وزیر برائے ابتدائی و ثانوی تعلیم خیبرپختونخوا فیصل خان ترکئی کی زیر صدارت صوبے کے تمام چیئرمین تعلیمی بورڈز سربراہان کا ایک اعلیٰ سطحی اجلاس منعقد ہوا، جس میں سالانہ میٹرک امتحان 2025 کی تیاریوں کا جائزہ لیا گیا۔اجلاس میں سیکرٹری تعلیم مسعود احمد، اسپیشل سیکرٹریز قیصر عالم، اور خدا بخش، ایڈیشنل سیکرٹریز، تمام چیئرمین بورڈز، ڈائریکٹر تعلیم، کمیونیکیشن سپیشلسٹ محکمہ تعلیم اور دیگر سینئر افسران نے شرکت کی۔صوبہ بھر میں میٹرک سالانہ امتحان 8 اپریل سے شروع ہو رہے ہیں۔ وزیر تعلیم کو بتایا گیا کہ صوبہ بھر میں 475807 طلبہ نویں جماعت کے امتحانات جبکہ 444404 طلبہ دسویں جماعت کے امتحانات دیں گے۔ صوبہ بھر میں کل 3634 امتحانی مراکز قائم کئے گئے ہیں جبکہ سپروائزری عملے کی تعداد 25810 ہے۔ تمام چیئرمین بورڈز نے اجلاس میں اپنی اپنی تیاریوں پر بریفنگ دی اور بتایا کہ امتحانات کے حوالے سے تمام تر انتظامات مکمل کر لئے گئے ہیں جن میں طلبہ کے بیٹھنے کے لئے فرنیچر، واش روم، بجلی، پانی، نگران عملہ کی ڈیوٹیز، اسٹیشنری، انسپیکشن ٹیموں کی تشکیل، پرچے کی ترسیل اور دیگر تمام امور شامل ہیں۔وزیر تعلیم فیصل خان ترکئی نے اجلاس سے خطاب کرتے ہوئے کہا کہ امتحانات میں نقل اور دیگر غیر قانونی ذرائع کے استعمال کے خلاف زیرو ٹالرنس پالیسی اپنائی جائے گی۔ انہوں نے ہدایت کی کہ طلبہ کو امتحان کے دوران اعتماد دیا جائے اور انسپیکشن عملہ بلا ضرورت طلبہ کو پریشان نہ کریں۔ وزیر تعلیم نے ای ایم آئی ایس سیل کو ہدایت کی کہ تمام بورڈز کے ساتھ کوآرڈینیشن کر کے محکمانہ سطح پر ایک مرکزی سی سی ٹی وی مانیٹرنگ سیل قائم کیا جائے۔سیکرٹری تعلیم مسعود احمد نے خیبرپختونخوا تعلیمی بورڈز چیئرمین کمیٹی (KPBCC) کے سربراہ کو ہدایت کی کہ ہر بورڈ کی سطح پر ایک کنٹرول روم قائم کیا جائے جبکہ ایڈیشنل سیکرٹری (جنرل) کو ہدایت کی کہ محکمہ تعلیم کی سطح پر بھی ایسا ہی سیل قائم کیا جائے جہاں سے امتحانات کی مانیٹرنگ کی جا سکے۔ انہوں نے اس بات پر زور دیا کہ طلبہ کو غیر ضروری معائنوں کے باعث ذہنی دباؤ یا الجھن کا شکار نہ کیا جائے۔مزید برآں، سیکرٹری تعلیم نے ہدایت کی کہ سیکریٹریٹ میں قائم انفارمیشن ڈیسک کی جانب سے تمام بورڈز کے تعاون سے روزانہ کی بنیاد پر رپورٹ تیار کی جائے گی، جو متعلقہ اعلیٰ حکام کو بروقت ارسال کی جائے گی- محکمہ تعلیم کی جانب سے ہاٹ لائن نمبر، واٹس ایپ نمبر اور محکمہ تعلیم کی ویب سائٹ پر شکایات پورٹل بھی قائم کر دیا گیا ہے۔

خیبر پختونخوا حکومت کی نئی سالانہ اے ڈی پی کسان دوست ہوگی۔سجاد بارکوال
خیبر پختونخواکے وزیر زراعت میجر ریٹائر سجاد بارکوال نے کہا ہے کہ صوبائی حکومت کی نئی سالانہ اے ڈی پی کسان دوست ہوگی اور صوبے میں زراعت کی ترقی کے لیے بھرپور اقدامات اٹھائے جائیں گے۔ پیر کے روز پاکستان تحریک انصاف کے مرکزی سیکرٹری اطلاعات شیخ وقاص اکرم کے ہمراہ پشاور میں ایک پریس کانفرنس سے خطاب کرتے ہوئے انہوں نے کہا کہ صوبے میں بیج کی نئی اقسام متعارف کروائی جا رہی ہیں جس کے لیے محکمہ زراعت نے بھرپور اقدامات شروع کر دئیے ہیں۔ انہوں نے کہا کہ سات اضلاع میں کسانوں کو مفت بیج فرام کئے گئے ہیں اور صوبے کے دیگر اضلاع میں بھی اسی طرح بیج کی فراہمی جلد شروع کی جائے گی۔صوبائی وزیر نے کہا کہ نئی اے ڈی پی میں ایسے منصوبے شروع کیے جائیں گے جن کی بدولت کسانوں کو زیادہ سے زیادہ ریلیف مل سکے۔انہوں نے کہا کہ کچن گارڈننگ کے نام سے ایک ایسا منصوبہ شروع کیا جا رہا ہے جس کے ذریعے سکولوں میں بچوں اور بچیوں کو مختلف سبزیاں اگانے کی تربیت سے روشناس کرایاجائے گا تاکہ وہ کم جگہ میں اپنے لئے زیادہ سے زیادہ سبزیاں پیدا کر سکیں۔ صوبائی وزیر زراعت نے کہا کہ پاکستان تحریک انصاف کے بانی عمران خان کے ویژن اور وزیر اعلیٰ کی ہدایات کے مطابق صوبے میں زراعت کی ترقی کے لیے ترجیحی بنیادوں پر اقدامات اٹھانے کے ساتھ ساتھ عوام کی امنگوں کے مطابق فصلوں کی پیداوار میں اضافہ کرنے اور زمینداروں اور کسانوں کے مسائل حل کرنے کے لیے تمام وسائل بروئے کار لائے جا رہے ہیں۔

وزیراعلیٰ خیبرپختونخوا کے معاون خصوصی برائے توانائی و برقیات انجینئر طارق سدوزئی نے ضلع مردان میں 2.6 میگاواٹ کے حامل مچئی پن بجلی گھر کاتفصیلی دورہ کیا۔ اس دوران چیف انجینئر انجینئر جواد حیدر سمیت دیگر اعلیٰ حکام بھی موجود تھے، دورے کے موقع پر معاون خصوصی کو چیف انجینئر نے بجلی گھر سے بجلی کی پیداوار، عملے اور دیگر اہم امور کے حوالے سے تفصیلی بریفنگ دی معاون خصوصی انجنئیر طارق سدوزئی نے مچئی پن بجلی گھر سے بجلی کی پیداوار کو خوش آئند قرار دیتے ہوئے کہا کہ صوبے میں مکمل دیگر پن بجلی گھروں کی طرح یہ مچئی پن بجلی گھر بھی صوبائی حکومت کے توانائی کے شعبے کو اہمیت دینے کے عزم کی عکاسی ہے، توانائی کا شعبہ ہماری اولین ترجیحات میں شامل ہے یہی وجہ ہے کہ پیڈو کے زیر انتظام صوبے کے کئی اضلاع میں پن بجلی منصوبوں پر تیزی سے کام جاری ہے جسکی تکمیل سے نہ صرف لوگوں کو سستی بجلی مہیا ہوگی بلکہ روزگار کے وسیع مواقع بھی پیدا ہونگے بعدازاں معاون خصوصی نے پن بجلی گھر کے مختلف حصوں کا معائنہ کیا اور شجرکاری مہم کے تحت ایک پودا بھی لگایا دریں اثناء معاون خصوصی برائے توانائی انجنئیر طارق سدوزئی نے شیخ ملتون ٹاؤن مردان میں مساجد کا بھی دورہ کیا جہاں انھوں نے صوبائی حکومت کی مساجد کی سولرائزیشن منصوبے کے تحت نصب سولر سسٹمز کا معائنہ کیا اس موقع پر پراجیکٹ منیجر سولرائزیشن عامر آفرید ی نے انھیں تفصیلی بریفنگ دی۔معاون خصوصی انجنئیر طارق سدوزئی نے پشاور صدر اور چغلپورہ میں واقع مساجد کے بھی دورے کئے اوروہاں نصب سولر سسٹمز کا معائنہ کیا اس موقع پر موجود لوگوں نے صوبائی حکومت کے اس منصوبے کو سراہا، پراجیکٹ ڈائریکٹر سولر اسفندیار نے معاون خصوصی کو بریفنگ دی، انجنئیر طارق سدوزئی نے مساجد کو شمسی توانائی پر منتقلی کے منصوبے کو انقلابی منصوبہ قرار دیا اور ہدایت کی کہ اس منصوبے کو جلد از جلد مکمل کیا جائے تاکہ اسکے ثمرات سے صوبے کے لوگ مستفید ہو سکیں۔

وزیر اعلیٰ خیبر پختونخوا کے معاون خصوصی برائے صنعت عبدالکریم تورڈھیر نے صوابی کے علاقے انبار شگئی میں نئی تعمیر ہونے والی جنازگاہ کا افتتاح کیا۔اس ترقیاتی منصوبے پر ایک کروڑ اور دس لاکھ روپے لاگت آئی ہے۔اس موقع پر صوبائی وزیر آبپاشی کے فوکل پرسن سہیل خان بھی ان کے ہمراہ تھے۔ افتتاحی تقریب میں پارٹی کے سینئر ورکرعابد حسین سمیت تنظیمی عہدیداران اور علاقہ کے معززین و عوام نے شرکت کی۔علاقے کے مکینوں نے اس اہم اور دیرینہ ضرورت کو پورا کرنے پر معاون خصوصی عبدالکریم تورڈھیر کاشکریہ ادا کیا اور ان کی کاوشوں کو سراہا اور کہا کہ مذکورہ سہولت کی دستیابی سے اہلِ محلہ کو اس حوالے سے پریشانیوں کا سامنا نہیں ہوگا۔افتتاح کے دوران عبدالکریم تورڈھیر نے اپنے خطاب میں کہا کہ یہ منصوبہ علاقہ کے عوام کی ایک دیرینہ ضرورت اور خواہش تھی اور میں اس بات پر خوش ہوں کہ ہم نے اس ضرورت کو پورا کرنے میں کامیابی حاصل کی۔انھوں نے کہا کہ میری ہمیشہ کوشش رہی ہے کہ ہم عوامی مسائل کو ترجیح دیں اور ان کے لیے سہولتیں فراہم کریں۔ اس جنازگاہ کی تعمیر ایک اہم قدم ہے جس سے انبار شگئی اور ارد گرد کے علاقوں کے عوام کو مدد ملے گی اور ان شاء اللہ، ہم اسی جذبے کے ساتھ دوسرے ترقیاتی منصوبوں پر بھی کام کرتے رہیں گے تاکہ عوام کی زندگی میں بہتری آ سکے۔ تقریب کے دوران علاقہ کے لوگوں نے عبدالکریم تورڈھیر کا شکریہ ادا کیا اور علاقے کی تعمیر وترقی کیلئے ان کی محنت کو سراہا۔

خیبر پختونخوا کے وزیر برائے پبلک ہیلتھ انجینئرنگ پختون یار خان نے بنوں قومی امن جرگے سے خطاب کرتے ہوئے کہا ہے کہ خیبر پختونخوا کی حکومت بنوں کے عوام کی تعمیر و ترقی اور امن و امان کے قیام کیلئے کوشاں ہے وہ عوام کی بہتری,ترقی,خوشحالی اور امن و امان کی فضا کی بحالی کیلئے تمام ممکنہ اقدامات اٹھا رہی ہے۔ عوام کی فلاح و بہبود کی تگ ودو سے ایک انچ بھی پیچھے نہیں ہٹیں گے میرا جینا مرنا قوم کے ساتھ ہے ہم اپنی قوم کو امن کی طرف لے جانے کیلئے اپنا کردار ادا کریں گے انہوں نے کہاکہ اسمبلی کے فلور پر قوم کیلئے امن کی آواز اٹھانے سے پہلے بھی خوفزدہ نہیں تھا آئندہ بھی خوف محسوس نہیں کیا جائے گا بلاخوف و جھجک اسمبلی کے فلور پر قوم کی نمائندگی و ترجمانی کی ہے آئندہ بھی کریں گے خیبر پختونخوا و خاص کر بنوں ڈویژن میں امن کی بحالی کیلئے مل کر جدوجہد کریں گے امن ہم سب کا مشترکہ مسئلہ ہے انہوں نے کہاکہ خدا کا لاکھ لاکھ شکر ہے ہم نے قوم کی ترجمانی میں کوئی کسر نہیں چھوڑی۔ امن و امان کی فضا نہ ہو تو ترقیاتی کام کیسے ہوں گے پہلا کام امن و امان کے قیام کیلئے تگ ودو کرنا ہے امن کی فضاء بحال نہ ہو تو سب کچھ بے مقصد ہے ہم سب نے ایک عہد کے تحت مل کر اتحاد و اتفاق کی فضاء کو بحال کرنا ہے۔ انہوں نے کہاکہ یہ وقت ایک دوسرے پر تنقید کرنے کا نہیں بلکہ اتفاق و اتحاد اور تعمیری سوچ رکھنے کا وقت ہے قوم کا نہ سودا کیا اور نہ ہی کریں گے انہوں نے واضح کیا کہ فوجی آپریشن اور دہشت گردی خواہ وہ کسی بھی شکل میں ہو کل بھی مخالفت کی ہے اور آئندہ بھی مخالفت کریں گے محکمہ سی ٹی ڈی اور پولیس کو فعال کیا جارہا ہے 16 نکاتی ایجنڈے پر عمل درآمد کیا جارہا ہے قوم کا ایک ایک مطالبہ پورا کرکے دم لیں گے۔

چیف سیکرٹری خیبر پختونخوا شہاب علی شاہ کی زیر صدارت اعلیٰ سطح کا اجلاس منعقد ہوا جس میں انتظامی سیکرٹریز اور متعلقہ افسران نے شرکت کی۔ اجلاس میں مختلف محکموں کی کارکردگی کا جائزہ لیا گیا اور گورننس کو مؤثر، شفاف اور عوامی خدمات کی فراہمی کو تیز تر بنانے کے لیے اہم ہدایات جاری کی گئیں۔اجلاس کے دوران چیف سیکرٹری نے بتایا کہ صوبے میں پیپر ورک کے خاتمے اور ڈیجیٹل طرز حکمرانی کے لیے ”ای آفس سسٹم” کا نفاذ عمل میں لایا جا رہا ہے، جس کی باقاعدہ لانچنگ 30 اپریل کو متوقع ہے۔ سسٹم اس وقت آزمائشی مرحلے میں ہے اور اس کے فعال ہونے کے بعد شفافیت، وقت کی بچت اور انتظامی کارکردگی میں نمایاں بہتری متوقع ہے۔چیف سیکرٹری نے سرمایہ کاری کے فروغ کے لیے پلاننگ اینڈ ڈویلپمنٹ ڈیپارٹمنٹ میں ”اسپیشل انویسٹمنٹ فسیلیٹیشن کونسل (SIFC)” سیل کے قیام کو اہم پیش رفت قرار دیا۔ SIFC کے تحت ورکنگ گروپس تشکیل دئیے جا چکے ہیں، جبکہ سرمایہ کاری کی ترجیحات اور ممکنہ منصوبہ جات پر مشتمل پراجیکٹ انوینٹری دستاویز 30 مئی تک جاری کی جائے گی۔ انہوں نے متعلقہ محکموں کو ہدایت کی کہ عوامی فائدے کے پیش نظر ایسے منصوبے ترجیحی بنیادوں پر مکمل کیے جائیں جو یا تو مکمل ہونے کے قریب ہیں یا جن کا عوامی مفاد سے گہرا تعلق ہے۔ترقیاتی فنڈز کے اجراء اور استعمال کا جائزہ لیتے ہوئے چیف سیکرٹری نے ہدایت کی کہ عوامی فلاح و بہبود سے متعلق سکیموں پر تیزی سے اخراجات یقینی بنائے جائیں۔ انہوں نے بتایا کہ اہم منصوبوں کی بروقت تکمیل کے لیے ایک مرکزی پراجیکٹ ٹریکنگ سسٹم بھی فعال کیا گیا ہے، اور تمام محکموں کو اس حوالے سے مکمل عملدرآمد کی ہدایت دی گئی ہے۔اجلاس میں پبلک پرائیویٹ پارٹنرشپ (PPP) کے تحت سیاحت کے فروغ کے لیے مجوزہ منصوبوں پر بھی تبادلہ خیال کیا گیا، جن میں تفریحی پارکس اور موٹرویز شامل ہیں۔ مزید برآں، صوبے میں حال ہی میں قائم کی گئی آٹھ پرائمری سکولوں کو پبلک پرائیویٹ ماڈل کے تحت آؤٹ سورس کرنے کا فیصلہ بھی کیا گیا ہے۔ چیف سیکرٹری نے تمام نئے پبلک پرائیویٹ منصوبوں کے لیے واضح ٹائم لائنز تیار کرنے کی ہدایت دی تاکہ ان کا مؤثر نفاذ ممکن بنایا جا سکے۔خریداری کے نظام میں اصلاحات کے سلسلے میں، چیف سیکرٹری نے کہا کہ آٹھ اہم محکموں میں نافذ کردہ ”ای-پیڈز ای پروکیورمنٹ سسٹم” کو تمام محکمانہ ٹینڈرنگ کے لیے لازمی قرار دیا گیا ہے، اور اس نظام کی یکم جولائی سے تمام محکموں تک توسیع دی جائے گی۔اجلاس کے دوران انفراسٹرکچر سے متعلق منصوبوں پر بھی اپ ڈیٹس پیش کی گئیں، جن میں رنگ روڈ کی ناردرن سیکشن پر پیش رفت اور پشاور ڈیویلپمنٹ اتھارٹی (PDA) کے تحت ریگی ماڈل ٹاؤن اور حیات آباد کے ماڈل سیکٹر کی ترقیاتی منصوبہ بندی شامل ہے۔

بروز اتوار ٹینٹ پیگنگ، کشتی، کوڈی اور دودا کے مقابلوں کا انعقاد کیا گیا۔اتوار کے روز منعقد ہونے والے مختلف ایونٹس کے موقع پر ممبر نیشنل اسمبلی فیصل امین گنڈ ہ پور اور تحصیل میئر عمر امین گنڈہ پور سپورٹس کمپلیکس میں موجود رہے جبکہ مذکورہ ایونٹس اور میلے میں دلچسپی رکھنے والے شائقین نے کثیر تعداد میں سپورٹس کمپلیکس کا رخ کیا۔ٹینٹ پیگنگ کے ایونٹ میں اتوار کے روز 70سے زائد رائیڈر کلبز نے شرکت کی اور اپنے جوہر دکھائے جس سے شائقین کافی لطف اندوز ہوئے اور تالیوں کی گونج میں گُھڑ سواروں کو داد ملتی رہی۔ٹینٹ پیگنگ کے سلسلے میں اسلام آباد سے آئے ہوئے خواتین رائیڈر کلب نے بھی پرفارم کیا جسے کافی سراہا گیا۔اسی طرح کوڈی اور دودا کے ایونٹس میں بھی علاقائی اور دو ر دراز کے نامور پہلوانوں نے حصہ لیا۔ اتوار کے روز دیگر ایونٹس میں سیک لفٹنگ، سٹون لفٹنگ، وغیرہ بھی شامل کیے گئے۔اس موقع پر اپنے خیالات کا اظہار کرتے ہوئے ممبر نیشنل اسمبلی فیصل امین گنڈہ پور نے کہا کہ ڈیرہ جات جہاں علاقائی ثقافت اور کلچر کو اجاگر کرتا ہے وہیں مہمان نوازی بھی ہمارے کلچر کا حصہ ہے لہذا ڈیرہ جات کیلئے آنے والے مہمانوں کو خوش آمدید کہیں اور اسکے ساتھ ساتھ ہم نے ڈیرہ جات کے تحت جو شجرکاری مہم کا آغاز کیا ہے اس میں بھی بڑھ چڑھ کر حصہ لیں اور اپنے حصے کا پودا ضرور لگائیں کیونکہ درخت ماحول کو صاف ستھرا بنانے میں بنیادی کردار ادا کرتے ہیں۔اس موقع پر کبڈی کے کھیل میں اچھی کارکردگی کا مظاہرہ کرنے والے نامور پہلوانوں میں انعامات تقسیم کیے گئے۔ تحصیل میئر عمر امین گنڈہ پور نے میڈیا کے نمائندوں سے گفتگو کرتے ہوئے کہا کہ ڈیرہ جات علاقے کے لوگوں سمیت کھلاڑیوں اور دوسرے اضلاع کے لوگوں کیلئے بھی خوشیاں بکھیرنے کا ذریعہ ہے جس سے روایتی کھیلوں کو زندہ رکھنے کے ساتھ ساتھ بڑی سطح پر اجاگر کیا جا رہا ہے۔ انہوں نے کہا کہ ڈیرہ جات کا تسلسل سے انعقاد وزیر اعلیٰ خیبر پختونخوا علی امین خان گنڈہ پور کی کاوشوں کا نتیجہ ہے کیونکہ ایسے مواقعوں کی فراہمی سے جہاں ایک طرف ثقافتی، روایتی، کلچرل ہم آہنگی کو فروغ ملتا ہے وہیں معاشی سرگرمیاں بھی دیکھنے کو ملتی ہیں اور کھلاڑیوں سمیت دیگر لوگوں کو بھی معاشی سرگرمیوں کے حوالے سے مختلف مواقع میسر آتے ہیں۔

سیاحوں کو معیاری اور محفوظ خوراک کی فراہمی یقینی بنانے کے لئے اقدامات جاری رہیں گے، ڈائریکٹر جنرل واصف سعید

خیبرپختونخوا فوڈ سیفٹی اینڈ حلال فوڈ اتھارٹی نے وزیر خوراک ظاہر شاہ طورو کی ہدایات پر صوبے کے سیاحتی اور تفریحی مقامات پر چھ روزہ خصوصی انسپکشن مہم مکمل کر لی۔ یہ مہم 31 مارچ (عید کے پہلے دن )سے 5 اپریل تک جاری رہی، جس کے دوران فوڈ سیفٹی ٹیموں نے مختلف اضلاع میں واقع مشہور سیاحتی مقامات پر کھانے پینے کے کاروباروں کا معائنہ کیا۔

ترجمان فوڈ اتھارٹی نے تفصیلات جاری کرتے ہوئے کہا کہ فوڈ سیفٹی ٹیموں نے پشاور، نوشہرہ کے کنڈ پارک، چارسدہ کے سردریاب، ہری پور کے خانپور ڈیم، مانسہرہ کے بالاکوٹ، ڈونگا گلی، نتھیا گلی، شوگران، ہرنو، سوات کے فضا گٹ، مالم جبہ اور ملاکنڈ سمیت دیگر سیاحتی و تفریحی مقامات پر چھاپے مارے۔

ترجمان نے بتایا کہ کہ مہم کے دوران تقریباً 640 کاروباروں کا معائنہ کیا گیا، کاروائیوں کیدوران 431 کلوگرام غیر معیاری خوراکی اشیاء پکڑ کر کو تلف کیا گیا، جبکہ 90 کاروباروں کو بہتری کے نوٹسز جاری کیے گئے۔ مزید برآں، 97 نئے لائسنس بھی جاری کیے گئے اور لائسنسنگ کی مد میں 1 لاکھ 91 ہزار روپے کی محصولات وصول کی گئیں۔

ترجمان فوڈ اتھارٹی کا مزید کہنا تھاکہ فوڈ اتھارٹی کی موبائل فوڈ ٹیسٹنگ لیبارٹریز نے موقع پر ہی خوردنی اشیاء جیسے کوکنگ آئل، گوشت، چائے، دودھ، دہی، مشروبات، مصالحہ جات، نمک اور دیگر اشیاء کے 32 نمونوں کی جانچ کی، جن میں سے 19 نمونے معیاری جبکہ 13 غیر معیاری پائے گئے۔

ترجمان کا کہنا تھا کہ سیاحوں نے فوڈ اتھارٹی کی جانب سے سیاحتی مقامات پر کیے جانے والے معائنے کو سراہا اور اسے خوراک کے معیار کو بہتر بنانے کی جانب ایک اہم قدم قرار دیا۔
ڈائریکٹر جنرل فوڈ اتھارٹی واصف سعید نے فوڈ سیفٹی ٹیموں کی عید کی چھٹیوں کے باوجود سیاحتی مقامات میں معائنوں پر داد دی اور کہا ایسے اقدامات مستقبل میں بھی جاری رہیں گے تاکہ سیاحوں کو معیاری اور محفوظ خوراک کی فراہمی یقینی بنائی جا سکے۔

سب سے زیادہ سیاحوں نے وادی سوات کا رخ کیا، اعدادو شمار کے مطابق سوات میں 2 لاکھ گیارہ ہزار 9 سیاحوں نے مختلف سیاحتی مقامات کی سیر کی

وزیراعلی خیبرپختونخوا علی امین گنڈا پور اور مشیر سیاحت و ثقافت زاہد چن زیب کی ہدایات پر عیدالفطر پر خیبرپختونخوا کے مختلف سیاحتی مقامات پر سیاحوں کیلئے تمام ٹورازم اتھارٹیز، ٹورازم پولیس اورٹورازم ہیلپ لائن 1422کو متحرک کرنے سمیت دیگر اقدامات اٹھائے گئے جس سے ہمیشہ کی طرح نہ صرف کثیر تعداد میں سیاحوں نے سیاحتی مقامات کا رخ کیا بلکہ بہترین انداز میں لطف اندوز بھی ہوئے عیدالفطر کے تین روز میں صوبہ کے مختلف سیاحتی مقامات پر 3 لاکھ چھ ہزار 215 سے زاہد سیاحوں نے رخ کیا جس میں سب سے زیادہ سیاحوں نے سوات کی مختلف وادیوں کا رخ کیا جس کی تعداد2 لاکھ گیارہ ہزار 9 تھی جبکہ وادی ناران میں 42 ہزار111، گلیات میں 28 ہزار جبکہ وادی کمراٹ میں 16ہزار400سیاحوں نے رخ کیا۔ مشیر سیاحت زاہد چن زیب کی ہدایات پر ٹورازم پولیس کے جوانوں کی ڈیوٹیاں منسوخ کی گئی تھیں جس پر انہوں نے صوبے کے مختلف سیاحتی مقامات پر دوران عید ڈیوٹی سرانجام دی۔