خصوصی افراد کی فلاح و بہبود، ہم سب کی مشترکہ ذمہ داری ہے:ڈاکٹر امجد علی

خصوصی افراد کی فلاح و بہبود اور انہیں معاشرے میں باعزت اور خودمختار زندگی گزارنے کے لیے سہولیات کی فراہمی کے سلسلے میں وہیل چیئرز کی تقسیم کی تقریب منعقد ہوئی، جس میں خیبر پختونخوا کے وزیر برائے ہاؤسنگ ڈاکٹر امجد علی نے خصوصی افراد میں وہیل چیئرز تقسیم کیں۔
اس موقع پر صوبائی وزیر ڈاکٹر امجد علی نے کہا کہ خصوصی افراد ہمارے معاشرے کا اہم حصہ ہیں اور ان کی ضروریات کا خیال رکھنا ہم سب کی مشترکہ ذمہ داری ہے۔ انہوں نے کہا کہ حکومت خصوصی افراد کو ہر ممکن سہولت اور معاونت فراہم کرنے کے لیے ٹھوس اقدامات اٹھا رہی ہے تاکہ انہیں روزمرہ زندگی میں درپیش مشکلات میں کمی لائی جا سکے۔
انہوں نے کہا کہ پی کے-7 کے تمام ویلیج کونسلز سے تعلق رکھنے والے رجسٹرڈ خصوصی افراد میں وہیل چیئرز تقسیم کی گئی ہیں، جس کا مقصد انہیں نقل و حرکت میں آسانی فراہم کرنا اور ان کے معیارِ زندگی کو بہتر بنانا ہے۔تقریب کے دوران خصوصی افراد اور اہلِ علاقہ نے فلاحی اقدام کو سراہتے ہوئے صوبائی وزیر ڈاکٹر امجد علی کا شکریہ ادا کیا اور اسے خصوصی افراد کی عملی معاونت کے حوالے سے ایک قابلِ تحسین قدم قرار دیا۔