مریم نواز کا پنجاب ائیر لائن بنانے کا فیصلہ مضحکہ خیز ہے، بیرسٹر ڈاکٹر سیف

تعجب ہے کہ چچا قومی اثاثے اونے پونے داموں بیچ رہے ہیں جبکہ بھتیجی خرید رہی ہے، مشیر اطلاعات

وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے وزیر اعلیٰ پنجاب مریم نواز کے پنجاب ائیر لائن بنانے کے فیصلے کومضحکہ خیز قرار دیتے ہوئے تعجب کا اظہار کیا ہے کہ مریم نواز کے چچا قومی اثاثے اونے پونے داموں بیچ رہے ہیں جبکہ بھتیجی خرید رہی ہے۔ اپنے ایک بیان میں بیرسٹر ڈاکٹر سیف نے کہا کہ کاپی کیٹ مریم نواز نے پی آئی اے خریدنے میں بھی علی امین کی کاپی کی ہے،علی امین گنڈاپور کے منصوبے کاپی کرنے میں راج کماری مریم نواز کا کوئی ثانی نہیں ہے اورسوال یہ ہے کہ مریم نواز پی آئی اے خرید کر اپنے لئے ٹھیک کرسکتی ہیں تو ان کے والد اور چچا حکمرانی کی کئی باریاں لے کر کیوں ٹھیک نہ کرسکے۔بیرسٹر ڈاکٹر سیف نے کہا کہ ملکی مفادات کو ذاتی مفادات پر قربان کرنا شریف خاندان کا شیوہ ہے اور اب عوام کے پیسوں سے بنائی جانے والی پی آئی اے کی ائیر لائن شریف خاندان کے لئے استعمال ہوگی اور شریف خاندان سر درد کی دوائی لینے کے لئے بھی طیارہ لندن بھیجے گا۔ بہتر یہی ہوگا کہ ائیر لائن کا نام جاتی امراء ائیر لائن رکھ لیں۔ انہوں نے کہا ایسا نہ ہو کہ اب مریم نواز پائلٹ کی وردی پہن کر ٹک ٹاک بنانے لگ جائیں۔