چیف سیکرٹری خیبرپختونخوا شہاب علی شاہ کی زیرصدارت منعقدہ اجلاس میں مون سون بارشوں اور سیلاب کے نقصانات سے بچنے کیلئے پیشگی اقدامات اور اس حوالے سے تیاریوں کا جائزہ لیا گیا۔ اجلاس میں متعلقہ انتظامی سیکرٹریز، ڈی جی پی ڈی ایم اے سمیت دیگر متعلقہ حکام نے شرکت کی۔ اجلاس میں کمشنرز بھی ویڈیو لنک کے ذریعے شریک ہوئے۔اجلاس میں جن علاقوں میں سیلاب کا خطرہ موجود ہے وہاں ضروری اقدامات کا تفصیلی جائزہ لیا گیا۔ اجلاس کو بتایا گیا کہ 2022 کے سیلاب کو مدنظر رکھتے ہوئے حفاظتی اقدامات کئے جارہے ہیں اور اس حوالے سے ایک جامع مون سون پلان ترتیب دیا گیا ہے۔ چیف سیکرٹری خیبرپختونخوا کا کہنا تھا کہ ضلعی انتظامیہ دریاؤں اور نالوں کی اطراف غیر قانونی تعمیرات اور ناجائز تجاوزات کیخلاف کاروائیاں جاری رکھیں۔ ان کا کہنا تھا کہ سیلاب سے بچاؤ کے لئے فنڈز کی دستیابی یقینی بنائی جارہی ہے۔ ڈی جی پی ڈی ایم اے نے بریفنگ دیتے ہوئے بتایا کہ جن اضلاع میں اربن فلڈنگ کا خطرہ ہے وہاں پی ڈی ایم اے نے ریسکیو 1122 کو 50 ڈی واٹرنگ پمپس مہیا کئے ہیں ان اضلاع میں ڈی آئی خان، لکی مروت، کوہاٹ، پشاور، نوشہرہ، مردان، ملاکنڈ (بٹ خیلہ)، سوات (مینگورہ)، مانسہرہ اور ایبٹ آباد شامل ہیں۔ اس کے علاوہ پی ڈی ایم اے پشاور میں ڈی واٹرنگ یونٹ بھی قائم کررہی ہے۔ اجلاس میں کسی بھی ممکنہ سیلابی صورتحال سے نمٹنے کیلئے پی ڈی ایم اے کو درکار وسائل کا بھی تفصیلی جائزہ لیا گیا۔ اجلاس کو بتایا گیا کہ پی ڈی ایم اے کنٹرول روم اور ہیلپ لائن 1700 کسی بھی ایمرجنسی مدد کے لئے ہمہ وقت فعال ہے۔چیف سیکرٹری نے ہدایت کی کہ جن اضلاع میں سیلاب کا خطرہ موجود ہے وہاں انتظامیہ پہلے سے اشیائے خوردونوش، پیٹرول اور ادویات وغیرہ کے وافر ذخیرہ کی دستیابی یقینی بنائے۔ چیف سیکرٹری خیبرپختونخوا کا کہنا تھا کہ ممکنہ طوفانی بارشوں، آندھی اور سیلاب کے نتیجے میں نقصانات سے بچنے کیلئے تمام ادارے پیشگی اقدامات بروقت مکمل کریں اور ادارے آپس میں باہمی رابطہ برقرار رکھیں۔چیف سیکرٹری کا کہنا تھا کہ محکمہ ایریگیشن دریاؤں اور نالوں کی اطراف سیلاب سے بچاؤ کے لئے حفاظتی بندوں کا معائنہ کرے اور حفاظتی انتظامات پر خصوصی توجہ دی جائے جبکہ محکمہ بلدیات سیوریج لائنز کی صفائی یقینی بنائے۔ سیاحتی اضلاع میں سیاحوں کی آمد کے پیش نظر بھی ضروری اقدامات کئے جائیں اور باقاعدگی سے ٹریول ایڈوائزری جاری کی جائے۔ اجلاس کو مزید بتایا گیا کہ دفعہ 144 کے تحت پلاسٹک بیگز کے استعمال اور دریاؤں میں نہانے پر پابندی لگائی جارہی ہے۔ اس کے علاوہ محکمہ صحت بھی پانی کے ذریعے پھیلنے والی بیماریوں کے حوالے سے پیشگی اقدامات کے لئے انتظامات کررہی ہے۔

خیبر پختونخوا حکومت نے پشاور میں 140 نوجوانوں کو سائنس و ٹیکنالوجی کے میدان میں نمایاں ریسرچ کرنے پر ایک پروقار ایوارڈز تقریب میں اعزاز ات سے نوازا۔ڈائریکٹوریٹ جنرل آف سائنس اینڈ ٹیکنالوجی ڈی جی ایس ڈی، خیبر پختونخوا کے تعاون سے تقریب کا انعقاد کیا گیا۔ تقریب کے مہمانِ خصوصی وزیر اعلی خیبر پختونخوا کے معاون خصوصی برائے سائنس ٹیکنالوجی و انفارمیشن ٹیکنالوجی ڈاکٹر شفقات ایاز، کے علاوہ تقریب میں سیکریٹری سائنس، ٹیکنالوجی و آئی ٹی امجد علی خان، ڈی جی ایس ڈی کے ڈائریکٹر جنرل ساجد شاہ، اور آئی ٹی بورڈ کے منیجنگ ڈائریکٹر کے علاوہ مختلف یونیورسٹیوں کے وائس چانسلر اور طلباء بھی موجود تھے۔ اس موقع پر تقریباً 30 سے زائد جامعات کے 140 طلبہ و طالبات کو ڈی جی ایس ڈی کے دو اہم پروگرامز کے تحت ایوارڈز دئے گئے، انڈر گریجویٹ ریسرچ سپورٹ کے 80 فائنلسٹ طلبہ کو فی 150,000 پاکستانی روپے دیے گئے۔ اور ماسٹرز انٹر ڈسیپلنری ریسرچ پروگرام کے 60 گریجویٹس کو مجموعی طور پر 600,000 پاکستانی روپے گرانٹ دی گئی۔ ماسٹرز پروگرام خیبر پختونخوا کی 11 اسٹریٹجک شعبوں سے منسلک ہے خیراتی شعبے، جواہرات، پھل و سبزیاں، شہد، جڑی بوٹیاں، مچھلیاں، شہری ماحول، مائیکرو ہائیڈرو انرجی، آثارِ قدیمہ اعلیٰhigh tech Moon shoot اعلیٰ مواد، بائیومیڈیسن، اور خلائی سائنسز کے طلباء کو منصوبوں کے ذریعے نئے سائنسی نتائج کے تلاش کرنے کے اہل ہوں گے۔ وزیر اعلیٰ خیبر پختونخواکے معاون خصوصی برائے سائنس ٹیکنالوجی و انفارمیشن ٹیکنالوجی ڈاکٹر شفقت ایاز نے نوجوانوں اور ڈی جی ایس ڈی کی کاوشوں کو سراہتے ہوئے کہا کہ“ہم خیبر پختونخوا میں سائنس و ٹیکنالوجی کے میدان میں تحقیقی کلچر کے فروغ کے لئے ضروری اقدامات بروئے کار لا رہے ہیں۔ اور صوبائی حکومت نوجوانوں کی حوصلہ افزائی کے لئے خصوصی اقدامات اٹھا رہی ہے۔ انہوں نے یہ بھی کہا کہ طبی شعبے میں سائنس و ٹیکنالوجی کی فروغ اور تحقیق مریضوں کو سہولتیں فراہم کرنے میں مددگار ہوگی، اور مستقبل کے چیلنجز سے نمٹنے کیلئے نوجوانوں کو بااختیار بنانے کا وژن چیئرمین پی ٹی آئی عمران خان کا ہے اور صوبائی حکومت اس پر عملدرآمد کیلئے عملی اقدامات اٹھا رہی ہے۔ سیکریٹری ST&IT امجد علی خان نے کہاکہ آج کے دور میں جن قوموں نے سائنس و ٹیکنالوجی میں ترقی کی ہے وہ آزاد اور خودمختار ہوتی ہیں۔ڈائریکٹر جنرل ساجد شاہ نے اس موقع پر اپنے خطاب میں کہا کہ یہ ایوارڈز ہمارے اس عزم کی عکاسی کرتے ہیں کہ سائنس و ٹیکنالوجی صرف قومی ترجیح نہیں، بلکہ صوبائی ضرورت بھی ہیں۔ نوجوان محققین کو فنڈ دے کر ہم خیبر پختونخوا میں علم، خود انحصاری اور جدت کے بیج بو رہے ہیں۔یہ تقریب خیبر پختونخوا کے تحقیقی ماحول کو مستحکم کرنے، مقامی مسائل کے حل کے لیے عملی تحقیق کو فروغ دینے، اور نوجوانوں کو مستقبل کی مضبوط بنیاد فراہم کرنے کے لیے ایک اہم قدم ہے۔ تقریب کے اختتام پر معاون خصوصی برائے سائنس ٹیکنالوجی و انفارمیشن ٹیکنالوجی شفقت ایاز نے نمایاں کارکردگی کا مظاہرہ کرنے والے ریسرچر میں توصیفی اسناد اور سرٹیفکیٹ تقسیم کئے۔

رائٹ ٹو پبلک سروسز کمیشن میں چھ عوامی شکایات کی شنوائی ہوئی۔ کمیشن کے دو کمشنرز محمد عاصم امام اورذاکر حسین آفریدی نے شہریوں کے درخواستوں پر سماعت کی۔ پشاور سے فیصل خان نے فرد کی حصول کے لیے کمیشن سے رجوع کیا تھا۔ حلقہ پٹواری دو سماعتوں پر پیش نہیں ہوا۔ کمیشن نے تنخواہ بند کرنے کے احکامات جاری کیے۔ چارسدہ سے رحیم شاہ نامی شہری نے ایف آئی آر کے اندراج کے لیے کمیشن کو درخواست دی تھی۔ پولیس کا موقف جاننے اور شہری کو سننے کے بعد کمیشن نے ڈی پی او چارسدہ کو فوراً ایف آئی آر کے اندراج کے احکامات جاری کیے۔ مانسہرہ اور ہری پور سے ڈرائیونگ لائسنس کے اجراء کے متعلق عوامی شکایات پر ڈائریکٹر ٹرانسپورٹ کو سمن جاری کیا گیا۔ خیبر سے عنایت اللہ نے ایف آئی آر کے اندراج کے لیے کمیشن کو درخواست دی ہے۔ کمیشن نے ڈی پی او خیبر کو انکوائری کر کے رپورٹ جمع کروانے کے ہدایت دی۔ مانسہرہ سے رفیلہ بی بی نے ایف آئی آر کے اندراج کے لیے درخواست دی تھی۔ دو بار غیر حاضری اور رابطہ نہ ہونے پر کمیشن نے درخواست خارج کردی۔ انم شہزاد نے ہری پور سے اپنی پھوپی کی ڈیتھ سرٹیفکیٹ کی حصول کے لیے کمیشن کو درخواست دی تھی۔ کمیشن نے لکھا کہ خاتون کا ڈیتھ سرٹیفکیٹ انکی بچوں کو جاری ہو چکا، کوئی اور نہیں لے سکتا، کیس کو خارج کر دیا۔ کرک سے اویس نے زمین کی حد براری کے لیے درخواست دی تھی۔ کمیشن نے کہا کہ مذکورہ کیس عدالت میں چل رہا ہے اور درخواست کنندہ کو سٹے بھی ملاہوا ہے، کمیشن کیس کو نہیں سن سکتا۔کمیشن نے سرکاری افسران کو عوام کی ضروریات کو مؤثر طریقے سے پورا کرنے اور خدمات کی فراہمی کے عمل کو بہتر بنانے پر زور دیا۔ بنیادی خدمات کا حصول عوام کا حق ہے نا کہ ان پر حکومت کا احسان۔

مشیر صحت خیبر پختونخوا احتشام علی نے پولیس اینڈ سروسز ہسپتال میں سی ٹی سکین، اینڈوسکوپی اور ای ٹی ٹی سروسز کا باضابطہ افتتاح کر دیا۔جمعرات کے روز اپنے دورہ کے دوران مشیر صحت احتشام علی نے ریڈیالوجی ڈیپارٹمنٹ میں سی ٹی سکین، کارڈیالوجی شعبہ میں ای ٹی ٹی جبکہ گیسٹروانٹرولوجی ڈیپارٹمنٹ میں اینڈوسکوپی سروسز کا افتتاح کیا۔ اس موقع پر ایم ایس پولیس اینڈ سروسز ہسپتال ڈاکٹر مشتاق آفریدی، متعلقہ شعبہ جات کے سربراہان اور طبی عملہ بھی موجود تھا۔احتشام علی نے اس موقع پر کہا کہ ان سروسز کی فراہمی سے پولیس اینڈ سروسز ہسپتال کی تشخیصی صلاحیت میں نمایاں بہتری آئے گی اور سرکاری ملازمین کو بروقت علاج میسر ہوگا۔ ماضی میں سرکاری ملازمین کو ان سروسز کے لیے دیگر ہسپتالوں کا رُخ کرنا پڑتا تھا، مگر اب یہ سہولیات انہی کے اپنے ہسپتال میں دستیاب ہیں۔انہوں نے مزید کہا کہ پولیس اینڈ سروسز ہسپتال لاکھوں سرکاری ملازمین اور ان کے خاندانوں کے علاج و معالجے کے لیے ایک اہم ادارہ ہے، اور ایم ایس ڈاکٹر مشتاق اور ان کی ٹیم اس شاندار کاوش پر داد و تحسین کی مستحق ہے۔اس موقع پر ایم ایس ڈاکٹر مشتاق آفریدی نے بتایا کہ ان سروسز کے آغاز سے او پی ڈی میں تین گنا اضافہ متوقع ہے، کیونکہ یہ اہم تشخیصی مراحل پہلے دوسرے ہسپتالوں میں ریفر کیے جاتے تھے۔ اب پورے صوبے کے سرکاری ملازمین اور ان کے اہل خانہ ان سہولیات سے براہِ راست مستفید ہو سکیں گے۔