یوم یکجہتی کشمیر کے موقع پر ضلع ایبٹ آباد میں ضلع انتظامیہ کی جانب سے کشمیر کے مظلوم عوام سے یکجہتی کا بھرپور اظہار کیا گیا۔ اس سلسلے میں ایوب پل حویلیاں پر انسانی ہاتھوں کی زنجیر بنائی گئی اور کشمیری عوام سے یکجہتی اور ان کی حمایت کے لیے ایوب پل سے پرانا پل حویلیاں تک واک بھی کی گئی۔ اس موقع پر ڈپٹی کمشنر ایبٹ آباد کیپٹن (ر) ثناء اللہ خان، وائس چانسلر ایبٹ آباد یونیورسٹی آف اینڈ ٹیکنالوجی ملک مجدد الرحمان، تحصیل چیئرمین حویلیاں عزیز شیر خان، ایڈیشنل ڈپٹی کمشنر ایبٹ آباد عثمان اشرف، اسسٹنٹ کمشنر حویلیاں، لائن ڈیپارٹمنٹس کے افسران اور نمائندوں سمیت سکولوں کے طلباء و طالبات اور اساتذہ نے شرکت کی۔ شرکاء نے بھارتی ظلم و تسلط کے خلاف کشمیری عوام کے غیر متزلزل عزم و حوصلے کو سراہا اور انہیں یقین دلایا کہ ہمارا دل کشمیریوں کے ساتھ دھڑکتا ہے۔ کشمیر کی بھارتی تسلط سے آزادی تک کشمیریوں کی حمایت کے عزم کا اعادہ کرتے ہوئے بھارتی سامراج کے خلاف اور کشمیری عوام کے حق میں نعرے بازی کی گئی۔ دریں اثناء گورنمنٹ ماڈل ہائی سکول حویلیاں میں یوم یکجہتی کشمیر کے حوالے سے پروقار تقریب کا انعقاد کیا گیا جس کے مہمان خصوصی ڈپٹی کمشنر ایبٹ آباد کیپٹن (ر) ثناء اللہ خان تھے جبکہ اس موقع پر ایڈیشنل ڈپٹی کمشنر، اسٹنٹ کمشنرز، اساتذہ اور نجی و سرکاری سکولوں کے طلباء و طالبات نے بڑی تعداد میں شرکت کی۔ تقریب میں طلباء و طالبات نے کشمیری عوام سے یکجہتی کے اظہار اور ان پر بھارتی مظالم کو اجاگر کرنے حوالے سے ٹیبلوز پیشں کیے اور تقاریر کیں۔ تقریب سے خطاب کرتے ہوئے ڈپٹی کمشنر ایبٹ آباد کیپٹن ر ثناء اللہ خان نے کہا کہ آج یوم یکجہتی کشمیر کے موقع پر ایک دفعہ پھر ہم سب مل کر کشمیری عوام کو یقین دلاتے ہیں کہ ان کے حق خودارادیت کے حصول کے لیے پاکستان کے عوام ان کے ساتھ کھڑے ہیں۔ پاکستان نے کشمیر اور کشمیری عوام کے لیے ہر عالمی فورم پر آواز اٹھائی ہے اور اٹھاتا رہے گا۔ انہوں نے کہا کہ ایک دن کشمیر میں بھی آزادی کا سورج طلوع ہوگا۔ ہم سب مل کر کشمیری عوام کے ساتھ کھڑے ہیں اور کشمیر کی بھارتی تسلط سے آزادی تک ان کے ساتھ کھڑے رہیں گے۔ قبل ازیں یوم یکجہتی کشمیر کے موقع پر ڈپٹی کمشنر آفس میں پرچم کشائی کی تقریب کا انعقاد بھی کیا گیا جس کے مہمان خصوصی کمشنر ہزارہ ڈویژن ظہیر اسلام تھے۔ پرچم کشائی کے بعد ملک خدادا پاکستان کی سلامیت اور کشمیر کی بھارتی سامراج اور کشمیریوں کی بھارتی ظالم افواج سے آزادی کے لیے خصوصی دعا کی گئی۔

یوم یکجہتی کشمیر کے حوالے سے پختونخوا ہاؤس میں خصوصی تقریب ہوئی۔ کمشنر ڈویژن مردان نثار احمد مہمان خصوصی تھے۔ تقریب میں ڈپٹی کمشنر مردان ڈاکٹر عظمت اللہ وزیر, ڈی پی او ظہور بابر آفریدی، سیکرٹری ٹو کمشنر سارا تواب، اے ڈی سی فنانس فہد افتخار، سرکاری افسران، میڈیا، سول سوسائٹی، سکولوں کے طلباء و طالبات نے شرکت کی۔ کشمیری بھائیوں کے ساتھ اظہار یکجہتی کے لیے ایک منٹ کی خاموشی اختیار کی گئی۔ سکول کے بچے بچیوں نے قومی نغمے، ترانے، تقاریر اور ٹیبلو پیش کیے جن میں کشمیری مسلمانوں کی قربانیوں کو اجاگر کیا گیا اور ان پر بھارتی قابض فوج کے ظلم و بربریت کی منظر کشی کی گئی۔ مقررین نے کشمیری مسلمانوں پر بھارتی غاصب فوج کے مظالم کی مذمت کی۔ انہوں نے کشمیر میں انسانی حقوق کی خلاف ورزیوں پر عالمی ضمیر کی خاموشی کو افسوسناک قرار دیا۔ تقریب سے خطاب کرتے ہوئے کمشنر مردان نثار احمد نے کہا کہ کشمیری مسلمانوں کی جدوجہد آزادی ضرور کامیاب ہوگی۔ انہوں نے کہا کہ مسئلہ کشمیر کو کشمیری عوام کی امنگوں اور اقوام متحدہ کی قراردادوں کے مطابق حل کیا جائے۔ انہوں نے اقوام متحدہ اور انسانی حقوق کے اداروں پر زور دیا کہ وہ کشمیر میں بھارتی مظالم اور انسانی حقوق کی سنگین خلاف ورزیوں کا نوٹس لیں۔ کمشنر مردان نے کہا کہ یہ دن ہمیں یہ احساس دلاتا ہے کہ آزادی کتنی اہم ہے اور ہمارے اسلاف نے آگ و خون کے دریا پار کر کے ہمارے لیے آزادی حاصل کی جس کی ہمیں قدر کرنی چاہییے۔ انہوں نے کہا کہ ہندوستان نے مقبوضہ کشمیر کی خصوصی حیثیت کا خاتمہ کرکے وہاں کی ڈیموگرافی تبدیل کرنے کی کوشش کی ہے۔ پاکستان اپنے کشمیری بہن بھائیوں کی جدوجہد آزادی میں ان کے ساتھ ہے اور کشمیری مسلمانوں کی قربانیوں کی بدولت کشمیر آزاد ہو کر پاکستان کا حصہ بنے گا۔ آخر میں کمشنر مردان نثار احمد اور ڈپٹی کمشنر ڈاکٹر عظمت اللہ وزیر نے واک کی قیادت کی۔

صوبائی وزیر لائیو سٹاک، فشریز و کوآپریٹیو فضل حکیم خان نے کہا ہے کہ دنیا کا کوئی آئین اور طاقت کشمیر کو ہم سے الگ نہیں کرسکتا کشمیر کے لیے ہم تن من دھن کی بازی لگاکر بھی دفاع کریں گے یوم یکجہتی کشمیر کی مناسبت سے جاری اپنے پیغام میں صوبائی وزیر فضل حکیم خان نے کہا کہ یوم یکجہتی کشمیر منانے کا مقصد یہی ہے کہ اپنے کشمیری بہن بھائیوں کو یاد دلایا جا سکے کہ پاکستانی قوم ان کے ساتھ کھڑی تھے، کھڑی ہے اور کھڑی رہے گی، ہماری سانسیں ان کے ساتھ چلتی ہیں، کشمیر ہماری شہ رگ ہے اور ایک عالمی تنازع بھی ہے، بدقسمتی سے عالمی طاقتوں نے مسئلہ کشمیر میں دلچسپی نہیں دکھائی، کشمیریوں کی نسل کشی کی جا رہی ہے فضل حکیم خان نے عالمی طاقتوں پر ایک بار پھر زور دیتے ہوئے کہا ہے کہ وہ کشمیری عوام کی آزادی کی اس تحریک کو پایہ تکمیل تک پہنچانے کے لئے اپنا مثبت کردار ادا کریں انہوں نے کہا کہ مسئلہ کشمیر کو اقوام متحدہ کی قراردادوں کے مطابق حل ہونا چاہیے کشمیر پاکستان کی شہ رگ ہے اس کا تحفظ ہر پاکستانی کا فرض ہے کشمیر پاکستان کا تھا ہے اور ہم اسے حاصل کر کے رہیں گے انہوں نے کہا کہ سابق وزیراعظم قائد عمران خان نے اقوام متحدہ میں جس دلیری اور دلائل کے ساتھ کشمیر کا مقدمہ پیش کیا تھا اس کی تاریخ میں مثال نہیں ملتی ہم قائد عمران خان کی والہانہ قیادت میں کشمیری عوام کے حقوق کی جنگ لڑتے رہیں گے اور مقبوضہ کشمیر کا مسئلہ حل ہونے تک چین سے نہیں بیٹھیں گے انہوں نے کہا کہ صوبائی حکومت اور صوبے کے عوام یوم یکجہتی کشمیر کے موقع پر کشمیری عوام کے ساتھ مکمل یکجہتی کا اظہار کرتے ہیں اور حق خود ارادیت کے حصول کی اس جدوجہد میں ان کی اخلاقی، سیاسی اور سفارتی حمایت جاری رکھنے کے عزم کا اعادہ کرتے ہیں فضل حکیم خان نے عالمی برادری اور انسانی حقوق کی عالمی تنظیموں پر زور دیا کہ وہ کشمیری عوام پر بھارتی ظلم و ستم کا نوٹس لیں اور کشمیری عوام کو ان کا حق خودارادیت دلانے کے سلسلے میں اقوام متحدہ کی قرار دادوں پر عملدرآمد کو یقینی بنانے میں اپنا کردار ادا کریں۔

وزیراعلی خیبر پختونخوا کے مشیر برائے اینٹی کرپشن مصدق عباسی نے بانی پاکستان تحریک انصاف عمران خان سے ملاقات مسلسل روکنے پر اسلام آباد ہائی کورٹ میں رٹ دائر کردی۔ رٹ میں موقف اختیار کیا گیا ہے کہ بانی چیئرمین عمران خان سے متعدد بار ملاقات کرنے سے روکا گیا اور ملاقات کرنے نہیں دیا گیا- رٹ میں بانی چیئرمین عمران خان سے ملاقات کی اجازت دینے کی استدعا کی ہے۔ مشیر وزیراعلی مصدق عباسی کا کہنا تھا کہ اڈیالہ جیل کے باہر چار، پانچ گھنٹے انتظار کروایا جاتا ہے اور بغیر کسی وجہ کے ملاقات کے بغیر واپس کر دیتے ہیں۔بانی چیئرمین عمران خان سے ملاقات یقینی بنانے کے لیے اسلام آباد ہائی کورٹ میں رٹ پٹیشن دائر کردی ہے۔

چیف سیکرٹری خیبرپختونخوا، ندیم اسلم چوہدری کی زیرِ صدارت یومِ یکجہتی کشمیر کی تیاریوں کے سلسلے میں ایک جائزہ اجلاس منعقد ہوا، جس میں متعلقہ محکموں کے سیکرٹریز، کمشنرز اور ڈپٹی کمشنرز نے شرکت کی۔اجلاس میں بتایا کیا گیا کہ پانچ فروری کو خصوصی واک، دعائیہ تقاریب، تصویری نمائش اور ڈاکومنٹریز کے ذریعے کشمیری عوام کی جدوجہدِ آزادی کو اجاگر کیا جائے گا۔ اسکولوں، کالجوں اور جامعات میں آگاہی تقاریب منعقد کی جائیں گی، جبکہ صبح 9 بجے ایک منٹ کی خاموشی اختیار کی جائے گی۔اجلاس کو بتایا گیا کہ اس ضمن میں تیاریاں مکمل کرلی گئی ہیں۔چیف سیکرٹری نے تمام محکموں اور انتظامیہ کو ہدایت کی کہ یومِ یکجہتی کشمیر بھرپور طریقے سے منایا جائے، تاکہ عالمی سطح پر مقبوضہ کشمیر میں جاری بھارتی مظالم کو اجاگر کیا جا سکے۔ چیف سیکرٹری خیبرپختونخوا نے ویڈیو لنک پر کمشنرز اور ڈپٹی کمشنرز سے ڈویژنل ہیڈکوارٹرز اور اضلاع میں بھرپور تیاری کرتے ہوئے دن کی اہمیت کو اجاگر کرنے کی ہدایت کی۔

وزیر اعلیٰ خیبر پختونخوا کے معاون خصوصی برائے صنعت عبدالکریم تورڈھیر نے پیر کے روز شہد کے کاروباری مرکز ” ہنی انٹرنیشنل مارکیٹ چمکنی” اور زرعی تحقیقاتی مرکز ترناب فارم پشاور کا دورہ کیا۔منیجنگ ڈائریکٹر سمال انڈسٹریز ڈویلپمنٹ بورڈ حبیب اللہ عارف،چیف کلسٹر ڈویلپمنٹ ڈیپارٹمنٹ خیبر پختونخوا اکنامک زونز ڈویلپمنٹ اینڈ مینجمنٹ کمپنی طاہر خٹک،سمال اینڈ میڈیم انٹرپرائزز ڈویلپمنٹ اتھارٹی (سمیڈا) اور ٹریڈ ڈویلپمنٹ اتھارٹی آف پاکستان کے افسران اور ہنی بی ایسوسی ایشن کے نمائندے بھی ان کے ہمراہ تھے۔معاون خصوصی نے دورے کے دوران شہد کے شعبے کے حوالے سے اجتماعی مرکز میں کاروباری سرگرمیوں کا جائزہ لیا اور وہاں پر سہولیات کا بھی معائنہ کیا۔معاون خصوصی کو انھیں شہد محفوظ کرنے اور پروسسینگ کرنے کے مراحل کے حوالے سے آگاہی بھی دی گئی اور انھوں نے ہنی بی ایسوسی ایشن کی جانب سے اس شعبے کی ترقی کے حوالے سے تجاویز بھی فراہم کی گئیں۔اس موقع پر انھوں نے زرعی تحقیقاتی ادارہ ترناب فارم میں شعبہ انٹامالوجی کے تحت قائم ہنی کوالٹی ٹیسٹنگ لیب کا دورہ بھی کیا۔انھوں نے وہاں پر شہد کے تجزیاتی سرگرمیوں کا جائزہ لیا اور انھیں مختلف انواع کے تجزیاتی ٹیسٹوں کے بارے میں معلومات فراہم کی گئیں اور ان کی سرٹیفیکیشن کے حوالے سے بھی انہیں بتایا گیا۔اس موقع پر معاون خصوصی نے کہا کہ شہد کا کاروبار اور مگس بانی صوبے کے معیشت کے حوالے سے اہمیت کے حامل ہیں اور اس سے کثیر تعداد میں لوگوں کا کاروبار وابستہ ہے۔انھوں نے کہا کہ اس شعبے پر توجہ دینے سے یہ آگے مزید ترقی کر سکتا ہے اس لیئے حکومت اس ضمن میں اپنی طرف سے بھرپور تعاون فراہم کرے گی۔انھوں نے تحقیقاتی مرکز کے حکام کو ہنی کے اینٹی بائیوٹیک ٹیسٹنگ میں قرشی کیساتھ باہمی رابطے اور تعاون پر زور دیا تاکہ اس کی سرٹیفیکیشن مزید بہتر اور معیاری ہو اور کہا کہ اس سلسلے میں پبلک پرائیویٹ پارٹنرشپ کے ماڈل پر بھی غور کیا جائے۔

بانی پی ٹی آئی عمران خان سے ملاقات یقینی بنانے کیلئے آج 3 فروری کو اسلام آباد ہائی کورٹ میں ریٹ پٹیشن دائر کی ہے مشیر خزانہ خیبرپختونخوا مزمل اسلم

مہنگائی اعداد و شمار میں حکومت تصویر کا دوسرا رخ چھپا رہی ہے مشیر خزانہ خیبرپختونخوا مزمل اسلم

مشیر خزانہ و بین الصوبائی رابطہ خیبرپختونخوا مزمل اسلم نے کہا ہے کہ خیبر پختونخوا حکومت نے پچھلے بجٹ میں پراپرٹی منتقلی ٹیکس 6 سے 3 فیصد کم کئے تھیاور خیبرپختونخوا حکومت نے وفاقی حکومت کو بھی ٹیکس شرح کم کرنے کی درخواست کی تھی مشیر خزانہ خیبرپختونخوا نے کہا کہ غریب لوگوں کے مکانات منتقلی میں زیادہ ٹیکس بہت بڑی رکاوٹ ہے جں کہ خیبرپختونخوا کاموقف ٹھیک ثابت ہوا وفاقی حکومت پراپرٹی ٹیکس کی شرح کو کم کرنے جارہی ہے۔ مزمل اسلم نے ایک اور بیان میں کہا کہ بانی پی ٹی آئی عمران خان سے 30 جنوری کو اڈیالہ جیل میں ملاقات کا وقت دیا گیا تھا مگر چار گھنٹے انتظار کروا کر بغیر وجہ کے واپس کر دیا گیا مزمل اسلم نے کہا کہ آج 3 فروری کو اسلام آباد ہائی کورٹ میں ملاقات یقینی بنانے کیلئے ریٹ پٹیشن دائر کی ہے۔ مشیر خزانہ خیبرپختونخوا مزمل اسلم نے مہنگائی بارے بیان میں کہا ہے کہ حکومت مہنگائی کے حوالے سے تصویر کا دوسرا رخ چھپا رہی ہے آج مہنگاء کے اعداد و شمار میں بتایا جائے گا کہ مہنگائی کی شرح 2.4 فیصد رہ گء ہے۔ مشیر خزانہ خیبرپختونخوا نے کہا کہ جو نا جانے دس یا پندرہ سال کی کم ترین شرح مہنگائی ہے اور مہنگائی کے اعداد و شمار میں کور انفلیشن core inflation کا ڈیٹا بھی جاری کیا گیا ہے جس کے مطابق دیہاتی مہنگائی 10.4 فیصد اور شہری مہنگائی 7.8 فیصد ریکارڈ کی گء ہے مزمل اسلم نے کہا کہ دراصل یہ وہ مہنگائی ہے جس سے قوت خرید کی کمر ٹوٹتی ہے آج مہنگائی کے حوالے سے خبروں میں مستقل مہنگائی کا زکر نہیں کیا جائے گا سوشل میڈیا کا دور ہے کچھ بھی نہیں چھپ سکتا ہے۔

صوبائی وزیر لائیو سٹاک، فشریز و ریجنل صدر پاکستان تحریک انصاف فضل حکیم خان کی زیر صدارت انصاف ہاؤس مینگورہ میں آٹھ فروری صوابی میں جلسے کی تیاریایوں کے حوالے سے مشاورتی اجلاس کیا گیا جس میں ممبران قومی و صوبائی اسمبلی، میئر و تحصیل چیئرمینان، ضلعی و تحصیل کے پی ٹی آئی عہدیداران نے شرکت کی، مشاورتی اجلاس میں 8 فروری صوابی کے حوالے سے مشاورت کی گئی اور سوات سے بھرپور انداز میں شرکت کا عزم کیا گیا، صوبائی وزیر فضل حکیم خان نے اجلاس سے خطاب کرتے ہوئے کہا کہ جعلی وفاقی حکومت نے 8 فروری کو ہمارا مینڈیٹ چرایا اس روز کو بطور یوم سیاہ منانے کے لیے سب کو نکلنا ہو گا انہوں نے کہا کہ غلامی سے نجات کے لیے جدوجہد ضروری ہوتی ہے آٹھ فروری کو اس قوم کا مینڈیٹ چرا کر ملک کو اندھیروں میں دھکیلا گیا۔ پاکستانی قوم نے تمام تر مشکلات کے باوجود جوق در جوق نکل کر تحریک انصاف کے حق میں ووٹ ڈالا مگر ان کے ووٹ کو پیروں تلے روند کر جمہوریت پر شب خون مارا گیا۔ ملک میں جمہوریت کے ہاتھ پاؤں باندھ کر انسانی حقوق کی دھجیاں بکھیر دی گئیں کارکنوں سے ممبران قومی و صوبائی اسمبلی سلیم الرحمان، علی شاہ خان ایڈوکیٹ، سلطان روم خان، محمد نعیم، سوات سٹی میئر شاہد علی خان، تحصیل چیئرمین کبل سعید خان، تحصیل چیئرمین میاں شاہد علی اور دیگر نے بھی خطاب کیا جبکہ انصاف یوتھ ونگ، آئی ایس ایف اور پی ٹی آئی کارکنان نے کثیر تعداد میں شرکت کی مقررین نے کہا کہ موجودہ وفاقی حکومت اخلاقیات سے بالکل عاری ہے کیونکہ انھوں نے عوام کے حق پر ڈاکہ مار کر عوام کو ان کے نمائندگان چننے کے حق سے محروم کیا 8 فروری کو سوات اور ملاکنڈ ڈویژن سے عوام کا سمندر اپنے حق کیلئے صوابی جلسے میں شرکت کیلئے جائے گا اور اپنے مینڈیٹ کو واپس لینے کیلئے بھرپور آواز اٹھائے گا۔8 فروری کو سوات سمیت ملاکنڈ ڈویژن سے بڑا قافلہ صوبائی وزیر فضل حکیم خان کی قیادت میں صوابی جلسے کیلئے روانہ ہوگا۔