وزیراعلیٰ خیبرپختونخوا سردار علی امین خان گنڈا پورکی زیر صدارت جمعرات کے روز انسداد منشیات ، منشیات کے عادی افراد کی بحالی اور گداگری کی روک تھام سے متعلق ایک اجلاس وزیراعلیٰ ہاو¿س پشاور میں منعقد ہوا جس میں صوبائی دارالحکومت پشاور میں منشیات کے عادی افراد کی بحالی اور گداگری کے سدباب کیلئے دو الگ الگ مختلف ایکشن پلانز کی منظوری دی گئی ہے ۔ انسداد منشیات سے متعلق ایکشن پلان کے تحت منشیات کی روک تھام کیلئے خصوصی کاروائیاں عمل میں لانے کے علاوہ پشاور میں تقریباً دو ہزار منشیات کے عادی افراد کی بحالی کیلئے اقدامات بھی اٹھائے جائیں گے ۔صوبائی وزیر برائے ایکسائز ٹیکسیشن و نارکاٹیکس کنٹرول میاں خلیق الرحمن کے علاوہ چیف سیکرٹری ندیم اسلم چوہدری،انسپکٹر جنرل آف پولیس اختر حیات خان گنڈا پور ، ایڈیشنل چیف سیکرٹری داخلہ محمد عابد مجید ،وزیراعلیٰ کے پرنسپل سیکرٹری امجد علی خان، متعلقہ محکموں کے انتظامی سیکرٹریز ، کمشنر پشاور اور دیگر متعلقہ حکام نے اجلاس میں شرکت کی۔اجلاس میں منشیات کے استعمال کی روک تھا م کےلئے خصوصی ٹاسک فورس قائم کرنے کا فیصلہ کیا گیا ہے جو انسداد منشیات سے متعلق ایکشن پلان پر عملدرآمد کو یقینی بنائے گی۔ ایکشن پلان کے تحت منشیات کے عادی افراد کی بحالی کیلئے ان نجی اداروں کی خدمات حاصل کی جائیں گی جو بحالی میں مہارت رکھتے ہوں، نجی شعبے کے بحالی مراکز میں علاج ، کھانے پینے ، رہائش سمیت بحالی کےلئے درکار دیگر تمام سہولیات دستیاب ہوں گی ۔ منشیات کے عادی افراد کی بحالی کا دورانیہ چار مہینوں پر مشتمل ہوگا جس کے بعد بحال شدہ افراد کو دو ماہ پر مشتمل ٹیکنیکل اورووکیشنل کورسز کروائے جائیں گے ۔ مزید برآں بحال شدہ افراد کا ان کے خاندانوں کے ساتھ چھ ماہ تک فالو اپ بھی کیا جائے گا جبکہ دیگر صوبوں سے تعلق رکھنے والے منشیات کے عادی افراد کی بحالی کے بعد متعلقہ صوبوں کے حوالے کیا جائے گا۔ منشیات کے عادی دو ہزار افراد کی بحالی کے مجموعی عمل پر 326 ملین روپے لاگت آئے گی ۔اجلاس میں تعلیمی اداروں میں منشیات کے استعمال کی بڑھتی ہوئی شرح پر تشویش کا اظہا رکرتے ہوئے طلبہ کو اس لعنت سے محفوظ کرنے کیلئے خصوصی اقدامات کا فیصلہ کیا گیا ہے ۔ تعلیمی اداروں کے طلبہ کو منشیات کے منفی اثرات سے متعلق آگہی دینے کیلئے مہم شروع کرنے جبکہ پہلے مرحلے میں اعلیٰ تعلیمی اداروں میں زیر تعلیم طلبہ کی جنرل اسکریننگ کا اُصولی فیصلہ کیا گیا ہے ۔ سیکرٹری اعلیٰ تعلیم کی سربراہی میں قائم کمیٹی طلبہ کی جنرل اسکریننگ کیلئے تعلیمی اداروں کی انتظامیہ کے ساتھ مل کر طریقہ کار وضع کرے گی ۔ طلبہ کی جنرل اسکریننگ رپورٹ کو خفیہ رکھا جائے گا جبکہ یہ صرف طلبہ کے والدین کے ساتھ شیئر کی جائے گی ۔ اجلاس میں منشیات سپلائی کرنے والے بڑے مگر مچھوں کے خلاف بھی کریک ڈاﺅن کا فیصلہ ہوا ہے ۔ اس مقصد کیلئے پولیس، محکمہ ایکسائز و نارکوٹیکس کنٹرول اور اینٹی نارکوٹیکس فورس مشترکہ کاروائیاں کریں گے، منشیات سپلائی کرنے والوں کے خلاف کاروائیوں کی مانیٹرنگ کیلئے وزیراعلیٰ سیکرٹریٹ میں خصوصی کنٹرول روم قائم کیا جائے گا۔

وزیر اعلیٰ خیبر پختونخوا سردار علی امین خان گنڈاپور کی زیر صدارت خیبر پختونخوا ریوینیو اتھارٹی کے پالیسی بورڈ کا تیسرا  اجلاس بدھ کے روز وزیر اعلیٰ ہاو¿س پشاور میں منعقد ہوا جس میں  مالی سال 2024-25 کے دوران اتھارٹی کے لیے 47 ارب روپے ریوینیو اکٹھا کرنے کا ہدف مقرر کیا گیا ہےجبکہ نئے مال سال کے لئے ریونیو اتھارٹی کے بجٹ تخمینہ جات کی بھی منظوری دی گئی ہے۔ اجلاس میں متعلقہ کابینہ اراکین نذیر عباسی، میاں خلیق الرحمان ، مزمل اسلم کے علاوہ متعلقہ انتظامی سیکرٹریز اور دیگر بورڈ ممبران نے بھی  شرکت کی۔اجلاس میں بورڈ کے گذشتہ اجلاس میں کئے گئے فیصلوں پر عملدرآمد کا جائزہ لینے کے علاوہ صوبائی حکومت کی آمدن بڑھانے کے لئے ریونیو اتھارٹی کے اقدامات ، کامیابیوں اور دیگر امور پر بریفنگ بھی دی گئی۔اجلاس کو بتایا گیا کہ رواں مالی سال کے لئے ریونیو اتھارٹی کو 35 ارب روپے ریونیو کا ٹارگٹ ملا تھا جس کے مقابلے میں ریونیو اتھارٹی نے رواں مالی سال کے دوران اب تک 37 ارب روپے ریوینیو اکٹھا کر لیا ہے۔ بورڈ اجلاس میں دیگر ایجنڈا آئٹمز کے ساتھ ساتھ ریونیو اتھارٹی کے مختلف مجوزہ ریگولیشنز کی بھی مشروط منظوری دی گئی ہے۔وزیر اعلیٰ نے اجلاس سے خطاب کرتے ہوئے کہا کہ ٹیکس کے جملہ معاملات میں شفافیت اور استعداد کو بڑھانے کے کے لئے انفارمیشن اینڈ کمیونیکیشن ٹیکنالوجی کا موثر استعمال کیا جائے جبکہ ڈیجیٹائزیشن کے عمل میں ان علاقوں کو پہلی ترجیح دی جائے جہاں سے زیادہ ریونیو اکھٹا ہوتا ہے۔ریونیو اتھارٹی کی استعداد کار کو بڑھانے کے لئے خالی آسامیوں کو پر کرنے کے لئے اقدامات کئے جائیں۔

خیبرپختونخوا انڈر 23 انٹر ریجنل گیمز کی رنگا رنگ افتتاحی تقریب منگل کے روز حیات آباد سپورٹس کمپلیکس پشاور میں منعقد ہوئی جس کے مہمان خصوصی خیبرپختونخوا کے وزیراعلیٰ سردار علی امین خان گنڈا پور تھے ۔ صوبائی وزراءمینا خان آفریدی ، سید قاسم علی شاہ، وزیراعلیٰ کے مشیر برائے کھیل سید فخر جہاں ، ایم این ایز ارباب شیر علی اور آصف خان کے علاوہ محکمہ سپورٹس کے اعلیٰ حکام بھی اس موقع پر موجود تھے ۔ وزیراعلیٰ خیبرپختونخوا نے انڈر 23 انٹر ریجنل گیمز کے افتتاح کا باقاعدہ اعلان کیا۔ افتتاحی تقریب میں کھلاڑیوں نے مارچ پاسٹ، روایتی رقص اور دیگر مختلف پرفارمنس کا مظاہرہ کیا۔اس موقع پر آتش بازی کا شاندار مظاہرہ بھی کیا گیا۔ انڈر 23 انٹر ریجنل گیمز میں صوبہ بھر سے 1800 سے زائد مرد و خواتین کھلاڑی حصہ لے رہے ہیں جو 20 مختلف کھیلوں میں اپنی صلاحیتوں کا مظاہرہ کریں گے۔کھلاڑیوں میں 1078 مرد اور 770 خواتین کھلاڑی حصہ لے رہی ہیں، مرد کھلاڑیوں کے لیے 11 جبکہ خواتین کھلاڑیوں کے لیے کھیلوں کے 9 مختلف مقابلوں کا اہتمام کیا گیا ہے۔مرد کھلاڑی سکواش، بیڈمںٹن، ٹیبل ٹینس، والی بال، ہاکی، تائیکوانڈو، کرکٹ، کراٹے، ایتھلیٹکس اور تھرو بال میں حصہ لیں گے جبکہ خواتین کھلاڑی والی بال، بیڈمنٹن، ٹیبل ٹینس، جوڈو، ہاکی، کرکٹ، ایتھلیٹکس، تائیکوانڈو اور سکواش میں حصہ لیں گی۔خواتین کے مقابلے عبدالوالی خان سپورٹس کمپلیکس چارسدہ، پشاور سپورٹس گراو¿نڈ اور پشاور سپورٹس کمپلیکس میں ہونگے جبکہ مردوں کے کھیل حیات آباد سپورٹس کمپلیکس، پشاور سپورٹس کمپلیکس اور کوہاٹ سپورٹس کمپلیکس اور پشاور یونیورسٹی میں ہونگے۔ انڈر 23 انٹر ریجنل گیمز کے مقابلے 30 مئی تک جاری رہیں گے۔
افتتاحی تقریب سے بحیثیت مہمان خصوصی خطاب کرتے ہوئے وزیراعلیٰ نے اس ایونٹ کے انعقاد پر محکمہ سپورٹس کی پوری ٹیم کو مبارکباد پیش کرتے ہوئے کہاکہ یہ صوبائی سطح پر کھیلوں کا سب سے بڑا ایونٹ ہے جو آنے والے بین الصوبائی مقابلوں کیلئے بھی ایک مضبوط بنیاد فراہم کرے گا۔ نوجوانوں کو اپنی حکومت اور پاکستان تحریک انصاف کی سب سے اہم ترجیح قرار دیتے ہوئے اُنہوںنے کہاکہ نوجوانوں نے جس انداز میں پاکستان تحریک انصاف اور عمران خان کا ساتھ دیا ہے وہ لائق تحسین ہے اور میں یقین دلاتا ہوں کہ ہماری حکومت ہر شعبے میں نوجوانوں کی فلاح و بہبود کیلئے ٹھوس اقدامات کرے گی ۔ ایونٹ میں حصہ لینے والے کھلاڑیوں کو خوش آمدید کہتے ہوئے اُنہوںنے کہاکہ تمام کھلاڑی ان گیمز کے اختتام تک صوبائی حکومت کے مہمان ہیں اور ایونٹ کے اختتام تک ان کا بھر پور خیال رکھا جائے اور اُنہیں ہر قسم کی سہولیات کی فراہمی یقینی بنائی جائے گی ۔ وزیراعلیٰ نے کہاکہ کھیل نوجوانوں کو اچھی جسمانی صحت دینے کے علاوہ اُن میں برداشت ، حوصلہ ، صبر ، محنت اور مقابلے کی صلاحیتیں پیدا کرتی ہیں ۔ اُنہوںنے کہاکہ جن لوگوں میں جیتنے کا عزم ہو تا ہے اُن کو ہار بھی نہیں ہراسکتی۔ جن کے عزم بلند ہوتے ہیں ، اُن کیلئے ہار نا ایک وقتی آزمائش ہو تی ہے اور وہ اپنی کمزوریوں او رکوتاہیوں کو دور کر کے مزید آگے بڑھنے کی کوشش کرتے ہیں۔علی امین گنڈا پور نے نوجوانوں پر زور دیا کہ وہ پورے جذبے کے ساتھ کرپشن اور منشیات کے خلاف جنگ میں صوبائی حکومت کا ساتھ دیں اور معاشرے سے ان برائیوں کے خاتمے کیلئے اپنا کردار ادا کریں۔ وزیراعلیٰ نے اُمید ظاہر کی کہ ان گیمز میں حصہ لینے والے کھلاڑی نہ صرف قومی سطح پر بلکہ بین الاقوامی سطح پر بھی صوبے کا نام روشن کریں گے ۔ وزیراعلیٰ نے مزید کہاکہ عمران خان نے بہت پہلے کہہ دیا تھا کہ ہم ایک آزاد قوم نہیں ہیں جو آج سچ ثابت ہو گیا کیونکہ آج اس ملک میں مظلوم فلسطینیوں کے حق میں کوئی بولنے والا نہیں لیکن ہمارا صوبہ آزاد ہے ، ہم فلسطین اور کشمیر کے مسلمانوں سمیت تمام مظلو موں کے ساتھ کھڑے ہیں اور کھڑے رہیں گے ۔ اس موقع پر وزیراعلیٰ نے ایونٹ میں اچھی کارکردگی کا مظاہرہ کرنے والے کھلاڑیوںکیلئے اپنی طرف سے مجموعی طور پر 50 لاکھ روپے کا اعلان کیا جو محکمہ سپورٹس کی طرف سے کھلاڑیوں کو دی جانے والی انعامی رقم کے علاوہ ہو گی ۔ قبل ازیں وزیراعلیٰ نے حیات آباد سپورٹس کمپلیکس میں کرکٹ اسٹیڈیم کی اپ گریڈیشن کا بھی افتتاح کیا ۔