اسلامی جمہوریہ ایران کے قونصل جنرل علی بنافشہ خواہ نے بدھ کے روز خیبر پختونخوا کے وزیر اطلاعات، ثقافت اور سیاحت بیرسٹر فیروز جمال شاہ کاکاخیل سے تفصیلی ملاقات کی۔ پشاور میں ہونے والی اس ملاقات میں ایران اور صوبہ خیبر پختونخوا کے عوام کے درمیان گہرے تاریخی، ثقافتی اور مذہبی رشتوں پر بات چیت کی گئی. اجلاس میں عوامی روابط اور ثقافتی تبادلوں کو فروغ دینے اور خیبر پختونخوا اور ایرانی شہروں کے مابین موجود سیاحت کے امکانات کو پرکھنے کی اہمیت پر زور دیا گیا جبکہ ملاقات میں ایران اور خیبرپختونخوا کے درمیان اقتصادی تعلقات کو مضبوط بنانے کے مقصد کے تحت تجارت کو بڑھانے کے طریقوں پر بھی بات چیت ہوئی۔ وزیر اطلاعات اور قونصل جنرل نے ثقافت، ورثے، خوراک اور روایات کو اجاگر کرنے کے لئے مشترکہ سرگرمیوں کی اہمیت پر زور دیا۔ میٹنگ کا مرکزی محور ایرانی شہروں اور خیبر پختونخوا کے درمیان سڑک، سمندری اور ہوائی راستوں کے استعمال کے ذریعے سفر کو آسان بنانے کے اقدامات کرنا تھا۔ اس میں خیبرپختونخوا کے سیاحوں اور تاجروں کو ایرانی شہروں تک رسائی دینے کے لئے اسلام آباد یا پشاور سے براہ راست ہوائی پروازوں پر بات چیت بھی شامل تھی۔ خیبرپختونخوا کے وزیر اطلاعات نے ایران اور خیبرپختونخوا میں مذہبی اور ماحولیاتی سیاحت کے منفرد مواقع پر زور دیتے ہوئے مشترکہ تقریبات اور تہوار منانے کی ضرورت کو اجاگر کیا۔ قونصل جنرل علی بنافشہ خواہ نے پرتپاک استقبال کے لیے وزیر اطلاعات کا شکریہ ادا کیا۔ انہوں نے ایرانی سیاحوں کو خیبرپختونخوا کی طرف راغب کرنے کے لئے اقدامات کی اہمیت پر بھی بات کی. صوبائی وزیر بیرسٹر فیروز جمال شاہ کاکاخیل نے سفارتی، ثقافتی اور اقتصادی تعلقات کو مضبوط بنانے کے مشترکہ عزم کا اعادہ کیا. ملاقات میں قونصل جنرل علی بنافشہ خواہ نے وزیراطلاعات خیبر پختونخوا کو ایران میں ہونے والی نمائش میں شرکت کی دعوت دی جو انہوں نے قبول کر لی. ملاقات میں دونوں نے مسئلہ فلسطین پر بھی تبادلہ خیال کیا۔ قونصل جنرل علی بنفشہ خواہ نے کہا کہ فلسطینی عوام کی آواز کو مضبوط کرنے کے لیے پاکستان کا کردار خصوصی اہمیت کا حامل ہے۔ انہوں نے کہا کہ پاکستان اس سلسلے میں مثالی کردار ادا کر رہا ہے۔ نگران وزیر اطلاعات خیبر پختونخوا نے کہا کہ مسئلہ فلسطین کیلئے ہر فورم پر آواز بلند کی جائے گی جبکہ منطقی انجام تک فلسطین کی حمایت جاری رکھی جائے گی۔

خیبر پختونخوا کے نگران وزیر برائے امور ضم اضلاع،فنی تعلیم اورصنعت وحرفت ڈاکٹر عامر عبد اللہ نے ہدایت کی ہے کہ ضم اضلاع میں نوجوان طبقے کو مختلف ہنر اور پیشہ ورانہ تربیت کی فراہمی کیلئے شروع کردہ خصوصی منصوبے ایکسیلریٹڈ سکل ڈویلپمنٹ پروگرام کے تحت مختلف ٹریڈز میں تربیت دینے کیلئے شعبہ فنی تعلیم کے اداروں کے دستیاب وسائل سے استفادہ اٹھایا جائے اور اس سلسلے میں ٹیکنیکل ایجوکیشن اینڈ ووکیشنل ٹریننگ اتھارٹی سے باقاعدہ مفاہمت عمل میں لائی جائے۔ نگران وزیر نے مزکورہ خصوصی پروگرام میں اورکزئی، باجوڑ اور وزیرستان کے علاقوں کیلئے زیتون کی پیوندکاری اور اس سے جڑے دیگر ضروری تربیتی کورسز بھی شامل کرنے کی ہدایت کی جبکہ اس منصوبے کے متعلقہ حکام سے اس پروگرام کے تحت فارغ التحصیل اور باروزگار ہنرمندوں کا مکمل ڈیٹا بھی طلب کیا۔ یہ ہدایت انہوں نے بدھ کے روز ضم اضلاع کیلئے محکمہ صنعت وحرفت کے زیر انتظام شروع کردہ خصوصی منصوبے ایکسیلریٹڈ سکلڈ ڈویلپمنٹ پروگرام کے حوالے سے انہیں دی جانے والی بریفنگ کے دوران دیں۔ پراجیکٹ ڈائریکٹر خالد عثمان وزیر اور کوآرڈینیٹر طفیل نے اس اہم منصوبے کے اغراض ومقاصد،ابتک اس کے ذریعے کامیاب ہونے والے طلبہ وطالبات کی تفصیلات اور فراہم کئے جانے والے تربیتی کورسز کے حوالے سے تفصیلات فراہم کیں۔ نگران وزیر کو بتایا گیا کہ پراجیکٹ کے تحت مارکیٹ کی ضروریات کے مطابق ہنرمندانہ تربیت کے مختلف شعبوں جیسے مائننگ، ٹیکسٹائل،مینوپیکچرنگ وتعمیرات،ٹورزم،لائیوسٹاک وزراعت،انجینئرگ،آئی ٹی و ٹیلی کام کے بنیادی شعبوں سے جڑے ضروری تربیتی کورسز فراہم کئے جارہے ہیں۔ ان کو بتایا گیا کہ مذکورہ پروگرام کے پہلے مرحلے میں ضم اضلاع کے 302 مرد وخواتین ہنرمندوں کی تربیت مکمل ہوچکی ہے جبکہ دوسرے تربیتی مرحلے میں 445 افراد کی تربیت جاری ہے۔اس موقع پر نگران وزیر نے ہدایت کی کہ پروگرام کے تحت جیمز اینڈ جیمولوجیکل کورس کیلئے محکمہ فنی تعلیم کا حیات آباد میں واقع انسٹی ٹیوٹ کواستعمال میں لانے کیلئے ٹیوٹا کیساتھ ایم او یو سائن کیا جائے جبکہ ایسے ٹریڈز جن کے لئے فنی تعلیم کے مقامی کالجوں میں درکار سہولتیں اور انفراسٹرکچر پہلے سے موجود ہیں کو استفادہ میں لایا جائے۔نگران وزیر نے ان نجی اداروں جن سے پروگرام کے تحت تربیت کی خدمات حاصل کی جارہی ہیں کی فیس کے نرخ کی تفصیلات بھی انہیں فراہم کرنے کی ہدایت کی۔انھوں نے کہا کہ فارغ التحصیل ہنرمندوں کا روزگار شرع کرنے کیلئے ان کی مالی ضروریات کیلئے مختلف مائیکرو فنانس قرضہ سکیموں سے استفادہ اٹھانے کیلئے ان کا ڈیٹا سمال انڈسٹریز ڈویلپمنٹ بورڈ کے ذریعے اخوت فاؤنڈیشن اور بینک آف خیبر کو فراہم کیا جائے تاکہ وہ تربیت حاصل کرنے کے بعد بلا کسی تعطل باعزت روزگار شروع کرسکیں۔

نگران وزیر اعلیٰ خیبر پختونخوا جسٹس (ر) سید ارشد حسین شاہ نے ترقیاتی منصوبوں میں کام کرنے والے افسران کو پر اعتماد بنانے، ترقیاتی منصوبوں کو بروقت مکمل کرنے اور شفافیت یقینی بنانے کے سلسلے میں ایک اہم اقدام کے طور پر نیب کو پراجیکٹس سائیکل میں شامل کرنے کا فیصلہ کیا ہے اور اس مقصد کے لئے نیب کے اعلیٰ حکام کو باضابطہ مراسلہ ارسال کرنے کی ہدایت کی ہے۔ یہ فیصلہ انہوں نے منگل کے روز وزیراعلیٰ ہاو¿س پشاور میں خیبر پختونخوا اربن موبیلیٹی اتھارٹی کے بورڈ آف ڈائریکٹرز کے 15ویں اجلاس کی صدارت کرتے ہوئے کیا ۔ نگران صوبائی وزیر برائے سائنس ٹیکنالوجی اینڈ انفارمیشن ٹیکنالوجی ڈاکٹر نجیب اللہ کے علاوہ متعلقہ محکموں کے انتظامی سیکرٹریز، ڈی آئی جی ٹریفک پولیس، ایم ڈی اربن موبیلیٹی اتھارٹی، چیف ایگزیکٹو آفیسر ٹرانس پشاور اور دیگر بورڈ اراکین نے اجلاس میں شرکت کی۔وزیراعلیٰ نے پراجیکٹس سائیکل میں نیب کو نمائندگی دینے کے فیصلے کی اہمیت اجاگر کرتے ہوئے کہا کہ اس عمل سے ترقیاتی کاموں میں شفافیت یقینی ہوگی اور کام کرنے والے افسران کو اعتماد بھی ملے گا۔وزیر اعلیٰ کا کہنا تھا کہ کام کرنے والے افسران کو پورا اعتماد دیا جائے گا تاکہ وہ عوامی فلاح و بہبود کے منصوبوں پر عملدرآمد میں ہچکچاہٹ یا ڈر محسوس نہ کریں۔ وزیر اعلیٰ نے ہدایت کی کہ ترقیاتی منصوبوں سے متعلق تمام امور کو ابتدا ہی سے صاف اور شفاف رکھا جائے تاکہ مستقبل میں احتساب کے ڈر سے ترقیاتی کاموں پر عملدرآمد تاخیر کا شکار نہ ہو،اس سارے عمل سے ترقیاتی منصوبوں کی بروقت تکمیل یقینی ہوگی اور ان کے ثمرات بلاتاخیر عوام تک پہنچانے میں مدد ملے گی۔اجلاس میں رواں مالی سال کے لیے اتھارٹی کے بجٹ تخمینہ جات، بی آر ٹی کے کمرشل پلازوں کی تعمیر پر پیش رفت اور دیگر اہم امور کا تفصیلی جائزہ لیا گیا اور اہم فیصلے کیے گئے۔اجلاس میں بورڈ کے غیر سرکاری ممبران کے نام تجویز کرنے کے لئے مجوزہ نامینیشن کمیٹی کی منظوری دی گئی۔ مذکورہ کمیٹی بورڈز ممبرشپ میں ضروری تبدیلیاں لانے کیلئے سفارشات پیش کرے گی اور اس مقصد کے لئے متعلقہ قانون میں ترامیم بھی تجویز کرے گی۔ اجلاس میں رواں مالی سال کے لئے خیبر پختونخوا اربن موبیلیٹی اتھارٹی کے بجٹ کی مشروط منظوری دی گئی۔

خیبر پختونخوا کے نگران وزیر اطلاعات،ثقافت و سیاحت بیرسٹر فیروز جمال شاہ کاکاخیل نے کہا ہے کہ سوشل میڈیا پر منفی رویوں کا پرچار، ثقافتی اقدار پر یلغار اور اداروں کی کردار کشی نے معاشرے کو بڑا نقصان پہنچایا ہے، سوشل میڈیا کے غیر ذمہ دارانہ کردار اور سوشل میڈیا پر پروان چڑھنے والے منفی رویوں کی نفی کرنا ہوگی، ہماری تہذیب، اقدار اور معاشرے کے مثبت پہلووں کو اجاگر کرنے کی ضرورت ہے، ایسے میں نوجوانوں کا کردار نہایت اہم ہے، نوجوانوں کو ایسے منفی رویوں کا راستہ روکنا ہوگا اور دنیا کو ہماری معاشرتی اقدار اور روایات سے روشناس کرانا ہوگا، گزشتہ کئی سالوں سے سوشل میڈیا کے غلط استعمال سے نفرت کی فضاء بنائی گئی ہے، ہماری اقدار، اسلوب اور اداروں کے امیج پر حملے ہورہے ہیں، نفرت پھیلانے والوں اور ہماری تہذیب اور روایات پر یلغار کرنے والوں کو سخت سزا دینی ہے، کوہستان واقعہ میں سوشل میڈیا کا جو منفی کردار سامنے آیا ہے، تصاویر بنا کر وائرل کی گئیں جس سے اتنا بڑا واقعہ رونما ہوا، اس پر سخت کارروائی ہوگی، ایسے لوگوں کو کیفرکردار تک پہنچائیں گے، مجرموں کو سخت سزا دی جائے گی. ان خیالات کا اظہار انہوں نے نشتر ہال پشاور میں منعقدہ آرٹ اینڈ ڈیزائن نمائش کے افتتاح کے موقع پر خطاب کرتے ہوئے کیا۔ایک روزہ نمائش کا اہتمام خیبرپختونخوا کلچر و ٹوورزم اتھارٹی اور پشاور یونیورسٹی کے آرٹ اینڈ ڈیزائن شعبے نے مشترکہ طور پر کیا تھا. نمائش میں صوبائی نگران وزیر خزانہ احمد رسول بنگش نے بھی شرکت کی جبکہ نمائش میں طالبات کے ساتھ ساتھ شہریوں نے بھی بڑی تعداد میں شرکت کی اور یونیورسٹی طالبات کی جانب سے بنائے گئے آرٹ اور ڈیزائن کا مشاہدہ کیا. خطاب میں نگران وزیر اطلاعات و تعلقات عامہ خیبرپختونخوا بیرسٹر فیروز جمال شاہ کاکاخیل نے کہا کہ نگران وزیر برائے ضم اضلاع عامر عبداللہ ضم اضلاع کی ترقی خصوصاً نوجوانوں کے لئے بھرپور اقدامات کررہے ہیں اور فنڈ کی بلا تعطل فراہمی یقینی بنانے کے لئے نگران صوبائی حکومت وفاقی نگران حکومت سے بھی معاملات طے کررہی ہے. انہوں نے کہا کہ نوجوانوں کو مواقع فراہم کرنا اولین ترجیح ہے، اور ضم اضلاع کے نوجوانوں کے لئے خصوصی اقدامات کئے جا رہے ہیں، نشتر ہال کو فعال رکھنا اس کی ایک کڑی ہے تاکہ نوجوان اس پلیٹ فارم کا استعمال کرتے ہوئے اپنی صلاحیتیں دنیا کو دکھا سکیں. کلچر و ٹوورزم اتھارٹی اور پشاور یونیورسٹی کی طالبات نے بہترین آرٹ اینڈ ڈیزائن نمائش منعقد کی جس کے لئے وہ داد کی مستحق ہیں۔

فوڈ سیفٹی اینڈ حلال فوڈ اتھارٹی کے ڈپٹی ڈائریکٹر کی خصوصی ہدایات پر ٹیم کوہاٹ نے مختلف بازاروں میں خورا کی اشیاء کی انسپیکشن کی۔صفائی کے ناقص صورتحال پر دو ہوٹلوں اور گوشت شاپس پر جرمانہ عائد کیا گیاجبکہ مین سٹی میں مختلف فوڈ پوائنٹس کی چیکنگ کی گئی۔صفائی کا خیال نہ رکھنے پر کئی فوڈ پوائنٹس کو وارننگ دی گئی جبکہ ایک فوڈ پوائنٹ کو جرمانہ کیا گیا۔کوہاٹ یونیورسٹی آف سائنس اینڈ ٹیکنالوجی میں مختلف کینٹینوں کی انسپیکشن کی گئی۔صفائی کا خیال نہ رکھنے پر ایک کنٹین کو سیل کر کے جرمانہ عائد کیا گیا۔کاروائیوں کا مقصد عوام کو صاف اور محفوظ خوراک کی فراہمی یقینی بنانا ہے۔اس کے علاوہ عوامی شکایات بھی نمٹا دی گئیں۔