جنگ بندی کے بعد بالآخر نواز شریف منظر عام پر آگئے۔بیرسٹر سیف

جنگ بندی کے بعد بالآخر نواز شریف منظر عام پر آگئے۔بیرسٹر سیف
دوران جنگ باپ بیٹی نے چپ کا روزہ رکھا تھا۔مشیر اطلاعات
بھارت کو للکارنے والا مرد مجاہد عمران خان ہی ہے۔ بیرسٹر سیف
وزیراعلیٰ خیبر پختونخوا کے مشیر برائے اطلاعات وتعلقات عامہ بیرسٹر ڈاکٹرسیف نے کہا ہے کہ سیز فائر کے بعد بالآخر نواز شریف نمودار ہوئے ہیں۔ نواز شریف کی خدمت میں عرض ہے کہ جو مکا اور تھپڑ جنگ کے بعد یاد آئے، اُسے اپنے ہی منہ پر مار لینا چاہیے۔ سیز فائر کے بعد نواز شریف کے بیانات خود اُن پر الٹ رہے ہیں۔اپنے دفتر سے جاری بیان میں مشیر اطلاعات بیرسٹر ڈاکٹر سیف نے کہا کہ دوران جنگ باپ بیٹی دونوں نے منہ پر پٹی باندھی تھی اور چپ کا روزہ رکھا تھا جبکہ اب سیز فائر کے بعد دونوں ایسے نمودارہوئے ہیں جیسے بھارت انہوں نے فتح کرلیا ہو۔ انہوں نے کہا کہ ملک کے حقیقی لیڈر عمران خان نے قید میں رہ کر بھی مودی کو للکاراجبکہ نواز شریف نے آزاد ہو کر بھی مودی اور بھارت کے خلاف ایک لفظ نہیں بولا۔ پھر کہتے ہیں قوم عمران خان کے پیچھے کیوں کھڑی ہے۔ انہوں نے کہا کہ پاک بھارت کشیدگی میں نواز شریف نے مودی سے یاری کاپاس رکھا اور مکمل خاموش رہے۔ بیرسٹر ڈاکٹرسیف نے کہا کہ مودی کو للکارنے والا مردِ مجاہد صرف عمران خان ہے، نواز شریف میں یہ جرأت نہیں، نواز شریف صرف جاتی امرا میں مودی کی خاطر تواضع کر سکتے ہیں۔ بیرسٹر ڈاکٹرسیف نے کہا کہ جعلی حکومت صرف عمران خان کے خلاف جعلی مقدمات بنانے میں مہارت رکھتی ہے، فارم 47 کی حکومت موجودہ حالات میں بھی سیاسی بغض و عناد سے باز نہیں آ رہی، انہوں نے مزید کہا کہ پاکستان کو ایک قوم بنانے والا واحد لیڈر عمران خان ہے۔ عمران خان کو فوری طور پر رہا کیا جانا چاہیے۔بیرسٹر ڈاکٹرسیف نے کہا کہ موجودہ کشیدہ حالات میں خیبر پختونخوا سمیت پوری قوم دشمن کے خلاف متحد ہے اور سیسہ پلائی دیوار بنی ہوئی ہے، دشمن کے خلاف شاہینوں نے شاندار فتح حاصل کرکے پوری قوم کا سر فخر سے بلند کیا ہے