مشیر خزانہ خیبرپختونخوا مزمل اسلم نے کہا ہے کہ بدقسمتی سے پی ڈی ایم حکومت کے پاس ٹیکس بڑھانے کا کوئی منصوبہ نہیں ہے،ستم ظریفی یہ ہے ٹیکس دینے والوں سے مزید ٹیکس لیا جا رہا ہے۔ان خیالات کا اظہار انہوں نے یہاں سے جاری اپنے ایک بیان میں کیا۔انہوں نے کہا کہ افسوس کہ آئی ایم ایف بھی ایسی پالیسیاں تھوپ رہا ہے،آئی ایم ایف اور حکومتی مذاکرات میں سٹیک ہولڈرز کو اعتماد میں نہیں لیا جاتا۔مزمل اسلم نے کہا کہ حکومت کو صوبائی اور وفاقی ممبران پر مشتمل بورڈ تشکیل دینا چاہیئے اور بورڈ ممبران کو آئی ایم ایف سے مذاکرات کا اختیار دیا جائے۔مشیر خزانہ مزمل اسلم نے کہا کہ سخت پالیسی اقدامات اٹھانے سے پہلے اتفاق رائے ضروری ہے۔

پیراپلیجک سنٹر حیات آباد پشاور میں ورلڈ کلب فٹ ڈے کے حوالے سے ایک پروقار تقریب کا اہتمام کیا گیا اور کلب فٹ بچوں میں تحائف تقسیم کئے گئے۔ پشاور ترقیاتی ادارہ کے ڈائریکٹر جنرل کیپٹن (ر) خالد محمود نے تقریب میں بحیثیت مہمان خصوصی شرکت کی۔ اس موقع پر وہ سنٹر میں زیرعلاج اور صحت یاب کلب فٹ چلڈرن (پیدائشی ٹیڑھے پاؤں والے بچوں) اور انکے والدین میں گھل مل گئے اور ان سے بات چیت کی۔ انہوں نے اس بات پر اطمینان کا اظہار کیا کہ پیراپلیجک سنٹر میں کلب فٹ بچوں کا بالکل مفت اور کامیاب علاج ہوتا ہے۔ یہاں پیدائشی ٹیڑھے پاؤں والے بچے عملے کی دن رات محنت کے سبب محض چند سالوں میں صحتیاب ہو کر کھیل کود اور حصول تعلیم میں مشغول ہو جاتے ہیں اور والدین کے ساتھ ہنسی خوشی نارمل زندگی بسر کرنا شروع کر دیتے ہیں۔ انہوں نے اعتراف کیا کہ کلب فٹ بچوں کا علاج کافی صبرآزما اور مہنگا ہے جس کی وجہ سے غریب والدین کے پھول جیسے بچے ہمیشہ کیلئے معذوری کا شکار ہو جاتے ہیں۔ انہوں نے پیراپلیجک سنٹر پشاور میں کلب فٹ کے علاج کیلئے کی جانے والی بہترین خدمات کو سراہا اور تمام سٹاف ممبرز کو اس کامیاب کاوش پر مبارکباد دی۔ ڈائریکٹر جنرل پی ڈی اے نے سنٹر میں کلب فٹ کلینک کے علاوہ پیراپلیجکس یعنی ریڑھ کی ہڈی کے امراض میں مبتلا مریضوں کے مفت علاج و بحالی، انکے مصنوعی اعضا اور آلات کی تیاری کیلئے ورکشاپ اور بول چال میں مشکلات کے شکار افراد اور آٹزم سے متاثرہ بچوں کیلئے کلینک کے قیام کے علاوہ ڈاکٹر آف فزیوتھراپی اور اکوپیشنل تھراپی کی ڈگری کلاسز کے اجراء سمیت مختلف شعبوں میں منفرد طبی خدمات پر پیراپلیجک سنٹر کی انتظامیہ بالخصوص اس کے چیف ایگزیکٹیو ڈاکٹر سید محمد الیاس کی مخلصانہ خدمات کو سراہا اور اپنے ادارے کی جانب سے بھرپور تعاون کا یقین دلایا۔ پیراپلیجک سنٹر کے چیف ایگزیکٹیو ڈاکٹر سید محمد الیاس، ڈائریکٹر ریہیب و کلب فٹ پروگرام کوآرڈینیٹر امیر زیب نے کلب فٹ کے علاج پروگرام اور اسکی مزید توسیع پر تفصیلی روشنی ڈالی اور اپنا عزم دہرایا کہ مستقبل میں ڈویژنل سطح پر جدید پونسیٹی کلب فٹ کلینک بھی قائم کئے جائیں گے۔ ڈاکٹر الیاس کا کہنا تھا کہ پیراپلیجک سنٹر پشاور 2018ء سے کلب فٹ بچوں کا بالکل مفت علاج کر رہا ہے جس میں ان بچوں کی ابتدائی کاسٹنگ سے لے کر چار پانچ سال کے اندر مکمل بحالی شامل ہے۔ بچوں کے مفت علاج کے علاوہ مستحق زکوٰۃ خاندانوں کو آمدورفت کا کرایہ بھی دیا جاتا ہے تاکہ کوئی کلب فٹ بچہ غربت کی وجہ سے لاعلاج نہ رہے۔ سنٹر میں اب تک 3666 کلب فٹ بچوں کا بالکل مفت علاج ہوچکا ہے جبکہ خیبر پختونخوا کے تین بڑے ہسپتالوں یعنی خیبر ٹیچنگ ہسپتال، سیدوٹیچنگ ہسپتال اور ایوب ٹیچنگ ہسپتال میں بھی کلب فٹ کلینکس قائم کئے گئے ہیں۔ اسی طرح اسلام آباد میں نیشنل انسٹی ٹیوٹ آف ری ہیبلیٹیشن میڈیسن میں بھی کلب فٹ کلینک قائم کیا گیا ہے۔ ڈاکٹر الیاس سید کا مزید کہنا تھا کہ ہر سال دنیا بھر میں ورلڈ کلب فٹ ڈے اس عزم سے منایا جاتا ہے کہ معاشرے میں اس موذی پیدائشی نقص کے حوالے سے بیداری پیدا کی جائے۔ یہ ایسی بیماری ہے جو دنیا بھر میں لاکھوں لوگوں کو متاثر کرتی ہے تاہم بروقت تشخیص سے اس کا مکمل علاج ممکن ہے۔ یہ عالمی دن منانے کا مقصد اُن بچوں کی حوصلہ افزائی ہے جن کا علاج ہوچکا یا زیر علاج ہیں اور اُن میڈیکل پروفیشنلز کو بھی خراج تحسین پیش کرنا ہے جو اس لمبے اور صبر آزما علاج میں پوری تندہی سے کردار ادا کرتے ہیں۔ دُنیا میں 89 لاکھ لوگ کلب فٹ کے ساتھ پیدا ہوتے ہیں جن میں 78 لاکھ علاج نہ ہونے کی وجہ سے مستقل معذوری کے ساتھ زندگی گزار رہے ہیں۔ ایک اندازے کے مطابق پاکستان میں سالانہ دو لاکھ یعنی 800 میں ایک بچہ کلب فٹ کے ساتھ پیدا ہوتا ہے تاہم بروقت علاج سے 95 فیصد سے زیادہ بچے مکمل صحتیاب ہو جاتے ہیں۔ ڈاکٹر محمد الیاس کا مزید کہنا تھا کہ میریکل فیٹ جیسی بڑی عالمی تنظیم مکمل طور پر کلب فٹ بچوں کے علاج کیلئے وقف ہے۔ میریکل فیٹ نے مقامی طبی اداروں کے ساتھ ملکر کلب فٹ سے متاثرہ بچوں کا مفت علاج کرنے کی ذمہ داری لی ہے اور انکی کوشش ہے کہ کلب فٹ کے علاج کو مقامی ہیلتھ کیئر سسٹم میں شامل کرے۔ یہ ادارہ کلب فٹ کا علاج انتہائی موثر اور جدید طریقے یعنی پونسیٹی تکنیک سے کرتا ہے جس میں بچوں کے پیروں کو نرمی سے اصل حالت میں لانے کیلئے ہفتہ وار پلاسٹرز اور اچیلیس ٹینڈن ٹیناٹمی کا ایک سادہ طریقہ کار شامل ہے اس کے بعد پاؤں کیلئے خاص جوتوں کا استعمال بھی چار پانچ سال تک سوتے وقت کیا جاتا ہے تاکہ پاؤں دوبارہ مُڑنے کے امکانات کم کئے جا سکیں۔ بچپن میں بروقت علاج ہونے پر پاؤں کی پوزیشن عام طور پر چھ سے آٹھ ہفتوں کے اندر درست ہو جاتی ہے تاہم مکمل علاج چار پانچ سال پر محیط ہو تا ہے۔ انہوں نے بتایا کہ 2010ء میں قائم میریکل فیٹ نے اب تک 37 ممالک میں 433 کلینکس کھولے ہیں جن میں 95,000 سے زائد کلب فٹ بچوں کا علاج کرکے ان کی زندگیوں کو تبدیل کیا ہے۔ تقریب میں مہمان خصوصی کیپٹن (ر) خالد محمود، چیف ایگزیکٹیو ڈاکٹر سید محمد الیاس اور ڈائریکٹر ریہیب امیر زیب کلب فٹ بچوں اور انکے والدین میں گھل مل گئے، سیلفیاں بنائیں اور ان میں تحائف اور سویٹس بھی تقسیم کئے۔

صوبائی وزیر برائے پبلک ہیلتھ انجینئرنگ پختون یار خان نے کہا ہے کہ خیبر پختونخوا کی حکومت امن و امان کے قیام اور عوام کی فلاح و بہبود کیلئے کوشاں ہے، عوام کی بہتری،ترقی وخوشحالی اور امن و امان کی فضا کی بحالی کیلئے تمام تر ممکنہ اقدامات اٹھائیں گے، عوام کی فلاح و بہبود کو یقینی بنائیں گے اور اپنی قوم کو امن و ترقی کی طرف لے جانے کیلئے اپنا کردار ادا کریں گے۔ ان خیالات کا اظہار انہوں نے بنوں قوم کی طرف سے بلائے گئے امن جرگے سے خطاب کرتے ہوئے کیا۔ انہوں نے کہاکہ خدا کا لاکھ لاکھ شکر ہے کہ ہم نے قوم کی ترجمانی میں کوئی کسر نہیں چھوڑی ہے۔پختون یار خان نے کہا کہ امن و امان کا مسئلہ کسی ایک فرد کا نہیں بلکہ ہم سب کا مشترکہ مسئلہ ہے،عنقریب صوبائی سطح پر متعلقہ حکام بالا سے موجودہ صورت حال پر بات کی جائے گی اور موجودہ حالات سے آگاہ کیا جائے گا۔ انہوں نے کہاکہ امن و امان کی فضا برقرار رکھنے سے ہی ترقیاتی کاموں سے مستفید ہوا جا سکتا ہے اسلئے پہلا کام امن و امان کے قیام کیلئے تگ ودو کرنا ہے۔صوبائی وزیر نے کہا کہ ہمیں آج سے یہ عہد کرنا ہے کہ ہم سب مل کر اتحاد و اتفاق کی فضاء کو بحال اور قائم و دائم رکھیں گے۔

درال خوڑصوبے کا قیمتی اثاثہ، سالانہ 1ارب 30کروڑکی آمدن ہورہی ہے،نثاراحمدخان کی گفتگو
ہینڈ آؤٹ نمبر۔1823۔پشاور۔انور خان۔ساجد۔9 جون،2024ء
خیبرپختونخوامیں سال 2022اوررواں سال 2024کے دوران میں آنے والے تباہ کن سیلاب نے ضلع سوات میں توانائی کے منصوبے 36.6میگاواٹ درال خوڑپن بجلی گھر کوشدیدنقصان پہنچایاجس کے بعدمحکمہ توانائی وبرقیات اوراسکے ذیلی ادارے پختونخواانرجی ڈیویلپمنٹ آرگنائزیشن (پیڈو) نے ہنگامی بنیادوں پرمتاثرہ بجلی گھر کو بحال کرکے دوبارہ نیشنل گرڈ کے ساتھ منسلک کردیاتاہم مذکورہ بجلی گھر کو مستقبل میں سیلابی صورتحال سے محفوظ رکھنے کے لئے Protection Wallیعنی حفاظتی دیوارکی تعمیر کاکام بھی جلد مکمل کرلیا جائے گا۔اس سلسلے میں سیکرٹری توانائی وبرقیات نثاراحمدخان نے درال خوڑبجلی گھرسوات کا ہنگامی دورہ کیا۔اس موقع پر بریفنگ دیتے ہوئے بتایا گیا کہ پیڈوکے زیرنگرانی درال خوڑبجلی گھر2021میں چینی اورمقامی انجینئرزکی ٹیم نے کامیابی کے ساتھ مکمل کیا جس سے صوبے کو سالانہ 1ارب 30کروڑروپے خطیرآمدن ہورہی ہے تاہم سال 2022 اوربعدازاں اپریل 2024کوآنے والے تباہ کن سیلاب سے بجلی گھر کو شدید نقصان ہوا۔سیکرٹری توانائی نثاراحمدخان جو کہ قائمقام چیف ایگزیکٹو پیڈوکی حیثیت سے بھی خدمات سرانجام دے رہے ہیں نے درال خوڑپاورہاؤس کے سپل وے،سینڈٹریپ،پاورچینل،سوئچ یارڈ اوردیگرحصوں کاباریک بینی سے معائنہ کیااوربجلی گھر کوآئندہ سیلابی صورتحال سے محفوظ رکھنے کے لئے ضروری ہدایات بھی جاری کیں۔انہوں نے متعلقہ حکام کو بجلی گھر میں ٹیکنیکل سٹاف کی کمی دورکرنے کیلئے فوری طورپر بھرتی کے عمل کو پوراکرنے پر زوردیا۔ اس موقع پر خطاب کرتے ہوئے سیکرٹری توانائی نثاراحمد خان نے کہا کہ درال خوڑبجلی گھرصوبے کا ایک منافع بخش اثاثہ ہے جس سے صوبے کو سالانہ اربوں کی آمدن ہورہی ہے اس لئے آئندہ مون سون سے پہلے سیلاب سے بچاؤکے لئے حفاظتی دیوارکی تعمیر کا کام جلد مکمل کیاجائے کیونکہ تھوڑی سے بھی تاخیر بجلی گھر کی پیداوارکو متاثرکرسکتی ہے۔

خیبر پختونخوا کے وزیر زراعت میجر ریٹائرڈ سجاد بارکوال نے کہا ہے کہ وزیر اعلیٰ خیبر پختونخوا کی ہدایت کے مطابق چاول کی کاشت اور ان کی پیداوار بڑہانے کے لئے زمینداروں کو ہر قسم کی سہولت فراہم کی جائے گی۔ ان خیالات کااظہار انہوں نے ڈیرہ اسماعیل خان کے کسانوں کے ایک نمائندہ وفد سے بات چیت کرتے ہوئے کیا۔وفد نے جمال بلوچ اورطفیل بلوچ کے سربراہی میں پشاور میں ان سے ملاقات کی اور صوبائی وزیر زراعت سے سیڈ کی فراہمی،کسانوں کو درپیش مسائل اور فصلوں خاص کر چاول، گندم، مکئی اور زعفران وغیرہ کی پیداوار بڑھانے کے امور پر تبادلہ خیال کیا۔ صوبائی وزیر نے وفد کی معروضات انتہائی توجہ سے سنیں اور ترجیح بنیادوں پر انہیں حل کرنے کی یقین دہانی کرائی۔وزیر زراعت نے کہا کہ شعبہ زراعت انتہائی اہمیت کا حامل ہے اور صوبائی حکومت اس کی ترقی پر خاص توجہ دے رہی ہے۔ انہوں نے کہا کہ کسانوں اور زمینداروں کے مسائل سے وہ بخوبی آگاہ ہیں اور ان کے حل کے لئے تمام تر توانائیا اور وسائل بروئے کار لا رہے ہیں۔انہوں نے سیڈ فارم راکھ منگھن، بندکورائی اور رتہ کلاچی میں چاول اور زعفران اور دیگر فصلوں میں اضافے کے لئے بھر پور تعاون کا یقین دلایا اور کہا کہ زمیندروں کی فلاح کے حوالے سے کوئی سستی نہیں برتی جائے گی۔