صوبائی وزیر تعلیم فیصل خان ترکئی نے کہا ہے کہ تعلیم اور سپورٹس لازم و ملزوم ہیں صحت مند جسم اور تندرست وتوانا انسان ہی تعلیمی میدان میں بہترین کارکردگی کا مظاہرہ کر کے اہم کامیابیاں حاصل کر سکتا ہے اور یہ دونوں شعبے حکومت کی اہم ترجیحات میں شامل ہیں۔ انہوں نے کہا کہ محکمہ تعلیم نے ہم نصابی سرگرمیوں کے فروغ اور طلبہ و طالبات کو سپورٹس کے میدان میں کامیابیاں حاصل کرنے کے لئے انقلابی اقدامات کیے ہیں۔ ہائی اور ہائیر سیکنڈری سکولوں میں پلے ایریاز اور پلے گراؤنڈز کے قیام کے ساتھ ساتھ ضلعی اور صوبائی سطح پر ٹورنامنٹس اور کھیلوں کے دیگر ایونٹس منعقد کروائے ہیں جس کا مقصد گراس روٹ لیول پر طلبہ و طالبات کی رہنمائی اور ان کو نیشنل اور انٹرنیشنل لیول پر تیار کرنا ہے۔ انہوں نے کہا کہ ہمارے بچوں میں بے پناہ ٹیلنٹ موجود ہے اور امسال ہم نے صوبے کے تمام اضلاع میں ان ٹورنامنٹس کے انعقاد کے لئے احکامات جاری کیے تھے جس کے تحت صوبے کے تمام اضلاع میں یہ مقابلے منعقد ہوئے اور طلبہ نے بہترین پوزیشنز حاصل کی۔ وزیر تعلیم کا کہنا تھا کہ حکومت تعلیم کے ساتھ ساتھ کھیلوں کے فروغ کے لئے بھی سنجیدہ اقدامات کر رہی ہے اور محکمہ سپورٹس کو فنڈ کے اجراء میں صوبائی حکومت کی مکمل سپورٹ حاصل ہے انہوں نے کہا کہ ہمارے ان مقابلوں میں کارکردگی دکھانے والے بچوں کو ہم پلیٹ فارم مہیاں کر رہے ہیں اور ان کو مین سٹریم میں لانے کے لئے اقدامات کر رہے ہیں تاکہ ان کے ٹیلنٹ سے صوبے اور ملک کو فائدہ پہنچ سکے اور محکمہ تعلیم میں کھیلوں کے فروغ اور مواقعوں کی فراہمی کے لیے صوبائی وزیر کھیل کے ساتھ بھی مختلف منصوبوں پر بات چیت جا ری ہے جس سے ہمارے سکولوں کے بچے مستفید ہوں گے انہوں نے کہا کہ ہمارا پارٹی لیڈر عمران خان خود ایک مایا ناز سپورٹس مین رہ چکا ہے اور ان کے وژن کے مطابق کھیلوں کے فروغ کے لئے اقدامات کئے جا رہے ہیں۔ ان خیالات کا اظہار انہوں نے سپورٹس کمپلیکس مردان کی تقریب تقسیم انعامات سے بطور مہمان خصوصی اپنے خطاب میں کیا۔ تقریب میں ممبر قومی اسمبلی علی محمد خان، ممبر صوبائی اسمبلی عبدالسلام آفریدی، ڈائریکٹر ایجوکیشن ثمینہ الطاف، ڈپٹی کمشنر مردان عظمت وزیر، مختلف اضلاع کے ڈسٹرکٹ ایجوکیشن افیسرز، محکمہ سپورٹس کے عہدیداران، طلباء والدین اور کھلاڑیوں نے شرکت کی۔ تقریب سے خطاب کرتے ہوئے وزیر تعلیم فیصل خان ترکئی نے مزید کہا کہ صوبے میں جب سے ہماری حکومت آئی ہے صوبے میں امن و امان کے قیام کے لئے خصوصی اقدامات کیے گئے ہیں امن کے قیام سے ہمارے گراؤنڈز آباد ہو گئے ہیں نیشنل اور انٹرنیشنل لیول کے ایونٹس صوبے میں منعقد کئے گئے ہیں اور اس سلسلے کو ہم فروغ دے رہے ہیں انہوں نے کہا کہ محکمہ تعلیم کے تقریبا 35 ہزار سکول ہیں اور لاکھوں طلباء و طالبات ہمارے سکولوں میں پڑھ رہے ہیں تعلیم کے ساتھ ساتھ ہم ان کی جسمانی نشونما پر بھی توجہ دے رہے ہیں انہوں نے ایجوکیشن حکام کو ہدایت دی کہ اگلے سال کے ٹورنامنٹس کے لئے مزید بہتر تیاری کریں۔ اور جن جن اضلاع کی کارکردگی کمزور ہے ان کا مجھے رپورٹ دیں۔ وزیر تعلیم فیصل خان ترکئی نے طلبہ و طالبات کو مخاطب کرتے ہوئے کہا کہ بورڈز کے امتحانات قریب آرہے ہیں اور اس سے پہلے یہ ٹورنامنٹس اختتام کو پہنچے ہیں اب تمام تر توجہ امتحانات کی تیاری اور بہترین نتائج کے حصول پر دیں۔ میڈیا کے ایک سوال کے جواب میں وزیر تعلیم فیصل خان ترکئی نے کہا کہ ہم عوام کے حقوق کا جنگ لڑ رہے ہیں اور عمران خان صرف اس ملک کی ترقی اور غیروں کی غلامی سے آزادی کی بات کرتے ہیں جن کو بوگس کیسوں میں بند کر دیا گیا ہے انہوں نے کہا کہ عوام عمران خان کے دور حکومت اور موجودہ دور حکومت کا موازنہ کریں۔ اشیائے خوردونوش، بجلی، پیٹرول، گیس اور دیگر قیمتوں کا موازنہ کریں جس نے غریب کمزور اور عام آدمی کا جینا محال کر دیا ہے۔ وزیر تعلیم کا کہنا تھا کہ ہم مرکز سے اپنے صوبے کے حقوق، رائلٹی، رول آف لاء اور اپنے جائز مینڈیٹ کے حصول کی بات کرتے ہیں جن کا جواب نفی میں دیا جاتا ہے انہوں نے کہا کہ ہمارے صوبے کی اپنے پیداوار اور رائلٹی میں ہمیں وہ حصہ نہیں دیا جاتا جو کہ یہاں کے عوام کا حق ہے اور یہی ہمارے جائز مطالبات ہیں۔ انہوں نے امتحانی بورڈز کے حوالے سے کہا کہ صوبے کے تقریباً تمام بورڈز میں چیئرمین اور دیگر عملے کو تعینات کر دیا گیا ہے اور انشاء اللہ میرٹ پر مبنی صاف اور شفاف امتحانات صوبے بھر میں منعقد کرائے جائیں گے۔

خیبر پختونخوا کے وزیر برائے پبلک ہیلتھ انجینئرنگ، پختون یار خان، نے بنوں سنٹرل جیل کا دورہِ کیا اس موقع پر ان کے ہمراہ ڈپٹی کمشنر بنوں عبدالحمید خان اور ایکسیئن پبلک ہیلتھ فضل احمد بھی موجود تھے صوبائی وزیر نے جیل کے مختلف بیرکوں، پھانسی گھاٹ، لنگر خانے اور ہسپتال کا دورہِ کیا اور وہاں فراہم کئے جانے والے کھانے کے معیار کو بھی جانچا انہوں نے قیدیوں سے ملاقات کی اور ان کی خیریت دریافت کی صوبائی وزیر نے جیل میں قیدیوں کو مہیا کی جانے والی سہولیات پر اطمینان کا اظہار کیا مزید برآں انہوں نے ایکسیئن پبلک ہیلتھ بنوں فضل احمد کو ہدایت کی کہ بنوں سنٹرل جیل میں صاف پانی کی فراہمی یقینی بنائی جائے صوبائی وزیر کو ڈپٹی سپرنٹنڈنٹ بنوں سنٹرل جیل متعصم باللہ نے بریفنگ دی صوبائی وزیر کا کہنا تھا کہ خیبر پختونخوا کی حکومت قیدیوں اور جیلوں کی مشکلات کے خاتمے کیلئے بھرپور اقدامات کر رہی ہے انہوں نے کہا کہ قیدیوں کو آئین و قانون کے تحت تمام ممکنہ سہولیات فراہم کی جائیں گی اور اس معاملے میں کسی قسم کا سمجھوتہ نہیں کیا جائے گا۔

خیبر پختونخوا کے وزیر خوراک ظاہرشاہ طورو نے پشاور پریس کلب کا دورہ کیا اور سالانہ انتخابات میں کامیاب ہونے والی نومنتخب کابینہ کو مبارکباد پیش کی۔ وزیر خوراک نے پریس کلب کے صدر منتخب ہونے پر سینئر صحافی ایم ریاض کو خصوصی مبارکباد دی۔اس موقع پر انہوں نے نومنتخب نائب صدر عرفان خان، جنرل سیکرٹری طیب عثمان، جائنٹ سیکرٹری گلزار محمد، فنانس سیکرٹری احتشام خان، اور گورننگ باڈی کے اراکین کو بھی مبارکباد پیش کرتے ہوئے ان کے لیے نیک خواہشات کا اظہار کیا۔وزیر خوراک نے اپنے خطاب میں امید ظاہر کی کہ پشاور پریس کلب کی نئی قیادت صحافیوں کی فلاح و بہبود، آزادی صحافت کے فروغ، اور عوامی مسائل اجاگر کرنے میں اہم کردار ادا کرے گی۔ انہوں نے کہا کہ صحافی برادری ایک اہم ستون ہے جو ملک کی ترقی اور حقیقی جمہوریت کی بحالی میں کلیدی کردار ادا کر سکتی ہے۔دورے کے دوران وزیر خوراک نے صحافیوں کے مسائل بھی سنے اور انہیں حل کرنے کے لیے ہر ممکن تعاون کی یقین دہانی کرائی۔ انہوں نے کہا کہ حکومت آزادی صحافت کی حمایت کرتی ہے اور صحافی برادری کے مسائل کو ترجیحی بنیادوں پر حل کرنے کے لیے پرعزم ہے۔

خیبر پختونخوا کے وزیر برائے محنت فضل شکورخان کی زیرصدارت ایمپلائز سوشل سیکورٹی انسٹیٹیوشن(ای ایس ایس آئی) کا گورننگ باڈی اجلاس منعقد ہوا، اجلاس میں سیکرٹری محکمہ لیبر میاں عادل اقبال سمیت گورننگ باڈی کے اراکین اور متعلقہ افسران نے شرکت کی، اجلاس میں مختلف امور زیر غور لائے گئے جن میں بعض ایجنڈوں کی گورننگ باڈی اراکین نے متفقہ طور پر منظوری دیدی سوشل سیکورٹی ہسپتالوں میں ورکرز کی بہترین علاج معالجے کے لئے اراکین نے 5 ہیماٹوجی اینلائزرز خریدنے کی منظوری دیدی 5 مائیکرو لیب کمسٹری اینلائزرز خریدنے کی بھی متفقہ منظوری دیدی اس کے علاوہ گورننگ باڈی اراکین نے 5الٹراساؤنڈ مشین خریدنے کی بھی منظوری دیدی ورکرز کی بہتر مفاد میں 2 فزیوتھراپسٹ کی آسامیاں تخلیق کرنے کی بھی منظوری دیدی گئی اراکین نے ای ایس ایس آئی میں ایچ آئی ایم ایس نظام کو تنصیب کرنے اور سولرائزیشن کی منظوری دیدی اس موقع پر صوبائی وزیر فضل شکورخان نے کہا کہ صوبے میں ورکرز کی فلاح و بہبود کیلیے محکمہ میں انقلابی اصلاحات لانے کیلیے عملی اقدامات اٹھارہے ہیں معیشت کی مضبوطی اور استحکام میں مزدوروں کا اہم کردار ہے جسے نظرانداز نہیں کیا جاسکتا انہوں نے کہا کہ مزدوروں کیلیے قائم سوشل سیکورٹی ہسپتالوں میں بہترین طبی سہولیات کی فراہمی کو یقینی بنانے کیلیے ہرممکن اقدام اٹھارہے ہیں تاکہ وہاں پر مریض زیادہ سے زیادہ طبی سہولیات سے مستفید ہوسکیں۔

وزیر اعلیٰ خیبرپختونخوا کے معاون خصوصی برائے ٹرانسپورٹ حاجی رنگیز احمد نے متعلقہ حکام سے کہا ہے کہ ضلع صوابی تحصیل گدون میں تمام نامکمل سڑکیں فوری طور پر مکمل کی جائیں۔ انہوں نے متعلقہ حکام کو منصوبوں کا دورہ کرنے کی ہدایت کرتے ہوئے کہا کہ تمام سڑکوں پر تجاوزات کو فوری طور پر ختم کیا جائے اور مفاد عامہ کی خاطر سڑکوں کو مکمل طور پر کلئیر کیا جائیں۔ ان خیالات کا اظہار انہوں نے منگل کو اپنے دفتر میں ضلع صوابی تحصیل گدون کی سڑکوں کی ناقص صورتحال اور بحالی کے حوالے سے جائزہ اجلاس کی صدارت کرتے ہوئے کیا ہے۔ اجلاس میں ضلعی صدر صوابی پاکستان تحریک انصاف سہیل یوسفزئی، ایکسین روڈز و دیگر متعلقہ حکام نے شرکت کی ہے۔ اجلاس سے خطاب کرتے ہوئے معاون خصوصی نے کہا کہ تحصیل گدون میں سڑکوں کی بحالی پر کام کی رفتار کو تیز کیا جائے اور غیر ضروری کام کی بجائے مین سڑکوں پر توجہ دی جائے۔ انہوں نے کہا ہے کہ ٹھیکیداروں کو موبالائز کیا جائے کہ تمام سڑکوں پر بقایا سول ورک کو جلد از جلد مکمل کیا جائے تاکہ عوام کو مزید مشکالات کا سامنا نہ کرنا پڑے۔ انہوں نے ایکسین روڈز مواصلات و تعمیرات کو ہدایت جاری کرتے ہوئے کہا کہ وہ خود ان سڑکوں کا وزٹ کریں اور جہاں پر تجاوزات اور روکاوٹیں ہیں ان کو فوری طور پر کلئیر کریں۔ ان کا کہنا تھا کہ تحصیل گدون کی چھوٹی چھوٹی سڑکیں جن کو نامکمل چھوڑا گیا ہے ان پر سول ورک شروع کیا جائے اور جلد از جلد مکمل کیا جائے کیونکہ یہاں کے عوام کو سڑکوں کے حوالے سے مشکلات کا سامنا ہے، ہم نے عوام کی محرومیوں کا ازالہ کرنا ہے۔ اجلاس سے خطاب کرتے ہوئے کہا کہ عوام کا پیسہ عوام پر لگانا ہے کام کے معیار پر کوئی سمجھوتا نہیں کیا جائے گا۔ انہوں نے کہا کہ تحصیل گدون میں انفراسٹرکچر کی تعمیر و بحالی ممکن بنائی جائے گی۔

وزیراعلیٰ خیبرپختونخوا کے معاون خصوصی برائے سائنس، ٹیکنالوجی اور آئی ٹی شفقت ایاز نے پیر کے روز محکمہ سائنس، ٹیکنالوجی اور آئی ٹی کے پہلے اجلاس کی صدارت کی، جس میں محکمے کی کارکردگی اور امور کا جائزہ لیا گیا۔ سیکرٹری سائنس، ٹیکنالوجی اور آئی ٹی سیدہ تنزیلہ صباحت نے محکمے کے مشن، وژن، کردار، ذمہ داریوں، جاری منصوبوں اور مستقبل کے منصوبوں کے بارے میں تفصیلی بریفنگ دی۔ اجلاس کے دوران معاون خصوصی کو بتایا گیا کہ یہ محکمہ صوبے میں سائنس اور ٹیکنالوجی اور انفارمیشن ٹیکنالوجی کو فروغ دینے کا ذمہ دار ہے۔ اس کا دائرہ کار سرکاری محکموں میں ای-گورننس کے منصوبوں کو فروغ دینا، سائنس اور ٹیکنالوجی سے متعلق پالیسیوں پر عملدرآمد کرنا، اور آئی ٹی کے ذریعے تحقیق، تعلیم اور عوامی خدمات کی فراہمی کو بہتر بنانا شامل ہے۔ معاون خصوصی کو خیبرپختونخوا میں جاری ڈیجیٹل تبدیلی کے بارے میں بھی آگاہ کیا گیا، جو موبائل اور انٹرنیٹ کنیکٹیویٹی میں اضافے کی وجہ سے ممکن ہو رہی ہے۔

مشیر صحت احتشام علی نے حیات آباد میں واقع ذہنی امراض کے سپیشلائیزڈ ہسپتال فاونٹین ہاوس کا دورہ کیا۔ انہوں نے ہسپتال میں ادویات کا جائزہ لیا اور مریضوں کا حال دریافت کیا۔ انہوں نے انتظامیہ کے ہمراہ ہسپتال کے مختلف شعبوں کا دورہ کیا اور متعلہ حکام کے ساتھ ہسپتال کو فعال بنانے اور سرحد منٹل ہسپتال کے انضمام سے جڑے مسائل پر گفتگو کی۔مشیر صحت کو بتایا گیا کہ یہ 2013 سے پروجیکٹ کے طور پر زیر تعمیر ہسپتال ہے جس میں جنوری 2024 میں سرحد منٹل ہسپتال کو ضم کیا گیا۔ اس ہسپتال کو سنٹر ایکسلنس برائے منٹل ہیلتھ بنانا تھا جس کے تحت یہ ٹیچنگ ہسپتال بننا تھا۔ مشیر صحت نے اس کو ٹیچنگ ہسپتال قرار دینے کیلئے متلعقہ حکام سے انتظامی اقدامات کے احکامات بھی جاری کئے۔

وزیر اعلیٰ خیبر پختونخوا کے معاون خصوصی برائے صنعت وحرفت عبدالکریم تورڈھیر کی زیر صدارت پیر کے روز سمال انڈسٹریز ڈیویلپمنٹ بورڈ پشاور میں باجوڑ انڈسٹریل اسٹیٹ کے نئے ترقیاتی منصوبے کے تفصیلی ڈیزائن،ماسٹر پلان اور ڈرافٹ پی سی ون کی تیاری کا جائزہ لینے کے حوالے سے ایک اجلاس منعقد ہوا جس میں منیجنگ ڈائریکٹر سمال انڈسٹریز ڈیویلپمنٹ بورڈ حبیب اللہ عارف،ڈپٹی منیجنگ ڈائریکٹر نعمان فیاض اور بورڈ کے دیگر حکام نے شرکت کی۔اجلاس میں معاون خصوصی کو مذکورہ نئے صنعتی ترقیاتی منصوبے کے جلد از جلد قیام کے لئے اب تک کی پیش رفت سے آگاہ کیا گیا اور انہیں اس منصوبے کے خدو خال اور ممکنہ دستیاب سہولیات کی تفصیلات فراہم کی گئیں۔اس موقع پر معاون خصوصی نے متعلقہ منصوبے کی کنسلٹنٹ فرم کو آئندہ سال 31 جنوری تک اپنا کام ہر لحاظ سے مکمل کرنے کی ہدایت کی۔ان کو بتایا گیا کہ یہ نیا صنعتی منصوبہ 370 کنال رقبے پر محیط ہے جس میں مختلف سائز کے 166 صنعتی پلاٹس ہوں گے۔معاون خصوصی نے اس موقع پر کہا کہ اس منصوبے میں مستقبل کی ضرورت اور منصوبہ بندی کیلئے وسعت کی گنجائش رکھی جائے اور اس میں توانائی کی ضروریات پوری کرنے کیلئے سولرائزیشن پر بھی توجہ دی جائے۔انھوں نے کہا کہ مذکورہ منصوبے کے روڈ سائڈز کو کمرشل مقاصد کیلئے استعمال میں لایا جائے۔معاون خصوصی نے مزید کہا کہ اس منصوبے سے ضم اضلاع میں صنعتی ترقی کو فروغ حاصل ہوگا اور اس کے ذریعے مقامی کاروبار اور صنعتی شعبوں کو تقویت ملے گی۔

مشیر برائے اینٹی کرپشن مصدق عباسی کی ہدایت پر محکمہ اینٹی کرپشن کی حیات آباد فیز۔5 میں نجی ہسپتالوں کے اطراف میں غیر قانونی پارکنگ کے خلاف کارروائی
تفصیلات کے مطابق وزیراعلیٰ خیبرپختونخوا کے مشیر برائے اینٹی کرپشن مصدق عباسی کو حیات آباد فیز۔5 میں نجی ہسپتالوں کے قریب غیر قانونی پارکنگ کی شکایات موصول ہوئیں جن کا نوٹس لیتے ہوئے ڈائریکٹر اینٹی کرپشن اسٹیبلشمنٹ کو مذکورہ شکایات پر کاروائی کی ہدایت کی۔ ڈائریکٹر اینٹی کرپشن خیبرپختونخوا صدیق انجم نے ٹیم کے ہمراہ حیات آباد میں غیر قانونی پارکنگ کا اچانک دورہ کیا۔ دورے کے دوران نشاندہی کی گئی کہ پشاور ڈیویلپمنٹ اتھارٹی کی جانب سے پارکنگ کے لیے مختص جگہ الاٹ کی گئی جبکہ پارکنگ عملہ اپنی حدود سے تجاوز کر کے عوام کو لوٹ رہا ہے اوریہ بھی انکشاف ہوا کہ پارکنگ ریٹ سے زیادہ فی گاڑی وصول کر رہا تھا۔ پی ڈی اے کے عملے کی جانب سے بتایا گیا اس جگہ پر کوئی پارکنگ الاٹ نہیں کی گئی۔ محکمہ اینٹی کرپشن نے غیر قانونی پارکنگ پر پچاس ہزار روپے جرمانہ کرکے ٹھیکہ فوری طور پر ختم کرنے کیلئے ڈائریکٹر جنرل پشاور ڈیولپمنٹ اتھارٹی کو مراسلہ بھی ارسال کردیاہے