نگران وزیر اطلاعات و تعلقات عامہ، ثقافت و سیاحت خیبرپختونخوا بیرسٹر فیروز جمال شاہ کاکاخیل نے لاہور دورے کے موقع پر نگران وزیر اعلیٰ پنجاب محسن نقوی و پنجاب صوبائی نگران کابینہ اراکین کے ہمراہ حضرت ابو الحسن علی بن عثمان المعروف داتا علی ہجویری رحمتہ اللہ علیہ کے مزار پر حاضری دی، پھولوں کی چادر چڑھائی اور فاتحہ خوانی کی۔اس موقع پر سال نو کی مناسبت سے خصوصی دعا کا اہتمام کیا گیا تھا۔تقریب کا مقصد سال 2024 کی آمد کو سادگی سے مناتے ہوئے سال کا آغاز پرخلوص دعاؤں کے ساتھ کرنا تھا۔تقریب میں ملک میں معاشی استحکام، تنگدستی سے نجات، پائیدار امن، باہمی اتحاد و اتفاق کے لئے خصوصی دعائیں کی گئیں۔اس موقع پر شہداء اور ان کے خاندانوں کی لازوال قربانیوں کو یاد کرتے ہوئے انھیں خراج عقیدت پیش کیا گیا اور رب العالمین کے حضور شہداء کے درجات اور مسلح افواج، پولیس و دیگر سیکورٹی اداروں کے عزم و حوصلے کی بلندی کے لئے بھی دعائیں کی گئیں. دعائیہ تقریب میں مظلوم فلسطینیوں اور کشمیریوں کی آزادی اور جدوجہد میں کامیابی کے لئے بھی خصوصی دعائیں کی گئیں۔ اپنے خیالات کا اظہار کرتے ہوئے نگران وزیر اطلاعات و تعلقات عامہ خیبرپختونخوا بیرسٹر فیروز جمال شاہ کاکاخیل کا کہنا تھا کہ حضرت داتا گنج بخشؒ کی شخصیت اور افکارواحوال کو تاریخ، تصوّف میں نہایت معتبرمقام حاصل ہے۔انہوں نے کہا کہ درگاہ میں دعائیہ تقریب کا اہتمام کرتے ہوئے سال نو کا استقبال پنجاب نگران حکومت کا نہایت عمدہ قدم ہے جس میں شرکت کرکے انہیں دلی سکون ملا اور رب العالمین کے حضور ملک کی ترقی کے لئے دعا کرنے کا اہم موقع نصیب ہو۔انہوں نے کہا کہ اسلامی اقدار کے تحت نئے سال کا آغاز خصوصی دعاؤں کے ساتھ کیا گیا ہے۔اس سے پہلے درگاہ آمد پر نگران وزیر اعلیٰ پنجاب محسن نقوی نے خیبر پختونخوا کے نگران وزیر اطلاعات و تعلقات عامہ بیرسٹر فیروز جمال شاہ کاکاخیل کو خصوصی چادر پیش کی اور دعائیہ تقریب میں شرکت پر ان کا شکریہ ادا کیا۔

ہزارہ ریجن میں خیبر میڈیکل یونیورسٹی کے کیمپس کا قیام عمل میں لایا گیا ہے کیمپس میں اگلے مہینے سے باقاعدہ کلاسز کا اجراءکیا جائے گا۔ نگرا ں وزیراعلی خیبر پختونخوا جسٹس( ریٹائرڈ) سید ارشد حسین شاہ نے گزشتہ روز اپنے دورہ ایبٹ آباد کے دوران نو قائم شدہ کیمپس کا باضابطہ افتتاح کیا۔ اس موقع پر کیمپس میں شروع کی جانے والی تعلیمی سرگرمیوں کے بارے میں وزیراعلیٰ کو بریفنگ دیتے ہوئے بتایا گیا کہ کیمپس میں میڈیکل ایجوکیشن کے مختلف شعبوں میں طلبہ کو تعلیم و تربیت فراہم کی جائے گی جن میں الائیڈ ہیلتھ سائنسز، نرسنگ اور فارمیسی وغیرہ میں انڈر گریجویٹس ، پوسٹ گریجویٹس پروگرام شامل ہیں۔ علاوہ ازیں کیمپس میں میڈیکل گریجویٹس کو پبلک ہیلتھ ، ہیلتھ ریسرچ ،ایپڈ یمیالوجی اور بیسک میڈیکل سائنسز میں پوسٹ گریجویٹس ڈگری پروگرامز بھی کروائے جائیں گے ۔ مزید بتایا گیا کہ کیمپس میڈیکل کے مختلف شعبوں میں پوسٹ گریجویٹس ڈگر ی کیلئے پورے ہزارہ ریجن کے طلبہ کی ضروریات کو پورا کرے گا اور طلبہ کو اپنے ہی علاقے میں یہ تعلیمی سہولیات دستیاب ہوں گی ۔
خیبرمیڈیکل یونیورسٹی انسٹیٹوٹ آف ہیلتھ سائنسز ہزارہ کے قیام کو اور علاقے میں میڈیکل کی تعلیم کے فروغ کیلئے اہم اقدام قرار دیتے ہوئے وزیراعلیٰ نے کہاکہ اس کیمپس کے قیام سے علاقے کے میڈیکل گریجویٹس کو یہ تربیتی سہولت اُن کے گھر کی دہلیز پر دستیاب ہو ںگی اور اُنہیں اس مقصد کیلئے دیگر علاقوں کا سفر نہیں کرنا پڑے گا۔ میڈیکل کے شعبے میں تربیت یافتہ افرادی قوت کی تیاری میں خیبر میڈیکل یونیورسٹی کے کردار کو سراہتے ہوئے وزیراعلیٰ نے اُمید ظاہر کی کہ یہ یونیورسٹی اپنی سرگرمیاں مزید بہتر انداز میں جاری رکھے گی ۔ وائس چانسلر خیبر میڈیکل یونیورسٹی پروفیسر ڈاکٹر ضیاءالحق ، کمشنر ہزارہ ڈویژن ظہیر السلام کے علاوہ ضلعی انتظامیہ اور خیبر میڈیکل میڈیکل یونیورسٹی کے دیگر اعلیٰ حکام بھی اس موقع پر موجود تھے ۔

نگران وزیر اعلیٰ خیبر پختونخوا جسٹس( ر) سید ارشد حسین شاہ نے جمعرات کے روز نارتھ ویسٹ سکول آف میڈیسن پشاور میں گریجویشن تقریب میں بطور مہمان خصوصی شرکت کی۔ انہوں نے سیشن 2022-2017 کے تحت ایم بی بی ایس مکمل کرنے والے 148 گریجویٹس میں اسناد تقسیم کیں اور امتحانات میں نمایاں پوزیشن حاصل کرنے والے گریجویٹس کو گولڈ میڈلز پہنائے۔ تقریب سے خطاب کرتے ہوئے وزیر اعلیٰ نے فارغ التحصیل ہونے والے طلبہ، انکے والدین اور اساتذہ کو مبارکباد پیش کی اور کہا کہ آج ایک طرف ان ہونہار طلبہ کا تعلیمی مرحلہ اختتام پذیر ہو رہا ہے تو دوسری طرف پیشہ ورانہ سفر کا آغاز ہو رہا ہے۔ نگران وزیر اعلیٰ نے کہا کہ بلاشبہ ان تمام گریجویٹس نے یہاں تک پہنچنے کے لیے بڑی محنت کی ہے، اب وہ ایک ڈاکٹر کی حیثیت سے پیشہ ورانہ زندگی میں قدم رکھنے جا رہے ہیں۔ وزیر اعلیٰ نے نئے ڈاکٹرز سے کہا کہ وہ عوام کی خدمت  کو اپنا شعار بنائیں، اور خلوص نیت سے خلق خدا کی خدمت کریں، ہمارے لوگوں کی صحت اور بھلائی ان کے ہاتھوں میں ہے۔ وزیر اعلیٰ نے امید ظاہر کی کہ فارغ التحصیل ہونے والے طلباءو طالبات عملی اور پیشہ ورانہ زندگی میں اس اعلیٰ معیار کو آگے بڑھانے میں شامل ہونگے جو نارتھ ویسٹ سکول نے قائم کیا ہے۔ اعلیٰ اخلاقی اقدار اور کردار کو عملی زندگی میں کامیابی کیلئے انتہائی اہم قرار دیتے ہوئے انہوں نے گریجویٹس پر زور دیا کہ وہ عملی زندگی کے آغاز ہی سے پیشہ ورانہ اخلاقیات اور اعلیٰ کردار کے اصولوں پر سختی سے کاربند رہیں۔ موجودہ صوبائی حکومت کی شعبہ صحت سے متعلق ترجیحات کا ذکر کرتے ہوئے سید ارشد حسین شاہ نے کہا کہ صوبے میں ہیلتھ کیئر پریکٹیشنرز کی تعداد کو کئی گنا بڑھانے پر کام کر رہے ہیں۔ ان کا مزید کہنا تھا کہ نوجوان ہماری ترقی کا زینہ ہیں، انہیں دور حاضر کے تقاضوں سے ہم آہنگ کرنا ضروری ہے،نوجوانوں کو جدید خطوط پر تربیت دینے اور بیرون ممالک میں روزگار کے مواقع فراہم کرنے کے لیے دن رات کام کر رہے ہیں۔ صوبائی وزیر مسعود شاہ، وزیر اعلیٰ کے مشیر ریاض انور، فیکلٹی اراکین اور کثیر تعداد میں طلباءو طالبات نے تقریب میں شرکت کی۔

سٹیٹ بینک آف پاکستان نے بینک آف خیبر کو ای سٹیمپنگ ایجنٹ قرار دیدیاہے۔ اس مقصد کیلئے ایجنسی ایم او یو پر دستخط ہوچکے ہیں۔ ای سٹیمپنگ کے اجراسے صوبے میں جعلی سٹامپ پیپرز کا سدباب بھی ممکن ہوسکے گا۔اس اقدام سے موصول ہونے والے محاصل بینک آف خیبر کے ذریعے صوبے کے اکاؤنٹ ون میں جمع ہونگے۔ ای سٹیمپنگ صوبے میں گڈ گورننس کی جانب بھی ایک اہم اقدام ہے۔نگران وزیربرائے ریونیو، خزانہ اور ایکسائز اینڈ ٹیکسیشن احمد رسول بنگش نے کہا ہے کہ ای سٹیمپنگ کے اجراسے صوبے میں جعلی سٹامپ پیپرز کا سدباب ممکن ہوسکے گا۔اس اقدام سے موصول ہونے والے محاصل بینک آف خیبر کے زریعے صوبے کے اکاونٹ ون میں جمع ہونگے۔ ای سٹیمپنگ صوبے میں گڈ گورننس کی جانب ایک اہم اقدام ہے۔ وہ بینک آف خیبر اور سٹیٹ بینک آف پاکستان کے مابین ایجنسی معاہدے پر دستخط کیلئے منعقدہ تقریب میں بطور مہمان خصوصی شریک تھے۔ سیکرٹری خزانہ عامر سلطان ترین، ڈائریکٹر ریونیو اور ڈائریکٹر فنانس سٹیٹ بینک آف پاکستان قادر بخش سمیت بینک آف خیبر کے ہیڈ کنونشنل بینکنگ شیرمحمد سمیت دیگر متعلقہ اہلکاروں نے بھی شرکت کی۔ وزیر خزانہ احمد رسول بنگش نے ای سٹیمپنگ لانچنگ تقریب سے اپنے خطاب میں کہا کہ اس اقدام کے پیچھے بڑا مقصد اسٹامپ پیپرز تک بغیر کسی پریشانی کے فوری رسائی فراہم کرنا اور دھوکہ دہی کی سرگرمیوں کو روکنا ہے۔ اس سے قبل مینول نظام کے ساتھ، کسی کو عدالتی اور غیر عدالتی اسٹامپ پیپر جاری کرنے میں دو سے تین دن لگتے تھے۔ ای سٹیمپنگ نے دو آسان مراحل کے ساتھ اس عمل کو چند گھنٹوں تک محدود کردیا ہے۔ اس نظام سے دھوکہ دہی کا خاتمہ ممکن ہوگا کیونکہ اس نظام سے ای اسٹامپ کی آن لائن تصدیق ممکن ہوسکے گی۔ہیڈ کنونشنل بینکنگ شیر محمد اور ڈائریکٹر سٹیٹ بینک آف پاکستان قادر بخش نے اس مد میں ایجنسی ایم او یو پر دستخط کئے۔ ای سٹیپمنگ لانچنگ تقریب سے اپنے خطاب میں گروپ ہیڈ کنونشنل بینکنگ شیر محمد نے بتایا کہ ای سٹیمپنگ بینک آف خیبر اور کے پی آئی ٹی بورڈ کے تعاون سے پیش کیا جارہاہے۔ اب صرف 15 منٹ میں صوبے کے کسی بھی حصے سے آپ ای سٹیمپ حاصل کرسکتے ہیں۔ ای سٹیپمنگ کو حاصل کرنے کیلئے آن لائن چالان میں تفصیلات بھرکے بعد بینک میں فیس جمع کرکے ای سٹیمپ پرنٹ کیا جا سکتا ہے۔ ڈائریکٹر سٹیٹ بینک آف پاکستان قادر بخش نے کہا کہ بینک آف خیبر سٹیٹ بینک آف پاکستان کا چوتھا ایجنسی بینک ہے جسے حکومت کے ریونیوز حاصل کرنے کا اختیار دیا گیا ہے۔ ای سٹیمپ کے اجرا سے رئیل سٹیٹ کے کاروبار میں بھی مزید سہولت فراہم ہوگی۔ کسی پراپرٹی کی فروخت یا خریداری کی صورت میں، سٹیمپ ڈیوٹی کی قیمت کا تعین ڈی سی ویلیوایشن ٹیبلز کے ذریعے لوکیشن، کورڈ ایریا اور پراپرٹی کی قسم یعنی رہائشی یا کمرشل کے ڈیٹا کی بنیاد پر کیا جاتا ہے۔ یہ خصوصیت جائیداد کی قیمت کو کم کرنے کے نتیجے میں ٹیکس چوری کو روکنے میں بھی مدد کرتی ہے۔ ان خصوصیات کے نتیجے میں، اس نظام کے آغاز کے بعد سے اسٹامپ ڈیوٹی کی وصولی میں واضح اضافہ ہوا ہے۔ واضح رہے کہ بینک آف خیبر صوبے بھر میں 235 برانچوں کے ساتھ کام کررہاہے جن میں 122 اسلامی بینکنگ برانچز شامل ہیں۔