یومِ پاکستان اور عید کے تیسرے روز خیبرپختونخوا میں ”احساس شجرکاری مہم” کے تحت بھرپور شجرکاری کی گئی، جس میں ایک ہی دن میں 10 لاکھ پودے لگانے کا ہدف مقررہ وقت سے پہلے کامیابی سے حاصل کرلیا گیا۔
اس موقع پرچیف سیکرٹری خیبرپختونخوا شہاب علی شاہ نے نوشہرہ میں پودا لگا کر مہم کا باقاعدہ آغاز کیا۔ انہوں نے کہا کہ شجرکاری نہ صرف ماحول کے تحفظ بلکہ آنے والی نسلوں کے محفوظ مستقبل کے لیے بھی نہایت ضروری ہے۔
صوبہ بھر میں تقریباً 300 کے قریب مقامات پر محکمہ جنگلات نے بڑے پیمانے پر شجرکاری کی، جن میں تعلیمی ادارے، سرکاری دفاتر اور دیگر اہم مقامات شامل تھے۔ اس مہم میں سرکاری ٹیموں کے ساتھ ساتھ طلبہ، سول سوسائٹی اور عام شہریوں نے بھی بھرپور شرکت کی۔
چیف سیکرٹری نے عوام اور حکومت کی مشترکہ کوششوں کو قومی مقصد کے حصول کے لیے انتہائی اہم قرار دیتے ہوئے کہا کہ سرسبز پاکستان کے خواب کو حقیقت بنانے کے لیے اجتماعی کردار ادا کرنا ہوگا۔
انہوں نے بتایا کہ شجرکاری مہم صرف ایک دن تک محدود نہیں بلکہ یہ سلسلہ جاری رہے گا، جبکہ لگائے گئے پودوں کی کم از کم تین سال تک نگہداشت اور حفاظت کو یقینی بنایا جائے گا۔
مزید برآں، شہریوں کی سہولت کے لیے انفارمیشن ٹیکنالوجی بورڈ نے خصوصی ویب سائٹ بھی متعارف کرائی، جہاں لوگ خود پودے لگا کر اس کا ڈیٹا اپلوڈ کرسکتے ہیں، جس سے شجرکاری کی لائیو مانیٹرنگ ممکن ہوئی۔
چیف سیکرٹری شہاب علی شاہ نے اعلان کیا کہ 14 اگست کے موقع پر 14 لاکھ پودے لگانے کی تیاری بھی جاری ہے۔ انہوں نے اس عزم کا اعادہ کیا کہ خیبرپختونخوا میں جنگلات کے تحفظ اور ان کے رقبے میں اضافے کے لیے مؤثر اقدامات جاری رہیں گے۔
انہوں نے اس بات پر زور دیا کہ عوامی شرکت کے بغیر ماحولیاتی بہتری ممکن نہیں، اس لیے نوجوانوں اور سول سوسائٹی کو اس مہم میں زیادہ سے زیادہ شامل کیا جارہا ہے۔

خیبر پختونخوا کے وزیر برائے ابتدائی و ثانوی تعلیم ارشد ایوب خان نے عیدالفطر کے پُرمسرت موقع پر اپنے حجرہ ”ایوب منزل“ میں حلقہ سے آئے ہوئے معززین، عمائدین اور کارکنان سے ملاقات کی۔ اس موقع پر باہمی عید مبارکباد کا تبادلہ کیا گیا اور روایتی انداز میں گلے مل کر خوشیوں کا اظہار کیا گیا۔
صوبائی وزیر نے اس موقع پر تمام اہلِ وطن اور بالخصوص امتِ مسلمہ کو عیدالفطر کی دلی مبارکباد پیش کرتے ہوئے کہا کہ عید ہمیں بھائی چارے، محبت، ایثار اور یکجہتی کا درس دیتی ہے۔ انہوں نے دعا کی کہ اللہ تعالیٰ اس بابرکت موقع پر پوری امتِ مسلمہ کو ترقی، خوشحالی اور کامیابی سے نوازے۔
ارشد ایوب خان نے مزید کہا کہ ہمیں چاہیے کہ عید کی خوشیوں میں اپنے اردگرد موجود مستحق اور نادار افراد کو بھی شامل کریں تاکہ حقیقی معنوں میں عید کی خوشیاں سب تک پہنچ سکیں۔ انہوں نے اس عزم کا اظہار کیا کہ عوام کی خدمت کا سلسلہ مزید تندہی اور خلوص کے ساتھ جاری رکھا جائے گا۔

خیبرپختونخواکے وزیر خزانہ مزمل اسلم نے ہائی اکٹین اور کیروسین آئل کی قیمتوں میں گزشتہ روز اضافے پر ردعمل دیتے ہوئے کہا ہے کہ وفاقی حکومت نے ہائی اکٹین ائل پر 300 روپے لیوی لگا کر قیمت 534 روپے کردی اور ہائی اکٹین کو اشرافیہ کا ائل قرار دیا۔جبکہ غریبوں کے تیل کیروسین میں بھی248 روپے فی لیٹر اضافہ کرکے 430 کر دیا مزمل اسلم نے کہا کہ حکومتی اندازے کے مطابق ہائی اکٹین میں اضافے سے 9 ارب کی بچت ہوگی اور میرے اندازے کے مطابق 70 فیصد لوگ ہائی اکٹین سے سپریم پر منتقل ہو جائیں گے لہذا بچت تخمینہ کے حصول میں مشکلات ہوں گی۔ وزیر خزانہ خیبرپختونخوا نے کہا کہ چاند رات پر پٹرول قیمت نہ بڑھا کر وزیر اعظم نے عید کا تحفہ قرار دیا تھا اور 48 گھنٹوں بعد 70 روپے مٹی تیل اور 200 روپے ہائی اکٹین میں اضافے کو وزیراعظم عید سرپرائز کہہ سکتے ہیں۔ مزمل اسلم نے کہا عالمی قیمتوں کی مناسبت سے حکومت اب بھی پٹرول میں 105 روپے لیوی لے رہی ہے اور سبسڈی 78 روپے کی دے رہی ہے یعنی پیٹرول سے 27 روپے فی لیٹر حکومت کی آمدنی آرہی ہے۔ دوسری طرف ڈیزل میں 176.4 روپے سبسڈی دے رہی ہے اور لیوی 55 روپے کما رہی ہے جو کہ کل خسارہ 121 روپے فی لیٹر ہے۔ مزمل اسلم نے کہا کہ اس ہفتے حکومت لگ بھگ 94 روپے فی لیٹر خسارہ کرے گی اور صرف 6 سے7 ارب روپے سبسڈی ہے مگر حکومت لیوی کی آمدنی ہٹا کر اپنا نقصان 46 ارب روپے بتا رہی ہے جو غلط بیانی ہے۔

قائد عمران خان اور وزیراعلیٰ خیبر پختونخوا محمد سہیل آفریدی کے وژن کے مطابق ماحولیاتی تحفظ اور سرسبز پاکستان کے عزم کو آگے بڑھاتے ہوئے صوبائی وزیر آبپاشی ریاض خان نے بونیر میں احساس شجر کاری مہم کے تحت پودا لگا کر شجرکاری مہم کا باقاعدہ افتتاح کر دیا۔ اس موقع پر صوبائی وزیر ریاض خان نے خطاب کرتے ہوئے کہا کہ موسمیاتی تبدیلی کے بڑھتے ہوئے چیلنجز سے نمٹنے کے لیے شجرکاری ناگزیر ہو چکی ہے۔ انہوں نے کہا کہ درخت لگانا نہ صرف ماحول کو بہتر بناتا ہے بلکہ یہ ہماری آنے والی نسلوں کے محفوظ مستقبل کی ضمانت بھی ہے۔ انہوں نے بونیر کے پی ٹی آئی ورکرز، عوام، بالخصوص نوجوانوں اور سماجی کارکنوں سے اپیل کی کہ وہ اس قومی مہم میں بڑھ چڑھ کر حصہ لیں اور اپنے حصے کا کم از کم ایک پودا ضرور لگائیں۔ ان کا کہنا تھا کہ ہر فرد کا لگایا گیا ایک پودا پاکستان کو سرسبز و شاداب بنانے میں اہم کردار ادا کرے گا۔ریاض خان نے کہا کہ یہ وقت بیدار ہونے کا ہے، اپنی زمین اور آنے والی نسلوں کے بہتر مستقبل کے لیے عملی اقدامات اٹھانے کا ہے۔ پاکستان صرف ایک ملک نہیں بلکہ ہماری پہچان اور ہماری مشترکہ ذمہ داری ہے۔ انہوں نے کہا کہ ”کلین اینڈ گرین پاکستان” عمران خان کا وہ خواب ہے جسے حقیقت کا روپ دینے کے لیے ہم سب کو مل کر کام کرنا ہوگا تاکہ ایک ایسا پاکستان تشکیل دیا جا سکے جہاں ہر طرف ہریالی، تازگی اور زندگی ہو۔ انہوں نے عوام سے اپیل کی کہ وہ آج ہی ایک درخت لگائیں اور اسے خیبرپختونخوا حکومت کی متعلقہ ایپ پر رجسٹر کریں تاکہ یہ عمل ایک قومی تحریک کا حصہ بن سکے۔ انہوں نے کہا کہ یہ صرف ایک پودا نہیں بلکہ ہماری محبت، ہماری ذمہ داری اور ہماری پہچان ہے۔ آج اٹھایا گیا ایک چھوٹا قدم کل ہماری آنے والی نسلوں کے روشن مستقبل کی بنیاد بنے گا۔ یاد رہے کہ یہ مہم قائد عمران خان کے کلین اینڈ گرین پاکستان وژن کے مطابق وزیراعلیٰ خیبر پختونخوا محمد سہیل خان آفریدی کی خصوصی ہدایت پر یوم پاکستان 23 مارچ کے موقع پر ایک تاریخی اور ریکارڈ شجرکاری اقدام کے طور پر شروع کی گئی ہے۔

حکومت خیبر پختونخواکے احکامات کی روشنی میں اور آئی جی جیل خانہ جات ریحان گل خٹک کی خصوصی ہدایت پر سپرنٹنڈنٹ سنٹرل جیل مردان ریاض مہمند نے پودا لگا کر شجرکاری مہم کا باقاعدہ افتتاح کیا۔
یومِ پاکستان کے موقع پر جیل کے مختلف مقامات پر ڈیڑھ سو پودے لگائے گئے۔ سپرنٹنڈنٹ جیل ریاض مہمند نے اس موقع پر شجرکاری مہم کی اہمیت پر روشنی ڈالتے ہوئے کہا کہ درخت ماحول کی بہتری، آلودگی میں کمی اور موسمی تبدیلیوں کے اثرات کو کم کرنے میں کلیدی کردار ادا کرتے ہیں۔ ان کا کہنا تھا کہ صوبائی حکومت کے اقدامات کے ذریعے ماحولیاتی آلودگی میں خاطر خواہ کمی لائی جا سکتی ہے۔
ریاض مہمند کا مزید کہنا تھا کہ ماحولیاتی آلودگی اور موسمی تغیرات کے حوالے سے قیدیوں کی آگہی ضروری ہے اور جیل انتظامیہ کی جانب سے اس سلسلے میں اقدامات اٹھائے جائیں گے۔
یوم پاکستان کے حوالے سے اپنے جاری پیغام میں سپرنٹنڈنٹ جیل ریاض مہمند نے کہا کہ پاکستان کی بقا اور خوشحالی کے لیے کسی قربانی سے دریغ نہیں کریں گے اور اس حوالے سے جملہ سٹاف اور افسران پر عزم ہیں۔
ان کا مزید کہنا تھا کہ یوم پاکستان کے موقع پر شجرکاری مہم ایک قابل تحسین اقدام ہے جس کے ذریعے نئی نسل کو ماحولیاتی تبدیلی کے ساتھ ساتھ ملکی سلامتی اور قومی خوشحالی کے حوالے سے آگہی حاصل ہو گی۔
ان کا کہنا تھا کہ آئی جی جیل خانہ جات جناب ریحان گل خٹک کی پیشہ ورانہ مہارت کی بدولت محکمہ جیل خانہ جات ترقی کی منازل طے کر رہا ہے

خیبر پختونخوا میں احساس شجرکاری مہم 2026 کا باقاعدہ آغاز سابق وزیرِاعظم عمران خان کے وژن اور صوبائی حکومت کی ہدایات کے تحت کر دیا گیا ہے۔ یہ اقدام حکومت کے ماحولیاتی تحفظ اور پائیدار ترقی کے عزم کی عکاسی کرتا ہے۔
وزیراعلیٰ خیبر پختونخوا، سہیل خان آفریدی نے سال 2026 کے دوران صوبہ بھر میں دو کروڑ پودے لگانے کا ہدف مقرر کیا ہے۔ یہ مہم بلین ٹری سونامی منصوبے کا تسلسل ہے، جس کا مقصد جنگلات کے رقبے میں اضافہ اور موسمیاتی تبدیلی کے چیلنج سے مؤثر انداز میں نمٹنا ہے۔
صوبائی وزیر صحت، خلیق الرحمان نے اس مہم کا باقاعدہ افتتاح گاؤں جاروبہ، ضلع نوشہرہ میں شجرکاری مہم میں شرکت کر کے کیا، جہاں 15 ہزار سے زائد پودے لگائے گئے۔ اس موقع پر صوبہ بھر میں شجرکاری مہم کا آغاز ہوا، جس کے پہلے ہی دن دس لاکھ سے زائد پودے لگائے گئے، جبکہ یہ مہم پورے سال جاری رہے گی۔
تقریب سے خطاب کرتے ہوئے وزیر صحت نے کہا کہ صوبے کو دہشت گردی، امن و امان، بے روزگاری اور مہنگائی جیسے مسائل کا سامنا ہے، تاہم ان میں موسمیاتی تبدیلی سب سے بڑا چیلنج ہے۔ انہوں نے کہا کہ پاکستان میں کل جنگلات کے رقبے کا تقریباً 26 فیصد حصہ ہے، جس میں سے 40 فیصد خیبر پختونخوا میں واقع ہے، جو صوبے کی اہمیت کو ظاہر کرتا ہے۔
انہوں نے مزید کہا کہ خیبر پختونخوا قدرتی وسائل، خصوصاً پہاڑوں اور پانی سے مالا مال ہے، جن سے بھرپور فائدہ اٹھاتے ہوئے زیادہ سے زیادہ شجرکاری کی جا سکتی ہے۔ حالیہ برسوں میں صوبے کو شدید بارشوں، سیلاب اور مٹی کے کٹاؤ جیسے مسائل کا سامنا بھی رہا ہے، جس کے تدارک کے لیے حکومت سنجیدہ اقدامات کر رہی ہے۔
خلیق الرحمان نے عوام، محکمہ جنگلات کے اہلکاروں اور دیگر متعلقہ اداروں پر زور دیا کہ وہ شجرکاری مہم میں بھرپور تعاون کریں اور لگائے گئے پودوں کی حفاظت کو یقینی بنائیں تاکہ یہ پودے پروان چڑھ کر ماحول کو صاف، سرسبز اور صحت مند بنا سکیں۔
انہوں نے اس امید کا اظہار کیا کہ یہ اجتماعی کوششیں خیبر پختونخوا سمیت پورے پاکستان کو سرسبز، صاف اور صحت مند ماحول فراہم کرنے میں اہم کردار ادا کریں گی۔

وزیراعلی خیبرپختونخوا کے معاون خصوصی برائے اطلاعات و تعلقات عامہ شفیع جان نے 23 مارچ یوم پاکستان کے موقع پر اپنے پیغام میں پوری قوم، خصوصاً خیبرپختونخوا کے عوام کو دلی مبارکباد پیش کرتے ہوئے کہا ہے کہ آج سے 86 سال قبل برصغیر کے مسلمانوں نے ایک آزاد اسلامی ریاست کے قیام کا متفقہ فیصلہ کیا۔ 23 مارچ 1940 کو منظور ہونے والی قراردادِ پاکستان مملکتِ خداداد کے قیام کی بنیاد بنی،انہوں نے کہا کہ پاکستان کا قیام بلاشبہ مسلمانوں کی طویل جدوجہد، انتھک محنت اور عظیم قربانیوں کا نتیجہ ہے۔ آج کے دن ہم اپنے اسلاف کی شبانہ روز جدوجہد اور قربانیوں کو خراج عقیدت پیش کرتے ہوئے اس عزم کا اعادہ کرتے ہیں کہ وطن عزیز کو انصاف، قانون کی بالادستی اور فلاحی اصولوں پر مبنی ایک عظیم ریاست بنائیں گے،

دریں اثناء معاون خصوصی شفیع جان نے وزیراعلی سہیل آفریدی کے اعلان کے مطابق“احساس شجر”شجرکاری مہم کے تحت کوہاٹ جیل کے احاطے میں پودا لگا کر مہم کا افتتاح کیا۔ اس موقع پر ڈپٹی کمشنر کوہاٹ سمیت دیگر متعلقہ حکام بھی موجود تھے۔انہوں نے اس موقع پر گفتگو کرتے ہوئے کہا کہ اس سال 23 مارچ کو بامقصد انداز میں منانے کے لیے وزیراعلیٰ خیبرپختونخوا کی ہدایت پر خصوصی شجرکاری مہم کا آغاز کیا گیا، جس کے تحت صوبہ بھر میں ایک ہی دن کے دوران کامیابی سے 10 لاکھ پودے لگائے گئے۔ یہ اقدام ماحولیاتی تحفظ اور موسمیاتی تبدیلیوں کے منفی اثرات سے نمٹنے کے لیے نہایت اہم ہے۔شفیع جان نے کہا کہ شجرکاری وقت کی اہم ضرورت ہے، جو نہ صرف ماحولیاتی آلودگی کے خاتمے میں مددگار ثابت ہوتی ہے بلکہ آنے والی نسلوں کے لیے صاف اور صحت مند ماحول کی ضمانت بھی فراہم کرتی ہے۔ انہوں نے کہا کہ صوبائی حکومت کی جانب سے شروع کی گئی اس مہم کا مقصد زیادہ سے زیادہ درخت لگا کر سرسبز و شاداب پاکستان کی بنیاد رکھنا ہے۔انہوں نے مزید کہا کہ خیبرپختونخوا حکومت نے جنگلات کے فروغ کے لیے بلین ٹری سونامی سمیت متعدد اہم اقدامات کیے ہیں، جن کے نتیجے میں صوبے میں جنگلات کا رقبہ مجموعی رقبے کے 26.6 فیصد تک پہنچ چکا ہے۔ ان اقدامات کو بین الاقوامی سطح پر بھی بھرپور پذیرائی حاصل ہوئی ہے۔اخر میں شفیع جان نے عوام سے اپیل کی کہ وہ اس خصوصی مہم کو کامیاب بنانے کے لیے اپنے حصے کا پودا ضرور لگائیں۔ انہوں نے کہا کہ شجرکاری ایک قومی فریضہ ہے جس میں معاشرے کے تمام طبقات کو بڑھ چڑھ کر حصہ لینا چاہیے تاکہ خیبرپختونخوا کو حقیقی معنوں میں ایک سرسبز صوبہ بنایا جا سکے۔

23 مارچ 1940ء کا دن ہماری قومی تاریخ میں سنگِ میل کی حیثیت رکھتا ہے، یہ دن ہمیں عزم پاکستان اور ان قربانیوں کی یاد دلاتا ہے جو ہمارے آباؤ اجداد نے اس عظیم مملکت کے قیام کے لیے دیں۔
حکومتِ خیبرپختونخوا اس عزم کا اعادہ کرتی ہے کہ ہم گڈ گورننس، میرٹ، قانون کی بالادستی، شفافیت اور عوامی خدمت کو یقینی بناتے ہوئے پاکستان کو قائداعظم اور علامہ اقبال کے خوابوں کے مطابق ایک عظیم ملک بنانے میں اپنا کردار ادا کرتے رہیں گے۔ اس سال حکومت خیبرپختونخوا نے ماحولیاتی تحفظ اور موسمیاتی تبدیلی کو مدنظر رکھتے ہوئے 23 مارچ کو یوم پاکستان پر پورے صوبے میں 10 لاکھ پودے لگانے کا ہدف رکھا ہے۔ کیونکہ سرسبز خیبرپختونخوا پاکستان کے محفوظ مستقبل اور ترقی و خوشحالی کی ضمانت ہے۔
پاکستان زندہ باد!