خیبرپختونخوا کے نگران وزیر اطلاعات و تعلقات عامہ بیرسٹر فیروز جمال شاہ کاکاخیل نے کہا ہے کہ صحت مند زندگی گزارنے کے لئے صحت مندانہ سرگرمیوں کا ہونا ضروری ہے، سپورٹس ایونٹس اس ضمن میں اہم کردار ادا کرتی ہیں، کرنل شیر خان شہید سٹیڈیم میں پشاور کے صحافیوں کے لئے سپورٹس ایونٹ کا انعقاد خوش آئند ہے، محکمہ اطلاعات و تعلقات کے آفیسرز بھی اس ایونٹ میں شرکت کررہے ہیں، ایسے ایونٹس سے صحافیوں کو ایک نئی توانائی فراہم ہوتی ہے جس سے وہ پیشہ ورانہ فرائض ایک نئے ولولے کے ساتھ انجام دینے کے لئے تیار ہوتے ہیں، پشاور پریس کلب اور جملہ ممبران و صحافیوں کو ایسی صحت مندانہ سرگرمیوں کے انعقاد پر مبارکباد پیش کرتا ہوں، امید ہے اس میں مزید وسعت لائی جائے گی اور کرکٹ کے علاوہ دیگر کھیلوں کے مقابلے بھی منعقد کئے جائیں گے، ان خیالات کا اظہار انہوں نے میڈیا کرکٹ لیگ ایونٹ میں پشاور میں پریس کلب اور محکمہ اطلاعات و تعلقات عامہ خیبرپختونخوا کی ٹیموں کے درمیان کھیلے گئے میچ میں بطورِ مہمان خصوصی شرکت کرتے ہوئے کیا. اس موقع پر سیکرٹری اطلاعات و تعلقات حکومت خیبرپختونخوا سید جبار شاہ، ڈائریکٹر جنرل اطلاعات و تعلقات عامہ خیبرپختونخوا محمد عمران خان، ڈائریکٹر پبلک ریلیشنز لیاقت آمین، صدر پریس کلب پشاور ارشد عزیز ملک، سینئر صحافیوں ایم ریاض، شمیم شاہد، شہاب الدین، انیلا شاہین سمیت دیگر صحافی اور نظامت اطلاعات و تعلقات عامہ کے آفیسرز موجود تھے. صحافیوں اور آفیسرز سے گفتگو میں نگران صوبائی وزیر اطلاعات نے کہا کہ صحافی مشکل صورتحال میں رپورٹنگ کے فرائض انجام دیتے ہیں اور انہیں سخت ڈیڈ لائن کے تحت کام کرنا پڑتا ہے ایسے میں کھیلوں کی سرگرمیاں ذہنی دباؤ کم کرنے اور فشار سے بچانے میں بہت سود مند ثابت ہوتے ہیں. اس موقع پر بات چیت کرتے ہوئے صدر پریس کلب پشاور ارشد عزیز ملک نے نگران وزیر اطلاعات بیرسٹر فیروز جمال شاہ کاکاخیل کا حوصلہ افزائی کرنے کے لئے گراونڈ انے پر شکریہ ادا کیا. نگران صوبائی وزیر نے اس سے پہلے گراونڈ میں کرکٹ ٹیم کے کھلاڑیوں سے ملے، بیٹنگ کرتے ہوئے کرکٹ میچ کا آغاز کیا اور کچھ دیر گراونڈ میں موجود رہے اور میچ سے محظوظ ہوئے۔

خیبرپختونخوا کینگران وزیر اطلاعات و تعلقات عامہ بیرسٹر فیروز جمال شاہ کاکاخیل نے کہا ہے کہ غیر قانونی طور پر مقیم وہ غیر ملکی جو رضاکارانہ طور پر پاکستان سے جارہے ہیں ان کو صوبائی نگران حکومت سہولت کے ساتھ بارڈر تک رسائی دے گی، ایسے افراد کے ساتھ تعاون کیا جائے گا، جبکہ رضاکارانہ طور پر نہ جانے والے افراد کو آج (یکم نومبر) سے پروسسنگ زون میں منتقل کر کے ڈیپورٹ کیا جائے گا، ایسے افراد کے خلاف ریاست حرکت میں آئے گی اور قوانین پر سختی سے عملدرآمد یقینی بنایا جائیگا، اب تک 82000 سے زائد غیر قانونی افراد رضاکارانہ طور پر بارڈر کراس کرکے اپنے ممالک جاچکے ہیں،صرف گزشتہ روز ہی 11000 افراد باڈر کراس کر کے اپنے ممالک واپس گئے، صوبے کے مختلف اضلاع میں 52000 غیر قانونی طور پر مقیم افراد کی میپنگ کی گئی ہے جن کے انخلاء کے لئے پلان بھی تیار ہے، محکمہ داخلہ میں مربوط طریقہ کار اپنا کر تمام صورتحال کی سنٹرل کنٹرول روم سے مانیٹرنگ جاری ہے، کنٹرول روم دیگر صوبوں، اضلاع اور محکموں کے درمیان رابطے کا کام کررہا ہے تاکہ غیر قانونی طور پر مقیم افراد کو منظم طریقے سے اپنے ممالک بھیجا جاسکے. ان خیالات کا اظہار انہوں نے محکمہ داخلہ پشاور میں پریس کانفرنس کرتے ہوئے کیا، پریس کانفرنس کے دوران ایڈیشنل چیف سیکرٹری ہوم عابد مجید اور دیگر اعلیٰ حکام بھی موجود تھے، پریس کانفرنس سے پہلے میڈیا نمائندوں کو کنٹرول مختلف سیکشنز اور طریقہ کار پر بریف بھی کیا گیا. نگران وزیر اطلاعات خیبر پختونخوا بیرسٹر فیروز جمال شاہ کاکاخیل نے کہا کہ غیر قانونی طور پر مقیم افراد کی ان کے اپنے ممالک واپسی کو تین مرحلوں میں مکمل کیا جائے گا، خیبرپختونخوا میں غیر قانونی طور پر مقیم افراد کی واپسی کے لئے اتوار پیر اور منگل کا دن مقرر کیا گیا ہے جبکہ جمعہ اور ہفتہ کو پنجاب اور بدھ جمعرات کو اسلام آباد، گلگت بلتستان اور آزاد کشمیر کے لئے مختص کیا گیا ہے، غیر قانونی افراد کو مختص کردہ پروسسنگ زون میں رکھا جائے گا جہاں سے وہ اپنے ممالک ڈیپورٹ ہونگے، یکم نومبر سے سنگل ڈ اکومنٹ پالیسی پر عملدرآمد کا آغاز ہو گیا ہے اور پاکستان آنے والوں کو پاسپورٹ ویزہ پر ہی ویلکم کیا جائے گا. نگران صوبائی وزیر نے اس موقع پر کہا کہ عوام کے جان ومال کی حفاظت اولین ترجیح ہے، شہریوں کو پر امن ماحول فراہم کرنے اور بہتر معاشی استحکام کے لئے سخت اقدامات کئے گئے ہیں جس میں سمگلنگ کا خاتمہ، بھتہ خوری و غیر قانونی سم کارڈ کی روک تھام، اور ناجائز منافع خوری کا خاتمہ شامل تھے، جس کے مثبت نتائج برآمد ہوئے اور ملک میں معاشی استحکام آنا شروع ہو گیاہے اور اقدامات کے اس تسلسل کو جاری رکھا جائے گا.

خیبر پختونخوا کے نگران وزیر کھیل امور نوجوانان سائنس و انفارمیشن ٹیکنالوجی ڈاکٹر نجیب اللہ مروت نے لکی سپورٹس کمپلیکس ضلع لکی کی قیام کیلیے تشکیل کردہ کمیٹی کے اراکین کو ہدایت جاری کی ہے کہ مذکورہ سپورٹس کمپلیکس کی اراضی کی انتخاب کیلیے آج (منگل) کو سائٹ کا وزٹ کریں اور ایک ہفتے کے اندار اندر کلیئرنس رپورٹ پیش کرکے جلد سے جلد سپورٹس کمپلکس پر کام کا آغاز کریں یہ ہدایت نگران صوبائی وزیر نے اپنے دفتر میں لکی سپورٹس کمپلیکس کی قیام کے حوالے سے منعقدہ اجلاس کی صدارت کرتے ہوئے جاری کیا اجلاس میں سیکرٹری سپورٹس حمیداللہ خٹک، ڈپٹی سیکرٹری سپورٹس نائلہ، ڈائریکٹر ڈویلپمنٹ شاہ فاضل، سی پی او عارف اللہ، ڈسٹرکٹ سپورٹس آفیسر ضلع لکی مروت محمد اسماعیل وزیر نے شرکت کی جبکہ ڈپٹی کمشنر لکی مروت رحمت علی نے اجلاس میں ویڈیو کے لنک کے زریعے آئن لائن حصہ لیا اجلاس میں لکی سپورٹس کمپلیکس کے مختلف پہلوؤں کا جائرہ لیا گیا اور نگران صوبائی وزیر کھیل و امور نوجوانان کو تفصیلی بریفنگ دی گئی نگران صوبائی وزیر نےمذکورہ سپورٹس کمپلیکس کیلیے بنائی گئی کمیٹی ممبران کو ہدایت کی کہ لکی سپورٹس کمپلیکس کی قیام کیلیے سائٹ وزٹ کر کے موزوں جگہ کا انتخاب کے بعد منصوبے پر فوراً کام کا آغاز کیا جائیں انہوں نے کہا کہ لکی سپورٹس کمپلیکس کی قیام سے وہاں کے عوام اور بالخصوص نوجوان نسل اور کھیلوں سے دلچسپی رکھنے والوں کیلیے ذیادہ سے ذیادہ مواقع میسر ہونگے لوگوں کو مثبت اور صحت مندانہ سرگرمیوں میں مصروف رکھنے کیلیے سپورٹس کمپلیکس کا قیام نہایت ضروری ہے انہوں نے کہا کہ ماضی میں حکمرانوں نے ضلع لکی مروت کی ترقی پر خاطر خواہ توجہ نہیں دی جو اس پسماندہ علاقہ کو دینی چاہیے تھی بطور نگران صوبائی وزیر ضلع لکی مروت سمیت صوبے کے دیگر اضلاع کی ترقی اور انکی پسماندگی کو دور کرنے کیلیے کوشش کرونگا نگران صوبائی حکومت اپنی اپنی زمہ داریاں مینڈیٹ کے مطابق نبھا رہی ہے

وزیر اعلیٰ خیبرپختونخوا محمد اعظم خان کی سربراہی میں منعقدہ کابینہ کے خصوصی اجلاس میں خیبرپختونخوا کے آئندہ چار ماہ کے بجٹ کی منظوری کے بعد نگران وزیر خزانہ احمد رسول بنگش کے ہمراہ پریس کانفرنس کرتے ہوئے نگران وزیر اطلاعات و تعلقات عامہ بیرسٹر فیروز جمال شاہ کاکاخیل نے کہا کہ صوبے میں مالی مشکلات کے باوجود ایک متوازن بجٹ پیش کیا گیا ہے جس میں گوڈ گورننس کے رہنما اصولوں کو مد نظر رکھتے ہوئے کفایت شعاری اپنا کر مفاد عامہ کے منصوبوں کو جاری رکھنے پر توجہ مرکوز کی گئی ہے، اس مشکل صورتحال میں عمدہ بجٹ تجاویز تیار کرکے محکمہ خزانہ نے بہترین کام کیا ہے، نگران حکومت بغیر کسی اوور ڈرافٹ اور قرضہ لئے حکومتی مالی انتظام اگے بڑھا رہی ہے، نگران وفاقی حکومت سے بہتر سپورٹ ملنے پر صوبے کے مالی امور میں مزید بہتری آنے کی امید ہے، انہوں نے کہا کہ وزیر اعلیٰ خیبرپختونخوا محمد اعظم خان اور چیف سیکرٹری خیبرپختونخوا نے متعدد بار وفاقی حکومت کے سامنے مالی مشکلات سے متعلق امور رکھے اور نگران وزیر اعظم کے دورہ پشاور کے موقع پر بھی ان کی توجہ اس جانب مبذول کرائی گئی جس پر انہوں نے حل کرنے کی امید دلائی ہے، انہوں نے کہا کہ وفاق کے مالی امور میں بہتری ارہی ہے جس کا صوبے پر بھی مثبت اثر ہوگا. پریس کانفرنس سے خطاب میں وزیر خزانہ احمد رسول بنگش نے کہا کہ محکمہ قانون نے ایڈووکیٹ جنرل خیبرپختونخوا کی مشاورت سے رائے دی کہ غیر معمولی حالات کی وجہ سے صوبائی حکومت 31 اکتوبر 2023 کے بعد حکومتی امور کے لئے بجٹ پیش کرسکتی ہے، نتیجتاً، صوبائی حکومت نے 1 نومبر 2023 سے 29 فروری 2024 تک مزید چار ماہ کے لیے بجٹ کی منظوری کابینہ سے لی گئی ہے. انہوں نے کہا کہ یہ آرٹیکل 121، آرٹیکل 122، اور آرٹیکل 126 اور سپریم کورٹ آف پاکستان ریگولیشن نمبر 1998 سے متعلق فیصلے کے عین مطابق ہے. پریس کانفرنس میں بجٹ اعدادوشمار بیان کرتے ہوئے انہوں نے کہا کہ یکم نومبر 2023 سے 29 فروری 2024 کے چار ماہ کے لئے کل بجٹ کا تخمینہ 529 ارب روپے ہے جو گزشتہ چار ماہ کے مقابلے میں 14 فیصد زیادہ ہے، کل ترقیاتی اخراجات 112 ارب روپے رکھے گئے ہیں. بجٹ کی ترجیحات پر بات کرتے ہوئے انہوں نے کہا کہ ضروری خدمات کی فراہمی اور معاشی ترقی کو فروغ دینے پر توجہ مرکوز کی گئی ہے، بجٹ کا 29 فیصد تعلیم کے لیے مختص کیا ہے، صحت اور فلاح و بہبود کی سہولیات اور خدمات کو بڑھانے کے لئے صحت کے شعبے کے لئے بجٹ کا 19 فیصد مختص کیا گیا ہے اسی طرح امن و امان کو برقرار رکھنے کے لئے پولیس فورس کے لئے بجٹ کا 10 فیصد مختص کیا ہے، کفایت شعاری کے اقدامات کے تحت سرکاری بھرتیوں اور گاڑیوں کی خریداری پر پابندی رہے گی۔