خیبر پختونخوا کے وزیر خلیق الرحمان کو سیکرٹری ایکسائز اور ڈائریکٹر جنرل ایکسائز نے محکمہ ایکسائز کے انتظامی امور، محاصل ریکوری،منشیات روک تھام، غیر قانونی گاڑیوں اور محکمہ میں جاری ریفارمز پر تفصیلی بریفنگ دی، ڈائریکٹر جنرل ایکسائز نے تمام ڈائریکٹرز سے انکے متعلقہ ایکسائز امور پر تفصیلی آگاہی حاصل کی۔ صوبائی وزیر خلیق الرحمان نے اس موقع پر محکمہ کی کارکردگی کو سراہا اور محکمہ کی کارکردگی کو مزید بہتر بنانے کیلئے اصلاحات بارے اور منشیات کی لعنت کو معاشرے سے ختم کرنے کے پرزور عزم کا اظہار کیا، خلیق الرحمان نے مزید کہا کہ مقرہ اہداف پورا کرنے کے ساتھ ساتھ محکمہ ایکسائز سے متعلق عوامی امور کی بہترین سہولیات اولین ترجیح ہے، انہوں نے محکمہ کی کارکردگی کو مزید بہتر بنانے کیلئے محکمہ کو درپیش مسائل اور اصلاحات بارے اپنی سفارشات پیش کرنے کے ہدایات جاری کیں۔

ضلع صوابی۔مشیر وزیراعلیٰ برائے عشر و زکوٰۃ، سماجی بہبود اور ترقی خواتین مشال یوسفزئی نے رمضان المبارک کا تیسرا روزہ افطار پناہ گاہ شاہ منصور صوابی میں کیا۔ انہوں نے ڈسٹرکٹ ہیڈکوارٹر ہسپتال صوابی، پناہ گاہ شاہ منصور اور منشیات سنٹر صوابی میں محکمہ سوشل ویلفیئر کی جانب سے افطار پروگرام کا جائزہ لیا۔دورے کے موقع پر ڈپٹی کمشنر صوابی طارق اللہ، ایڈیشنل ڈپٹی کمشنر صوابی اور محکمہ سوشل ویلفیئر کے ضلعی آفسر ظفر خان سمیت اعلی حکام موجود تھے۔ ضلعی افسر سوشل ویلفیئر ظفر خان نے مشیر وزیراعلیٰ مشال یوسفزئی کو پناہ گاہوں میں مسافروں کو دی جانے سہولیات کے بارے میں بریف کیا۔نیز مشال یوسفزئی نے سہولیات کا خود بھی جائزہ لیا۔ مشال یوسفزئی نے اس موقع پر اظہار خیال کرتے ہوئے کہا کہ پاکستان تحریک انصاف کو خیبرپختونخوا کے عوام نے خدمت کرنے کا تیسرا موقع دیا ہے۔عوامی امنگوں پر اُترنے کی بھرپور کوشش کرینگے۔ عوامی خدمت کا یہ سفر جاری رہے گا۔ مشیر وزیراعلیٰ مشال یوسفزئی نے پناہ گاہ میں دی جانے والی سہولیات کی مزید بہتری کے حوالے سے کہا کہ خیبرپختونخوا میں موجود تمام پناہ گاہوں میں سہولیات کی دستیابی مزید بہتر بنائیں گے۔انہوں نے کہا کہ صوبہ بھر میں تمام پناہ گاہوں کی خود مانیٹرنگ کر رہی ہوں تاکہ عوام کو خدمات کی فراہمی مزید بہتر بنائی جا سکے۔ وزیر اعلیٰ خیبر پختونخوا کی عوام دوست و فلاحی پالیسیوں کے تحت پناہ گاہوں میں افطاری کا اہتمام ہر ضلع میں رمضان المبارک کے بابرکت مہینے میں جاری رہیگا۔

وزیر اعلیٰ خیبر پختونخوا کے معاون خصوصی برائے ہاؤسنگ امجد علی خان نے اپنے عہدے کا باقاعدہ چارج سنبھال لیا، سیکرٹری ہاوسنگ عنبر علی نے معاون خصوصی سے انکے دفتر میں ملاقات کی، ملاقات میں محکمہ کے مختلف منصوبوں اور دیگر امور پر تفصیلی بات چیت ہوئی، معاون خصوصی امجد علی خان نے اس موقع پر کہا کہ محکمہ ہاؤسنگ کی تمام جاری سکیموں کو عملی جامہ پہنا کر مقررہ وقت میں مکمل کرینگے۔ انہوں نے کہا کہ محکمہ میں بہتری لانے اور عوام کو سہولیات کی فراہمی کے لئے ہر ممکن اقدامات اٹھائینگے، خیبر پختونخوا کے عوام نے ہمیں تیسری مرتبہ بھاری مینڈیٹ سے کامیابی دلائی ہے اور ہم عوام کی امنگوں کے مطابق محکمہ میں بہتر لانے کے لئے ضروری اصلاحات کریں گے۔ انہوں نے ہدایت کی کہ محکمہ پر تفصیلی بریفنگ تیار کرکے چند روز میں انہیں پیش کی جائے۔

خیبرپختونخوا کے وزیر برائے ریونیو و اسٹیٹ نذیر احمد عباسی اور سینئر ممبر بورڈ آف ریونیو اکرام اللہ خان کے زیر صدارت بورڈ آف ریونیو کا تعارفی اجلاس بورڈ آف ریونیو کے کمیٹی روم میں منعقد ہوا، اجلاس میں بورڈ آف ریونیو کے ممبران، سیکرٹریز اور مختلف پراجیکٹس کے ڈائریکٹرز نے شرکت کی۔ اجلاس میں بورڈز کے ممبران و افسران کا صوبائی وزیر نذیر احمد عباسی سے تعارف کرایا گیا۔ سینئر ممبر بورڈ آف ریونیو اکرام اللہ خان نے صوبائی وزیر ریونیو اینڈ اسٹیٹ کو خوش آمدید کہا اور بورڈ آف ریونیو کے تنظیمی ڈھانچے، بورڈ کے قیام کے پس منظر اور افعال پر تفصیلی پر روشنی ڈالی۔ نیز ریونیو کورٹس میں زیر سماعت کیسز سے آگاہ کیا۔لینڈ ریکارڈ ڈیجیٹلائزیشن پراجیکٹ کے حوالے سے بتایا گیا کہ اس کا فیز ون جون تک مکمل ہو جائے گا۔اجلاس میں اظہار خیال کرتے ہوئے صوبائی وزیر ریونیو اینڈ اسٹیٹ نذیر احمد عباسی نے کہا کہ ہم نے ملکر کام کرنا ہے۔ مختلف سروسز کو آن لائن کرنے کیلئے اقدامات کرینگے تاکہ عوام کو انکے گھر کی دہلیز پر سہولت میسر ہو۔ انہوں نے مزید کہا کہ ہم سب کو اللہ تعالیٰ نے خدمت کا موقع دیا ہے۔ عوام کی بھرپور خدمت کرکے خوشی ہوگی۔ بریفینگ کے دوران سروس ڈیلیوری سنٹر، ضم اضلاع میں لینڈ ریکارڈ ڈیجیٹلائزیشن، ای سٹامپ، مالی سال 2023-24 کیلئے مختص بجٹ و اخراجات، گڈ گورننس کے لئے اقدامات و اصلاحات اور بورڈ آف ریونیو کو درپیش چیلنجز و مشکلات سے آگاہ کیا گیا۔ صوبائی وزیر ریونیو اینڈ اسٹیٹ نذیر احمد عباسی نے ہر قسم کے تعاون کا یقین دلایا۔

خیبر پختو نخوا کے وزیر زراعت محمد سجاد نے محکمہ زراعت شعبہ توسیع کا دورہ کیا، ممبر صوبائی اسمبلی خورشید خٹک، ڈائریکٹر جنرل زراعت شعبہ توسیع جان محمد،ڈائریکٹر جنرل ضم اضلاع مراد علی خان اور محکمہ کے دیگر اعلیٰ افسران بھی موجود تھے، ڈائریکٹر جنرل زراعت توسیع نے وزیر زراعت کو محکمہ کی طرف سے کی جانے والی مختلف سرگرمیوں اور ترقیاتی منصوبوں کے بارے میں تفصیلی بریفنگ دی، وزیر زراعت خیبر پختونخوا نے محکمہ کے افسران کو ہدایت کی کہ ہمارا صوبہ خیبر پختونخوا قدرتی طور پر بہت زرخیز ہے اور اللہ تعالی نے اس کو مختلف موسموں سے نوازا ہے جو کہ ہر قسم کی فصلات و باغات اور سبزیاں اگانے کے لیے موضوع ہے وزیر زراعت نے محکمہ کے افسران کو مزید ہدایت کی کہ صوبے میں زراعت کی ترقی کے لیے ہر ممکن کوشش کی جائے اور صوبہ میں بیروزگاری کے خاتمے اور نوجوانوں کو زراعت اور اس سے وابستہ کاروبار کی طرف راغب کرنے اور انہیں ہر قسم کی مدد فراہم کرنے کے لیے اقدامات کیے جائیں وزیر زراعت نے مزید کہا کہ خیبر پختونخوا کا زیادہ تر رقبہ بارانی ہے لہذا ان علاقوں میں زراعت کی ترقی کے لیے اقدامات کیے جائیں تاکہ صوبے کو خوراک کی پیداوار کے حوالے سے خود کفیل بنایا جا سکے، وزیر زراعت نے متعلقہ حکام کو زرعی کھادوادویات میں ملاوٹ کے خاتمے کے لیے یقینی اقدامات ٹھانے کی ہدایات کی، وزیر زراعت نے متعلقہ حکام کو زرعی کھادوں اور ادویات میں ملاوٹ کی خاتمے کے لئے یقینی اقدامات اٹھانے کی ہدایت کی۔

خیبر پختونخواکے وزیر محنت فضل شکور خان نے متعلقہ افسران کو ہدایت کی ہے کہ وہ محنت کشوں کی فلاح و بہبود کے لئے دورس اقدامات اٹھائیں اور جہاں کہیں مسائل درپیش ہوں ان کو فوری نوٹس میں لایا جائے تاکہ بروقت حل کیئے جاسکیں۔ ان خیالات کا اظہار انہوں نے جمعرات کے روز محکمہ محنت کے بارے بریفنگ اجلاس کی صدارت کرتے ہوئے کیا۔ اجلاس میں سیکرٹری لیبر، ایڈیشنل سیکرٹری لیبر، ڈائریکٹر لیبر اور دیگر متعلقہ افسران نے شرکت کی،اس موقع پر صوبائی وزیر کو محکمہ کے منصوبوں، کارکردگی، اہداف اور اب تک کی کامیابیوں کے حوالے سے تفصیلی طور پر آگاہ کیا گیا، صوبائی وزیر نے بریفنگ پر اطمینان کا اظہار کرتے ہوئے متعلقہ افسران کو ہدایت کی کہ صوبے میں انڈسٹریل اور سوشل سیکٹر میں کام کرنے والے مزدوروں کی فلاح و بہبود کے لیے بہتر سے بہتر اقدامات اٹھائے جائیں،انہوں نے کہا کہ محنت کشوں کے بال بچوں کے تحفظ اور انہیں پوری اجرت کی فراہمی کو یقینی بنانے پر خصوصی توجہ دی جائے اور ان کی محنت کے اوقات آٹھ گھنٹے سے متجاوز نہ ہوں، صوبائی وزیر نے ضم اضلاع میں صنعتوں کے فروغ کو بندوبستی اضلاع کی طرز پر انڈسٹری ورکرز کی فلاح و بہبود کے لیے بھرپور اقدامات اٹھانے کے عزم کا اعادہ کیا تاکہ صنعتی مالکان اور مزدور دلجمعی سے صوبے کی تیز تر ترقی میں اپنا حصہ ڈال سکیں، صوبائی وزیر نے پنجاب کی طرز پر انڈسٹری مالکان اور مزدوروں کے لیے سہولیات دینے کے عزم کا بھی اظہار کیا۔

خیبر پختونخوا کے وزیر زراعت محمد سجاد نے کہا ہے کہ صوبے میں زرعی مقاصد کیلئے پانی کا منظم استعمال انتہائی ضروری ہے اور اس سلسلے میں محکمہ زراعت کا شعبہ سائل اینڈ واٹر کنزرویشن موثر اقدامات اٹھائے۔ انھوں نے کہا کہ زرعی اراضیات پر ہاؤسنگ سوسائٹیز کے قیام سے ہماری زراعت کو لاحق خطرات کے پیش نظر کوششیں کی جائیں گی تاکہ غیر قانونی تعمیرات کا راستہ روکا جا سکے۔انھوں نے ہدایت کی کہ موسمی تغیرات کی وجہ سے پانی کی قلت کے خطرات سے نبرد آزما ہونے کیلئے اس کے صحیح استعمال کیلئے منصوبہ بندی کی جائے تاکہ اس کا ضیاع روک کر اسے زراعت کی ترقی کیلئے بہتر انداز میں استعمال میں لایا جاسکے۔ان خیالات کا اظہار انھوں نے بدھ کے روز پشاور میں سائل اینڈ واٹر کنزرویشن کے مرکزی دفتر کا دورہ کرنے کے موقع پر محکمہ کی جانب سے دی جانے والی بریفنگ کے دوران کیا۔بریفنگ میں رکن صوبائی اسمبلی خورشید خٹک نے بھی شرکت کی جبکہ ڈائریکٹر جنرل محمد یاسین وزیر نے صوبائی وزیر کو اس موقع پر محکمہ کے ترقیاتی منصوبوں اور صوبے میں پانی اور زرعی اراضیات کے بچاؤ کے حوالے سے اٹھائے جانے والے اقدامات کے حوالے سے آگاہ کیا۔ ان کو بتایا گیا کہ محکمہ کا مذکورہ شعبہ صوبہ میں زرعی مقصد کیلئے بارانی اور دیگر ذرائع کے پانی کو ذخیرہ کرنے اور منظم استعمال میں لانے کیلئے مختلف سرگرمیاں سر انجام دے رہا ہے جبکہ زرعی اراضیات کی حفاظت اور لیولنگ کیلئے بھی اقدامات اٹھاتا ہے۔ اس موقع پر صوبائی وزیر نے اظہار خیال کرتے ہوئے کہا کہ مستقبل کی منصوبہ بندی کیلئے زرعی اراضیات کی حفاظت انتہائی ضروری ہے اور اس سلسلے میں کل وقتی اقدامات نا گزیر ہیں۔انھوں نے کہا کہ اس سلسلے میں محکمہ ایک مانیٹرنگ کمیٹی تشکیل دے تاکہ وہ صوبہ میں زرعی اراضیات کے بچاؤ کی نگرانی کرے جبکہ وہ ذاتی طور پر بھی اس کی مانیٹرنگ کریں گے۔انھوں نے محکمہ کے حکام کو ہدایت کی کہ وہ زرعی ترقی کیلئے بہترین منصوبے سامنے لائے تاکہ ان پر عمل کرکے زرعی خودکفالت میں مدد مل سکے۔

خیبر پختونخوا کے وزیر جنگلات، ماحولیات، موسمیاتی تبدیلی و جنگلی حیات فضل حکیم خان نے کہا ہے کہ محکمہ کو مضبوط کرنا اور نظام میں بہترین لانا ہماری اولین ترجیحات میں شامل ہے، جنگلات معیشت کے استحکام میں بہت اہمیت کے حامل ہیں، ماحولیاتی آلودگی پر قابو پانا ناگزیر ہے،عوامی مینڈیٹ پر پورا اترنے کے لیے ضروری ہے کہ لوگوں کو زیادہ سے زیادہ ریلیف دیں۔ ان خیالات کا اظہار انہوں نے محکمہ کے تعارفی اجلاس کی صدارت کرتے ہوئے کیا سیکرٹری سید نظر حسین شاہ، سپیشل سیکرٹری اور محکمہ کے دیگر افسران نے اجلاس میں شرکت کی۔ اجلاس میں صوبائی وزیر کو محکمہ کے جاری اور نئے اے ڈی پی اور اے آئی پی سکیموں کے بارے میں تفصیلی بریفنگ دی گئی، اجلاس میں خیبر پختونخوا کے بندوبستی اور قبائلی اضلاع کے منصوبوں کے بارے میں بھی تفصیل سے گفتگو ہوئی، صوبائی وزیر جنگلات کو واٹر شیڈ،گزارا فار سٹ، کے پی فارسٹ پالیسی 1999 کے پی فارسٹ آرڈیننس 2002, کے پی فارسٹ کاربن ٹریڈنگ سمیت محکمہ کے دیگر اہم امور پر تفصیل سے بتایا گیا۔اس موقع پر صوبائی وزیر فضل حکیم خان نے کہا کہ ہم سب کو مل کر ایک ٹیم کی طرح کام کرنا ہوگا، عوام کے لیے آسانی پیدا کر کے نظام میں بہتری لانا ہوگی اور معیشت کی مضبوطی میں جنگلات کی اہمیت کے پیش نظر ان کی حفاظت اور بڑھانے کے لیے اقدامات اٹھانا ہوں گے۔

وزیر صحت سید قاسم علی شاہ کی سربراہی میں صوبے میں پولیو کی صورتحال بارے جائزہ اجلاس
میں خود باقاعدہ طور پر پوسٹ کمپین میٹنگ کی صدارت کرونگا، پولیو کے خاتمے میں سب کو کردار ادا کرنا ہوگا۔ اگر ہم نے پولیو کا خاتمہ یقینی بنانا ہے تو اس دفعہ پولیو کیلئے روایتی انداز سے ہٹ کر سوچنا ہوگا۔ پولیو کے خاتمے کیلئے ڈونرز کی جانب سے فراہم کردہ تعاون پر ان کے مشکور ہیں، پولیو جائزہ اجلاس میں وزیر صحت کا اظہار خیال
خیبر پختونخوا کے وزیر صحت سید قاسم علی شاہ کی سربراہی میں ایک اعلیٰ سطحی اجلاس میں منعقد ہوا جس میں سپیشل سیکرٹری ہیلتھ برائے انسداد پولیو عبدالباسط کے علاوہ پراونشل ای او سی کے ڈپٹی کوآرڈی نیٹر، ٹیم لیڈ عالمی ادارہ صحت و دیگر اہلکاروں نے بھی شرکت کی۔ اجلاس میں وزیر صحت کو صوبہ میں پولیو صورتحال، درپیش مسائل اور آئندہ کے لائحہ عمل بارے بتایا گیا۔ سپیشل سیکرٹری برآئے انسداد پولیو عبدالباسط نے پولیو کی صورتحال کا جائزہ پیش کیا۔ اجلاس میں جنوبی اضلاع میں پولیو کیسز کی صورتحال پر خصوصی تبادلہ خیال ہوا۔ وزیر صحت نے جنوبی اضلاع میں پولیو کیسز کی بہتات اور بنوں، لکی مروت اور اپر و لوئر وزیرستان میں پولیو کمپینز نہ ہونے کی وجوہات بارے بھی بتایا گیا۔ پولیو کمپینز کے دوران جنوبی اضلاع میں سیکیورٹی چیلنجز کا بھی خصوصی ذکر کیا گیا۔وزیر صحت کو بتایا گیا کہ پچھلے سال پولیو کے 6 جبکہ امسال کوئی کیس سامنے نہیں آیااس کے علاوہ انہیں بتایا کہ گیا کہ صوبہ میں پانچ سال سے کم عمر 7.3 ملین بچوں کو پولیو سے بچاؤ کے قطرے پلانے ہوتے ہیں۔ وزیر صحت کو پولیو کے لحاظ سے سات ہائی رسک جنوبی اضلاع کے بارے میں بھی بتایا گیا جن میں بنوں۔ لکی مروت، ڈی آئی خان، ٹانک، شمالی وزیرستان اور جنوبی وزیرستان اپر و لوئر شامل ہیں۔ وزیر صحت کے استفسار پر انہیں سیکورٹی چیلنجز اور اس کی وجہ سے مختلف اضلاع میں منسوخ ہونے والے پولیو کمپینز کے بارے میں تفصیلات بتائی گئیں۔ اس موقع پر کوآرڈی نیٹر ای او سی نے وزیر صحت سے درخواست کی کہ پراونشل ٹاسک فورس کی میٹنگ وزیراعلیٰ کی صدارت میں منعقد کرائی جائے۔