چیئرپرسن خیبر پختونخوا کمیشن برائے وقارِ نسواں ڈاکٹر سمیرا شمس کی ہدایات پر صنفی بنیاد پر تشدد سے متاثرہ افراد کے لیے صوبائی ہیلپ لائن نظام کو مزید مؤثر بنانے کے لیے ایک ذیلی کمیٹی تشکیل دی گئی ہے۔

چیئرپرسن خیبر پختونخوا کمیشن برائے وقارِ نسواں ڈاکٹر سمیرا شمس کی ہدایات پر صنفی بنیاد پر تشدد سے متاثرہ افراد کے لیے صوبائی ہیلپ لائن نظام کو مزید مؤثر بنانے کے لیے ایک ذیلی کمیٹی تشکیل دی گئی ہے .اس سلسلے میں ذیلی کمیٹی کا پہلا اجلاس 14 اپریل 2026 کو کمیشن کے دفتر میں منعقد ہوا، جس کی صدارت ڈاکٹر سمیرا شمس نے کی۔ اجلاس میں متعلقہ اراکین کے ساتھ “بلو ہیلپ لائن” کے منیجر نے بھی شرکت کی۔اجلاس کے دوران “بلو ہیلپ لائن” کی کارکردگی اور چیلنجز پر تفصیلی بریفنگ دی گئی۔ ڈاکٹر سمیرا شمس نے ہدایت کی کہ خواتین کو فوری اور مؤثر مدد فراہم کرنے کے لیے ہیلپ لائن کو مزید مضبوط بنایا جائے۔ انہوں نے کہا کہ سائبر کرائم جیسے بڑھتے ہوئے مسائل کے حل کے لیے متعلقہ اداروں سے بہتر رابطہ ناگزیر ہے۔ڈاکٹر سمیرا شمس نے اس عزم کا اعادہ کیا کہ صوبائی حکومت خواتین کے تحفظ، انصاف تک رسائی اور ان کے حقوق کے لیے ہر ممکن اقدامات جاری رکھے گی۔ انہوں نے کہا کہ ایک مربوط “ون اسٹاپ ہیلپ لائن” کا قیام ایک اہم قدم ہوگا جس سے تمام خدمات ایک پلیٹ فارم پر دستیاب ہوں گی۔اجلاس میں فیصلہ کیا گیا کہ بلو ہیلپ لائن کو ادارہ جاتی اور مالی طور پر مزید مضبوط بنانے کے لیے متعلقہ محکموں سے رابطہ کیا جائے گا، ہیلپ لائن عملے کی صنفی حساسیت کی تربیت کو یقینی بنایا جائے گا، عوامی آگاہی مہم کو مزید تیز کیا جائے گا، شکایات کے لیے ایک مربوط ڈیجیٹل نظام قائم کیا جائے گا، جبکہ اس حوالے سے مزید پیش رفت کے لیے اعلیٰ حکام سے اجلاس بھی کیے جائیں گے۔ڈاکٹر سمیرا شمس نے خصوصی طور پر ہدایت کی کہ خواتین کے تحفظ سے متعلق آگاہی مہمات کو بی آر ٹی کے ساتھ بھی شروع کیا جائے تاکہ زیادہ سے زیادہ عوام تک پیغام پہنچ سکے۔انہوں نے کہا کہ یہ اقدامات خواتین کے تحفظ اور بروقت انصاف کی فراہمی کے نظام کو مزید مضبوط بنانے میں اہم کردار ادا کریں گے۔