خیبر پختونخوا فوڈ اتھارٹی کا 8 ہزار کلو خراب قیمہ و کوفتے، 5 ہزار کلو دل و کلیجی اور جعلی مشروبات برآمد

وزیر اعلیٰ خیبر پختونخوا کی ہدایات پر فوڈ سیفٹی اینڈ حلال فوڈ اتھارٹی نے رمضان المبارک کے دوران غیر معیاری، ملاوٹ شدہ اور مضرِ صحت خوراک کے خلاف صوبہ بھر میں کارروائیاں تیز کر دی ہیں اور مختلف اضلاع میں کارروائیوں کے دوران بڑی مقدار میں ناقص اور مضرِ صحت خوراک برآمد کرکے ضبط کی گئی جبکہ متعدد کاروباروں کے خلاف قانونی کارروائی عمل میں لائی گئی۔ ترجمان فوڈ سیفٹی اتھارٹی نے تفصیلات جاری کرتے ہوئے کہا کہ مردان میں فوڈ سیفٹی ٹیم نے مختلف کارروائیاں کرتے ہوئے ایک قیمہ پروڈکشن یونٹ پر چھاپہ مارا جہاں سے تقریباً 8 ہزار کلو گرام خراب اور غیر معیاری قیمہ و کوفتے برآمد کرکے ضبط کر لیا گیا، جبکہ ولی انٹرچینج پر ناکہ بندی کے دوران ایک بس سے 5 ہزار کلو گرام دل اور کلیجی بھی برآمد کی گئی۔ اسی طرح ایک کارخانے پر چھاپے کے دوران 70 کارٹن زائد المیعاد انسٹنٹ ڈرنک پاؤڈر، 30 کارٹن مس لیبل مصنوعات، تقریباً 100 کلو گرام زیرے کا چھلکا اور ملاوٹ میں استعمال ہونے والے مختلف کلرز اور سپلیمنٹس بھی قبضے میں لے لیے گئے۔فوڈ سیفٹی اتھارٹی نے تمام سامان بحقِ سرکار ضبط کرتے ہوئے مالکان کے خلاف ایف آئی آر درج کر لی ہے اور مزید قانونی کارروائی شروع کر دی گئی ہے۔تفصیلات میں بتایا گیا کہ دوسری جانب مانسہرہ میں فوڈ سیفٹی ٹیم نے کارروائی کے دوران 45 کلو خراب دہی اور 60 کلو غیر معیاری گوشت برآمد کرکے موقع پر تلف کر دیا جبکہ ذمہ داران کو نوٹسز جاری کر دیے گئے۔اسی طرح نوشہرہ کے علاقے امان کوٹ میں ایک فیکٹری پر چھاپے کے دوران 1200 لیٹر کاربونیٹیڈ کولڈ ڈرنکس ضبط کرکے یونٹ کو سیل کر دیا گیا اور مالک پر بھاری جرمانہ عائد کیا گیا۔ اس کے علاوہ ناقص صفائی کی صورتحال پر ایک بیکری یونٹ پر بھی جرمانہ عائد کیا گیا۔ڈائریکٹر جنرل خیبر پختونخوا فوڈ سیفٹی اینڈ حلال فوڈ اتھارٹی کاشف اقبال جیلانی نے رمضان المبارک کے دوران ٹیموں کو مضرِ صحت خوراک کے خلاف کارروائیاں مزید سخت کرنے کی ہدایت جاری کرتے ہوئے کہا ہے کہ انسانی صحت سے کھیلنے والے عناصر کے ساتھ کسی قسم کی رعایت نہیں برتی جائے گی اور ایسے افراد کے خلاف سخت قانونی کارروائی عمل میں لائی جائے گی۔