معاونِ خصوصی شفیع جان اور ایم این اے شہریار آفریدی کے فنڈز سے تین تالاب میں چیک ڈیم منصوبہ پر کام کا باقاعدہ آغاز

ضلع کوہاٹ کی یونین کونسل شاہ پور کے علاقہ تین تالاب میں وزیراعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان اورسابق وفاقی وزیر داخلہ و رکن قومی اسمبلی شہریارخان آفریدی کے فنڈز سے چیک ڈیم کی تعمیر کا شہریار آفریدی کے فوکل پرسن قاسم زبیر کی موجودگی میں باقاعدہ آغاز کر دیا گیا ہے جس کا مقصد علاقے میں پانی کی قلت پر قابو پانا اور عوام کو ریلیف فراہم کرنا ہے۔اس موقع پر معاون خصوصی شفیع جان کا کہناتھاکہ یہ اہم منصوبہ مقامی آبادی کا دیرینہ مطالبہ تھاجو عملی شکل اختیار کر گیاہے۔ ان کے مطابق چیک ڈیم بارش کے پانی کو ذخیرہ کرنے میں مدد دے گا جس سے خشک موسم میں پانی کی دستیابی ممکن ہوگی۔ شفیع جان نے مزید کہاکہ منصوبے سے نہ صرف زرعی پیداوار میں اضافہ ہوگا بلکہ زیر زمین پانی کی سطح بھی بہتر ہوگی جبکہ سیلابی ریلوں کے بہاؤ کو کنٹرول کرنے میں بھی مدد ملے گی۔ مقامی رہائشیوں نے منصوبے کے آغاز کو خوش آئند قرار دیتے ہوئے امید ظاہر کی ہے کہ اس سے علاقے میں پانی کی کمی کے مسائل میں نمایاں کمی آئے گی اور معیشت کو سہارا ملے گا۔