خیبرپختونخوا کے وزیر برائے پبلک ہیلتھ انجینئرنگ پختون یار خان سے معروف کاروباری شخصیت ملک شرین مالک نے ملاقات کی ملاقات کے دوران دونوں رہنماؤں کے درمیان سیاسی اور علاقائی امور پر تفصیلی تبادلہ خیال ہوا ملک شیرین مالک نے بنوں اور حلقہ پی کے 101 کو درپیش مسائل پر روشنی ڈالتے ہوئے ان کے فوری حل پر زور دیا۔اس موقع پر صوبائی وزیر پختون یار خان نے یقین دہانی کرائی کہ خیبر پختونخوا کی حکومت بنوں اور پی کے 101 کے عوامی مسائل اور محرومیوں کے ازالے کیلئے سنجیدہ اقدامات کرے گی انہوں نے کہا کہ خطے میں امن و امان کا قیام ناگزیر ہے اور حکومت اس مقصد کیلئے تمام وسائل بروئے کار لائے گی انہوں نے کہاکہ حکومت عوامی خدمت کو سیاست سے بالاتر ہو کر دیکھتی ہے اور ہر ممکن کوشش کی جا رہی ہے کہ علاقے کی محرومیوں کا ازالہ کیا جائے بنوں کے عوام کو درپیش مسائل برسوں سے توجہ کے منتظر ہیں لیکن اب حکومت ان مسائل کو ترجیحی بنیادوں پر حل کرنے کیلئے سنجیدہ ہے انہوں نے کہا کہ ترقیاتی منصوبوں، صحت، تعلیم اور انفراسٹرکچر کی بہتری کیلئے اقدامات جاری ہیں اور عوام کو جلد مثبت نتائج نظر آئیں گے۔

صوبائی اسمبلی کی قائمہ کمیٹی برائے لائیو اسٹاک، فشریز اور کوآپریٹو ڈیپارٹمنٹ کا اجلاسں صوبائی اسمبلی سیکریٹریٹ کے کانفرنس روم میں منعقد ہوا جس کی صدارت چیئرپرسن اور رکن صوبائی اسمبلی شیر علی آفریدی نے کی۔ اجلاس میں اراکین صوبائی اسمبلی عبیدالرحمن، عبدالمنعم اور اعجاز محمد نے بھی شرکت کی۔اجلاس کے آغاز میں چیئرپرسن نے متعلقہ محکمے کی مجموعی کارکردگی کا جائزہ لیا اور ادارہ جاتی بہتری پر زور دیا۔ انہوں نے کہا کہ لائیو سٹاک اور فشریز کے شعبوں میں ریونیو بڑھانے اور عوامی فلاح کے امکانات موجود ہیں، جن سے مؤثر انداز میں فائدہ اٹھانے کی ضرورت ہے۔ ان شعبوں کی ترقی نہ صرف صوبے کی معیشت کو تقویت دے سکتی ہے بلکہ روزگار کے نئے مواقع بھی پیدا ہو سکتے ہیں۔اجلاس کے دوران محکمہ لائیو اسٹاک کے تحت میڈیسن اور ویکسین سروسز سے متعلق تفصیلات بارے چیئرپرسن نے ہدایت کی کہ آئندہ اجلاس میں یہ معلومات ہر صورت مہیا کی جائیں، بصورت دیگر یہ معاملہ پبلک اکاؤنٹس کمیٹی کے سپرد کیا جائے گا۔چیئرپرسن شیر علی آفریدی نے آگاہ کیا کہ کمیٹی کی جانب سے جلد ہیچریز اور متعلقہ ریسرچ سینٹرز کا دورہ کیا جائے گا تاکہ زمینی حقائق کی روشنی میں محکمانہ کارکردگی کا جائزہ لیا جا سکے۔اجلاس میں محکمہ لائیو اسٹاک کی جانب سے بتایا گیا کہ ریونیو میں بہتری کے لیے مربوط اور سنجیدہ اقدامات کیے جا رہے ہیں جبکہ کمیٹی کو درکار اعدادوشمار پر آئندہ اجلاس میں بریفنگ دی جائے گی۔

وزیراعلیٰ خیبرپختونخوا کے معاونِ خصوصی برائے صنعت، عبدالکریم تورڈھیر نے کہا ہے کہ دنیا ماحول دوست ٹرانسپورٹ کی جانب بڑھ رہی ہے، اور الیکٹرک گاڑیوں (ای ویز) کا فروغ اس سلسلے میں اہم قدم ہے۔ پاکستان میں اس حوالے سے نیک نیتی سے پالیسی سازی خوش آئند ہے، تاہم اس کے مؤثر نفاذ کے لیے ایک واضح اور جامع ریگولیٹری نظام اپنانا ناگزیر ہے۔ان خیالات کا اظہار انہوں نے پشاور میں الیکٹرک گاڑیوں اور ماحول دوست ٹرانسپورٹ کے فروغ کے لیے متعارف کی جانے والی پانچ سالہ نیشنل الیکٹرک وہیکل پالیسی (2025-30) کے حوالے سے ایک اعلیٰ سطحی ورکشاپ سے خطاب کرتے ہوئے کیا۔ ورکشاپ کا مقصد نئی قومی پالیسی سے متعلق آگاہی پیدا کرنا اور قومی و صوبائی حکومتوں کے مابین تعاون کو فروغ دینا تھا۔ورکشاپ کی صدارت وزیراعلیٰ کے معاونینِ خصوصی برائے صنعت عبدالکریم تورڈھیر اور برائے ٹرانسپورٹ رنگیز خان کے علاوہ وفاقی سیکریٹری صنعت و پیداوار سیف انجم نے کی۔ اس موقع پر سیف انجم نے نئی پالیسی کا خاکہ پیش کرتے ہوئے اس کے فریم ورک، تزویراتی مقاصد، فوائد، ادارہ جاتی طریقہ کار اور نفاذ کے لیے مرتب کردہ روڈمیپ پر تفصیلی بریفنگ دی۔ ورکشاپ کے دوران شرکاء نے پالیسی میں مزید بہتری کے لیے مختلف آراء بھی پیش کیں۔ورکشاپ میں ایڈیشنل چیف سیکرٹری منصوبہ بندی و ترقیات اکرام اللہ، سیکرٹری منصوبہ بندی عدیل شاہ، سیکرٹری ٹرانسپورٹ مسعود یونس، دیگر اعلیٰ حکام، وفاقی و صوبائی محکموں کے نمائندگان، صنعتکار، کاروباری شخصیات، سرحد چیمبر آف کامرس اینڈ انڈسٹری کے صدر فضل مقیم، انجمن تاجران کے نمائندگان اور متعلقہ سٹیک ہولڈرز نے شرکت کی۔پانچ سالہ نئی پالیسی کے تحت 2025 سے 2030 تک ملک میں 30 فیصد گاڑیوں کو الیکٹرک وہیکل پر منتقل کرنے کا ہدف مقرر کیا گیا ہے، جس کے لیے ملک بھر میں 3000 چارجنگ اسٹیشنز قائم کیے جائیں گے۔معاون خصوصی عبدالکریم تورڈھیر نے کہا کہ اگرچہ نئی پالیسی کے حوالے سے مشاورت کا عمل جلد بازی میں مکمل کیا گیا، تاہم ماحول کے تحفظ کے لیے یہ ایک مثبت پیش رفت ثابت ہو سکتی ہے۔ انہوں نے کہا کہ الیکٹرک گاڑیوں کی مقامی سطح پر تیاری کے لیے خاص طور پر لیتھیئم بیٹریز کی مینوفیکچرنگ کو فروغ دینے کی ضرورت ہے۔ اس مقصد کے لیے سرمایہ کاری کے آسان ماڈلز اور لیزنگ کے شفاف طریقہ کار وضع کیے جانے چاہئیں تاکہ مقامی صنعت کو فروغ ملے۔انہوں نے مزید کہا کہ ان بیٹریز کی عمر، استعمال کے بعد ان کا محفوظ طریقے سے تلف ہونا، اور ماحول پر ممکنہ اثرات جیسے امور کے لیے بھی ایک جامع ریگولیٹری نظام قائم کیا جانا ضروری ہے۔ انہوں نے چارجنگ اسٹیشنز کے مقام، رسائی اور چارجنگ طریقہ کار کے بارے میں بھی شفاف پالیسی کی ضرورت پر زور دیا۔ معاون خصوصی نے کہا کہ محکمہ صنعت صوبائی سطح پر خیبرپختونخوا بورڈ آف انوسٹمنٹ اینڈ ٹریڈ کے ذریعے وفاقی اداروں سے قریبی روابط رکھے گا تاکہ پالیسی کے نفاذ میں ہر ممکن تعاون فراہم کیا جا سکے۔اس موقع پر معاون خصوصی برائے ٹرانسپورٹ، رنگیز خان نے کہا کہ پالیسی میں دو اور تین پہیوں والی گاڑیوں کے لیے دی جانے والی سبسڈی سے کم آمدنی والے افراد مستفید ہوں گے، بشرطیکہ چارجنگ اسٹیشنز دیہی علاقوں میں بھی دستیاب ہوں۔ انہوں نے تجویز دی کہ چارجنگ اسٹیشنز کے قیام کے تمام مراحل ون ونڈو آپریشن کے تحت مکمل کیے جائیں تاکہ سرمایہ کاروں اور صارفین دونوں کو سہولت ہو۔
۔۔۔۔۔۔۔۔۔۔۔۔۔۔۔۔۔

صوبائی وزیر اعلیٰ تعلیم مینا خان آفریدی نے کہا ہے کہ صوبائی حکومت اعلیٰ تعلیم باالخصوص انجنئیرنگ اور ٹیکنالوجی کے تعلیم کے فروغ کے لیے تمام وسائل بروئے کار لا رہی ہے۔ حکومت نے اعلیٰ تعلیم کا بجٹ نگران دور کے ایک ارب 90 کروڑ کے مقابلے میں حالیہ بجٹ میں 10 ارب کر دیا ہے۔ یونیورسٹیاں روایتی انجینئرنگ کے ساتھ آرٹیفیشل انٹیلیجنس اور سائبر سیکورٹی کے شعبوں میں ماہرین کی تیاری پر توجہ دیں جو جدید دور کا تقاضہ اور ہماری حکومت اور عمران خان کا ہی وژن ہے۔ وہ یونیورسٹی آف انجینئرنگ اینڈ ٹیکنالوجی مردان میں ٹیک وژن فائنل ائیر پراجیکٹ ایکسپو کے موقع پر میڈیا سے بات چیت اور طلبہ و فیکلٹی سے خطاب کر رہے تھے۔ اس موقع پر ڈائریکٹر جنرل سائنس اینڈ ٹیکنالوجی ساجد خان، یونیورسٹی کے وائس چانسلر ڈاکٹر گل محمد، ڈین ڈاکٹر عمران، انڈسٹری کے نمائندگان، فیکلٹی ممبرز اور طلبہ و طالبات کی بڑی تعداد موجود تھی۔ ایکسپو میں 30 مختلف انڈسٹریز اور فائنل ائیر کے طلبہ و طالبات نے اپنے مصنوعات اور پراجیکٹس کے 66 سٹالز لگائے تھے۔ وزیر برائے اعلیٰ تعلیم نے تمام سٹالز کا دورہ کیا اور طالب علموں سے ان کے پراجیکٹس کے بارے میں تبادلہ خیال کیا۔ بیسٹ پراجیکٹ ایوارڈ سول انجینئرنگ ڈیپارٹمنٹ نے حاصل کیا۔ صوبائی وزیر نے اس موقع پر یونیورسٹی میں حال ہی میں قائم شدہ آرٹیفیشل انٹیلیجنس سنٹر اور یونیورسٹی کی جانب سے مکمل شدہ دو سو کلو واٹ سولر سسٹم کا افتتاح کیا۔ سنٹر برائے آرٹیفیشل انٹیلیجنس کاقیام ملک میں اس شعبے میں ترقی کے حوالے سے ایک سنگ میل ثابت ہوگا۔ وائس چانسلر پروفیسر ڈاکٹر گل محمد نے تقریب سے خطاب کرتے ہوئے کہا کہ انجنیرنگ کے طلبہ و طالبات کو ملازمت کے پیچھے بھاگنے کی بجائے مختلف ہنر سیکھ کر ایک انٹرپرینور کے طور پر لوگوں کو روزگار دے کر ملک و قوم کی خدمت کرنی چاہئیے۔ اس موقع پر خطاب کرتے ہوئے صوبائی وزیر برائے اعلیٰ تعلیم مینا خان آفریدی نے کہا کہ وہ اس ایکسپو میں طلبہ و طالبات کے مختلف پروجیکٹس سے از حد متاثر ہوئے ہیں اور یونیورسٹی آف انجینئرنگ اینڈ ٹیکنالوجی مردان کے طالب علموں نے یہ ثابت کیا کہ ہمارے نوجوان بھرپور ٹیلنٹ کے حامل ہیں اور تھوڑی سی توجہ دے کر ان کی صلاحیتوں کو ملک وقوم کے حق میں استعمال کیا جا سکتا ہے۔ انہوں نے یو ای ٹی مردان کے وائس چانسلر اور فیکلٹی کو خراج تحسین پیش کرتے ہوئے کہا کہ ان کی کاوشیں ان کامیاب پراجیکٹس میں واضح طور پر جھلک رہی ہیں۔ اُنہوں نے کہا کہ یونیورسٹیوں کو انڈسٹریز کے ساتھ لنک کرنے سے نہ صرف روزگار کے مواقع پیدا ہوں گے بلکہ نئی تحقیق سے عوام کو بہترین سہولیات بھی میسر آسکیں گے۔ انہوں نے کہا کہ سنٹر برائے اے آئی کے تحت بی ایس لیول کے چار نئے پروگراموں کے اجراء سے یونیورسٹی مزید آگے بڑھے گی اور اس نئی ٹیکنالوجی کو فروغ ملے گا۔ مینا خان آفریدی نے ایکسپو میں نمائش کے لیے رکھے گئے پراجیکٹس کے حامل طالب علموں کو 30 ہزار روپے فی پراجیکٹ کیش ایوارڈ بھی دئیے۔ جبکہ بہترین آئیڈیاز پیش کرنے والوں میں 20/20 ہزار روپے کیش پرائز تقسیم کیے۔ اس موقع پر وائس چانسلر ڈاکٹر گل محمد نے وزیر برائے اعلیٰ تعلیم مینا خان آفریدی اور ڈی جی سائنس اینڈ ٹیکنالوجی ساجد خان کو شیلڈز پیش کئے۔

وزیر اعلی خیبر پختو خوا کےمشیر صحت احتشام علی نے خیبرپختونخوا ڈاکٹر کونسل کے نمائندہ وفد کو دفتر مدعو کرکے ان سے ملاقات کی اور طبی عملے کو درپیش مسائل بارے سیر حاصل گفتگو کی۔
ملاقات میں سپیشل سیکرٹری ہیلتھ سمیت انصاف ڈاکٹرز فورم کے صوبائی صدر ڈاکٹر نبی جان آفریدی بھی موجود تھے۔ ملاقات میں طبی عملے کے مسائل پر غور و حوض ہوا۔ مشیر صحت احتشام علی نے پچھلے ہفتے آئے ڈاکٹرز جرگہ کے محکمہ صحت میں تھوڑ پھوڑ پر افسوس کا اظہارکرتے ہوئے کہا کہ پڑھے لکھے لوک ایسے کام کرینگے تو عام آدمی سے کیا توقع کی جاسکتی ہے۔ انہوں نے کہا کہ کوئی بھی نمائندہ تنظیم کسی بھی وقت میرے دفتر آسکتی ہے لیکن غیر شائستہ گفتگو اور سرکاری املاک کو نقصان پہنچانا قابل قبول نہیں۔ مشیر صحت نے واضح کیا کہ ڈاکٹرز کے مطالبات پر پہلے ہی 80 فیصد کام مکمل ہوچکا ہے۔ اس بابت انصاف ڈاکٹرز فورم نے بطور نمائندہ طبی عملے کے زیادہ تر مسائل پر پہلے ہی کام مکمل کرلیا ہے۔انہوں نے مزید بتایا کہ کنٹریکٹ بھرتی کا عمل جاری ہے۔ مختلف ایم ٹی آئیز میں بھی بھرتی کا عمل مسلسل جاری ہے۔ پبلک سروس کمیشن کے زریعے بھی ڈسٹرکٹ سپیشلسٹ کی بھرتی کا عمل شروع ہوا تھا جو کہ قانونی پیچیدگیوں کی وجہ سے فی لوقت معطل ہے۔ مشیر صحت احتشام علی نے یہ بھی بتایا کہ ڈاکٹرز کی تنخواہوں میں اضافے کا عمل بھی آخری مراحل میں ہے اور بہت جلد ڈاکٹرز کمیونٹی کو اچھی خبر سنائیں گے۔ طبی عملے کے مسائل کا ادراک ہے اور یہ مسائل سیاست سے بالاتر ہوکر حل کرینگے۔

جدید ٹیکنالوجی اور انٹرکراپنگ سے کسانوں کی پیداواری صلاحیت بڑھائی جائے گی، نجی شعبہ زراعت کا لازمی حصہ ہے – صوبائی وزیر زراعت

خیبر پختونخوا کے وزیر زراعت میجر (ر) سجاد بارکوال نے کسانوں کی پیداواری صلاحیت میں اضافے، جدید زرعی ٹیکنالوجیز کی تربیت، اور زرعی یونیورسٹیوں میں عملی تعلیم پر زور دیتے ہوئے کہا ہے کہ محکمہ زراعت صوبے میں زرعی شعبے کو جدید خطوط پر استوار کرنے کے لیے پرعزم ہے۔بین الاقوامی زرعی کانفرنس و ایکسپو کے اختتامی سیشن سے خطاب کرتے ہوئے صوبائی وزیر زراعت نے کہا کہ کسانوں کی فصلات کے حوالے سے صلاحیت بڑھانا ہماری اولین ترجیح ہے۔ محکمہ زراعت کسانوں کو جدید ترین ٹیکنالوجیز کے بارے میں موثر تربیت فراہم کرے۔ ساتھ ہی، زرعی یونیورسٹیوں کو چاہیے کہ وہ طلباء کو عملی اور میدانی سطح کا علم بھی فراہم کریں تاکہ وہ مستقبل میں جدید زراعت کے چیلنجز کا مقابلہ کر سکیں۔صوبائی وزیر زراعت نے صوبے میں زرعی زمین کی قلت کی طرف اشارہ کرتے ہوئے انٹرکراپنگ کی اہمیت پر زور دیتے ہوئے کہا کہ خیبرپختونخوا میں صرف 1.7 ملین ہیکٹر زمین ہی زراعت کے لیے دستیاب ہے۔ ایسی صورت میں، کسانوں کو انٹرکراپنگ جیسی جدید تکنیکوں کی تربیت دے کر ہی ان کی فی ایکڑ پیداوار اور مجموعی آمدنی میں اضافہ کیا جا سکتا ہے۔ انہوں نے محکمہ زراعت کو ہدایت کی کہ وہ انٹرکراپنگ کی تربیت اور اس کے فروغ کے لیے موثر اقدامات کرے۔سجاد بارکوال نے زرعی ترقی میں نجی شعبے کے کردار کو انتہائی اہم قرار دیا اور انکے کردار کی تعریف کرتے ہوئے کہا کہ اگر نجی شعبے کو زراعت کے سیکٹر سے باہر کیا جاتا ہے تو اس کا مطلب درحقیقت زراعت کو پسماندگی کی طرف دھکیلنا ہے۔ نجی سرمایہ کاری، مارکیٹ رابطے اور جدید انتظام زرعی ترقی کے لیے انتہائی اہم ہیں۔ محکمہ زراعت صوبے میں نجی شعبے کی بھرپور معاونت اور شراکت کے لیے پرعزم ہے۔انہوں نے مزید کہا کہ محکمہ زرعی تحقیق کے پی نے زیادہ پیداوار دینے والی اور پائیدار فصلوں کی 129 نئی اقسام تیار کی ہیں۔ یہ اقسام کسانوں کو بہتر پیداوار اور ماحولیاتی چیلنجز کا مقابلہ کرنے میں مددگار ثابت ہوں گی۔ اسی طرح، انہوں نے محکمہ زراعت توسیع کی کاوشوں کو بھی سراہتے ہوئے کہا کہ محکمہ زراعت توسیع زرعی برادریوں میں جدید زرعی ٹیکنالوجیز کی تشہیر اور ان کے استعمال کو فروغ دینے کے لیے نئے اور مؤثر رجحانات قائم کر رہا ہے۔اپنے خطاب کے اختتام پر وزیر زراعت سجاد بارکوال نے اس کامیاب کانفرنس کے انعقاد پر منتظمین، شرکاء اور خصوصاً میڈیا نمائندوں کا شکریہ ادا کیا۔ انہوں نے امید ظاہر کی کہ محکمہ زراعت اور اس سے وابستہ تمام ادارے مل کر صوبے کے کسانوں کی فلاح و بہبود اور زرعی شعبے کی ترقی کے لیے اپنا کردار ادا کرتے رہیں گے۔ اس موقع پر سیکرٹری زراعت خیبر پختونخوا عطاالرحمان خلیل نے خطاب کرتے ہوئے اس بات پر زور دیا کہ یہ کانفرنس و ایکسپو محکمہ زراعت اور صوبے کے کسانوں کے لیے انتہائی مفید ثابت ہوئی ہے۔ نامیاتی کاشتکاری (آرگینک فارمنگ) ایک نئی ٹیکنالوجی ہے جس پر پینل ڈسکشن کے دوران تفصیل سے بات چیت ہوئی۔ انہوں نے موجودہ پانی کے موثر استعمال کو وقت کی اہم ترین ضرورت قرار دیتے ہوئے بتایا کہ پینل ڈسکشن میں اس موضوع پر مؤثر طریقے سے گفتگو ہوئی۔ سیکریٹری زراعت نے کہا کہ خیبر پختونخوا کے موسمی حالات زیتون کی کاشت کے لیے موزوں ہیں اور محکمہ اس کی مالیاتی اہمیت کو اجاگر کرنے اور کسانوں کو اس کے منافع بخش پہلوؤں سے آگاہ کرنے کے لیے پرعزم ہے۔ نئی زرعی ٹیکنالوجیز کو موسمیاتی تبدیلیوں کے تناظر میں ڈیزائن کیا جانا چاہیے۔ انہوں نے تقریب کے اختتام پر صوبے میں زرعی ترقی کے لیے نجی شعبے کی کاوشوں کی تعریف کی۔ یہ قابل ذکر ہے کہ اس تقریب میں غیر ممالک کے ماہرین، صوبوں کے محققین اور خیبر پختونخوا کے مختلف اضلاع سمیت پورے پاکستان سے تعلق رکھنے والے کسانوں نے بھی شرکت کی۔کانفرنس کے اختتام پر صوبائی وزیر زراعت نے منتظمین میں شیلڈ ز بھی تقسیم کیں۔
۔۔۔۔۔۔۔۔۔۔۔۔۔۔۔

وزیر خوراک خیبرپختونخوا ظاہر شاہ طورو نے مالی سال 2025-26 کے اخراجاتِ جاریہ کے ضمن میں خیبرپختونخوا اسمبلی میں محکمہ خوراک تین اہم مطالباتِ زر پیش کیے، جو ایوان نے بھاری اکثریت سے منظور کر لیے۔ ان مطالبات کا مقصد خوراک کے شعبے میں پالیسی اہداف کی تکمیل، فوڈ سیکیورٹی کو یقینی بنانا، اور ضم اضلاع میں گندم و چینی سے متعلقہ امور کی انجام دہی کے لیے مالی وسائل کی فراہمی ہے۔وزیر خوراک نے محکمہ خوراک کے مطالبہ زر نمبر 49 میں ایوان سے درخواست کی کہ 1 کھرب 13 ارب 10 کروڑ 47 لاکھ 74 ہزار روپے کی رقم اسٹیٹ ٹریڈنگ اِن فوڈ گرین اینڈ شوگر کے مد میں مختص کی جائے تاکہ مالی سال 30 جون 2026 تک اس شعبے کے اخراجات پورے کیے جا سکیں۔ ایوان نے یہ مطالبہ زر بھاری اکثریت سے منظور کر لیا۔
ظاہر شاہ طورو نے مطالبہ زر نمبر 35 میں فوڈ سیکیورٹی نیٹ کے پالیسی اہداف کے لیے 10 ارب 60 کروڑ 1 لاکھ 2 ہزار روپے جاری کرنے کی درخواست پیش کی، تاکہ مالی سال کے دوران درکار اہم اخراجات بروقت ادا کیے جا سکیں۔ یہ مطالبہ بھی اسمبلی نے بھاری اکثریت سے منظور کر لیا۔
اسی طرح وزیر خوراک نے محکمہ خوراک کے مطالبہ زر (ضم اضلاع) نمبر 66 میں مزید 37 کروڑ 9 لاکھ 7 ہزار روپے کی منظوری کی درخواست پیش کی، تاکہ ضم شدہ اضلاع میں اسٹیٹ ٹریڈنگ اِن فوڈ گرین اینڈ شوگر سے متعلق امور کے لیے ضروری فنڈز میسر آ سکیں۔ یہ مطالبہ بھی صوبائی اسمبلی نے اکثریت سے منظور کر لیا۔