خیبر ٹیچنگ ہسپتال کے ڈائریکٹر ڈاکٹرمحمد ظفر آفریدی کی گزشتہ روز وزیراعظم پاکستان انوار الحق کاکڑ کے ساتھ وزیراعظم ہاؤس اسلام آباد میں ملاقات ہوئی، ڈاکٹر محمد ظفر آفریدی نے خیبر ٹیچنگ ہسپتال اور صوبے میں دیگر صحت کے مسائل کے بارے میں تبادلہ خیال کیا۔ ملاقات میں خیبر ٹیچنگ ہسپتال کے ڈائریکٹر نے وزیر اعظم کو سوینئر کے طور پر خیبر پاس کا ماڈل تحفہ پیش کیا جبکہ خیبر ٹیچنگ ہسپتال کی تین سالہ کارکردگی رپورٹ کا کتابچہ بھی پیش کیاگیا، وزیراعظم نے خیبر ٹیچنگ ہسپتال میں ریکارڈ تبدیلیوں میں اور ترقیاتی کاموں پر گہری خوشی کا اظہار کیا اور انتظامیہ کی انتھک محنت اور کوششوں کو سراہا، انھوں کہا کہ میں خیبر ٹیچنگ ہسپتال سے واقف ہوں اور خیبر پختونخوا میں خیبر ٹیچنگ ہسپتال ایک رول ماڈل ادارے کا کردار ادا کر رہا ہے، کتابچے میں نئے تعمیر شدہ او پی ڈی عمارت، ماڈیولر، ہسپتال کے آپریشن تھیٹر، نئی ایمرجنسی عمارت کی تعمیر کے قیام کے ساتھ ساتھ پاکستان کا پہلی ہیلیم فری، ایم آر آئی مشین، پاکستان کے پہلے جنرل اور قدیم سرکاری ہسپتال جو آئی ایس او سرٹیفیائیڈ ہے، سے متعلق معلومات درج ہیں۔ ڈاکٹرمحمد ظفر آفریدی نے ان کو مستقبل کے مزید ترقیاتی کاموں کی فہرست و تفصیلات پیش کیں جو بجٹ میں کمی کی وجہ سے پوری نہیں ہو رہیں جس پر وزیراعظم نے یقین دہانی کرائی کہ خیبر پختونخوا کی حکومت سے مزید بجٹ کی منظوری کے حوالے سے بات کرینگے۔ مزید برآں ڈاکٹر ظفر آفریدی نے وزیراعظم پاکستان انوار الحق کاکڑ کو خیبر ٹیچنگ ہسپتال دعوت کی پیشکش کی اور ہسپتال میں نئے تعمیر شدہ ائی سی یو کمپلیکس سمیت کیت لیب اور پاکستان کی پہلی 1.5 ٹیسکلا ہیلیم فری ایم آر ائی مشین کی افتتاحی تقریب میں بطور مہمان خصوصی شرکت کریں جس پر وزیر اعظم نے گہری دلچسپی ظاہر کی اور انھوں نے یقین دہانی کرائی کہ میں اپنے اگلے پشاور کے دورے میں انشاء اللہ خیبر ٹیچنگ ہسپتال کا دورہ کرینگے اور ہسپتالوں کے درپیش مسائل کو ترجیحی بنیادوں پر حل کرینگے کیونکہ عوام کو بہترین طبی سہولیات فراہم کرنا ہی حکومت وقت کی اولین ترجحات میں شامل ہوتا ہے۔

ایل آرایچ پشاور میں پہلے کارڈیالوجی سمٹ کا انعقاد، مشیر صحت پروفیسر ریاض انورکی بحیثیت مہمان خصوصی شرکت، ایل آرایچ پشاور میں پہلے کارڈیالوجی سمٹ کا انعقادہوا جس میں مشیر صحت پروفیسر ریاض انور نے بحیثیت مہمان خصوصی شرکت کی، کارڈیالوجی سمٹ کے انعقاد کا اہتمام ڈاکٹر ملک فیصل افتخار اور اس کی ٹیم نے کیا اور اس میں کارڈیالوجی کے نامور ڈاکٹروں نے حصہ لیا۔اس موقع پر ایل آر ایچ کے بورڈ آف گورنرز کے چیرمین پروفیسر محمد ذبیر خان اور انتظامیہ بھی، بورڈ ممبر ڈاکٹر موسیٰ کلیم کے،پروفیسر حفیظ اللہ، ڈاکٹر محمود اور کے ٹی ایچ کے ڈاکٹر عمار اشرف، پاکستان چیسٹ سوسائٹی کے صدر،پی آئی سی۔ ایچ ایم سی، کے کارڈیالوجسٹ بھی موجود تھے۔ اس موقع پر مشیر صحت ڈاکٹر ریاض انور نے کہا کہ ایل آر ایچ کا کارڈیالوجی یونٹ بہترین خدمات پیش کر رہا ہے اور اس سلسلے کو برقرار رکھنے کے لئے ہر ممکن تعاون جاری رکھیں گے۔ مختلف موضوعات پر اپنے خیالات کا اظہار کرتے ہوئے دیگر مقررین نے کہا کہ ایل آر ایچ کا کارڈیالوجی یونٹ صوبے کا پرانا اور بڑا یونٹ ہے۔ ۔ایل آر ایچ کے کارڈیالوجی یونٹ کے ہیڈ ڈاکٹر ملک فیصل افتخار نے کہا کہ ہارٹ اٹیک کے مریضوں کو ایکو، انجیوگرافی اور پرائمری پی سی آئی سمیت دیگر تمام سروسز 24 گھنٹے مہیا کی جا رہی ہیں جبکہ اس حوالے سے نئی ٹیکنالوجی اور جدید مشینری اور آلات کو بروئے کار لایا جا رہا ہے۔ انہوں نے کہا کہ ایمرجنسی سی سی یو میں 24 گھنٹے دل کے امراض میں مبتلا مریضوں کو علاج فراہم کیا جا رہا ہے جبکہ پیڈیاٹرک کارڈیالوجی یعنی بچوں کے دل کے امراض کا یونٹ بھی مکمل طور پر فعال ہے جو دل کے بیمار بچوں کو مسلسل علاج فراہم کر رہا ہے۔ ڈاکٹر ملک فیصل افتخار نے کہا کہ ایل آر ایچ کا پریونٹو کارڈیالوجی سیکشن علاج کے ساتھ ساتھ دل کی بیماریوں کی روک تھام کے لیے بھی مسلسل کام کر رہا ہے۔

خیبر پختونخوا حکومت اوریو ایس ایڈنے گندم کی پیداوار میں اضافے کے لیے ایک مشترکہ منصوبے کا آغاز کیا اورپاکستان کے زرعی شعبے کومزید ترقی دینے کے لیے ایک اہم اقدام کے تحت یو ایس ایڈ کی اقتصادی ترقی و بحالی اور خیبر پختونخوا کے زراعت کے توسیعی محکمے اورضلع مردان کے 250 مقامی کسانوں کے ساتھ مل کر، 250 ایکڑ زمین کے لیے بیج فراہم کیے۔ اس موقع پر ماہرین نے بتایا کہ پاکستان عالمی سطح پر 8 واں سب سے بڑا گندم پیدا کرنے والا اور ایشیا میں تیسرا سب سے بڑا ملک ہونے کے ناطے، زراعت میں نمایاں حصہ رکھتا ہے، جو اس شعبے میں 7.8 فیصد اور ملک کے جی ڈی پی میں 1.8 فیصد حصہ ڈالتا ہے (پاکستان کا اقتصادی سروے 2021-2022)۔ گندم کے کاشتکاروں کو درپیش مسائل سے نمٹنے اور پائیدار حل کو یقینی بنانے کے لیے سیڈ کلسٹر اپروچ نظریے کو اپنایا گیا۔ڈاکٹر شکیل کاکاخیل، یو ایس ایڈ کی اقتصادی ترقی و بحالی کے ڈ پٹی چیف آف پارٹی نے اس منصوبے کی اہمیت کو اجاگر کرتے ہوئے کہا، “خیبر پختونخوا میں، گندم کی پیداوار دوسری صوبوں کے مقابلے میں کم رہی ہے۔ پنجاب اور سندھ میں اوسط پیداوار 2.9 ٹن فی ہیکٹر ہے، جبکہ خیبر پختونخوا میں گندم کی اوسط پیداوار 1.56 ٹن فی ہیکٹر ہے۔ اعلیٰ پیداوار والی اقسام کی عدم موجودگی، پانی کی کمی، غیر متوازن کیڑے مار ادویات اور کھادوں کی ایپلی کیشنز جیسی مختلف وجوہات کی وجہ سے پیداوار نسبتا کم ہے۔انہوں نے مزید کہا، “بیج کسی بھی دوسرے عنصر سے زیادہ یہ فیصلہ کرتا ہے کہ کوئی فصل کیا نتیجہ حاصل کر سکتی ہے۔ فصلوں کے انتظام، ان پٹس اور ان کے معیار کی ایپلی کیشن، اور موسمی حالات جیسے تمام دیگر عوامل دوسرے نمبر پر آ سکتے ہیں۔ بیج کی کم پیداوار کی صلاحیت بہتر مشینری، فصل کی دیکھ بھال، ان پٹس وغیرہ کے باوجود زیادہ پیداوار نہیں دے گی۔خیبر پختونخوا کی سالانہ گندم کے بیج کی ضرورت تقریباً 30,000 ٹن ہے، جبکہ فیڈرل سیڈ سرٹیفیکیشن اور رجسٹریشن ڈیپارٹمنٹ کے مطابق کسانوں کو صرف 7 فیصد (2,100 ٹن) سرٹیفائیڈ گندم کا بیج دستیاب ہے۔ باقی بیج غیر رسمی ذرائع سے آتا ہے، یا تو کسانوں کے اپنے بچائے ہوئے بیج یا ساتھی کسانوں، یا گاؤں کی دکانوں سے حاصل کردہ بیج، جہاں ہمیشہ تخم کے معیارکے بارے معلومات نامکمل ہوتی ہیں۔کلسٹر نقطہ نظر کے تحت، ضلع مردان کے علاقے ساولڈھیر کے 250 کسانوں کو 250 ایکڑ رقبے کے لیے بنیادی گندم کا بیج، مکس کھاد وغیرہ فراہم کی جائیں گی۔ اس اقدام کا مقصد اس خطے میں گندم کاشت کرنے والوں کے بنیادوں کو مضبوط بنانا ہے۔

خیبر پختونخوا کے نگران وزیر برائے صنعت وحرفت،فنی تعلیم اور امور ضم اضلاع ڈاکٹر عامر عبداللہ نے بدھ کے روز ضم ضلع مہمند کا ایک روزہ دورہ کرکے وہاں پر قائم ہونے والے دو صنعتی یونٹس کی فعالیت کا افتتاح اور ایک نئے یونٹ کا سنگ بنیاد رکھا۔خیبر پختونخوا اکنامک زونز ڈویلپمنٹ اینڈ منیجمنٹ کمپنی کے تحت ضلع مہمند میں قائم صنعتی زون میں نگران وزیر نے نئے گھی یونٹس کا باضابطہ افتتاح کیا جو ایک مہینے کے مختصر عرصے میں فعال کئے گئے ہیں جبکہ نئے قائم ہونے والے آٹا یونٹ کا سنگ بنیاد بھی رکھا۔ان یونٹس کے قیام میں مجموعی طور پر 1.2 بلین روپے کی سرمایہ کاری کی گئی ہے جس سے مجموعی طور پر 1100 افراد کو باعزت روزگار کے مواقع میسر آسکیں گے اور بالخصوص اس سے مقامی افراد کو اپنے ہی علاقے میں بہتر روزگار ملے گا۔نئے یونٹس کے افتتاح کے دوران نگران وزیر کے ہمراہ خیبر پختونخوا اکنامک زونز ڈویلپمنٹ اینڈ منیجمنٹ کمپنی کے چیف ایگزیکٹیو آفیسر جاوید اقبال خٹک اور کمپنی کے زون منیجر سمیت،صنعت کار اور مقامی عمایدین بھی موجود تھے۔ اس موقع پر نگران وزیر نے اظہار خیال کرتے ہوئے اس عزم کا اظہار کیا کہ وہ دن دور نہیں جب یہ علاقے اپنے باسیوں کی شاندار روایات کیساتھ ساتھ اپنی محنت اور یہاں پر لگی صنعتوں کی وجہ سے پہچانے جائیں گے۔انھوں نے اس موقع پر ہدایت کی کہ علاقے میں ماربل صنعتوں سے نکلنے والے فضلے کو ضائع ہونے سے بچانے کیلئے اسے کارآمد بنایا جائے۔اس فضلے سے ٹائل بنانے کیلئے پلانٹ لگایا جائے یور یہ بال ملز میں بننے والی مصنوعات میں بھی کام آسکتا ہے۔ اس سلسلے میں کے پی ایزڈمک تکنیکی مدد فراہم کرے۔نگران وزیر نے اس موقع پر کمپنی حکام کو گھی یونٹس میں فوڈ پروسیسنگ کے دوران فوڈ سیفٹی ریگولیشن سے متعلق آگاہی کیلئے مدد فراہم کرنے کی ہدایت کی جبکہ مذکورہ گھی صنعتوں پر زور دیا کہ وہ قانونی تقاضوں کے مطابق صفائی کے معیار میں بہتری لائیں۔نگران وزیر نے اس موقع پر بعض صنعتکاروں کی جانب سے زون میں نکاسی آب کے مسلے کا نوٹس لیتے ہوئے اگلے تعمیراتی ترقیاتی پیکج میں اس سکیم کو ڈالنے کی ہدایت کی۔انھوں نے اس موقع پر کمپنی حکام کو ادارہ جاتی سماجی ذمی داری”کارپوریٹ سوشل رسپانسبلٹی” کے اصولوں پر عمل کرتے ہوئے صنعتکاروں کی باہمی تعاون سے ایک فنڈ قائم کرنے کی بھی ہدایت کی جو مقامی آبادی کی فلاح وبہبود کیلئے استعمال میں لایا جاسکے گا۔

خیبر پختونخوا کے نگران وزیر برائے فنی تعلیم،صنعت وحرفت اور امور ضم اضلاع ڈاکٹر عامر عبداللہ نے منگل کے روز گورنمنٹ کالج آف ٹیکنالوجی پشاور کا دورہ کرکے وہاں پر فنی علوم وتربیت کی نصابی سرگرمیوں اور عملی تربیت کا جائزہ لیا۔نگران وزیر کو اس موقع پر کالج میں فراہم کئے جانے والے ڈگری کورسز اور عملی تربیت کی مختلف شعبہ جاتی سرگرمیوں پر تفصیلی بریفنگ بھی دی گئی۔نگران وزیر نے بریفنگ کے دوران ہدایت کی کہ ادارہ اپنے اعلیٰ معیار کو عالمی سطح پر تسلیم کرنے کیلئے عالمی سطح پر ادارہ جاتی معیارات جانچنے کے ادارے “آئی ایس او”سرٹیفیکیشن کرانے کیلئے اقدامات اٹھائے اور اس سلسلے میں انھوں نے ایک مہینے کے اندر تمام لوازمات پورے کرنے کی ہدایت کی۔نگران وزیر نے کالج کے طلبہ کو علمی اور تحقیقی سرگرمیوں کیلئے ایچ ای سی کی ڈیجیٹل لائبریری سے استفادہ اٹھانے کیلئے کالج کی لائبریری کو اس کے ساتھ منسلک کرانے کی بھی ہدایت کی۔انھوں نے اس موقع پر فنی تربیتی اداروں اور صنعتوں کے مابین موئثر رابطہ کاری کو اہم قرار دیتے ہوئے ہدایت کی کہ کالج صوبے کا اہم فنی ادارہ ہوتے ہوئے ڈگری کورسز کے اختتامی عرصے میں عملی تربیت پانے کیلئے صنعتوں میں طلبہ کی تربیتی سرگرمیوں کی نگرانی اور جانچ کیلئے ایپ بنائے جو موبائل اور مرکزی ڈیش بورڈ کے ذریعے صنعتوں میں بھیجے گئے طلبہ کی تربیتی سرگرمیوں پر نظر رکھنے میں معاون ثابت ہو۔انھوں نے اس حوالے سے آئندہ دو مہینوں میں اس منصوبے کو عملی طور پر فعال کرنے کی ہدایت کی۔نگران وزیر نے کالج کی عملی تربیت میں آٹو لیب اور دیگر جدید مشینی لیبارٹریز کو انتہائی مفید قرار دیتے ہوئے انھیں ادارے کے ذرائع آمدن کیلئے بھی استعمال میں لانے پر زور دیا اور کہا کہ اس سلسلے میں ادارے کی فراہم کی جانے والی ممکنہ خدمات کے دائرے کو طلبہ کی تربیت سے آگے بڑھا کر مختلف سرکاری و نجی اداروں اور صنعتوں کی ضروریات کے لئے استعمال میں لایا جائے۔ اس سے نہ صرف ادارہ کے مالی وسائل بڑھیں گے بلکہ دیگر اداروں و صنعتوں اور کالج کے مابین ممکنہ باہمی تعاون کا رابطہ بڑھے گا۔ اس موقع پر نگران وزیر کا کہنا تھا کہ ادارہ اپنے مالی اخراجات کو کنٹرول کرنے اور توانائی ضروریات کو شمسی توانائی پر منتقل کرنے کیلئے اقدامات شروع کرے کیونکہ موجودہ مالی حالات کے تناظر میں توانائی ضروریات کا پائدار حل مستقبل میں شمسی توانائی کو بروئے کار لانے میں مضمر ہے۔