ڈسٹرکٹ اینڈ سیشن جج کوہاٹ کا ضلعی عدالتوں میں ڈبل ڈاکٹ کورٹس سسٹم کا افتتاح، مقدمات کے تیز تر فیصلوں کا عزم

پشاور ہائی کورٹ کی ہدایات پر عمل درآمد کرتے ہوئے ڈسٹرکٹ اینڈ سیشن جج کوہاٹ محترمہ صوفیہ وقار خٹک نے ڈسٹرکٹ کورٹس کوہاٹ میں ڈبل ڈاکٹ کورٹس سسٹم کا باضابطہ افتتاح کر دیا جس کا مقصد مقدمات کے جلد تصفیے اور عدالتی بوجھ میں کمی لانا ہے۔ ڈسٹرکٹ اینڈ سیشن جج کوہاٹ نے افتتاحی تقریب سے خطاب کرتے ہوئے کہا کہ ڈبل ڈاکٹ کورٹس کے قیام سے عدالتی کارکردگی میں نمایاں بہتری آئے گی اور سائلین کو بروقت انصاف کی فراہمی یقینی بنائی جا سکے گی۔ انہوں نے کہا کہ یہ اقدام زیرالتواء مقدمات کو کم کرنے میں کلیدی کردار ادا کرے گا۔تقریب میں انسداد دہشت گردی عدالت کوہاٹ کے جج محمد آصف، ضلعی عدلیہ کے دیگر جوڈیشل افسران، صدر ڈسٹرکٹ بار ایسوسی ایشن کوہاٹ، کابینہ اراکین اور وکلاء برادری کے نمائندوں نے شرکت کی۔ تقریب کے اختتام پر بینچ اور بار نے انصاف کی فوری اور مؤثر فراہمی کیلئے مشترکہ طور پر کام کرنے کے عزم کا اعادہ کیا جبکہ دعا کے ساتھ تقریب کا اختتام ہوا۔