وزیراعلیٰ خیبرپختونخوا کے مشیر برائے سیاحت و ثقافت اور آثارقدیمہ زاہد چن زیب نے محکمہ سیاحت و آثارقدیمہ کے حکام کے ہمراہ گورنر ہاؤس اور سول سیکرٹریٹ پشاور کے عقب میں واقع پشاور عجائب گھر کا تفصیلی دورہ کیا اور اس کے مختلف حصے دیکھے۔ انہوں نے اس بات پر اطمینان کا اظہار کیا کہ عجائب گھر میں اس خطے سے تعلق رکھنے والے گندھارا تہذیب سے لیکر دوسری و تیسری صدی عیسوی کے دور دیو مالائی داستانوں کے حامل نایاب آثار و نوادرات محفوظ ہیں۔ مشیر سیاحت کا کہنا تھا کہ زندہ قومیں اسی طرح اپنی تاریخ کو محفوظ بناتی اور ساتھ ہی اس سے سبق سیکھتی ہیں اور ایسی قومیں اپنی جہد مسلسل کی بدولت بہت سرعت کے ساتھ پسماندگی کی دلدل سے نکل کر ترقی کے بام عروج کو پہنچ جاتی ہیں۔ اس موقع پر ڈائریکٹر آرکیالوجی ڈاکٹر عبدالصمد نے انہیں عجائب گھر میں دور فرنگ کے وکٹوریہ ڈانسنگ کلب کا میدان رقص دکھایا جو ملکہ وکٹوریہ کی یاد میں پوری شان و شوکت کے ساتھ 1907ء میں ایک سال کے قلیل عرصے میں تعمیر ہوا۔ بعدازاں ایک انگریز باشندے بوب رائٹسن نے اسے لیز پر حاصل کرکے ڈانسنگ ہال اور تفریحی کلب بنا دیا تاہم 1974ء میں اسے عجائب گھر بنا دیا گیا۔ ڈاکٹر عبدالصمد نے مشیر سیاحت کو بتایا کہ عجائب گھر ہفتہ کے ساتوں روز سیاحوں کیلئے کھلا رہتا ہے اور سیاحوں کے رش کے سبب آمدن کا بڑا ذریعہ بھی ہے۔ پورے برصغیر میں اس عجائب گھر کی انفرادیت یہ ہے کہ خیبر پختونخوا میں موجود 90 فیصد گندھارا تہذیب کے آثار اور مہاتما بدھ کے جنم دن سے لیکر وفات تک پوری داستان حیات یہاں محفوظ ہے جو بدھ مذہب میں پیغمبر کا درجہ رکھتے ہیں۔ مجموعی طور پر عجائب گھر میں بین الاقوامی اہمیت کے 14 ہزار نوادرات رکھے گئے ہیں جن میں بدھ نوادرات کے علاوہ قرآن مجید کے ابتدائی قلمی نسخے، مغل تصاویر و سکے، کشان، ہنز و دیگر حملہ اوروں کے آثار اور قدیم قبائلی اسلحہ، زیورات، مردانہ و زنانہ ملبوسات اور دستکاریاں قابل ذکر ہیں۔ انہوں نے بتایا کہ عجائب گھر کی نوادرات کو سوئٹزرلینڈ سمیت مختلف عالمی نمائشوں میں پیش کیا گیا تو زبردست بین الاقوامی پذیرائی کے سبب قیمتی ایوارڈ بھی حاصل کئے۔ مشیر سیاحت نے اس بات کو سراہا کہ انفارمیشن ٹیکنالوجی کے ذریعے عجائب گھر کی الماریوں میں رکھے گئے نوادرات اور مجسموں کے ساتھ بار کوڈ بھی لگائے گئے ہیں اور کوئی بھی ملکی و غیر ملکی سیاح اپنے موبائل ایپلیکیشن کے ذریعے اپنی زبان میں انکی پوری تفصیلات و تاریخ جان سکتا ہے۔ تاہم زاہد چن زیب نے ہدایت کی کہ مختلف گیلریوں اور الماریوں میں رکھے نوادرات اور مجسموں کی شوکیسنگ بھی جدید ٹیکنالوجی کے استعمال سے جاذب نظر بنائی جائے تاکہ سیاحوں کی ان میں دلچسپی مسلسل برقرار رہے۔ اسی طرح ورچول ٹورازم کے ذریعے ان نوادرات کی عالمی سطح پر تشہیر پر بھی توجہ دی جائے۔ مشیر سیاحت نے عجائب گھر کو مغل طرز تعمیر کا بہترین نمونہ قرار دیا اور اسکی دیکھ بھال یقینی بنانے کی ہدایت بھی کی۔

خیبر پختونخوا کے وزیر مواصلات و تعمیرات شکیل احمد نے کہا ہے کہ عوام کو آمدورفت کی سہولیات دینے اور تجارت و سیاحت کی سرگرمیوں کے فروغ کے لئے سڑکوں اور موٹرویز کی تعمیر ضروری ہے جس کے لئے صوبائی حکومت بھر پور اقدامات اٹھا رہی ہے اور سوات موٹروے فیز۔ II کا منصوبہ اسی سلسلے کی کڑی ہے جسے علاقے کے عوام کی امنگوں کے عین مطابق مکمل کیا جا رہا ہے۔ان خیا لات کا اظہار انہوں نے سوات موٹر وے فیز۔II کے حوالے سے پشاور میں منعقدہ ایک اجلاس کی صدارت کرتے ہوئے کیا۔اس موقع پر صوبائی وزیر جنگلات و ماحولیات فضل حکیم خان،وزیر اعلیٰ کے معاون خصوصی برائے ہاؤسنگ ڈاکٹر امجد علی،سوات سے تعلق رکھنے والے اراکین قومی اور صوبائی اسمبلی سمیت سوات موٹر وے فیز۔II کے پراجیکٹ ڈائریکٹر برکت علی، منیجنگ ڈائریکٹر خیبر پختونخوا ہائی ویز اتھارٹی اسد علی اور دیگر افسران بھی موجود تھے۔ اجلاس میں سوات موٹروے فیز۔II کے منصوبے کے موجودہ تعمیراتی ڈیزائن اور منصوبے کو عوامی توقعات کے مطابق مفید بنانے پر تفصیلی غور و خوض کیا گیا۔ اس موقع پر شرکاء اجلاس کو بریفنگ میں بتایا گیا کہ 36.50بلین روپے کی لاگت پر مشتمل سوات موٹر وے فیز۔IIتقریبا 80 کلومیٹر طویل ہوگی اور 9پلوں کی تعمیر کے ساتھ 7انٹرچینج بھی منصوبے میں شامل ہیں جبکہ درکار اراضی کے حصول کے لیے 21.5 بلین روپے مختص کئے گئے ہیں۔صوبائی وزیر مواصلات نے کہا ہے کہ سوات موٹروے فیز۔I کی کامیابی کے بعد صوبائی حکومت اب فیز۔II کی تعمیر شروع کررہی ہے۔انہوں نے کہا ہے کہ تعمیراتی منصوبے عوامی فلاح و بہبود کے لئے ہوتے ہیں اور سوات موٹر وے فیز۔II میں جہاں کہیں بھی مقامی لوگوں کومسائل کا سامنا ہے تو صوبائی حکومت پوری سنجیدگی کے ساتھ انہیں حل کرنے پر توجہ مرکو ز کئے ہوئے ہے۔صوبائی وزیر نے اس ضمن میں حکومتی سطح پرایک کمیٹی بھی تشکیل دی جو مقامی لوگوں کے منصوبے کے حوالے سے تحفظات دور کرنے، ڈیزائن میں مزید بہتری پیدا کرنے اور اسے عوامی ضرورتوں سے ہم آہنگ بنانے کے لئے اپنی سفارشات مرتب کرکے سوات موٹر وے فیز۔II کے حوالے سے منعقدہونے والے ا ٓئندہ اجلاس میں پیش کرے گی۔

خیبر پختون خوا کے وزیر موصلات و تعمیرات شکیل احمد نے کہا ہے کہ محکمے کی کارکردگی کو مزید بہتر بنانے کے لیے کچھ ضروری اور اہم اصلاحات کر رہے ہیں جن سے عوامی منصوبوں کی بروقت تکمیل ہوگی اور ان کامعیار بہتر ہوگا جبکہ عوامی سکیموں کے لیے ٹنڈرز کے حصول کے لیے خاص شرائط لاگو ہوں گی جن کی بدولت یہ منصوبے شفاف انداز میں تکمیل تک پہنچیں گے۔ ان خیالات کا اظہار انہوں نے جمعرات کے روز خیبر پختونخوا کنٹریکٹرایسوسی ایشن کے اجلاس کی صدارت کرتے ہوئے کیا۔ اجلاس میں کنٹریکٹرز ایسوسی ایشن نے اپنے مسائل کے حوالے سے صوبائی وزیر کو اگاہ کیا اور بتایا کہ سکیموں کی تکمیل کے لیے فنڈز کی کمی کا مسئلہ درپیش ہے۔صوبائی وزیر نے اجلاس سے خطاب کرتے ہوئے کہا کہ عوامی منصوبوں کی بروقت تکمیل اور اعلیٰ معیار پر ہرگز سمجھوتا نہیں کیا جائے گا۔ انہوں نے کہا ہے کہ وزیراعلیٰ خیبر پختونخوا سردار علی امین گنڈاپور کی واضح ہدایت ہے کہ اب عوامی منصوبوں کی تکمیل ایک یا دو سال میں ہوگی کیونکہ پرانے منصوبے جو سالوں سے نامکمل ہیں اب ان کی کاسٹ تین گنا بڑھ گئی ہے انہوں نے کہا کہ خیبر پختونخواکے کنٹریکٹر کو درپیش مسائل سے وہ بخوبی آگاہ ہیں اور ان کے مسائل زیادہ تر فنڈزسے متعلق ہیں اور فنڈز کی منصفانہ تقسیم کے حوالے سے مناسب اقدامات اٹھائے جائیں گے۔ کنٹریکٹر ایسوسی ایشن نے صوبائی وزیرکی یقین دہانی اور ان کے مسائل میں دلچسپی لینے پر ان کا شکریہ ادا کیا اور مکمل تعاون کا یقین دلایا۔اجلاس میں سیکر ٹری مواصلات و تعمیرات ڈاکٹر اسد علی اور دیگر افسران بھی موجود تھے۔

خیبر پختونخوا کے زیر برائے اعلیٰ تعلیم میناخان آفریدی نے۔کہا ہے کہ حکومت صوبائی ہائیر ایجوکیشن کمیشن(ایچ ای سی) کے قیام کے لئے کوشاں ہے اور اس سلسلے میں مختلف قوائد و ضوابط طے کئے جا رہے ہیں تاکہ صوبے کی یونیورسٹیوں کے تعلیمی، تحقیقی اور مالی و انتظامی امور سمیت دیگر تمام معاملات کو خوش اسلوبی کے ساتھ چلایا جا سکے اعلیٰ تعلیمی اداروں میں معیاری تعلیم کی فراہمی صوبے کی ذمہ داری ہے اور اس حوالے سے یونیورسٹیوں کو درپیش مالی مشکلات کو حل کرنے میں معاونت سمیت دیگر مسائل کے خاتمے کے لئے حکومتی سطح پرہر ممکن اقدمات اٹھائے جارہے ہیں۔ ان خیالات کا اظہار انہوں نے ہزارہ یونیورسٹی میں بریفنگ کی صدارت کرتے ہوئے کیا۔ صوبائی وزیر نے ہزارہ یونیورسٹی کا تفصیلی دورہ بھی کیا انہوں نے یونیورسٹی کے وائس چانسلر پروفیسر ڈاکٹر محسن نواز،مختلف فیکلٹیز کے ڈینز اور پروفیسرز سے ملاقات کی صوبائی وزیر کو یونیورسٹی میں جاری تعلیمی و تعمیراتی منصوبوں کے بارے میں تفصیلی بریفنگ دی گئی صوبائی وزیر نے ہزارہ یونیورسٹی میں زیر تعلیم طلباء و طالبات کی سکالر شپ کے مسائل کو صوبائی اور وفاقی حکومتوں کے ساتھ اٹھانے کا عندیہ دیا اور کہا کہ طلبہ کو بہترین تعلیمی سہولیات کی فراہمی ہم سب کی مشترکہ ذمہ داری ہے جس کے لئے تمام تر کوششیں بروئے کار لائی جارہی ہیں صوبائی وزیر کا قومی سطح پر معاشی اور معاشتری ترقی میں کردار کے حوالے سے کہنا تھا کہ یونیورسٹی کے ORICاور QAC دفاتر معیاری تعلیم، تحقیق اور یونیورسٹی کے صنعتی یونٹس سے روابط سمیت دیگر کاروباری اداروں سے وابستگی کے لئے کلیدی اہمیت کے حامل ہیں اور اس کے لئے ضروری ہے کہ مذکورہ دونوں دفاتر اپنا مثبت اور بھرپور کردار ادا کریں اور دونوں کی مضبوطی سے معیاری تعلیم اور ریسرچ کاکام ممکن ہے انہوں نے یونیورسٹی کے مالیاتی ڈسپلن کی تعریف کی اور یونیورسٹی کی مالی حالت پر اطمینان کا اظہار کیا انہوں نے یونیورسٹی طلباء کی تعلیمی مشکلات کے حل اور انہیں دیگر سہولیات فراہم کرنے پر وائس چانسلر کی کاوشوں کو سراہتے ہوئے کہا کہ وہ طلباء کی مدد کرنے اور ان کی رہنمائی میں ہمیشہ پیش پیش رہتے ہیں جو قابل تحسین ہے۔انہوں نے وائس چانسلر کو طلباء کی فلاح و بہبود کے لئے مزید اقدامات کرنے کے بارے میں متعدد تجاویزبھی دیں اس موقع پر مانسہرہ کے ایم پی اے اکرام غازی اور سیاسی شخصیت کمال سلیم سواتی، یونیورسٹی کے ڈینز، پروفیسرز، فیکلٹی ممبران اور انتظامی افسران بھی موجود تھے صوبائی وزیر نے دورہ کے موقع پر یونیورسٹی میں پودا بھی لگایا۔

وزیر اعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا ہے کہ لندن پلان کو تقویت دینے کے لئے آصف زرداری نے دبئی میں ڈیرے ڈالے ہیں۔ ملک ریاض کو بانی پی ٹی آئی کے خلاف گواہ بنانے کے لئے سرتوڑ کوششیں جاری ہیں۔ انہوں نے کہا کہ صدر زرداری ملک ریاض کو منانے دبئی پہنچ گئے ہیں۔ ملک ریاض کے ڈٹ جانے پر بحریہ ٹاون کے دفاتر پر چھاپے مارے جارہے ہیں اور بحریہ ٹاون کے عملے کو اغوا کیا گیا ہے۔ جعلی فارم 47 حکومت کے اوسان خطا ہیں۔ حواس باختہ ٹولہ عمران خان کے خلاف ہر حد تک جانے کو تیار ہے۔ اسکی تمام تدابیر رائیگاں جائیں گی۔ اعلیٰ عدالتوں میں سازشی ٹولے کے جھوٹے کیسوں سے ہوا نکل رہی ہے۔ سازشی ٹولے کو فکر ہے کہ کہیں عمران خان جیل سے باہر نہ نکال آئیں۔ عمران خان کی رہائی سے سازشی مافیا کی جان نکل رہی ہے۔ راج کماری کابینہ نے بھی خان کے خلاف ایکشن لینے کی منظوری دی جو آرٹیکل 10کی خلاف ورزی ہے۔