر تلف کر دیا۔ترجمان فوڈ اتھارٹی کی جانب سے جاری تفصیلات کے مطابق ڈپٹی ڈائریکٹر مردان ڈویژن شاد خان کی نگرانی میں 8 ہزار 8 سو کلوگرام سے زائد غیر معیاری و مضر صحت گڑ، 20 بوریاں غیر معیاری فرائیڈ چپس، 500 کلوگرام سے زائد ناقص ساسز اور مضر صحت مصالحہ جات تلف کیا گیا۔ کارروائی کے دوران تمام ضبط شدہ تمام ناقص خوراکی اشیاء کو مروجہ ایس او پیز کے تحت تلف کیا گیا تاکہ ماحولیاتی آلودگی سے بچا جا سکے۔ڈائریکٹر جنرل فوڈ سیفٹی اتھارٹی واصف سعید نے اس موقع پر واضح کیا کہ غیر معیاری اور مضر صحت خوراک فروخت کرنے والے کاروباروں کے خلاف سخت کارروائی جاری رہے گی۔ انہوں نے کہا کہ شہریوں کی صحت سے کھیلنے والوں کو کسی صورت معاف نہیں کیا جائے گا اور قانون کے مطابق سخت تادیبی کارروائی عمل میں لائی جائے گی۔واصف سعید نے عوام سے اپیل کی کہ وہ غیر معیاری اور مضر صحت اشیاء کی فروخت کی اطلاع فوری طور پر متعلقہ حکام کو دیں تاکہ صحت عامہ کا تحفظ یقینی بنایا جا سکے۔

وزیرِ اعلیٰ خیبرپختونخوا کے معاونِ خصوصی برائے جنگلات، ماحولیات، جنگلی حیات و موسمیاتی تبدیلی پیر مصور خان نے کہا ہے کہ جنگلات کا فروغ ایک بہتر اور پائیدار مستقبل کی ضمانت ہے، صوبے میں جرمن حکومت کے تعاون سے بلین ٹری سپورٹ پراجیکٹ کے تحت 13 اضلاع میں وسیع رقبے پر شجرکاری کی جائے گی۔ ان خیالات کا اظہار انھوں نے جرمن حکومت کے مالی تعاون سے بلین ٹری شجرکاری سپورٹ پروگرام کے تحت آگرہ ملاکنڈ میں شجرکاری کی تکمیل کے بعد وہاں کا دورہ کرنے کے موقع پر کیا، اس موقع پر ایڈیشنل ڈپٹی کمشنر، ڈویژنل فارسٹ آفیسر ملاکنڈ اور ناظمین سمیت علاقے کے لوگ بھی کثیر تعداد میں موجود تھے، معاون خصوصی نے کہا کہ مذکورہ پروگرام کے تحت آگرہ میں 25 ہیکڑز پر مختلف انواع کے 27 ہزار پودوں کی شجرکاری مکمل کی گئی ہے، اس منصوبے کی کامیابی سے ماحول پر اچھے اثرات مرتب ہونگے،پیر مصور خان کا کہنا تھا کہ جرمن حکومت کی جانب سے بلین ٹری سپورٹ پراجیکٹ کے تحت صوبے کے 13 اضلاع میں وسیع رقبے پر شجرکاری کی جائے گی، ملاکنڈ پہلا ضلع ہے جہاں مذکورہ پروگرام کے تحت شجرکاری مکمل کی گئی ہے، انھوں نے کہا کہ جنگلات کے شعبے میں جرمن حکومت کی جانب سے مالی تعاون جنگلات کے فروغ کے حوالے سے بانی پاکستان تحریک انصاف عمران خان کے وژن اور صوبائی حکومت کی اس شعبے میں حاصل کامیابیوں کا اعتراف ہے، انھوں نے درختوں کی اہمیت اورجنگلات کے بقاء پر زور دیتے ہوئے کہا کہ موسم بہار شجرکاری کے لیے موزوں اور بہترین موسم ہوتا ہے اس لیے عوام ماحولیاتی تحفظ اور کاربن جیسی مضر صحت گیسوں کے اثرات کو کم کرنے کے لیے بڑھ چڑھ کر شجرکاری مہم میں حصہ لیں۔