خیبر پختونخوا کے سیکرٹری ماحولیاتی تبدیلی، جنگلات، ماحولیات و جنگلی حیات، جنید خان کی زیرِ صدارت فاریسٹ ریجن-III، مالاکنڈ ڈویژن کے بارے میں ایک تفصیلی جائزہ اجلاس منعقد ہوا۔ اس موقع پر چیف کنزرویٹر ریجن-III، اصغر خان نے مالاکنڈ ڈویژن کے جنگلات کی موجودہ صورتحال، درپیش چیلنجز اور عملی پہلوؤں پر ایک مختصر مگر جامع بریفنگ پیش کی۔ اجلاس میں چیف کنزرویٹر ریجن-III شوکت فیاض، چیف کنزرویٹر ریجن-I، احمد جلیل سمیت ریجن-II اور ریجن-III کے کنزرویٹرز نے بھی شرکت کی۔بریفنگ کے دوران اصغر خان نے فورم کو آگاہ کیا کہ ریجن-III ملاکنڈ ڈویژن کا رقبہ 1659710 ایکڑ پر پھیلا ہوا ہے، جس میں سے 1023281 ایکڑ کو پروٹیکٹر فارسٹ اور 636429 ایکڑ کو مشترکہ عوامی جنگلات کے طور پر نامزد کیا گیا ہے—جو مجموعی طور پر ڈویژن کی کل اراضی کے 21 فیصد حصے پر جنگلاتی رقبے کی حیثیت رکھتے ہیں۔ انہوں نے مزید بتایا کہ خطے میں منظور شدہ آسامیوں کی تعداد 2049 ہے، جن میں سے فی الحال 1362 اہلکار مختلف سرکلز میں تعینات ہیں۔سیکرٹری محکمہ جنگلات جنید خان نے ڈویژنل قیادت کو یقین دہانی کرائی کہ افرادی قوت کے اس فرق کو پُر کرنے کے لیے جاری بھرتی کے عمل کو تمام ضابطہ جاتی لوازمات کی سختی سے پابندی کرتے ہوئے تیز کیا جائے گا۔ انہوں نے ادارہ جاتی کارکردگی اور حوصلے کو یقینی بنانے کے لیے تمام ڈویژنوں میں طویل عرصے سے زیر التواء ترقی کے معاملات کو حل کرنے کے لیے محکمے کے عزم کا بھی اعادہ کیا۔فارسٹ ڈیویلپمنٹ فنڈ کے تحت ترقیاتی منصوبوں کا جائزہ لیتے ہوئے، سیکرٹری محکمہ جنگلات نے چیف کنزرویٹر ریجن-I کو ہدایات جاری کیں کہ وہ اہم سکیموں پر عمل درآمد فوری طور پر شروع کردیں، جن میں جنگلات انسپکشن ہٹس کی تعمیر نو اور بڑی مرمت، اور دفتری گاڑیوں پٹرول سکواڈ گاڑیوں کی مرمت کے منصوبے شامل ہیں۔وزیراعلیٰ خیبر پختونخوا محمد سہیل آفریدی کے “سرسبز خیبر پختونخوا وژن” کا حوالہ دیتے ہوئے سیکرٹری جنید خان نے اس عزم کو دہرایا کہ صوبائی حکومت درختوں کی غیر قانونی کٹائی کے خلاف عدم برداشت کی پالیسی پر سختی سے کاربند رہے گی۔ انہوں نے زور دیا کہ جنگلات ”صوبے کے زندہ پھیپھڑے“ ہیں اور ان کی قدر و منزلت کو کم کرنے کی ہر غیر قانونی کوشش کا سخت قانونی کارروائی سے مقابلہ کیا جائے گا۔ انہوں نے مزید کہا کہ ووڈ لاٹس، طوفانی ہواؤں سے گرے ہوئے درختوں، اور مختلف سرکلز میں موجود لکڑی کی شفافیت، قانونی حیثیت اور پائیدار جنگلات کو یقینی بنانے کے لیے ایک جامع لائحہ عمل کو حتمی شکل دے کر منظوری کے لیے وزیراعلیٰ کو پیش کیا جائے گا۔اجلاس کا اختتام صوبائی حکومت کے اس عزم سے ہوا کہ قدرتی وسائل کے تحفظ اور سرسبزی میں اضافے، صحت مند اور ماحولیاتی تبدیلیوں کا مقابلہ کرنے والی کوششوں کو تیز کرنے کے لئے بھر پور اقدامات اٹھائے جائیں گے۔

وزیرِ صحت خیبر پختونخوا خلیق الرحمن نے ضلع ایبٹ آباد کے خصوصی دورے کے موقع پر مقتولہ لیڈی ڈاکٹر وردہ مشتاق کے گھر جا کر اہلِ خانہ سے دلی تعزیت کی، مرحومہ کے لیے فاتحہ خوانی کی اور غمزدہ خاندان کو ہر ممکن تعاون کی یقین دہانی کروائی۔اس موقع پر صوبائی وزیرِ صحت خلیق الرحمن نے کہا کہ“ڈاکٹر وردہ مشتاق کا بے رحمانہ قتل انتہائی افسوسناک سانحہ ہے۔ حکومت اس واقعے کو بہت سنجیدگی سے لے رہی ہے، اور ہم ہر قیمت پر انصاف کی فراہمی یقینی بنائیں گے۔ ملزمان قانون کی گرفت سے ہرگز نہیں بچ سکیں گے۔”بعد ازاں صوبائی وزیر نے بے نظیر ٹیچنگ ہسپتال ایبٹ آباد کا دورہ کیا، جہاں انہوں نے ڈاکٹرز ایسوسی ایشن کے نمائندوں سے بھی ملاقات کی۔ انہوں نے کہا کہ“ڈاکٹرز کا تحفظ حکومت کی اولین ترجیح ہے۔ صحت کے شعبے میں خدمات انجام دینے والے ہمارے لیے قابلِ قدر اثاثہ ہیں۔ اس افسوسناک واقعے کی شفاف تحقیقات کے لیے جے آئی ٹی تشکیل دے دی گئی ہے، جو مکمل پیشہ ورانہ انداز میں اپنی ذمہ داری نبھا رہی ہے۔”انہوں نے مزید کہا کہ“حکومت صحت کے عملے کو محفوظ ماحول فراہم کرنے کے لیے تمام وسائل بروئے کار لائے گی۔ ہم ڈاکٹر کمیونٹی کے ساتھ کھڑے ہیں اور مستقبل میں ایسے واقعات کی روک تھام کے لیے مؤثر اقدامات کیے جا رہے ہیں۔”اس موقع پر ڈپٹی کمشنر ایبٹ آباد سرمد سلیم اکرم اور ڈی ایچ او ایبٹ آباد بھی صوبائی وزیر کے ہمراہ موجود تھے۔

رپورٹ: ریاض غفور

خیبرپختونخوا کے وزیر بلدیات مینا خان آفریدی نے پشاور شہر میں متعدد نائیبرہوڈ کونسلز کے دفاتر کا اچانک دورہ کیا، جہاں انہوں نے ملازمین کی حاضری، صفائی کی صورتحال، عوامی خدمات کی فراہمی اور دیگر انتظامی امور کا تفصیلی جائزہ لیا۔ وزیر بلدیات نے نائیبرہوڈ کونسلز 46، 52، 49 اور 47 سمیت مختلف یونٹس کا معائنہ کیا۔دورے کے دوران وزیر بلدیات نے نائیبرہوڈ کونسلز 46 اور 52 میں صفائی ستھرائی کی ناقص صورتحال، عوامی شکایات اور سروس ڈلیوری میں سنگین خامیوں کا نوٹس لیتے ہوئے دونوں کونسلز کے سیکرٹری کو معطل کرنے کی ہدایت جاری کی۔وزیراعلیٰ کی ہدایات کے مطابق وزیر بلدیات مینا خان آفریدی نے کہا کہ پشاور سمیت پورے صوبے میں بلدیاتی خدمات کی بہتری حکومت کی اولین ترجیح ہے، اور اس مقصد کے لیے وہ خود دیگر اضلاع میں بھی نائیبرہوڈ اور ویلج کونسلز کی کارکردگی کا جائزہ لیں گے۔مینا خان آفریدی نے کہا کہ عوام نے صوبائی حکومت کو بہترین خدمات کی فراہمی کا مینڈیٹ دیا ہے، لہٰذا یہ کسی صورت قابلِ قبول نہیں کہ عوامی ٹیکسز پر چلنے والے ادارے اپنی بنیادی ذمہ داریاں پوری نہ کریں۔ انہوں نے واضح کیا کہ محکمہ بلدیات کے ہر سطح پر کام کرنے والے ملازمین اپنی کارکردگی بہتر بنائیں، ورنہ سخت کارروائی کی جائے گی۔وزیر بلدیات نے کہا کہ صوبے کی ترقی، شہری سہولیات کی بہتری اور صاف ستھرا ماحول یقینی بنانا حکومت کی مشترکہ ذمہ داری ہے، اس لیے ناقص کارکردگی اور غفلت کے لیے محکمے میں کوئی گنجائش نہیں رہے گی۔

وزیرِ صحت خیبر پختونخوا خلیق الرحمٰن کی زیرِ صدارت محکمہ صحت پشاور میں خیبر پختونخوا ہیلتھ فاؤنڈیشن کے اقدامات، جاری منصوبوں، درپیش مسائل اور مستقبل کے لائحہ عمل کے حوالے سے ایک اعلیٰ سطحی اجلاس منعقد ہوا۔ جس میں فاؤنڈیشن کے منیجنگ ڈائریکٹر نے فاؤنڈیشن کی کارکردگی اور انتظامی امور پر تفصیلی بریفنگ دی۔اجلاس میں فیصلہ کیا گیا کہ آؤٹ سورس شدہ تمام صحت سہولیات میں موجود عارضی انتظامات کا جائزہ لیا جائے گا تاکہ بلا تعطل سروس کی فراہمی کو یقینی بنایا جا سکے۔ محکمہ صحت، فاؤنڈیشن کے اشتراک سے جاری اور آئندہ تمام منصوبوں کے لیے ایک مضبوط اور جامع حکمت عملی بھی وضع کرے گا تاکہ پائیدار نظامِ کار ممکن بنایا جا سکے۔فورم نے آؤٹ سورس شدہ صحت سہولیات کی مؤثر نگرانی کو مزید بہتر بنانے پر اتفاق کیا۔ اس مقصد کے لیے ایک ڈیجیٹل ڈیش بورڈ تیار کیا جائے گا جس کے ذریعے اوپی ڈی، آئی پی ڈی، عملے کی حاضری اور سہولیات کے استعمال سمیت کارکردگی کی نگرانی کی جا سکے گی۔یہ بھی فیصلہ کیا گیا کہ موجودہ کارکردگی کی بنیاد پر مالی کٹوتی اور ادائیگی کے نظام کا ازسرِ نو جائزہ لیا جائے گا اور تمام آؤٹ سورس شدہ سہولیات کے لیے ایک یکساں کارکردگی پر مبنی مالی نظام متعارف کرایا جائے گا تاکہ معیاری خدمات کی فراہمی کو یقینی بنایا جا سکے۔صوبائی وزیرِ صحت نے ہدایت کی کہ فاؤنڈیشن آؤٹ سورس شدہ ہسپتالوں کے تمام میڈیکل سپرنٹنڈنٹس اور سہولت منیجرز کے ساتھ باقاعدگی سے کارکردگی جائزہ اجلاس منعقد کرے تاکہ بہتر رابطہ قائم رکھا جا سکے، بروقت مسائل حل ہوں اور مجموعی کارکردگی میں بہتری آئے۔اجلاس میں اس امر پر بھی زور دیا گیا کہ فاؤنڈیشن معاہدوں اور منظور شدہ معیار کے مطابق ضروری انسانی وسائل اور تمام کلینیکل و نان کلینیکل سہولیات کی دستیابی یقینی بنائے۔ غیر مطابقت رکھنے والے اداروں کو فوری طور پر خامیاں دور کرنے کے لیے نوٹسز جاری کیے جائیں، خصوصاً اہم خدمات میں کوتاہی کی صورت میں۔زیرِ التواء معاہدوں کے حوالے سے بتایا گیا کہ دارازندہ، سرائے مولہ خان، شگرام، مامد گٹ اور دیگر سہولیات کے معاہدوں کی جانچ پڑتال اور حتمی منظوری کے عمل کو ترجیحی بنیادوں پر مکمل کیا جائے گا تاکہ ان صحت مراکز کو بلا تاخیر مکمل طور پر فعال کیا جا سکے۔سوشل میڈیا پر ناقص سہولیات سے متعلق گردش کرنے والی اطلاعات کے تناظر میں فاؤنڈیشن کو ہدایت کی گئی کہ وہ زمینی سطح پر سروس ڈیلیوری کا مکمل جائزہ لے اور جہاں ضرورت ہو وہاں فوری اصلاحی اقدامات کرے تاکہ معیاری طبی سہولیات کی فراہمی یقینی بنائی جا سکے۔اجلاس میں ڈی ایچ کیو ہسپتال داسو کے مسائل پر بھی تفصیلی غور کیا گیا۔ خیبر پختونخوا ہیلتھ فاؤنڈیشن ہسپتال کے انفراسٹرکچر اور سروس ڈیلیوری کا جامع جائزہ لے گا اور بہتری کے لیے ایک تفصیلی رپورٹ محکمہ صحت کو پیش کرے گا۔اجلاس میں منسلک اداروں کے کیپٹیشن فیس ماڈل کا بھی ازسرِ نو جائزہ لینے کا فیصلہ کیا گیا تاکہ تعلیم و تربیت کے معیار اور مجموعی طور پر صحت سہولیات کی استعداد میں بہتری لائی جا سکے۔

مشیر خزانہ خیبرپختونخوا مزمل اسلم نے ٹرانسپرنسی انٹرنیشنل کی جاری کردہ کرپشن رپورٹ پر ردعمل دیتے ہوئے کہا ہے کہ صوبوں میں کرپشن کے تصور کے مطابق پنجاب میں سب سے اوپر جبکہ خیبر پختونخوا میں تناسب سب سے نیچے ہے۔ مزمل اسلم نے کہا کہ نیشنل کرپشن پرسیپشن سروے 2025 کی رپورٹ جاری ہوگئی ہے اور مبینہ اعداد و شمار کے مطابق پولیس 24 فیصد کے ساتھ پاکستان کا سب سے زیادہ کرپٹ شعبہ تصور کیا جاتا ہے۔ مزمل اسلم نے کہا کہ صوبائی سطح پر پولیس کے بارے میں کرپشن کا سب سے زیادہ تصور پنجاب میں 34 فیصد ہے۔ اس کے بعد بلوچستان 22 فیصد جبکہ سندھ 21 فیصد ہے اور خیبر پختونخوا کا نمبر سب سے نیچے 20 فیصد ہے۔ مشیر خزانہ خیبرپختونخوا نے کہا کہ عوامی خدمات میں رشوت کے لحاظ سے بھی خیبر پختونخوا کا سکور سب سے کم جبکہ سندھ، پنجاب کا زیادہ ہے۔ مزمل اسلم نے کہا کہ الحمدللہ خیبر پختونخوا ڈیجیٹل ایپ دستک نے 2025 کا ایوارڈ جیت لیا جبکہ دوسری جانب دوسرے صوبے کرپشن کے تمام ایوارڈ جیت رہے ہیں۔

خیبرپختونخوا حکومت کے منشیات کے خلاف زیرو ٹالرنس پالیسی اور صوبائی وزیر ایکسائز،ٹیکسیشن اور نارکوٹکس کنٹرول سید فخرجہان کی ہیدایات پر جاری آپریشن کے سلسلے میں گزشتہ تین دنوں کے دوران محکمہ ایکسائز نے ملاکنڈ،پشاور اور مردان میں الگ الگ کاروائیاں عمل میں لائیں۔ملاکنڈ میں عاکف نواز خان سرکل آفیسر کی نگرانی میں ازلان اسلم ایس ایچ او تھانہ ایکسائز سوات نے ملاکنڈ کے علاقے خار میں کارروائی کرتے ہوئے نشہ فروشی میں ملوث سہولت کار سلمان کو رنگے ہاتھوں گرفتار کیا۔ ملزم کے قبضے سے 135 گرام چرس برآمد ہوئی۔پشاور کارخانوں مارکیٹ میں ماجد خان ایکسائز اینڈ ٹیکسیشن آفیسر نارکوٹکس کنٹرول کی نگرانی،فیصل خان سرکل آفیسر خیبر کی سربراہی میں ماجد حسین ایس ایچ او نے کارخانوں مارکیٹ میں دکان پر چھاپہ مارا۔ کارروائی کے دوران 208 عدد (187 گرام) نشہ آور گولیاں برآمد ہوئیں جبکہ مزاحمت کے باوجود ملزم کو گرفتار کرکے مقدمہ درج کرلیا گیا۔اسی طرح سعود خان گنڈا پور پراوینشل انچارج بیورو آف اینٹیلیجنس اینڈ انویسٹیگیشن کی نگرانی میں فخر عالم خان انسپکٹر اور شیر شاہ سوری سب انسپکٹر نے مردان،نوشہرہ روڈ پر کارروائی کرتے ہوئے دو کم عمر لڑکوں کے ذریعے آئس راولپنڈی سمگل کرنے کی کوشش ناکام بنادی۔ دونوں لڑکوں کے پیروں سے بندھی ہوئی 2000 گرام آئس برآمد کی گئی جس کے سلسلے میں مقدمہ درج کرکے ملزمان کے پورے نٹ ورک تک پہنچنے کیلئے تحقیقات جاری ہیں۔