نگران وزیراعلی کے مشیر برائے منصوبہ بندی و ترقیات، آبنوشی اور مواصلات و تعمیرات ڈاکٹر سید سرفراز علی شان نے وزارت منصوبہ بندی و ترقیات کے حکام کو ہدایت جاری کی ہے کہ بالخصوص فارن فنڈڈ منصوبوں کی فزیبلٹی کے وقت زمین کی خریداری، حصول کے طریقے کار، احراجات اور دیگر ضروری عوامل کو مدنظر رکھا جائے اور سیکشن فور کے علاوہ دیگر ذرائع سے ان اضلاع میں جہاں زمین کی کمی ہے زمین کے حصول کے لیے لائحہ عمل طے کریں۔ انہوں نے مزید ہدایت جاری کی کہ تمام جاری صوبائی، وفاقی اور فارن فنڈڈ ترقیاتی منصوبوں میں اخراجات بھی شیڈول کے مطابق ہو اور کوشش کریں کہ ریلیز شدہ ترقیاتی بجٹ بروقت خرچ کیا جا سکیں تاکہ ترقیاتی کام متاثر نہ ہو۔ انہوں نے حکام کو ہدایت کی کہ تمام جاری منصوبوں کی ڈیڈ لائن اور پلان کا پروپوزل اگلے ہفتے بھیجا جائے تاکہ جن منصوبوں کی تکمیل قریب ہو ان پر بھرپور توجہ دی جائے اور کثیر المعیاد منصوبوں کے لیے ابھی سے پالیسی بنائی جائے۔

یہ ہدایات انہوں نے مکہ منصوبہ بندی و ترقیات کے فارن فنڈڈ منصوبوں پر بریفنگ لیتے وقت جاری کی۔ اجلاس میں چیف پی اینڈ ڈی اختررحمان اور دیگر پلاننگ افیسرز نے شرکت کی۔ نگران مشیر نے کہا کہ ترقیاتی منصوبوں کی بروقت تکمیل ہماری اولین ترجیح ہے اور ہدایت کی کہ ان تمام منصوبوں کی نشاندہی کریں جن میں مسائل ہو تاکہ ان کے بروقت حل کے لیے اقدامات کیے جائیں اور جن منصوبوں میں پراجیکٹ مینجمنٹ یونٹ کے قیام اور پراجیکٹ ڈائریکٹرز کی تعیناتی یا دیگر مسائل ہو ان کی بھی نشاندہی کریں تاکہ ان کو بھی بروقت توجہ دی جا سکے تاکہ عوامی مفاد میں شروع کردہ منصوبے متاثر نہ ہو۔

نگران مشیر کو بتایا گیا کہ اس وقت خیبر پختونخوا کے مختلف محکموں میں مختلف نوعیت کے 66 فارن فنڈڈ منصوبوں پر کام جاری ہیں۔ جن میں روڈز ، صحت ، تعلیم انرجی اور فلاح و بہبود کے دیگر سیکٹرز شامل ہیں۔

چیف جسٹس پشاور ہائی کورٹ پشاور محمد ابراہیم خان کا سنٹرل جیل پشاور کا دورہ

چیف جسٹس پشاور ہائی کورٹ پشاور محمد ابراہیم خان نے سنٹرل جیل پشاور کا دورہ کیا ان کے ہمراہ نگران صوبائی وزیر برائے جیل خانہ جات جسٹس ریٹائرڈمسز ارشاد قیصر،ڈسٹرکٹ اینڈ سیشن جج پشاور اشفاق تاج اور آئی جی جیل خانہ جات عثمان محسو د ومتعلقہ جوڈیشل افسران بھی موجود تھے۔چیف جسٹس پشاور ہائی کورٹ نے سب سے پہلے خواتین بیرک کا دورہ کیااور خواتین بیرک میں ویڈیو لنک کی سہولت کو سراہا۔انھوں نے خواتین قیدیوں کے مسائل سنے اور ان کے فوری حل کے لئے موقع پر ہدایات جاری کیں۔بعدازاں جسٹس محمد ابراہیم خان نے جیل کی عمارت میں بنے ہسپتال کے نئے وارڈ کا دورہ کیا اوربیمار قیدیوں کی عیادت کی۔چیف جسٹس نے جیل میں بنی فیکٹری کا دورہ بھی کیا جہاں پر قیدیوں کو چمڑہ سازی کی صنعت سے پشاوری جوتے اور پرس بنانے کا ہنرسکھایا جاتا ہے،علاوہ ازیں کشیدہ کاری اور پینٹنگ کلاس کا بھی دورہ کیا۔چیف جسٹس پشاور ہائیکورٹ نے جوینائل بیر ک کا بھی دورہ کیا اور کم عمر قیدیوں کے لئے بنیادی سہولیات کی فراہمی کے لئے خصوصی احکامات جاری کیے۔ چیف جسٹس پشاور ہائی کورٹ ابراھیم خان نے جیل، عدلیہ اور دیگر محکموں کے افسران کو مخاطب کر تے ہوئے کہا کہ احتساب کا عمل سب سے پہلے اپنی ذات سے شروع کرنا چاہیے، پھر اس کے بعد اپنے ما تحت عملہ کا قبلہ درست کرنا چاہیے۔جیل کے دورہ کے اختتام پر انہوں نے آئی جی جیل خانہ جات اور سپرنٹنڈنٹ جیل وسیم خان کو مخاطب کرنے ہوئے جیل میں موبائل فون ومنشیات کے استعمال اور دیگر چھوٹے موٹے مسائل پر تشویش کا اظہار کیا اور کہا کہ میرے آفس کے دروازے آ پ کے لئے ہر وقت کھلے ہیں، نظام کی درستگی کے لئے اگر مجھے 80فیصد عملے کے خلاف بھی کاروائی کرنی پڑے تو جتنا میرے اختیار میں ہو گامیں کرونگا۔انہوں نے حلفاََ کہا کہ1993 سے میں نے بطور ایڈیشنل سیشن جج اپنے سفر کا آغاز کیا اور 31سالوں میں چیف جسٹس کے عہدے تک کے عرصہ کے دوران کوئی بھی فیصلہ کسی قسم کے دباؤ کے تحت نہیں کیا۔ چیف جسٹس نے اس دورہ کے دوران 115مختلف معمولی نوعیت کے قیدیوں کی فوری رہائی کے احکامات جاری کیئے۔مزید برآں انہوں نے 14فارن ایکٹ کے تحت گرفتار کثیر تعداد میں قیدیوں کی ان کے اپنے ملک منتقلی کے لئے متعلقہ محکمہ کو فوری انتظامات کر نے کے احکامات بھی جاری کئے۔آخر میں انہوں نے سیشن جج پشاور اشفاق تاج کی انصاف کی فراہمی کے لئے جدید ٹیکنالوجی کو اختیار کرنے پر اور قیدیوں کے زیر التواء مقدمات کی فوری سماعت وفیصلہ کرنے جیسے اقدامات کو سراہااور موقع پر مختلف عدالتوں کے ججز صاحبان سے جیل سے بذریعہ ویڈیو لنک بات چیت کر کے ان سے اس نظام کی افادیت کو مزید بہتر کرنے کے لئے آراء طلب کیں۔۔۔۔۔۔۔

خیبر پختونخوا کینگران وزیر برائے جیل خانہ جات، سماجی بہبود،زکوٰۃ و عشر جسٹس(ر) ارشاد قیصر نے سنٹرل جیل پشاور کا تفصیلی دورہ کیا،آئی جی جیل خانہ جات عثمان محسود نے نگران صوبائی وزیر کو جیل کے مختلف حصوں اور سہولیات کے بارے میں بریف کیا. نگران صوبائی وزیر نے دورے کے موقع پر خواتین و کمسن قیدیوں کے بیرکوں میں قیدیوں سے ملاقاتیں کیں، مسائل سنے اور سہولیات کا جائزہ لیا. دورے کے دوران جیل ہسپتال کے وارڈ بھی گئیں، انہوں نے قیدیوں کو فراہم علاج و معالجے کی سہولیات بابت دریافت کیا. اس موقع پر نگران صوبائی وزیر نے قیدیوں کی اصلاح اور انھیں ہنر مند بنانے کے لئے جیل میں کئے گئے اقدامات کا بھی معائنہ کیا اور قیدیوں کی تیار کردہ اشیاء بھی دیکھیں اور انکے ہنر کو سراہا. دورے کے موقع پر نگران وزیر کو جیل کے اندر آنلائن کورٹ رومز کا بھی دورہ کرایا گیا. نگران صوبائی وزیر نے آنلائن کورٹ کے طریقہ کار کو سراہتے ہوئے کہا کہ آنلائن نظام کی بدولت مقدمات کی جلد پیروی ممکن ہوگی. سنٹرل جیل کے دورے کے موقع پر نگران صوبائی وزیر جسٹس(ر) ارشاد قیصر نے جیل احاطے میں پودا بھی لگایا۔

بجلی چوری کے تدارک کے لئے بااثرمافیااوربڑی مچھلیوں کے خلاف سخت کارروائی کافیصلہ

کارخانوں،ہوٹلز،کمرشل پلازوں،شادی ہالز،غیرقانونی ہاؤسنگ سوسائٹیوں کی لسٹیں تیار،جلدکریک ڈاؤن ہوگا

خیبرپختونخوامیں قائم صوبائی ٹاسک فورس کا پہلااجلاس،قومی سطح پر جاری مہم کی کامیابی کے لئے مختلف تجاویزپراتفاق

خیبرپختونخوامیں بجلی کے ناجائز استعمال اورکنڈہ کلچرمیں ملوث بااثرمافیااوربڑی مچھلیوں کے خلاف سخت کارروائی کا فیصلہ کیاگیاہے جبکہ بجلی چوری میں ملوث صوبے میں قائم مختلف کارخانوں،ہوٹلز،کمرشل پلازوں،شادی ہالز،فیکٹریوں،شاپنگ مالز،حجروں،دکانوں اورغیرقانونی ہاؤسنگ سوسائٹیوں کی بھی لسٹیں تیارکرلی گئی ہیں جن کے خلاف جلدہی بڑے پیمانے پرکریک ڈاؤن کیا جائے گا۔ گھریلوصارفین کوبھی تنبیہ کی گئی ہے کہ گنڈہ کلچرکوفوری ترک کرکے قانونی طورپر بجلی کے استعمال کی طرف آجائیں بصورت دیگرقانون کے مطابق سخت کارروائی کی جائے گی۔بجلی بلوں کے نادہندگان بھی تعاون کرتے ہوئے اپنے بقایاجات جلد اداکریں تاکہ ملک کوموجودہ بحران سے نکالاجاسکے۔ اس بات کا فیصلہ وزیراعظم پاکستان کی ترجیح کے مطابق ملک بھر کی طرح خیبرپختونخوامیں بھی بجلی کے ناجائزاستعمال کے تدارک اوربجلی صارفین سے واجب الادابقایاجات کی ریکوری کی جاری مہم کے لئے صوبائی سیکرٹری داخلہ کی سربراہی میں قائم صوبائی ٹاسک فورس کے پہلے اجلاس میں کیاگیا۔اجلاس میں ٹاسک فورس کے سربراہ سیکرٹری داخلہ عابدمجید،سیکرٹری توانائی ذوالفقارعلی شاہ،کمشنرپشاورزبیرخان،کمشنرملاکنڈشاہد اللہ خان،ڈپٹی سیکرٹری صنعت وکامرس مقبول خان،پیسکوچیف فضل ربی کے علاوہ Zoomکے ذریعے ایڈیشنل سیکرٹری پاورڈویژن ارشدمجیدخان، مختلف ڈویژن میں تعینات کمشنرز،ریجنل پولیس افسران اورپیسکوکے اعلیٰ حکام نے خصوصی طورپر شرکت کی۔اجلاس میں بتایاگیاکہ رواں ماہ 5ستمبر سے اب تک ایک ہفتے کے دوران صوبے بھر میں کل 518چھاپے مارے گئے،بجلی چوری میں ملوث925غیرقانونی کنڈکشن(کنڈے) ہٹائے گئے،مختلف تھانوں میں 684مقدمات درج،28افرادکوگرفتارکیاگیااور338صارفین کو وارننگ جاری کی گئیں۔صوبے میں جاری مہم کے دوران نادہندگان سے ایک ہفتے کے دوران 4ملین روپے کی ریکوری کی گئی ہے۔پیسکوچیف کے مطابق صوبے میں بجلی نادہندگان کے ذمے190بلین روپے کے بقایاجات ہیں جن کی وصولی کے لئے ٹیمیں تشکیل دی گئی ہیں۔ایڈیشنل سیکرٹری پاورڈویژن ارشدمجیدخان نے پیسکوکی کارکردگی پرعدم اطمینان کا اظہارکرتے ہوئے کہاکہ سب سے زیادہ بجلی چوری مردان،چارسدہ،بنوں،پشاورمیں ہے جبکہ ریکوری کے اہداف بھی سست ہیں۔انہوں نے ہدایت کی کہ فوری طورپر تمام اضلاع میں پیسکو فیڈرزکاڈیٹامتعلقہ کمشنرزوڈپٹی کمشنرزکوشیئرکیاجائے اورمہم میں مزید تیزی لائی جائے تاکہ مہم کونتیجہ خیزبنایاجائے۔اجلاس میں بنوں،ڈی آئی خان،کوہاٹ،بنوں،ہزارہ ڈویژن کے کمشنرزاورریجنل پولیس آفیسرزنے اپنے اپنے اضلاع میں ریکوری اوربجلی چوری کی روک تھام کے لئے اقدامات سے آگاہ کیا۔اجلاس میں وسل بلورکے قانون کے تحت مہم کوکامیاب بنانے پر بھی زوردیاگیا۔ اجلاس میں صوبائی ٹاسک فورس کے سربراہ سیکرٹری داخلہ عابدمجیدنے بجلی کے ناجائزاستعمال کی روک تھام اورریکوری مہم کے دوران پیسکوکی جانب سے عوامی آگاہی کے لئے اشتہاری مہم کے فقدان اورکمزور عوامی رابطہ مہم پربرہمی کا اظہارکرتے ہوئے پیسکوچیف کوفوری طورپر گلی گلی،محلے اوربازاروں میں پینافلیکس آویزاں کرنے اوراخبارات،ٹی وی چینلز پرآگاہی مہم شروع کرنے کی ہدایت کی ورصوبے کے پوش علاقوں سمیت غیرقانونی ہاؤسنگ سوسائیٹیزکے خلاف سخت کارروائی کرنے پر زوردیا۔انہوں نے پیسکوحکام، ضلعی اورتحصیل کی سطح پر قائم ٹاسک فورس کمیٹیوں میں شامل صوبے بھر کے ڈپٹی کمشنرز،اسسٹنٹ کمشنرز اورپولیس حکام کوہدایت کی کہ محکمہ داخلہ میں PMRU آپریشن کی مانیٹرنگ کے فرائض انجام دے رہاہے اس لئے آپریشن کے حوالے سے تمام ڈیٹااسی مانیٹرنگ یونٹ کوروزانہ کی بنیاد پرفراہم کیاجائے۔اجلاس میں مہم کو کامیاب کرنے کے لئے سیکرٹری توانائی سید ذوالفقارعلی شاہ نے بھی اہم تجاویز پیش کیں۔انہوں نے ایڈیشنل سیکرٹری پاورڈویژن کی ذاتی دلچسپی اورتعاون کوسراہتے ہوئے امید کا اظہارکیا ہے کہ مذکورہ اقدام سے صوبے میں بجلی بحران پر قابوپانے میں بڑی حدتک کامیابی ملے گی۔

نگران وزیراعلی خیبرپختونخوا کے مشیر برائے صحت ڈاکٹر ریاض کا ایم ٹی آئی ڈیرہ اسماعیل خان سے متعلق خبر کا نوٹس، ہسپتال انتظامیہ سے جواب طلب

نگران وزیراعلی خیبرپختونخوا کے مشیر برائے محکمہ صحت ڈاکٹر ریاض انور نے ایم ٹی آئی ڈی آئی خان میں صحت کارڈ کی معطلی کے حوالے سے سوشل میڈیا پر چلنے والی خبر کا نوٹس لیتے ہوئے متعلقہ ہسپتال انتظامیہ سے جواب طلب کرلیا ہے، اس سلسلے میں اپنے دفتر سے جاری بیان میں نگراں مشیر کا کہنا تھا کہ ڈی آئی خان ایم ٹی آئی میں صحت کارڈ کی معطلی افسوسناک ہے،مفت علاج کی بجائے مریضوں سے پیسوں کی وصولی ناقابل برداشت ہے،مشیر صحت ڈاکٹر ریاض انور نے کہا کہ عوام کو صحت کی بہترین اور مفت علاج کی فراہمی کے لئے کوشاں ہے اور اس سلسلے میں کوئی کوتاہی برداشت نہیں کی جائے گی،نگران مشیر نے کہا کہ صحت کارڈ پر سرکاری ہسپتالوں میں علاج اولین ترجیح ہونی چاہئے، عوام کو انکی دہلیز پر علاج کی فراہمی کے لئے ہر ممکن اقدامات اٹھائے جارہے ہیں، واضح رہے کہ سوشل میڈیا پر خبر چلی تھی کہ متعلقہ ایم ٹی آئی میں صحت کارڈ پر علاج معطل ہے

بینک آف خیبر نے انڈر13 اسکواش ٹیلنٹ ہنٹ پروگرام کے دوسرے سیزن کا باضابطہ آغاز کر دیا ہے، اس سلسلے میں ایک تقریب کا اہتمام کیا گیا جس میں محکمہ کھیل اور بینک آف خیبر کے اعلی عہدیداروں نے شرکت کی۔ پروگرام ڈائریکٹوریٹ آف سپورٹس، خیبر پختونخوا کے اشتراک سے 12 ستمبر سے 20 ستمبر 2023 تک پشاور کے قمر زمان اسکواش کمپلیکس قیوم اسٹیڈیم میں جاری رہیگا یہ پروگرام پاکستان کے اسکواش کے سنہرے دور کی بحالی کیلئے ایک اہم اقدام ہے پورے خیبرپختونخوا سے کھلاڑی ٹیلنٹ ہنٹ میں حصہ لے رہے ہیں جن میں سے چھ کھلاڑیوں،تین لڑکوں اور تین لڑکیوں کوتین سال کی مدت کیلئے منتخب کیا جائے گا۔کامیاب ٹیلنٹڈ کھلاڑیوں کو بینک آف خیبر کی طرف سے ماہانہ وظیفے کے علاوہ خصوصی کوچنگ اور بین الاقوامی معیار کی پلیئنگ کٹس دی جائینگی۔ بینک آف خیبر اپنی کارپوریٹ سماجی ذمہ داری کے طو رپر کھیلوں کی صحت مند انہ سرگرمیوں کو فروغ دینے کے لیے پرعزم ہے جس سے معاشرے پر مثبت اثرات مرتب ہوتے ہیں۔ ڈائریکٹوریٹ آف سپورٹس اور خیبرپختونخوا اسکواش ایسوسی ایشن کے اشتراک سے ٹیلنٹ ہنٹ پروگرام کا مقصد پاکستان میں اسکواش کو فروغ دینا اور قومی و بین الاقوامی کھیلوں کے میدان میں اپنا کردار ادا کرنا ہے۔ بینک کھیلوں کو فروغ دینے اور نئے ٹیلنٹ کی جستجو کیلئے ایسے ایونٹس کے انعقاد میں پیش پیش ہے۔

خیبرپختونخوا فوڈ سیفٹی اینڈ حلال فوڈ اتھارٹی کی ٹیمیں متحرک،پشاور میں ملاوٹ مافیا کیخلاف گھیرا تنگ، خصوصی مہم کا آغاز

خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیم نے پشاور میں ملاوٹ مافیا کیخلاف گھیرا تنگ کرتے ہوئے چائے کی پتی بنانے والی فیکٹری سے غیر معیاری اور مضر صحت ہزاروں کلوگرام چائے کی پتی برآمد کرتے ہوئے کارخانہ سربمہر کیا اس سلسلے میں فوڈ سیفٹی اتھارٹی کے ترجمان نے تفصیلات جاری کرتے ہوئے کہا کہ نگران صوبائی وزیر خوراک کی ھدایات پر خیبرپختونخوا فوڈ سیفٹی اتھارٹی نے خصوصی مہم کا آغاز کیا ہے جس کے تحت فوڈ سیفٹی ٹیم ٹاؤن۔4 پشاور نے خفیہ اطلاع پر پر بشیرآباد کے علاقے میں چائے کی پتی بنانے والی فیکٹری پر اچانک چھاپہ مارا اور کارخانے سے 3 ہزار کلوگرام سے زائد غیر معیاری اور مضر صحت چائے کی پتی برآمد کرکے کارخانہ کو سربمہر کیا اور مشینری بھی ضبط کر لی جبکہ کارخانے کے مالک کو گرفتار کرکے قانونی کارروائی کا آغاز بھی کیا گیا، ترجمان کا کہنا تھا کہ چائے کی پتی میں چنے کا چھلکا، نان فوڈ گریڈ کلر، استعمال شدہ چائے اور دیگر مختلف کیمیکلز کی ملاوٹ کی جا رہی تھی، جسے تیاری کے بعد پنجاب سپلائی کرنا تھا، دریں اثناء ڈائریکٹر جنرل فوڈ اتھارٹی شاہ رخ علی خان نے کہا کہ جعلسازوں اور ملاوٹ مافیا کیساتھ کسی قسم کی نرمی نہیں برتی جائے گی اورشہریوں کی صحت سے کھیلنے والوں کیخلاف آہنی ہاتھوں سے نمٹا جائے گا۔