عملے اور متعلقہ اہلکاروں کو ادویات اور ویکسینز کی خریداری اور تقسیم میں شفافیت اور میرٹ کو یقینی بنا نے کی ہدایت

صوبائی حکومت لائیو سٹاک کی ترقی کو خصوصی ترجیح دے رہی ہے کیونکہ یہ غذائی تحفظ اور برآمدات کو بڑھانے میں کلیدی کردار ادا کرتا ہے

خیبر پختونخوا کے وزیر لائیو سٹاک، فشریز اور کوآپریٹو فضل حکیم یوسفزئی نے جمعرات کے روز ورسک روڈ پشاورپر لائیو سٹاک ضم اضلاع کے مال مویشیوں کے لئے قائم سٹور پر ادویات و ویکسین کی دستیابی کا معائنہ کرنے کے لئے اچانک دورہ کیا۔ اس موقع پرانہوں نے ادویات اور ویکسینز کی مقدار،تقسیم کے طریقہ کار اور معیارات کا جائزہ لیا۔ صوبائی وزیر لائیو سٹاک نے اس موقع پر گفتگو کرتے ہوئے سٹور کے عملے اور متعلقہ اہلکاروں کو ہدایت کی کہ ادویات اور ویکسینز کی خریداری اور تقسیم کے تمام مراحل میں شفافیت اور میرٹ کو یقینی بنایا جائے۔ انہوں نے خبردار کیا کہ کسی بھی قسم کی غفلت، بدعنوانی، یا معیارپر سمجھوتہ کرنے والوں کے خلاف سخت قانونی کارروائی کی جائے گی۔ صوبائی وزیر نے مصنوعی نسل کشی کے لیے درآمد کردہ ویکسین کی جدید ٹیکنالوجی کے ذریعے ذخیرہ کرنے کے طریقہ کار پر توجہ دلاتے ہوئے کہا کہ اسے مناسب درجہ حرارت پر رکھا جائے اور اس کی تقسیم شفاف انداز میں مویشی پال کسانوں میں بروقت یقینی بنائی جائے۔انہوں نے کہا کہ لائیو سٹاک کے شعبے کاصوبے کی معیشت میں اہم کردار ہے۔ دیہی علاقوں میں لاکھوں خاندانوں کی روزی روٹی لائیو سٹاک سے جڑی ہوئی ہے۔ انہوں نے کہا کہ صوبائی حکومت اس شعبے کی ترقی اور مویشیوں کی صحت و افزائش نسل کو ترجیح دے رہی ہے کیونکہ یہ غذائی تحفظ اور برآمدات کو بڑھانے میں کلیدی کردار ادا کرتا ہے۔بریفنگ کے دوران ڈائریکٹر لائیوسٹاک ڈاکٹر وحید اللہ وزیر، پراجیکٹ ڈائریکٹر ڈاکٹر سجاد وزیر بھی موجود تھے۔اس موقع پر صوبائی وزیر لائیو سٹاک فضل حکیم یوسفزئی کو بریفنگ دیتے ہوئے بتایا گیا کہ مصنوعی نسل کشی کے جدید ٹیکوں کی درآمد کی بدولت اچھی نسل کی گائے اور بھینسوں کی نسل میں اضافہ ہوا ہے اور دودھ کی پیداوار میں بھی خاطر خواہ بہتری آئی ہے۔

وزیر خوراک خیبرپختونخوا ظاہر شاہ طورو نے کہا ہے کہ وزیر اعلیٰ علی امین خان گنڈاپور کی قیادت میں خیبرپختونخوا حکومت عوامی فلاح و بہبود کے منصوبوں میں ملک بھر میں سب سے آگے ہے۔ صوبہ خیبرپختونخوا نے 169 ارب روپے کا سرپلس بجٹ پیش کر کے باقی تمام صوبوں پر سبقت حاصل کی ہے۔ظاہرشاہ طورو نے ان خیالات کا اظہار مردان میں ویمن اینڈ چلڈرن ہسپتال کی افتتاحی تقریب سے خطاب کرتے ہوئے کیا، جس کے مہمانِ خصوصی وزیر اعلیٰ خیبرپختونخوا علی امین خان گنڈاپور تھے۔ تقریب سے مشیر صحت احتشام علی ایڈووکیٹ اور رکن قومی اسمبلی علی محمد خان نے بھی خطاب کیا۔وزیر خوراک نے کہا کہ مردان میں بچوں اور ماؤں کے علاج معالجے کے لیے سٹیٹ آف دی آرٹ ہسپتال کی تکمیل سے علی امین گنڈاپور نے اہالیان مردان کے ساتھ اپنا وعدہ پورا کر لیا۔انہوں نے کہا کہ وزیر اعلیٰ نے نہ صرف صوبے بھر میں جاری اربوں روپے کے ترقیاتی منصوبوں کو مکمل کیا بلکہ آنے والے مالی سال کے بجٹ میں بھی عوامی فلاح و بہبود کے نئے ریکارڈ منصوبوں کی منظوری دی جائے گی۔صوبائی وزیر نے مزید کہا کہ وزیر اعلیٰ علی امین خان گنڈاپور نے عمران خان کی رہائی کے لیے بھرپور مہم چلانے کے ساتھ ساتھ صوبے میں گڈ گورننس کی بھی اعلیٰ مثال قائم کی، جس سے خیبرپختونخوا کو اے ڈی پی پلس صوبہ بنا دیا گیا۔انہوں نے کہا کہ وزیر اعلیٰ کا دورہ مردان یہاں کے عوام کے لیے خوش آئند اور نیک شگون ثابت ہوگا۔

ورلڈ بینک کے ایک اعلیٰ سطح وفد نے، جس کی قیادت پاکستان میں ورلڈ بینک کے کنٹری ڈائریکٹر ناجی بن حسین کر رہے تھے، بدھ کے روز چیف سیکرٹری خیبر پختونخوا شہاب علی شاہ سے ان کے دفتر میں ملاقات کی۔ملاقات میں دو طرفہ تعاون کو مزید مضبوط بنانے، جاری ترقیاتی منصوبوں کا جائزہ لینے اور مستقبل کے اقدامات کو صوبے کے طویل المدتی ترقیاتی وژن سے ہم آہنگ کرنے پر تبادلہ خیال کیا گیا۔ورلڈ بینک کے کنٹری ڈائریکٹر اور چیف سیکرٹری خیبر پختونخوا نے خیبر پختونخوا میں پائیدار ترقی اور جامع اقتصادی نمو کے لیے باہمی تعاون کو مزید فروغ دینے کے عزم کا اعادہ کیا۔

صوبائی وزیر تعلیم فیصل خان ترکئی نے کہا ہے کہ امسال داخلہ مہم میں مقرر کردہ 10 لاکھ بچوں کو داخل کروانے کا ہدف ہر صورت مکمل کیا جائے گا، تمام ڈسٹرکٹ ایجوکیشن آفیسرز کو ہدایت ہے کہ روزانہ کی بنیاد پر طلبہ داخل تفصیلات فراہم کی جائے جس بھی ڈسٹرکٹ ایجوکیشن آفیسر نے ٹارگٹ پورا نہ کیا ہو ان کے خلاف کاروائی ہوگی، داخلہ مہم کے دوران والدین، آئمہ کرام، علاقہ عمائدین، سیاسی راہنماؤں اور صوبہ بھر کے تمام لوگوں سے گزارش ہے کہ بچوں کو سکولوں میں لانے کے لیے ہماری معاونت کریں، ہم نے ہر صورت آؤٹ آف سکول کو کنٹرول کرنا ہے۔ وزیر تعلیم نے یہ بھی عندیہ دیا کہ امسال آؤٹ آف سکول کے لئے محکمہ تعلیم کے لیول پر ڈیٹا کلیکشن کے لیے سروے کیا جائے گا۔ انہوں نے حکام کو یہ بھی ہدایت دی کہ جہاں جہاں اساتذہ کی کمی ہے وہاں پر عارضی بنیادوں پر بذریعہ پیرنٹس ٹیچرز کونسل عارضی اساتذہ تعینات کئے جائیں۔ انہوں نے کہا کہ عنقریب 16 ہزار اساتذہ کی بھرتی کا عمل بھی مکمل کیا جائے گا جس سے اساتذہ کی کمی پوری ہو جائے گی۔ وزیر تعلیم نے ایجوکیشن حکام کو سختی سے ہدایت کی کہ داخلہ مہم کے دوران طلبہ و طالبات کی مکمل تفصیلات فراہم کی جائے اور ڈیٹا ہر صورت ٹھیک ہونا چاہیے۔ ان خیالات کا اظہار انہوں نے داخلہ مہم کے حوالے سے ڈسٹرکٹ ایجوکیشن آفیسرز کے ساتھ منعقدہ آن لائن اجلاس کی صدارت کرتے ہوئے کیا۔ اجلاس میں سیکرٹری ایجوکیشن مسعود احمد، ڈی جی ایجوکیشن مانیٹرنگ اتھارٹی، ایم ڈی پی ایس آر اے، ایم ڈی سی ایس ای ایف، ڈائریکٹریس ایجوکیشن اور دیگر اعلیٰ حکام نے شرکت کی۔وزیر تعلیم نے متعلقہ حکام کو ہدایت کی کہ ڈراپ آؤٹ اور جن بچوں کی عمر زیادہ ہے ان کو کمیونٹی سکولوں اور اے ایل پی سینٹرز میں داخل کروایا جائے انہوں نے یہ بھی ہدایت کی کہ ضم اضلاع اور خواتین کے داخلوں پر خصوصی توجہ دی جائے تاکہ کوئی بھی بچہ تعلیم کی عظیم نعمت سے محروم نہ رہے وزیر تعلیم نے پرائیویٹ سکولز ریگولیٹری اتھارٹی حکام کو ہدایت کی کہ نجی سکولوں کی رجسٹریشن کے لئے خصوصی مہم چلائے جائیں تاکہ غیر رجسٹرڈ سکولوں کو بھی رجسٹر کرواکر وہاں کے بچوں کو بھی مین سٹریم میں لایا جائے اور وہ سکول جو کہ عرصہ دراز سے غیر رجسٹرڈ ہیں ان کے لیے ایمینسٹی سکیم متعارف کروایا جائے۔ انہوں نے ای ایم ائی ایس حکام کو ہدایت کی کہ بچوں کی داخلہ ڈیٹا روزانہ کی بنیاد پر اپلوڈ کردی جائے۔ انہوں نے ڈائریکٹوریٹ آف ایجوکیشن اور سیکرٹریٹ لیول پر کمیٹیوں کے قیام کی بھی ہدایت کی جو جاری داحلہ مہم کی مانیٹرنگ کریں گے۔ انہوں نے تمام ڈسٹرکٹ ایجوکیشنز آفیسرز کو 4 دنوں کے اندر اپنے اضلاع کا داحلہ ٹارگٹ بھیجنے کی ہدایت کی جبکہ جن جن اضلاع میں انٹرنیٹ کے مسائل آرہے ہیں وہ پیشگی اقدامات کریں جبکہ ضم اضلاع کے مرد و خواتین ڈسٹرکٹ ایجوکیشن افیسرز داخلہ مہم اور ڈیٹا اپلوڈ پر خصوصی توجہ دیں۔ وزیر تعلیم نے تمام ڈسٹرکٹ ایجوکیشن آفیسرز کو یہ بھی ہدایت دی کہ جن جن اضلاع میں بچوں نے اے ایل پی سینٹرز میں اپنا کورس مکمل کیا ہے ان کو مینسٹریم میں لانے کے لئے سرکاری سکولوں میں داخلے دئیے جائیں۔

خیبر پختونخوا کے صوبائی وزیر برائے پبلک ہیلتھ، پختون یار خان کا کہنا ہے کہ خیبر پختونخوا، خصوصاً بنوں کی تعمیر و ترقی پر کوئی سیاست نہیں کی جائے گی بلکہ سیاست سے بالاتر ہو کر علاقے کی محرومیوں کا ازالہ کیا جائے گا ان خیالات کا اظہار انہوں نے بنوں کے علاقے میر مست اسماعیل خانی میں بجلی کی فراہمی کے افتتاح کے موقع پر کیا اس موقع پر اہلِ علاقہ نے بتایا کہ وہ گزشتہ پانچ سال سے بجلی جیسی نعمت سے محروم تھے، تاہم اب صوبائی وزیر نے 200 کے وی کا نیا ٹرانسفارمر نصب کروا دیا ہے صوبائی وزیر نے کہا کہ نگران حکومت نے صرف انتقامی کارروائیاں کیں، پچھلی پی ٹی آئی حکومت کے بڑے منصوبے ختم کیے۔ جب ہماری حکومت برسرِ اقتدار آئی تو سرکاری ملازمین کی پندرہ دن کی تنخواہیں بھی بقایا تھیں، جسے ہم نے حل کیا انہوں نے کہا کہ موجودہ حکومت نے صحت کارڈ کی حد 10 لاکھ سے بڑھا کر 20 لاکھ کر دی ہے، اب ہر شہری کے صحت کارڈ میں 20 لاکھ روپے کی سہولت موجود ہے صوبائی وزیر کا کہنا تھا کہ مخالفین نے بنوں کو ہمیشہ نظر انداز کیا، عوام کو مختلف مسائل سے دوچار رکھا، اور ہمارے حلقے میں تو ایک اینٹ تک کا کام نہیں کیا۔ آج جب میں علاقے کا دورہ کرتا ہوں تو ہر طرف مسائل ہی مسائل نظر آتے ہیں انہوں نے عزم ظاہر کیا کہ وہ اپنے پانچ سالہ دورِ حکومت میں تمام محرومیوں کا خاتمہ کریں گے اور اپنے حلقے کو ایک مثالی حلقہ بنائیں گے انہوں نے بتایا کہ حلقے میں مختلف ترقیاتی منصوبوں کا آغاز کر دیا گیا ہے اور ہر علاقے میں ترقیاتی کام کیا جائے گ خیبر پختونخوا کی حکومت عوام کی فلاح، بہبود اور تعمیر و ترقی کیلئے پرعزم ہے۔

صوبائی وزیر سماجی بہبود سید قاسم علی شاہ نے پیسکو چیف انجینئر اختر حمید سے اپنے حلقے میں بجلی کے مسائل کے حوالے سے اہم ملاقات کی۔ ملاقات میں حلقے میں جاری غیر اعلانیہ لوڈشیڈنگ، مختلف فیڈرز پر اوور لوڈنگ، کیبل کی تبدیلی اور ٹرانسفارمرز کی بروقت مرمت کے حوالے سے تفصیلی گفتگو کی گئی۔اس موقع پر صوبائی وزیر نے عوامی مشکلات کی نشاندہی کرتے ہوئے پیسکو چیف سے کہا کہ ان مسائل کا فوری حل نکالا جائے تاکہ عوام کو ریلیف مل سکے۔ پیسکو چیف انجینئر اختر حمید نے تمام مسائل کو ترجیحی بنیادوں پر حل کرنے کی یقین دہانی کرائی۔ملاقات کے دوران ضلعی زکوۃ چیئرمین ملک جہانزیب خان،چیئرمین ظاہر خان لنڈی ارباب، جنرل سیکرٹری سٹی ویسٹ اعجاز خان صراف اور حلقے کے دیگر ورکرز بھی موجود تھے۔عوامی حلقوں نے اس ملاقات کو خوش آئند قرار دیتے ہوئے اُمید ظاہر کی ہے کہ بجلی کے مسائل جلد حل ہوں گے۔

خیبر پختونخوا کے وزیر لائیو سٹاک وماہی پروری فضل حکیم خان یوسفزئی کی زیر صدارت محکمہ فشریز کی کارکردگی کے حوالے سے اجلاس بدھ کے روز پشاور میں منعقد ہوا جس میں ڈائریکٹر جنرل فشریز ارشد عزیز اور دیگر متلقہ افسران نے شرکت کی صوبائی وزیر کو محکمہ کی 9 مہینوں کی کارکردگی کے بارے میں تفصیلی بریفنگ دی گئی صوبائی وزیر کو بریفنگ میں بتایا گیا کہ کالام سوات اور ناراں میں چھ کنال اراضی کو لوگوں کے قبضے سے واگزار کرایاگیا جبکہ پشاور میں 10 کنال پر محیط اراضی میں پہلی فش بائیو ڈائیورسٹی سنٹر کو قائم کیا جائے گا مزید بتایا کہ خیبر پختونخوا کی تاریخ میں پہلی مرتبہ سوات میں فشریز پارک قائم کیا جائے گا جس میں سپورٹس گالا کا انعقاد کر کے فشنگ کے مختلف مقابلے کرائے جائیں گے اور مقابلوں میں بہترین کارکردگی پر انعامات اور ٹرافیاں دی جائیں گی بریفنگ میں بتایا گیا کہ فشنگ ڈیموں کی نیلامی سے محکمہ کی ریونیو میں بھی خاطر خواہ اضافہ ہوا ہے۔پچھلی نیلامی ایک کروڑ بہتر لاکھ (1 کروڑ 72 لاکھ) تھی جبکہ9 مہینوں میں یہ نیلامی 12 کروڑ 13 لاکھ سے تجاوز کر گئی ہے۔ فشنگ کی پیداوار میں بھی کافی حد تک اضافہ ہوچکا ہے جو 4 ہزار میٹرک ٹن سے بڑھ کر 5 ہزار 22 میٹرک ٹن تک پہنچ گیا ہے اس کے علاوہ 1710 فش فارمرز کو فشنگ کی تربیت دی گئی ہے جو اپنی کنبے کی کفالت میں اہم کردار ادا کر رہے ہیں جبکہ مختلف قسم کی فشنگ لائسنس بھی 1050 سے بڑھ کر 14943 لوگوں کو جاری کیے جا چکے ہیں صوبائی وزیر کو بتایاگیا کہ 9 مہینوں میں صوبے کے مختلف اضلاع میں غیر قانونی فشنگ پر 5093 لوگوں کے خلاف کاروائی ہوچکی ہے اور انکو چالان کیا گیا ہے اس موقع پر صوبائی وزیر فضل حکیم خان نے متعلقہ افسران کو ہدایت جاری کی کہ محکمہ کی کارکردگی میں مزید بہتری لانے کے لیے کوششوں کو تیز کیا جائے انہوں نے کہا کہ سوات میں فشریز پارک کی قیام سے صوبے میں سیاحت کو کافی فروغ ملے گا انہوں نے محکمہ کی 9 مہینوں کی کارکردگی کو سراہا اور اس میں مزید بہتری کی ہدایت کی انہوں نے سختی سے ہدایت کی کہ صوبے میں جہاں پر بھی غیر قانونی ماہی گیری ہورہی ہو تو اس کی روک تھام کے لیے عملی اقدامات اٹھا کر قانونی کاروائی کو فوری طور پر یقینی بنایا جائے اور ضمن میں کسی کے ساتھ کوئی نرمی نہ برتی جائے۔

ڈیرہ اسماعیل خان میں ڈیرہ جات 2025 کی جاری سرگرمیوں کے سلسلے میں بدھ کے روز محکمہ کھیل اور امور نوجوانان خیبرپختونخوا کے زیر اہتمام متعدد مقابلے منعقد ہوئے۔ ڈسٹرکٹ آڈیٹوریم ڈیرہ اسماعیل خان میں لوگوں کی توجہ کیلئے آرٹ نمائش سب سے اہم سرگرمی رہی۔ڈائریکٹر جنرل سپورٹس خیبر پختونخوا عبدالناصر خان نے اس آرٹ نمائش کا باقاعدہ افتتاح کیا جو دو روز تک جاری رہے گی۔اس نمائش میں ڈیرہ اسماعیل خان کے تقریباً 75 سینئر اور جونئیر فنکاروں کے تخلیقی کام کو نمائش کیلئے رکھا گیا ہے۔آرٹ نمائش کی افتتاحی تقریب میں ایڈمنسٹریٹر پشاور سپورٹس کمپلیکس جعفر شاہ، ڈائریکٹر سپورٹس عدنان سہیل،ڈپٹی ڈائریکٹر آپریشن سپورٹس جمشید بلوچ،فوکل پرسن برائے صوبائی وزیر کھیل حنیف داوڑ اور دیگر متعلقین موجود تھے۔ڈائریکٹر جنرل سپورٹس عبدالناصر خان نے آرٹ نمائش میں رکھے گئے فن پاروں کا نظارہ کیا اور ڈیرہ کے فنکاروں کی کینوس پر اتاری گئی تخلیقی اور خوبصورت کام کو سراہا۔وہ فنکاروں سے بھی ملے اور انھیں انکے کام پر داد پیش کی اور اس بات کا یقین دلایا کہ محکمہ سپورٹس کے تحت اس طرح کے ایونٹس کے ذریعے فنکاروں کے ہنر و تخلیق کے لئے مواقع فراہم کرنے کی کوشش کریں گے اور انکے فن کو قومی اور بین الاقوامی سطح پر اجاگر کرنے کی بھی کوشش کی جائے گی۔واضح رہے کہ ڈیرہ جات 2025 کی سرگرمیاں 20 اپریل تک جاری رہیں گی جس کے آخری مرحلے میں آف روڈ چیلنج کا ایونٹ منعقد ہوگا جس میں ملک کے نامی گرامی رائڈرز شرکت کریں گے۔

خیبر پختونخو زکواۃ و عشر کونسل کا نواں اجلاس کونسل کے چیئرمین امتیاز خان کی زیر صدارت بدھ کے روز پشاور میں منعقد ہوا۔ اجلاس میں سابق رکن قومی اسمبلی ساجد نواز، صوبائی زکواۃکونسل کے ممبران اور متعلقہ محکموں کے افسران نے شرکت کی۔اجلاس کے دوران کمیٹی کے ایجنڈے اور گزشتہ اجلاس کے فیصلوں پر تفصیلی غور کیا گیا جبکہ ضلع کرم کی زکواۃکمیٹی کی تشکیل نو بھی اجلاس کے اہم نکات میں شامل رہی۔اس موقع پر چیئرمین صوبائی زکواۃو عشر کونسل امتیاز خان نے خطاب کرتے ہوئے کہا کہ وزیر اعلیٰ خیبر پختونخوا علی امین خان گنڈاپور نے صوبے کے نادار، غریب اور بے سہارا افراد کے لیے تاریخی اقدام اٹھایا ہے۔ وزیر اعلیٰ نے روشن کارڈ اور سہارا کارڈ کے تحت مستحق افراد کو دی جانے والی ماہانہ امداد کو ڈبل کر کے 10 ہزار روپے کر دیا ہے۔اس فیصلے سے روشن مستقبل کارڈ کے تحت 9 ہزار افراد اور سہارا کارڈ کے تحت 15 ہزار مستحق افراد براہ راست مستفید ہوں گے۔چیئرمین امتیاز خان نے مزید کہا کہ صوبے کے عوام کے لیے جہیز فنڈ کی مد میں 2 لاکھ روپے کی مالی معاونت بھی فراہم کی جائے گی تاکہ غریب خاندانوں کی بیٹیوں کی شادی میں آسانی پیدا کی جا سکے۔انہوں نے کہا کہ صوبائی حکومت عوامی فلاح و بہبود کے منصوبوں پر عملدرآمد کے لیے پرعزم ہے اور زکوٰۃ و عشر کونسل کے تمام وسائل مستحقین کی خدمت کے لیے بروئے کار لائے جائیں گے۔