وزیر اعلیٰ کے معاون خصوصی برائے محکمہ بہبود آبادی خیبرپختونخوا، ملک لیاقت علی خان نے نیسپاک حکام سے ایک اہم اور تفصیلی ملاقات کی، جس کا مقصد دیر لوئر کو دیر بالا سے جوڑنے والے میدان ٹو براول ٹنل کے منصوبے پر بریفنگ لینا اور آئندہ کے لائحہ عمل پر مشاورت کرنا تھا۔اس موقع پر نیسپاک کی اعلیٰ سطحی انجینئرنگ ٹیم نے ملک لیاقت علی خان کو منصوبے کی تکنیکی رپورٹ، فزیبلٹی اسٹڈی، ابتدائی ڈیزائن اور مجوزہ لاگت پر باضابطہ بریفنگ دی۔ حکام نے بتایا کہ ٹنل کی تعمیر نہ صرف سفری وقت میں نمایاں کمی لائے گی بلکہ دونوں اضلاع کے درمیان معاشی، تجارتی اور سماجی روابط کو بھی فروغ دے گی۔وزیر اعلیٰ کے معاون خصوصی برائے محکمہ بہبود آبادی ملک لیاقت علی خان نے نیسپاک ٹیم کو بتایا کہ میدان ٹو براول ٹنل کا منصوبہ عوام کی دہائیوں پر محیط خواہش ہے۔ یہ صرف ایک سڑک یا ٹنل نہیں بلکہ ایک نئے ترقیاتی دور کا آغاز ہوگا، جو اپر اور لوئر دیر کے درمیان فاصلے کو کم کرے گا اور لوگوں کی زندگیوں میں آسانی لائے گا۔انہوں نے مزید کہا کہ یہ منصوبہ ان کی خصوصی توجہ اور نگرانی میں آگے بڑھایا جائے گا تاکہ کوئی رکاوٹ یا تاخیر نہ ہو۔ انہوں نے متعلقہ اداروں کو ہدایت دی کہ وہ تمام تخمینہ جاتی، ماحولیاتی، اور سوشل امپیکٹ رپورٹس کو بروقت مکمل کریں تاکہ منصوبے پر عملی کام جلد از جلد شروع کیا جا سکے۔نیسپاک حکام نے بھی یقین دہانی کرائی کہ منصوبے کو قومی اہمیت کے تحت فوری ترجیح دی جا رہی ہے، اور تمام ابتدائی مراحل جلد مکمل کر لیے جائیں گے۔ملک لیاقت خان نے کہا ہے کہ یہ منصوبہ نہ صرف دیر لوئر و دیر بالا بلکہ پورے ملاکنڈ ڈویژن کے لیے ایک گیم چینجر ثابت ہوگا

ڈسٹرکٹ اٹارنیز اور لاء آفیسرز ویلفیئر ایسوسی ایشن خیبر پختونخوا کی نئی کابینہ کی حلف برداری کی ایک پروقار تقریب سول سیکرٹریٹ پشاور میں منعقد ہوئی۔ تقریب کے مہمانِ خصوصی وزیر قانون خیبر پختونخوا، آفتاب عالم ایڈووکیٹ نے نومنتخب کابینہ کے عہدیداران سے حلف لیا۔تقریب میں سیکرٹری محکمہ قانون و انسانی حقوق، ڈائریکٹر جنرل لاء اینڈ ہیومن رائٹس، محکمہ قانون کے دیگر اعلیٰ حکام اور خیبر پختونخوا لاء آفیسرز ایسوسی ایشن کے عہدیداران، بشمول صدر طارق خان ترین اور سیکرٹری جنل کے پی لوا وقار اعوان، نے شرکت کی۔اس موقع پر وزیر قانون نے نئی کابینہ کو ذمہ داریاں سنبھالنے پر دلی مبارکباد پیش کی اور ان کے کردار کو عدالتی نظام کی بہتری میں کلیدی حیثیت قرار دیا۔ اپنے خطاب میں انہوں نے کہا کہ ڈسٹرکٹ اٹارنیز اور لاء آفیسرز عدالتی نظام میں ریڑھ کی ہڈی کی حیثیت رکھتے ہیں۔ ان کا بنیادی فریضہ عوامی مقدمات کی پیروی، قانونی مشاورت کی فراہمی، اور ریاست کی مؤثر نمائندگی کو یقینی بنانا ہے۔وزیر قانون نے کہا کہ دیوانی مقدمات میں ریاست کی نمائندگی، کیسز کی تفتیش، ف عدالت میں مؤثر پیروی، اپیلوں کی نگرانی، اور پلی بارگین جیسے قانونی مراحل میں ڈسٹرکٹ اٹارنیز کا کردار نہایت اہم ہے۔انہوں نے مزید کہا کہ سرکاری اداروں کو قانونی مشورے اور آراء کی فراہمی، قوانین اور ضوابط کی تیاری، اور پالیسی سازی میں اٹارنیز کی معاونت حکومتی فیصلوں کو آئینی اور قانونی تقاضوں سے ہم آہنگ بناتی ہے۔وزیر قانون آفتاب عالم ایڈووکیٹ نے امید ظاہر کی کہ نئی کابینہ ایسوسی ایشن اور اس کے اراکین کی فلاح و بہبود کے لیے فعال اور مؤثر کردار ادا کرے گی۔انہوں نے اس بات پر بھی زور دیا کہ ایسوسی ایشن کو بدعنوانی، ماحولیاتی خلاف ورزیوں اور صارفین کے حقوق کے تحفظ جیسے عوامی مفاد کے اہم شعبوں پر توجہ مرکوز کرنی چاہیے۔ ساتھ ہی، غیر قانونی سرگرمیوں کے خلاف مؤثر کارروائی، عوامی مفادات کا تحفظ اور قانونی اصلاحات میں تعاون کو ایسوسی ایشن کی ترجیحات کا حصہ ہونا چاہیے۔آخر میں، صدر کے پی لوا کی طارق خان ترین کی جانب سے پیش کیے گئے مطالبات اور درپیش مسائل پر وزیر قانون نے مکمل تعاون کی یقین دہانی کرائی۔

پاکستان تحریک انصاف کے وہ مخلص اور وفادار کارکنان جو مشکل ترین حالات میں بھی قائد عمران خان کے ساتھ کھڑے ہیں وہ قوم کا فخر اور پارٹی کا سرمایہ ہیں۔ ان خیالات کا اظہار انہوں نے اپنی رہائش گاہ پر جیل سے رہائی پانے والے پی ٹی آئی کارکنان سے ملاقات کے دوران گفتگو کرتے ہوئے کیا۔ ملاقات کے دوران چیئرمین کالج کالونی سیدو شریف حبیب اللہ خان اور دیگر پی ٹی آئی رہنما بھی موجود تھے۔ فضل حکیم خان نے کہا کہ پی ٹی آئی کے ان کارکنان نے ظلم، جبر اور سیاسی انتقام کا سامنا کیا، مگر اپنے نظریے سے پیچھے نہیں ہٹے ہم اُن کی قربانیوں کو سلام پیش کرتے ہیں۔ آپ لوگ ہمارے سر کا تاج ہیں۔ صوبائی وزیر نے مزید کہا کہ پاکستان تحریک انصاف ایک نظریہ ہے اور عمران خان کی قیادت میں یہ جدوجہد پاکستان میں حقیقی آزادی، شفافیت، انصاف اور عوامی حکمرانی کے لیے ہے ہم سب عمران خان کے سپاہی ہیں اور حقیقی آزادی کے حصول تک چٹان کی طرح ڈٹے رہیں گے فضل حکیم خان نے جیل سے رہائی پانے والے کارکنان کو خراج تحسین پیش کرتے ہوئے کہا کہ پارٹی ان کے حوصلے، استقامت اور قربانیوں کو ہمیشہ یاد رکھے گی۔ انہوں نے کہا کہ یہ جدوجہد صرف ایک سیاسی جماعت کی نہیں بلکہ ملک کے ہر باشعور شہری کی ہے جو اپنے بچوں کا بہتر مستقبل چاہتا ہے۔

خیبر پختونخوا کے وزیر زراعت میجر (ر) سجاد بارکوال نے کہا ہے کہ جب عمران خان کا مینڈیٹ ہو اور خان کا جانثار وزیراعلیٰ سردار علی امین خان گنڈاپور ہو اور خان کے ورکر کی حیثیت سے وہ کرک کے نمائندہ ہوں تو حکومت خیبرپختونخوا کے بجٹ اور تمام ترقیاتی پروگراموں میں کرک کا تاریخ ساز حصہ ضرور ہو گا۔اپنے ایک بیان میں صوبائی وزیر زراعت کا کہنا تھا کہ ماضی کے ادوار میں گیس رائلٹی کو بنیاد بنا کر خٹکزینہ کو اپنے حقوق سے محروم کرنے والا دور گزر چکا ہے۔ انہوں نے مالی سال 26-2025 میں پورے ضلع کرک کے عوام کیلئے سالانہ ترقیاتی پروگرام میں شامل منصوبوں کی تفصیلات بتاتے ہوئے کہا کہ نئے بجٹ میں آر ایچ سی احمد آباد کی ٹائپ ڈی ہسپتال اور ڈی ایچ کیو ہسپتال کرک کی کیٹیگری اے کو اپگریڈیشن کے علاوہ دورافتادہ محروم علاقہ جات میں بی ایچ یو کا قیام، بنیادی مراکز صحت منڈوہ اور شہیدان کو فوری طور پر فنکشنل کرنا، تمام دیہی و بنیادی مراکز صحت کو جدید سہولیات سے آراستہ کرنا شامل ہے۔اسی طرح گرلز ڈگری کالج لتمبر، ماڈل سکول کرک اور گرلز سکول ونکی کو اسی سال فنکشنل کرنا بھی بجٹ کا حصہ ہیں۔وزیر زراعت نے مقامی آبادی و مختلف یونین کونسل سمیت کندہ احمد والا،صورتی کلہ،زنئے کلہ، سی کوٹ، رحمت آباداور طور ڈنڈ و ملحقہ آبادی کے پینے کے پانی کا مسئلہ حل کرنے کیلئے میگا واٹر سپلائی سکیموں اور مناسب مقامات پر پورے حلقے میں اوور ہیڈ ٹینکس پر بھی اسی سال کام شروع ہو گا۔سجاد بارکوال نے ورانہ مسکان لنک روڈ، خوڑہ روڈ، سی پیک لنک روڈ براستہ پلوسہ سر کی تعمیر، سٹی ہسپتال کرک کی ریہیبیلیٹیشن، زرین چینہ واٹر سپلائی سکیم، انڈی کرک نشپہ بانڈہ چرپرہ بہادر خیل روڈ، سپورٹس کمپلیکس کی تعمیر،کرک گریٹر واٹر سپلائی کی ریویژن کے مطابق ایگزیکیوشن، کرد شریف روڈاور انڈس اپ لفٹ کرک ایریگیشن کنال کی فیزیبیلیٹی کی نوید سناتے ہوئے کہا کہ وہ ذاتی طور پر بھر پور اور جاندار طریقے سے ان تمام سکیموں کی متعلقہ محکموں کے ساتھ کوآرڈنیشن کریں گے تاکہ خان کے مشن اور وزیراعلیٰ کی کرک کو دی گئی عنایات کو عملی جامہ پہنایا جا سکے۔علاوہ ازیں، امبریلہ سکیموں سے متعلق بھی عوام کو وقت کے ساتھ ساتھ آگاہی دیتے رہیں گے۔

ایوب میڈیکل انسٹی ٹیوشن کے ڈاکٹرز کو معیاری سہولیات فراہم کرنا ہماری اولین ترجیح ہے۔چیرمین بی او جی پروفیسر عابد جمیل

تفصیلات کے مطابق ایوب میڈیکل انسٹی ٹیوشن کے ڈنٹسٹری بلاک میں پوسٹ گریجویٹ ریذیڈنٹس کے لیے جدید سہولیات سے آراستہ لائبریری کا باقاعدہ افتتاح کر دیا گیا۔افتتاح چیئرمین بورڈ آف گورنرز پروفیسر عابد جمیل اور بی او جی کے ممبر پروفیسر عالم زیب منان نے مشترکہ طور پر کیا۔ اس موقع پر ادارے کے ایگزیکٹو ممبران مختلف شعبہ جات کے سربراہان اور فیکلٹی کے دیگر ارکان بھی موجود تھے۔جدید طرز کی اس لائبریری میں مرد و خواتین کے لیے علیحدہ علیحدہ مطالعہ گاہیں قائم کی گئی ہیں۔ لائبریری میں تیز رفتار وائے فائے، ائیر کنڈیشنڈ ماحول، آرام دہ کرسیاں اور دیگر بہترین سہولیات فراہم کی گئی ہیں تاکہ طلباء و طالبات کو علمی و تحقیقی ماحول میسر آ سکے۔چیئرمین بی او جی پروفیسر عابد جمیل نے افتتاحی تقریب سے خطاب کرتے ہوئے کہا کہ ہمارے ڈاکٹرز کو معیاری سہولیات فراہم کرنا ہماری اولین ترجیح ہے۔ انہوں نے لائبریری کے قیام پر ادارے کے ڈین و سی ای او پروفیسر ڈاکٹر ثاقب ملک اور ان کی ٹیم کی کاوشوں کو سراہا اور کہا کہ ایسے اقدامات ادارے کے علمی معیار کو مزید بلند کریں گے۔ایوب میڈیکل انسٹی ٹیوشن مسلسل تعلیمی و تحقیقی سہولیات میں بہتری کی جانب گامزن ہے تاکہ مستقبل کے ماہرین طب کو ایک مثالی تعلیمی ماحول فراہم کیا جا سکے۔

چیف سیکرٹری خیبرپختونخوا شہاب علی شاہ کی زیر صدارت ہفتہ وار جائزہ اجلاس منعقد ہوا جس میں انتظامی سیکرٹریز اور متعلقہ افسران نے شرکت کی۔ اجلاس میں گورننس، ترقیاتی منصوبوں، عوامی خدمات کی فراہمی اور بنیادی اشیاء کی قیمتوں کے کنٹرول سمیت دیگر اہم امور کا تفصیلی جائزہ لیا گیا۔اجلاس کا ایک اہم پہلو سرکاری افسران کی استعداد کار میں اضافے کے لئے پبلک پرائیویٹ پارٹنرشپ (پی پی پی) کے مختلف پہلوؤں پر تربیت کی فراہمی تھی۔ اجلاس کو آگاہ کیا گیا کہ نیشنل یونیورسٹی آف سائنسز اینڈ ٹیکنالوجی کے تحت 20 افسران ڈپلومہ کورس میں زیر تربیت ہیں، جبکہ 23 افسران APMG CP3P کا فاؤنڈیشن سرٹیفکیٹ کورس حاصل کر چکے ہیں، جو کہ پبلک پرائیویٹ پارٹنرشپ فریم ورک میں مہارت کے لئے ضروری ہے۔اجلاس میں 12 ضروری اشیاء کی قیمتوں کا بھی جائزہ لیا گیا۔ متعلقہ حکام نے بریفنگ دی کہ قیمتوں کی نگرانی کے لئے ایک لائیو ڈیش بورڈ کا قیام عمل میں لایا جارہا ہے، جس کے اشیائے خوردونوش کی قیمتوں کی مانیٹرنگ کی جائے گی۔ چیف سیکرٹری نے ہدایت کی کہ جن اضلاع میں اشیائے خوردو نوش کی سپلائی میں چیلنجز کی وجہ سے قیمتوں میں فرق ذیادہ ہے وہاں ڈپٹی کمشنرز ہول سیلرز سے براہ راست رابطہ کریں اور قیمتوں کے کنٹرول کے لئے اقدامات یقینی بنائیں۔چیف سیکرٹری نے کہا کہ صوبائی حکومت عوام کو زیادہ سے زیادہ ریلیف فراہم کرنے کے لیے پرعزم ہے۔ اجلاس میں ترقیاتی فنڈز کے اجرا اور اخراجات پر بھی بریفنگ دی گئی، جبکہ معمول کی حفاظتی ٹیکہ جات مہم اور پولیو کے خاتمے کی مہم سے متعلق پیش رفت پر بھی تبادلہ خیال کیا گیا۔پشاور ڈیویلپمنٹ اتھارٹی (پی ڈی اے) کے حکام نے اجلاس کو شہر میں جاری انفراسٹرکچر منصوبوں پر بریفنگ دی، جن میں ناردرن سیکشن رنگ روڈ کے ‘مسنگ لنک’ پشاور میں جنرل بس ٹرمینل کی تعمیر اور ٹریفک مسائل کے حل کے لئے اقدامات شامل تھے۔ چیف سیکرٹری نے متعلقہ محکموں کو ہدایت کی کہ یونیورسٹی روڈ پر ٹریفک، پیدل چلنے والوں کے لئے سہولیات (روڈ فرنیچر) کو بہتر بنایا جائے تاکہ ٹریفک کی روانی بہتر ہوسکے جبکہ رنگ روڈ کی مرمت کا کام بھی فوری طور پر شروع کیا جارہا ہے۔اجلاس کو بتایا گیا کہ لینڈ یوز و بلڈنگ کنٹرول اتھارٹی (لوبکا) کا بجٹ منظور کر لیا گیا ہے اور اس ادارے میں اصلاحات کردی گئی ہیں تاکہ بلڈنگ کنٹرول اقدامات کو تیز کیا جا سکے۔ اجلاس میں سیاحتی علاقوں میں ہوٹلز اور ریسٹورنٹس میں نکاسی آب کے نظام کی بہتری کے حوالے سے بھی پیش رفت کا جائزہ لیا گیا۔ بتایا گیا کہ گزشتہ 15 دنوں میں 92 مختلف ہوٹلوں اور ریسٹورنٹس میں سیوریج سسٹم بہتر بنایا گیا ہے جبکہ مزید ہوٹلوں اور ریسٹورنٹس کے نکاسی آب کی بہتری پر کام جاری ہے۔

خیبرپختونخوا کے وزیر برائے لائیو سٹاک، فشریز و کوآپریٹیو فضل حکیم خان نے کہا ہے کہ ہم نے ہمیشہ اقتدار کو نہیں بلکہ عوامی خدمت کو اولین ترجیح دی ہے۔ ہمیں اپنے عوام کی خدمت سے دلی خوشی اور اطمینان حاصل ہوتا ہے اور میں خود کوعوام کاخادم تصور کرتا ہوں۔ ان خیالات کا اظہارانہوں نے ملوک آباد مینگورہ دورہ کے موقع پر لوگوں سے ملاقات کے دوران کیا۔ صوبائی وزیرکا کہنا تھا کہ حلقہ کے تمام لوگ ہمارے لیے یکساں اہمیت رکھتے ہیں اور ہم کسی بھی فرق یا امتیاز کے بغیر تمام لوگوں کی خدمت پر یقین رکھتے ہیں۔ ہمارے حجرے کے دروازے عوام و کارکنان کے لیے ہر وقت کھلے ہیں اور میں ہمہ وقت ان کی خدمت کے لیے موجود ہوں۔ فضل حکیم خان نے کہا کہ خیبرپختونخوا حکومت کا وژن بھی اسی عوامی خدمت کے جذبے پر مبنی ہے اور ہم اس عزم کے ساتھ آگے بڑھ رہے ہیں کہ ہر شہری کو بنیادی سہولیات اور انصاف کی فراہمی ممکن بنائی جائے۔انہوں نے مزید کہا کہ پاکستان تحریک انصاف ہی وہ واحد جماعت ہے جو نہ صرف عوامی مسائل کو صحیح معنوں میں سمجھتی ہے بلکہ ان کا دیرپا اور قابل عمل حل بھی رکھتی ہے۔ پی ٹی آئی کا منشور شفاف حکمرانی، انصاف کی فراہمی، تعلیم، صحت، اور معاشی بہتری جیسے بنیادی عوامی حقوق پر مبنی ہے۔فضل حکیم خان نے کہا کہ پی ٹی آئی کی جدوجہد کسی فرد یا گروہ کے لیے نہیں بلکہ پاکستان کے روشن مستقبل کے لیے ہے۔ ہمارا مشن ہے کہ ہر پاکستانی کو باعزت زندگی گزارنے کا حق ملے اور یہی ہمارا منشور ہے۔