خیبرپختونخوا فوڈ سیفٹی اینڈ حلال فوڈ اتھارٹی کی صوبہ بھر میں بڑی کارروائیاں

خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیموں نے صوبہ بھر میں غیر معیاری اور مضر صحت خوراک کے خلاف بڑے پیمانے پر کریک ڈاؤن کرتے ہوئے ایک ہفتے کے دوران متعدد کارروائیاں عمل میں لائیں۔ ترجمان فوڈ اتھارٹی نے کاروائیوں کے حوالے سے تفصیلات جاری کرتے ہوئے کہا کہ فوڈ سیفٹی ٹیموں نے مختلف اضلاع میں کارروائیوں کے دوران بھاری مقدار میں جعلی، ایکسپائر اور مضر صحت اشیائے خورونوش برآمد کر کے تلف کر دیں جبکہ متعدد یونٹس کو سیل اور مالکان پر جرمانے بھی عائد کیے گئے۔
تفصیلات کے مطابق خفیہ اطلاع پر پشاور اور نوشہرہ کی ٹیموں نے پبی کے علاقے میں مشترکہ کارروائی کرتے ہوئے 2100 لیٹر جعلی کولڈ ڈرنکس برآمد کر لیں جبکہ 3000 لیٹر موقع پر ہی تلف کر دی گئیں۔ اسی طرح حفظانِ صحت کے اصولوں کی خلاف ورزی پر ایک جوس فیکٹری پر جرمانہ عائد کیا گیا۔ پشاور فوڈ سیفٹی ٹیم نے ضلع مہمند میں گھی ملز کا معائنہ کرتے ہوئے 560 لیٹر ایکسپائر کیمیکلز پکڑ کر تلف کیے اور مالکان پر جرمانے عائد کیے۔ اسی طرح فوڈ سیفٹی ٹیم نے مردان میں مصالحہ یونٹ اور گوشت کی دکانوں کے معائنے کے دوران ناقص صفائی، مس لیبلنگ اور غیر معیاری اشیاء پر کارروائی کرتے ہوئے 300 کلو غیر معیاری مصالحہ برآمد کر کے یونٹ سیل کر دیا گیا اور قانونی کارروائی شروع کر دی گئی جبکہ ایک گوشت کی دکان سے 50 کلو خراب گوشت برآمد کر کے تلف کیا گیا۔
نوشہرہ کے رسالپور انڈسٹریل اسٹیٹ میں کارروائیوں کے دوران 1760 لیٹر ایکسپائرڈ فروٹ پلپ تلف کیا گیا۔ ہری پور میں ضلعی انتظامیہ کے ہمراہ موبائل لیب کے ذریعے دودھ کے نمونوں کی جانچ کی گئی جہاں 300 لیٹر مضر صحت دودھ تلف کر کے جرمانے عائد کیے گئے۔ رپورٹ میں بتایا گیا کہ ڈیرہ اسماعیل خان میں فوڈ سیفٹی ٹیم نے گودام پر چھاپے کے دوران 10 ہزار لیٹر غیر معیاری مشروبات برآمد کر کے تلف کیے گئے جبکہ کوہاٹ میں کوہاٹ اور بنوں ٹیموں نے مشترکہ کارروائی کرتے ہوئے 2550 لیٹر جعلی و مضر صحت مشروبات برآمد کیں۔ سوات میں قیمہ کی دکان پر چھاپے کے دوران 2300 کلو مضر صحت قیمہ برآمد کر کے تلف کیا گیا اور ایک بڑے نیٹ ورک کو بے نقاب کیا گیا۔ ملاکنڈ میں خفیہ اطلاع پر گھی کے کارخانے پر کارروائی کرتے ہوئے مس لیبل گھی برآمد کیا گیا جبکہ 200 لیٹر غیر معیاری و ایکسپائر گھی ضبط کر کے کارخانہ سیل کر دیا گیا۔
ترجمان کے مطابق مختلف اضلاع میں حفظانِ صحت کے اصولوں کی خلاف ورزی پر مالکان کو بھاری جرمانے عائد کیے گئے اور مزید قانونی کارروائی کا آغاز بھی کر دیا گیا ہے۔
ڈائریکٹر جنرل فوڈ اتھارٹی کاشف اقبال جیلانی نے کامیاب کارروائیوں پر فوڈ سیفٹی ٹیموں کو سراہا اور کہا کہ عوام کو محفوظ اور معیاری خوراک کی فراہمی یقینی بنانے کے لیے کارروائیاں بلا تعطل جاری رہیں گی اور شہریوں کی صحت سے کھیلنے والوں کے ساتھ کسی قسم کی نرمی نہیں برتی جائے گی۔