وزیراعلی خیبرپختونخوا کے معاون خصوصی برائے اطلاعات و تعلقات عامہ شفیع جان نے معروف صحافی مرحوم سیلاب محسود کو خراج تحسین پیش کرتے ہوئے کہا ہے کہ مرحوم سیلاب محسود کی خدمات ہمارے لئے مشعل راہ ہیں۔ قبائلی خطے کے لئے انکی صحافتی خدمات کو سراہتے ہیں – سیلاب محسود نے ایسے مشکل وقت اور کٹھن حالات میں صحافت کی جب ایف سی آر جیسے کالے قوانین نافذ تھے اور علاقہ دہشت گردی کی لپیٹ میں تھا، ان کی صحافتی خدمات صحافتی برادری کیلئے مثال ہے۔ سیلاب محسود کی ایف سی آر قوانین کے خلاف و انسانی حقوق کے لیے خدمات ہمشہ یاد رکھی جائیں گی۔ معاون خصوصی شفیع جان نے سیلاب محسود کی خدمات کے اعتراف میں گومل یونیورسٹی ڈیرہ اسماعیل خان میں سیلاب محسود چئیر کے قیام اور انکے آبائی علاقے لدھا محسود میں سیلاب محسود کے نام پر پبلک لائبریری کے قیام کا اعلان کیا۔ انہوں نے یہ اعلانات یونیورسٹی آف پشاور کے میوزیم ہال میں محسود پریس کلب کی جانب سے سیلاب محسود کی یاد میں منعقدہ تقریب میں کئے۔ تقریب میں اراکین صوبائی اسمبلی آصف محسود اورطارق سعید سمیت وائس چانسلر گومل یونیورسٹی ڈیرہ اسماعیل خان، قومی مشران، سیاسی و صحافتی برداری اور انکے رفقاء نے شرکت کی۔ وزیراعلی خیبرپختونخوا کے معاون خصوصی برائے اطلاعات و تعلقات عامہ شفیع جان نے تقریب میں بطور مہمان خصوصی شرکت کی۔ تقریب میں صحافی شمس مومند، فخر کاکا خیل، شمیم شاہد، یاسین قریشی سمیت دیگر شرکاء نے مرحوم سیلاب محسود کی صحافتی، ادبی اور سماجی خدمات کو زبردست الفاظ میں خراج تحسین پیش کیا اور انکے ساتھ گزرے ہوئے لمحات کا ذکر کیا۔تقریب سے اپنے خطاب میں معاون خصوصی شفیع جان کا کہنا تھا کہ سیلاب محسود نے ظلم کا مقابلہ قلم سے کیا اور اپنے قلم سے معاشرے کے اصلاح میں اہم کردار ادا کیا۔ سیلاب محسود نے قومی و بین الاقوامی اداروں میں خدمات سر انجام دیں۔ وہ قوم ترقی نہیں کرتی جو اپنے ہیرو بھول جاتے ہیں زندہ قومیں اپنے ہیروز کی قدر کرتی ہیں۔ انہوں نے مزید کہا کہ نوجوان وزیراعلیٰ محمد سہیل آفریدی نے چارج سنبھالنے کے بعد عوامی فلاحی اقدامات کو ترجیح بنایا ہوا ہے اور تمام حکومتی فیصلے عوامی مفاد میں کئے جا رہے ہیں۔ ان کا کہنا ہے کہ صوبے میں پریس کلبز کے مسائل کے حل کے لئے کام کررہے ہیں اور تمام پریس کلبوں کو فنڈز جاری کئے جائیں گے تاکہ صحافتی برادری کے مسائل حل ہوں اور ان کو کام کے بہتر مواقع حاصل ہوں۔ محسود پریس کلب کی جانب سے منعقدہ تقریب میں سیلاب محسود مرحوم کی زندگی پر بنائی گئی ڈاکومنٹری پیش کی گئی۔ قبل ازیں تقریب میں معاون خصوصی شفیع جان کو روایتی پگڑی پہنائی گئی۔ تقریب میں شمالی وزیرستان میران شاہ پریس کلب کے عہدیداران سے ان کے عہدوں کا حلف بھی لیا گیا۔ معاون خصوصی برائے اطلاعات و تعلقات عامہ شفیع جان نے پریس کلب کابینہ سے حلف لیا اور نیک خواہشات کا اظہار کیا۔میڈیا سے اپنے گفتگو میں معاون خصوصی شفیع جان کا کہنا تھا کہ گزشتہ روز کوہاٹ میں پاکستان تحریک انصاف نے تاریخی پاور شو کا انعقاد کیا جسمیں نوجوان وزیراعلی محمد سہیل آفریدی سمیت پارٹی قائدین نے شرکت کی۔ ہم کسی سے لڑنا نہیں چاہتے بلکہ آئین و قانون کی حکمرانی چاہتے ہیں۔ گڈ گورننس میں اگر صوبے ہم سے مقابلہ کرنا چاہتے ہیں تو ہم کسی بھی صوبے سے مقابلے کے لئے تیار ہیں۔ نوجوان وزیراعلی محمد سہیل آفریدی کی ترجیحات میں گڈ گورننس اولین ہے۔ صحافت کی آڑ میں منفی پروپیگنڈا و بلیک میلنگ کو بند کیا جانا چاہیے۔ رجیم چینج کے بعد پاکستان تحریک انصاف کی آواز کو دبایا گیا۔ بانی چیئرمین عمران خان کے نام و تصویر نشر کرنے پر پابندی عائد کی گئی۔ پاکستان تحریک انصاف نے سوشل میڈیا کے ذریعے اپنا بیانیہ پھیلایا۔ پارٹی کی کامیابی میں سوشل میڈیا نے اہم کردار ادا کیا۔ پختونخوا کے عوام کا ایک ہی لیڈر ہے وہ عمران خان ہے۔ عمران خان کی نرسری سے نئی نوجوان قیادت سامنے آئی ہے۔ فارم 47 کی حکومت نے بانی چیئرمین عمران خان کے پیغامات و ملاقاتوں کا سلسلہ بند کردیا ہے۔

چیف سیکرٹری خیبرپختونخوا شہاب علی شاہ کی زیرِ صدارت گورننس امور کے حوالے سے ہفتہ وار جائزہ اجلاس منعقد ہوا جس میں متعلقہ انتظامی سیکرٹریز اور اعلیٰ افسران نے شرکت کی۔ اجلاس میں صوبائی حکومت کی ہدایات پر عوامی خدمت، شفافیت اور گڈ گورننس کے فروغ کیلئے اٹھائے گئے مختلف اقدامات کا تفصیلی جائزہ لیا گیا۔اجلاس کو بریفنگ دیتے ہوئے بتایا گیا کہ صوبے بھر میں ناجائز تجاوزات کے خلاف بلا تفریق کارروائیاں جاری ہیں۔ سرکاری زمینوں پر قائم 1335 غیر قانونی اسٹرکچرز کی نشاندہی کی گئی تھی جن میں سے اب تک 818 تجاوزات ہٹا دی گئی ہیں جبکہ باقی کے خلاف کارروائی جاری ہے۔اجلاس میں دارالحکومت پشاور کی عظمتِ رفتہ کی بحالی کے حوالے سے جاری منصوبوں پر بھی پیش رفت کا جائزہ لیا گیا۔ بریفنگ میں بتایا گیا کہ رنگ روڈ اور جی ٹی روڈ کی بحالی اور خوبصورتی کے کام تیزی سے جاری ہیں، جبکہ پشاور رنگ روڈ مسنگ لنک اور نیو جنرل بس اسٹینڈ کے منصوبے بھی تیزی سے تکمیل کی جانب گامزن ہیں۔توانائی کے شعبے سے متعلق بریفنگ میں بتایا گیا کہ داسو ہائیڈرو پاور پراجیکٹ کے داسو ٹرانسمیشن لائن منصوبے پر عملدرآمد کو تیز کر دیا گیا ہے۔ یہ منصوبہ توانائی کی بڑھتی ہوئی ضروریات پوری کرنے، معاشی ترقی کے فروغ اور سستی بجلی کے حصول میں اہم کردار ادا کرے گا۔سیاحتی مقامات کے ماحولیاتی تحفظ کے حوالے سے اجلاس کو آگاہ کیا گیا کہ ہوٹلوں اور ریسٹورنٹس کو قواعد و ضوابط پر ڈھالا جارہا ہے۔ 535 ہوٹلوں اور ریسٹورنٹس میں سے 474 نے اپنے سیوریج سسٹم کو بہتر بنا لیا ہے جبکہ باقی کو بھی مقررہ وقت میں اصلاحات کی ہدایات دی گئی ہیں۔ اس کے علاوہ سیاحتی مقامات پر لینڈ یوز اور ماسٹر پلاننگ پر عملدرآمد بھی یقینی بنایا جا رہا ہے۔اجلاس میں پشاور کیلئے جدید سالڈ ویسٹ مینجمنٹ سسٹم پر جاری کام کا بھی جائزہ لیا گیا۔ چیف سیکرٹری کو بتایا گیا کہ شہر میں صفائی کے نظام کو جدید خطوط پر استوار کرنے کیلئے مختلف اقدامات کئے جا رہے ہیں۔ڈیجیٹائزیشن کے حوالے سے اجلاس میں بتایا گیا کہ صوبائی حکومت کے کیش لیس نظام، ای رجسٹری اور دیگر ڈیجیٹل اقدامات سے شفافیت کو فروغ ملے گا اور عوام کو بہتر سہولیات فراہم ہوں گی۔اجلاس میں اشیائے خوردونوش کی قیمتوں پر کنٹرول سے متعلق بھی تفصیلی جائزہ لیا گیا۔ چیف سیکرٹری نے ہدایت کی کہ ضلعی انتظامیہ قیمتوں کے تعین اور نگرانی کیلئے باقاعدگی سے اجلاس منعقد کرے اور بازاروں میں چیکنگ کا عمل جاری رکھا جائے۔ اجلاس کو بتایا گیا کہ منافع خوروں اور ذخیرہ اندوزوں کے خلاف صوبائی حکومت نے کارروائیاں مزید تیز کر دی ہیں۔چیف سیکرٹری خیبرپختونخوا شہاب علی شاہ نے اجلاس سے خطاب کرتے ہوئے کہا کہ صوبائی حکومت عوام کو بہتر سہولیات کی فراہمی، شفاف طرزِ حکمرانی اور قانون کی عملداری کیلئے پرعزم ہے۔ انہوں نے متعلقہ افسران کو ہدایت کی کہ جاری منصوبوں کی بروقت تکمیل اور عوامی مفاد کو ہر صورت مقدم رکھا جائے۔

خیبر پختونخوا کے وزیرِ صحت خلیق الرحمٰن نے صوبے کے دور افتادہ اور مشکل رسائی والے اضلاع میں حفاظتی ٹیکہ جات کی سہولیات کو مضبوط بنانے کے لیے موبائل آؤٹ ریچ امیونائزیشن سرگرمیوں کے تحت فراہم کی جانے والی نئی گاڑیاں باضابطہ طور پرمتعلقہ حکام کے حوالے کیں۔ اس موقع پر سیکرٹری صحت شاہد اللہ خان اور ڈائریکٹر ای پی آئی مہتاب بھی موجود تھے۔صوبے کے مجموعی طور پر 16 اضلاع کو معمول کی حفاظتی ٹیکہ جات کی سہولیات تک رسائی بہتر بنانے کے لیے یہ گاڑیاں فراہم کی گئی ہیں۔ ان اضلاع میں جنوبی وزیرستان، مانسہرہ، بنوں، لکی مروت، ڈیرہ اسماعیل خان، اپر دیر، کرک، مہمند، اپر کوہستان، بونیر، تورغر، بٹگرام، شانگلہ، کوہاٹ، چترال اور ٹانک شامل ہیں۔ یہ گاڑیاں دور دراز اور پسماندہ علاقوں میں بچوں کو بروقت حفاظتی ٹیکے لگانے کے لئے استعمال کی جائیں گی۔اس موقع پر گفتگو کرتے ہوئے صوبائی وزیرِ صحت نے گاوی (Gavi)، دی ویکسین الائنس، اور یونیسیف (UNICEF) کا شکریہ ادا کیا اور کہا کہ ان اداروں کے تعاون سے صوبے کے حفاظتی ٹیکہ جات کے نظام کو مزید بہتر بنانے میں مدد مل رہی ہے۔ انہوں نے کہا کہ ان گاڑیوں کی فراہمی سے محکمہ صحت کی آؤٹ ریچ صلاحیت میں نمایاں اضافہ ہوگا اور جغرافیائی مشکلات کے باعث کسی بھی بچے کو حفاظتی ٹیکہ جات سے محروم نہیں رہنے دیا جائے گا صوبائی وزیرِ صحت نے مزید کہا کہ محکمہ صحت صوبائی حکومت کے تعاون سے ایک جامع صحت پالیسی کو حتمی شکل دے رہا ہے، جس کا مقصد صحت کے شعبے میں مضبوط اصلاحات اور مثبت و پائیدار تبدیلیاں متعارف کرانا ہے۔ انہوں نے کہا کہ یہ اصلاحات محکمہ صحت کو مضبوط بنائیں گی اور صوبہ بھر میں صحت کی سہولیات کی یکساں فراہمی کو یقینی بنائیں گی تاکہ ہر شہری کو بلا امتیاز معیاری علاج میسر ہو۔میڈیا نمائندگان کے سوالات کے جوابات دیتے ہوئے صوبائی وزیرِ صحت نے کہا کہ محکمہ صحت موجودہ اور آئندہ چیلنجز سے نمٹنے کے لیے دن رات کام کر رہا ہے۔ انہوں نے آبادی میں تیزی سے اضافے اور محدود صحت کے مراکز کے باعث ہسپتالوں پر بڑھتے ہوئے دباؤ کا اعتراف کرتے ہوئے بتایا کہ صوبائی حکومت نئے ہسپتالوں کے قیام اور موجودہ سہولیات میں توسیع کا منصوبہ رکھتی ہے تاکہ بڑے ہسپتالوں پر بوجھ کم کیا جا سکے۔انہوں نے مزید بتایا کہ محکمہ صحت ڈاکٹرز، نرسز اور پیرا میڈیکل اسٹاف کی نئی آسامیوں کے قیام پر بھی کام کر رہا ہے تاکہ صحت کے اداروں کو مطلوبہ انسانی وسائل فراہم کیے جا سکیں۔ انہوں نے یقین دہانی کرائی کہ آلات، عملے، ادویات کی کمی اور انسانی وسائل سے متعلق مسائل کو ترجیحی بنیادوں پر حل کیا جا رہا ہے اور جلد ان میں بہتری لائی آئے گی۔صوبائی وزیرِ صحت نے اس عزم کا اعادہ کیا کہ صوبائی حکومت مسلسل اصلاحات اور مؤثر سروسز کے ذریعے خیبر پختونخوا کے عوام کے لیے صحت کے نظام کو مضبوط بنانے اور بہتر طبی سہولیات کی فراہمی کے لیے پُرعزم ہے۔

خیبرپختونخوا کے وزیر آبپاشی ریاض خان کے زیر صدارت ان کے دفتر پشاور میں گبرال دریا کالام اور شاہگرام/مدین خوڑ کے کنارے حفاظتی پشتوں، فلڈ مینجمنٹ اور ترقیاتی منصوبوں سے متعلق ایک اہم اجلاس منعقد ہوا۔ اجلاس میں ممبر قومی اسمبلی ڈاکٹر امجد علی خان، ممبر صوبائی اسمبلی میاں شرافت علی خان، سیکرٹری محکمہ آبپاشی عبدالباسط اور متعلقہ افسران نے شرکت کی۔ اجلاس کے دوران خیبرپختونخوا فلڈ ریزیلینس پروجیکٹ (KP-FRP) کے تحت منصوبوں پر تفصیلی بریفنگ دی گئی۔ بریفنگ میں بتایا گیا کہ منصوبے کے تحت مختلف نوعیت کے فلڈ پروٹیکشن اقدامات شامل ہیں جن میں حفاظتی دیواریں، بندات، پشتے، ریٹیننگ والز، بایو انجینئرنگ اسٹرکچرز، پانی کے رخ موڑنے، ذخیرہ کرنے کے منصوبے، ٹیلی میٹری و فلڈ وارننگ سسٹم، نیز اہم ندی نالوں، دریاؤں کی بحالی اور دیگر شامل ہیں۔ ان اقدامات کا مقصد ممکنہ سیلابی خطرات میں کمی، بروقت نکاسی آب اور عوام کی جان و مال کے تحفظ کو یقینی بنانا ہے۔ اس موقع پر ممبران اسمبلی ڈاکٹر امجد علی خان اورمیاں شرافت علی خان نے اپنے اپنے حلقوں کو درپیش مسائل سے صوبائی وزیر ریاض خان کو آگاہ کیا اور فلڈ پروٹیکشن والز، پشتوں اور دیگر ترقیاتی منصوبوں کی ضرورت پر زور دیا۔ صوبائی وزیر آبپاشی ریاض خان نے اجلاس سے خطاب کرتے ہوئے کہا کہ خیبرپختونخوا حکومت وزیراعلیٰ خیبرپختونخوا محمد سہیل آفریدی کی قیادت میں عوام کے جان و مال کے تحفظ اور پائیدار ترقی کے لیے ٹھوس اور دیرپا اقدامات کر رہی ہے۔ انہوں نے کہا کہ صوبائی حکومت کی ترجیح ہے کہ سیلاب سے متاثرہ اور خطرے سے دوچار علاقوں میں جدید سائنسی بنیادوں پر منصوبہ بندی کی جائے تاکہ مستقبل میں نقصانات سے بچا جا سکے۔صوبائی وزیر آبپاشی نے متعلقہ حکام کو ہدایت کی کہ مجوزہ منصوبوں کو شفاف طریقے سے اور مقررہ ٹائم لائن کے اندر مکمل کیا جائے جبکہ منتخب نمائندوں کی سفارشات کو بھی منصوبہ بندی میں شامل کیا جائے۔ انہوں نے کہا کہ صوبائی حکومت عوامی تحفظ اور ترقیاتی اہداف کے حصول کے لیے تمام دستیاب وسائل بروئے کار لائے گی۔ریاض خان نے کہا ہے کہ محکمہ آبپاشی عوام کی فلاح و بہبود اور علاقائی ترقی کے لیے ہر ممکن اور ضروری اقدام کر رہی ہے صوبائی حکومت عوامی مفاد کے منصوبوں کو ترجیحی بنیادوں پر مکمل کر رہی ہے۔ انہوں نے کہا کہ محکمہ آبپاشی میں شفافیت، بہتری اور جدید تقاضوں کے مطابق اصلاحات پر خصوصی توجہ بھی دی جا رہی ہے جس کے مثبت اثرات براہ راست عوام تک پہنچیں گے انہوں نے کہا کہ خیبرپختونخوا کے ہر حلقے میں ترقیاتی منصوبے مکمل کیے جائیں گے تاکہ تمام علاقے یکساں ترقی کے مواقع حاصل کر سکیں۔

خیبر پختونخوا کے وزیر برائے پبلک ہیلتھ انجینئرنگ فضل شکور خان کی زیر صدارت محکمہ کے سنٹرل ریجن پشاور کی نئی ترقیاتی سکیموں سے متعلق ایک اہم اجلاس پشاور میں منعقد ہوا۔جس میں چیف انجینئر سنٹر اور ایکسین سنٹرل ریجن پشاور نے شرکت کی۔ اجلاس میں صوبائی وزیر کو سنٹرل ریجن پشاور میں نئی ترقیاتی سکیموں کے حوالے سے تفصیلی بریفنگ دی گئی۔ بریفنگ میں صاف پینے کے پانی کی فراہمی، نکاسی آب کے نظام کی بہتری، سکیموں کی افادیت، موجودہ ضروریات اور عوامی مسائل کے حل کے لیے ترجیحی منصوبوں پر غور کیا گیا۔صوبائی وزیر فضل شکور خان نے اس موقع پر کہا کہ عوام کو صاف پینے کے پانی اور بہتر نکاسی آب کی سہولیات کی فراہمی موجودہ صوبائی حکومت کی اولین ترجیحات میں شامل ہے انہوں نے ہدایت کی کہ نئی سکیموں پر کام کی رفتار تیز کی جائے اور تمام منصوبوں کو شفافیت، معیار اور مقررہ ٹائم لائن کے مطابق پایہ تکمیل تک پہنچایا جائے۔صوبائی وزیر نے مزید ہدایت جاری کی کہ سنٹرل ریجن پشاور میں عوامی ضروریات کو مدنظر رکھتے ہوئے سکیموں کی منصوبہ بندی کی جائے، فیلڈ لیول پر نگرانی کے نظام کو مؤثر بنایا جائے انہوں نے متعلقہ افسران کو تاکید کی کہ تمام نئی سکیموں کی پیش رفت سے متعلق باقاعدہ رپورٹنگ کو یقینی بنایا جائے محکمہ پبلک ہیلتھ انجینئرنگ سنٹرل ریجن پشاور میں ترقیاتی سکیموں کی بروقت تکمیل کے ذریعے عوام کو زیادہ سے زیادہ ریلیف فراہم کرے گا۔