مشیر زراعت خیبر پختونخوا میاں محمد عمر سے ورلڈ بینک وفد کی ملاقات، زرعی ترقی اور کسانوں کی فلاح کے لیے تعاون مزید مضبوط بنانے پر اتفاق

وزیراعلیٰ خیبر پختونخوا کے مشیر برائے زراعت میاں محمد عمر سے ورلڈ بینک کے ایک اعلیٰ سطحی وفد نے جمعرات کے روز خیبر پختونخوا ہاؤس اسلام آباد میں ملاقات کی۔ ملاقات کے دوران صوبے میں مجوزہ زرعی ترقیاتی منصوبے کے مختلف پہلوؤں، اہداف اور متوقع نتائج پر تفصیلی تبادلہ خیال کیا گیا۔ورلڈ بینک وفد نے مشیر زراعت کو بریفنگ دیتے ہوئے بتایا کہ مجوزہ منصوبہ 171 ملین امریکی ڈالر کے انٹرنیشنل ڈویلپمنٹ ایسوسی ایشن (IDA) کریڈٹ کے ذریعے مالی معاونت حاصل کرے گا۔ منصوبے کا مقصد خیبر پختونخوا میں زرعی پیداوار اور پیداواری استعداد میں اضافہ، آبپاشی کے نظام کی جدید خطوط پر بہتری، چھوٹے کاشتکاروں کی تکنیکی و ادارہ جاتی صلاحیتوں کا فروغ اور زرعی مصنوعات میں ویلیو ایڈیشن کے ذریعے کسانوں کی آمدن میں پائیدار اضافہ یقینی بنانا ہے۔اس موقع پر مشیر زراعت میاں محمد عمر نے کہا کہ خیبر پختونخوا حکومت زرعی شعبے کی جامع اور پائیدار ترقی کو اپنی ترجیحات میں سرفہرست رکھتی ہے اور کسان برادری کی فلاح و بہبود کے لیے عملی اقدامات جاری ہیں۔ انہوں نے کہا کہ ورلڈ بینک کے اشتراک سے مجوزہ منصوبہ صوبے کے زرعی شعبے کی جدیدکاری، وسائل کے مؤثر استعمال اور دیہی معیشت کے استحکام میں نمایاں کردار ادا کرے گا۔انہوں نے مزید کہا کہ چھوٹے کاشتکار صوبے کی زرعی معیشت کا بنیادی ستون ہیں، لہٰذا ان کی استعداد کار میں اضافہ، جدید زرعی ٹیکنالوجی تک رسائی، موسمیاتی تبدیلیوں سے مطابقت رکھنے والی کاشتکاری کے فروغ اور منڈیوں تک بہتر رسائی کو یقینی بنانا حکومت کی اہم ترجیحات میں شامل ہے۔ ان کے مطابق اس منصوبے کے تحت کسانوں کو جدید مہارتوں، تکنیکی معاونت اور کاروباری مواقع کی فراہمی سے زرعی شعبے میں پیداواری صلاحیت، مسابقت اور پائیدار ترقی کو فروغ ملے گا۔ملاقات کے دوران دونوں فریقین نے منصوبے پر مؤثر اور بروقت عملدرآمد، ادارہ جاتی تعاون کے فروغ اور خیبر پختونخوا کے زرعی شعبے کی ترقی کے لیے باہمی اشتراک کو مزید مضبوط بنانے کے عزم کا اظہار کیا۔ملاقات میں سیکرٹری زراعت خیبر پختونخوا ڈاکٹر محمد بختیار خان، ڈائریکٹر جنرل آن فارم واٹر مینجمنٹ حیات خان، ڈائریکٹر آن فارم واٹر مینجمنٹ رب نواز بھی موجود تھے۔