وزیرِ اعلیٰ خیبرپختونخوا کے مشیر برائے کھیل و امورِ نوجوانان تاج محمد ترند جمعرات کے روز نظامت امور نوجوانان کا دورہ کیا، جہاں انہیں مختلف سیکشنز کا تفصیلی معائنہ کرایا گیا اور محکمے کی کارکردگی، ترقیاتی و غیر ترقیاتی منصوبوں سمیت درپیش مسائل پر بریفنگ دی گئی۔اس موقع پر سیکرٹری کھیل و امور نوجوانان سعادت حسن ز ڈائریکٹر جنرل تاشفین حیدر، ڈائریکٹر یوتھ افئیر ز نعمان مجاہد سمیت دیگر افسران بھی موجود تھے،اس موقع پر مشیرِ وزیرِ اعلیٰ تاج محمد ترند نے واضح ہدایات دیتے ہوئے کہا کہ کسی بھی ٹھیکیدار کو ایڈوانس پیمنٹ نہیں دی جائے گی، ادائیگی صرف کام مکمل ہونے کے بعد ہوگی۔ محکمے میں زیرو کرپشن ٹالرنس پالیسی پر سختی سے عمل درآمد کیا جائے گا، اس موقع پر ڈائریکٹر نعمان مجاہد نے مشیر وزیراعلی کو محکمے کو درپیش مشکلات و دیگر مسائل سے بھی آگاہ کیا گیا۔ڈائریکٹر یوتھ افیئرز نے مشیرِ وزیرِ اعلیٰ کو محکمہ کی سرگرمیوں اور آئندہ کے منصوبوں سے آگاہ کرتے ہوئے بتایا کہ عوامی فلاح کے لیے انٹرنشپ پروگرامز، لیپ ٹاپ سکیم اور آسان اقساط پر قرضوں کے مزید پروگرام شروع کیے جا رہے ہیں، جن سے صوبے کی نوجوان نسل کو براہِ راست فائدہ پہنچے گا۔ مشیرِ وزیرِ اعلیٰ نے محکمے کی کارکردگی پر اطمینان کا اظہار کرتے ہوئے نوجوانوں کے لیے جاری منصوبوں کو سراہا اور کہا کہ حکومت خیبرپختونخوا نوجوانوں کی ترقی و انکو بااختیار بنانے کے لیے ہر ممکن اقدامات کر رہی ہے۔ہماری ابادی زیادہ تر نوجوانوں پر مشتمل ہے، نوجوان ہی ہمارا قیمتی سرمایہ ہے، بانی چئیر مین عمران خان کے ویژن کے مطابق نوجوانوں پر سرمایہ کاری کرینگے تاکہ وہ اپنے پاؤں پر کھڑے ہو سکیں۔

صوبائی وزیر آبپاشی خیبرپختونخوا ریاض خان نے کہا ہے کہ قائد عمران خان کے ساتھ ہونے والی ناانصافی دراصل ہر پاکستانی کے ساتھ ناانصافی ہے۔ یہی وجہ ہے کہ آج ہر کارکن، ہر نمائندہ اور ہر باشعور شہری اپنے قائد کے ساتھ کھڑا ہے تاکہ ملک میں انصاف اور قانون کی بالادستی کو یقینی بنایا جا سکے۔ انہوں نے کہا کہ ہم وزیر اعلیٰ خیبرپختونخوا محمد سہیل آفریدی کے ساتھ مکمل یکجہتی کا اظہار کرتے ہیں اور ہر محاذ پر ان کے شانہ بشانہ کھڑے ہیں۔ انہوں نے کہا کہ وزیر اعلیٰ خیبرپختونخوا کا قائد عمران خان سے ملاقات کا فیصلہ نہ صرف ایک سیاسی ضرورت ہے بلکہ موجودہ حالات میں انصاف، جمہوریت اور قانون کی بالادستی کے لیے ایک مثبت اور جرات مندانہ قدم ہے۔ انہوں نے کہا کہ ہم پُرامن طریقے سے انصاف کے حصول کے لیے اپنی آواز بلند کر رہے ہیں۔ عمران خان کا ویژن شفافیت، انصاف اور عوامی خدمت پر مبنی ہے اور ہم اس ویژن کی تکمیل کے لیے ہر محاذ پر ثابت قدم ہیں۔ ان خیالات کا اظہار صوبائی وزیر نے اسلام آباد ہائیکورٹ کے باہر میڈیا سے گفتگو کرتے ہوئے کیا۔ اس موقع پر خیبرپختونخوا کے صوبائی وزراء اور اراکین قومی و صوبائی اسمبلی بھی موجود تھے۔ ریاض خان نے کہا کہ ان کی یہ موجودگی وزیر اعلیٰ خیبرپختونخوا محمد سہیل آفریدی کی قائد عمران خان سے ملاقات اور ان کے زیر التواء مقدمات میں غیر معمولی تاخیر کے خلاف ایک پُرامن مگر مؤثر احتجاج کی علامت ہے۔ صوبائی وزیر ریاض خان نے کہا کہ دو سال کا طویل عرصہ گزر جانے کے باوجود انصاف کی فراہمی میں جاری تاخیر نے نہ صرف انصاف کے بنیادی اصولوں بلکہ آئین پاکستان کی روح اور عوام کے اعتماد کو بھی چیلنج کر دیا ہے۔ انہوں نے کہا کہ قائد عمران خان ہمارے قومی قائد ہیں جنہوں نے ہمیشہ پاکستان کے عوام کے حقوق، شفافیت اور انصاف کی بات کی ہے۔ آج جب ان کے ساتھ غیر منصفانہ رویہ اختیار کیا جا رہا ہے تو یہ ہم سب کی ذمہ داری ہے کہ اپنے قائد کے ساتھ کھڑے ہوں اور حق و سچ کی حمایت کریں۔ریاض خان نے کہا کہ وزیر اعلیٰ محمد سہیل آفریدی کی قیادت میں خیبرپختونخوا کی کابینہ مکمل طور پر متحد اور پرعزم ہے۔ ہم قائد عمران خان کے ویژن، شفاف طرز حکمرانی، عوامی خدمت اور قانون کی بالادستی کی تکمیل کے لیے ہر سطح پر جدوجہد جاری رکھیں گے۔ انہوں نے کہا کہ ہمارا علامتی احتجاج پُرامن ہے اور اس کا مقصد صرف انصاف کی فراہمی اور آئینی اصولوں کا تحفظ ہے ہم چاہتے ہیں کہ عدالتوں میں انصاف بلا تاخیر فراہم ہو اور ملک میں قانون سب کے لیے برابر ہو۔

صوبے میں آئس نشے کی عفریت سے نوجوان نسل کو بچانے اور اس کے بڑھتے ہوئے خطرے کے تدارک کے لیے محکمہ ایکسائز و ٹیکسیشن اور نارکوٹکس کنٹرول کی جانب سے ایمرجنسی بنیادوں پر کاروائیاں شروع کردی گئی ہیں جسکے سلسلے میں پشاور میں ایک اہم کارروائی کے دوران تعلیمی اداروں کے طلباء کو آئس فراہم کرنے والے گروہ کے سرغنہ سمیت تین ملزمان کو گرفتار کرلیا گیا۔خیبرپختونخوا کے وزیر ایکسائز و ٹیکسیشن اور نارکوٹکس کنٹرول سید فخر جہان کی منشیات کے خلاف زیرو ٹالرنس پالیسی اور حالیہ احکامات کی روشنی میں، سیکریٹری ایکسائز خالد الیاس اور ڈائریکٹر جنرل عبدالحلیم خان کی نگرانی میں صوبے بھر میں آئس کے خلاف ہنگامی کارروائیاں جاری ہیں۔ پراوینشل انچارج بیورو آف انٹیلیجنس اینڈ انویسٹیگیشن سعود خان گنڈا پور اور ایکسائز اینڈ ٹیکسیشن آفیسر (کاؤنٹر نارکوٹکس آپریشنز) ماجد خان کی قیادت میں فخر عالم خان انسپکٹر اور حمزہ شاروم خان سب انسپکٹر پر مشتمل EIB سکواڈ نے حیات آباد کے علاقے شاکس مدرسہ کے قریب کامیاب کارروائی کرتے ہوئے طلباء کو آئس سپلائی کرنے والے ملزمان طارق، ابراہیم اور سعود رشید کو گرفتار کر کے ان کے قبضے سے 500 گرام آئس برآمد کر لی۔ملزمان کے خلاف مقدمہ تھانہ ایکسائز خیبر میں درج کر کے مزید تفتیش شروع کر دی گئی ہے۔صوبائی وزیر سید فخر جہان نے معاشرے سے آئس کے سماجی زہر کے خاتمے کے لیے کسی قسم کی نرمی یا رعایت نہ برتنے کے واضح احکامات محکمہ کو جاری کیئے ہیں اور اس سلسلے میں محکمہ ایکسائز کو نوجوان نسل کے تحفظ کیلئے پہلی دفاعی اور ایکشن لائن کے طور پر اقدامات اٹھانے کی ہیدایت کی ہے جبکہ محکمہ کو اس ناسور کے حوالے سے پندرہ روز کا ڈیڈ لائن بھی دیا ہے۔

حکومت خیبرپختونخوا کا گڈ گورننس روڈمیپ درست سمت میں گامزن ہے۔ محکمہ بلدیات کے ذریعے عوامی خدمات کی فراہمی جاری ہے۔ ستمبر 2025 کے تمام اہداف حاصل کرلیے گئے ہیں جبکہ پشاور کی خوبصورتی اور بحالی، حیات آباد ماڈل سیکٹر، نیو جنرل بس سٹینڈ کے منصوبوں پر کام جاری ہے ۔اس حوالے سے ایک اہم اجلاس چیف سیکرٹری خیبرپختونخوا شہاب علی شاہ کی زیر صدارت بدھ کے روز پشاور میں منعقد ہوا جس میں سیکرٹری بلدیات، ڈی جی پی ڈی اے اور دیگر متعلقہ حکام نے شرکت کی۔
اجلاس میں میں محکمہ بلدیات کے گڈ گورننس روڈمیپ اور پشاور ڈویلپمنٹ اتھارٹی کے منصوبوں کا جائزہ لیا گیا۔اجلاس میں بتایا گیا کہ حیات آباد پشاور میں شہریوں کو مختلف سروسز کی فراہمی کے لیے 15 نومبر سے سروس ڈیلیوری یونٹ کام شروع کردے گا جبکہ جی ٹی روڈ اور رنگ روڈ پر 16 نومبر سے پیچ ورک، لین مارکنگ، کیٹ آئیز، روڈ فرنیچر، پولز میں لائٹس کی تنصیب اور فٹ پاتھ کی بحالی پر کام شروع ہوگاحکومت خیبرپختونخوا کے پارکس کی اپ گریڈیشن کے اقدام پر پی ڈی اے نے پشاور میں 76 سے زائد پارکس پر ترقیاتی کام شروع کردیا ہے
جبکہ رنگ روڈ مسنگ لنک ناردرن سیکشن پر بھی کام تیزی سے جاری ہے۔
پورے صوبے میں مویشی منڈیوں، سبزی منڈیوں، بس ٹرمینلز، نالوں کی صفائی، خوبصورتی اور بحالی کے اقدامات بھی جاری ہیں۔ جبکہ پشاور کوہاٹ روڈ پر بس ٹرمینل کو اپ گریڈ اور رنگ روڈ پر ذبح خانے کو بہتر بنایا جائے گا۔اجلاس میں مزید بتایا گیا کہ ایبٹ آباد میں سبزی منڈی، پشاور پخہ غلام نالہ محمد زئی کی صفائی، پشاور میں جی ٹی روڈ پر واقع کالا مویشی منڈی کی صفائی اور شیڈز کی تعمیر اور ضلع سوات میں خوازہ خیلہ ڈیری بابا روڈ پر نالے کی صفائی، جمرود خیبر میں جمرود بازار میں پانی کھڑا ہونے کی جگہ کی کلیرنس پر کام جاری ہے۔

مشیر خزانہ خیبرپختونخوا مزمل اسلم نے گزشتہ روز خیبرپختونخوا ہاؤس اسلام آباد میں پریس بریفننگ دیتے ہوئے بتایا ہے کہ حکومت نے 27 ویں آئینی ترمیم کا شوشہ چھوڑا ہے جبکہ گیار واں این ایف سی کا اجلاس اگست میں بلایا گیا تھا بعض صوبوں نے سیلابی صورتحال کی وجہ سے تاریخ آگے کرنے کی تجویز دی تھی جبکہ خیبرپختونخوا بار بار این ایف سی اجلاس بلانے کا کہہ رہا ہے۔ ابھی تک این ایف سی اجلاس بلانے کا ٹائم نہیں بتایا گیا ہے۔ ایک طرف این ایف سی اجلاس بلانے کی باتیں کر رہے ہیں جبکہ دوسری طرف 27 ویں ترمیم کی باتیں کر رہے ہیں۔
مشیر خزانہ خیبرپختونخوا مزمل اسلم نے کہا کہ وفاقی حکومت اپنے اخراجات کم کرنے کی بجائے صوبوں کا فنڈز کم کر رہے ہیں۔ مزمل اسلم نے کہا کہ 5147 ارب روپے نان ٹیکس ریونیو بھی وفاقی حکومت کو جاتا ہے وفاقی حکومت نے 19238 ارب روپے آمدنی کا تخمینہ لگایا ہے اور تخمینہ کھبی پورا نہیں ہوتا اس میں سے صوبوں کو 8200 ارب روپے دینے ہیں تو وفاق کے پاس 11072 ارب روپے بچیں گے وفاقی حکومت این ایف سی میں جو 41.5 فیصد کا کہتی ہے وہ مکمل بے ایمانی اور جھوٹ ہے کیونکہ وفاق کے پاس نان ٹیکس ریونیو کا 5147 ارب روپے پورے جاتے ہیں جو صوبوں کو نہیں ملتے۔ مزمل اسلم نے کہا کہ وفاق کا خرچہ رواں سال 17593 ارب روپے ہے جس میں سے اصولی طور پر ترقیاتی اخراجات 15 سے 20 فیصد ہونے چاہیے جو نہیں ہیں بلکہ صرف 1000 ارب روپے ترقیاتی فنڈز کیلئے مختص کیے ہیں۔ جس کے بارے میں بتایا جا رہا ہے کہ وفاقی حکومت کے پاس فنڈز نہیں ہیں اسلئے ترقیاتی فنڈز 300 ارب روپے کم کرکے 700 ارب روپے کر دئیے جائیں گے۔ اس سے معیشت بہتری کا اندازہ لگائیں۔ مشیر خزانہ خیبرپختونخوا مزمل اسلم نے پریس کانفرنس کرتے ہوئے بتایا کہ حکومت کے 8207 ارب روپے سود کی ادائیگی میں جا رہے ہیں پاکستان میں شرح سود 22 سے 11 فیصد پر آگیا ہے لیکن پھر بھی حکومت کے فنڈز ناقص پالیسیوں کی وجہ سود کی ادائیگیوں میں جا رہے ہیں۔ مزمل اسلم نے کہا کہ صوبوں کے مقابلے میں وفاق کے پاس سب سے کم ملازمین ہے پھر بھی انکا اس سال پنشن کا بل 1055 ارب روپے ہیں اس کے علاؤہ وفاق کے 1928 ارب روپے کے گرانٹس بھی دے رھا ہے جب پیسے نہیں ہیں تو گرانٹس کیوں دے رہے ہیں۔ مشیر خزانہ خیبرپختونخوا نے کہا ہے کہ وفاقی حکومت سبسڈی کے مد میں 1186 ارب روپے دے رہے ہیں اور سول حکومت چلانے کیلئے 975 ارب انکے اپنے اخراجات ہیں۔ ایمرجنسی کیلئے 390 ارب روپے رکھے گئے ہیں جو بانٹے جاتے ہیں۔ وفاقی حکومت کا مکمل خسارہ 6 ہزار ارب روپے ہیں۔ مزمل اسلم نے کہا کہ وفاقی حکومت صوبوں کے فنڈز کم کرنا چاہتی ہے کہ انکے اخراجات زیادہ ہیں جبکہ غلط پالیسیوں کی وجہ سے انکا سسٹم تو ٹھیک ہونا ہی نہیں ہے۔ مزمل اسلم نے کہا آئی پی پیز کی ایک غلط فیصلے کی وجہ سے ملک 5100 ارب روپے کی ادائیگی کر چکا ہے۔ مزمل اسلم نے کہا کہ وفاقی حکومت کی ناقص پالیسیوں کا خسارہ صوبوں اور عوام پر کیوں آئے جو وفاقی حکومت کرنا چاہتی ہے۔ مشیر خزانہ خیبرپختونخوا نے کہا کہ ایل این جی کے 45 جہاز حکومت واپس کر رہی ہے اسکا نقصان پاکستان اُٹھائے گا۔ اگر حکومت ایسے معاہدے کرے گی تو وفاقی حکومت کھبی ٹھیک سمت میں نہیں ہو سکتی۔ مشیر خزانہ خیبرپختونخوا مزمل اسلم نے کہا کہ پچھلے چار سالوں میں 35 ہزار روپے روپے کا قرض لیا گیا اس میں چار ہزار ارب روپے بھی ترقیاتی اخراجات میں نہیں لگائے گئے۔ سود کی ادائیگی کیلئے قرض لے رہے ہیں کیا اس سے معیشت بہتر ہو جائے گی۔ مزمل اسلم نے کہا کہ خیبرپختونخوا پر 78 سالوں میں 775 ارب روپے کا قرض ہے جبکہ پچھلے 18 مہینوں میں خیبرپختونخوا نے 300 ارب روپے کی بچت کر لی ہے اگر ان 300 ارب روپے کو قرض سے منفی کرتے ہیں تو خیبرپختونخوا کا 40 فیصد قرض کم ہوسکتا ہے۔ مشیر خزانہ خیبرپختونخوا مزمل اسلم نے کہا کہ پاکستان کا کل قرض 78 ہزار ارب روپے ہیں اگر بقایاجات ملا لیں تو 94 ہزار روپے روپے بنتے ہیں۔ مزمل اسلم نے کہا کہ پچھلے تین مہینوں میں فارن ڈائریکٹ انویسٹمنٹ 447 ملین ڈالر کی آئی ہے جبکہ منافع 751 ملین ڈالر کا باہر گیا ہے ایک طرف سرمایہ کاری آتی نہیں ہے اگر آتی ہے تو منافع باہر جاتا ہے۔ ملک سے مختلف کمپنیاں باہر جا رہی ہے۔ مزمل اسلم نے کہا کہ کل جو وفاقی حکومت کے جو سات وزراء پریس کانفرنس کر رہے تھے وہ بتا رہا تھے کہ آئی ایم ایف کی سٹاف لیول معاہدہ نشاندہی کر رہا ہے کہ حکومت صحیح سمت میں جا رہی ہے جبکہ چار ہفتے ہوگئے بورڈ میٹنگ کا اعلان نہیں ہوا۔ مزمل اسلم نے کہا کہ اسٹیٹ بینک کہہ رہا ہے کہ شرح سود 11 فیصد ہے جبکہ مہنگائی 6.2 فیصد ہے جبکہ اشیاء کی قیمتیں 40 فیصد تک بڑھ گئی ہیں۔

خیبرپختونخوا کے وزیر ایکسائز، ٹیکسیشن و نارکوٹکس کنٹرول سید فخر جہان سے انکے دفتر میں آل پاکستان کار ڈیلرز ایسوسی ایشن آف سمال ٹریڈرز کے وفد نے مرکزی چیئرمین حاجی بخت میر جان درانی کی سربراہی میں ملاقات کی۔وفد میں صوبائی صدر حاجی محمد اسلام اور صوبائی جنرل سیکریٹری معزاللہ خان بھی شامل تھے۔ ملاقات میں صوبے میں چھوٹی گاڑیوں کے کاروبار سے وابستہ افراد کو درپیش مسائل، محکم? ایکسائز و ٹیکسیشن کے امور اور محصولات سے متعلق معاملات پر تفصیلی تبادلہ خیال کیا گیا۔وفد کے شرکائ نے صوبائی وزیر کو کابینہ میں دوبارہ شمولیت اور اہم محکمہ ایکسائز، ٹیکسیشن و نارکوٹکس کنٹرول کی ذمہ داریاں سنبھالنے پر مبارکباد پیش کی۔ اس موقع پر انہوں نے محکمے کی کارکردگی میں بہتری، کاروباری طبقے کو سہولیات کی فراہمی اور محصولات میں اضافے سے متعلق متعدد تجاویز بھی پیش کیں۔صوبائی وزیر سید فخر جہان نے وفد کی مفید آرائ کو سراہتے ہوئے کہا کہ محکمے کی تیز رفتار ترقی اور شفاف نظام کے قیام کیلئے واضح حکمتِ عملی طے کی جا چکی ہے۔ انہوں نے کہا کہ اصلاحات کے ذریعے گڈ گورننس کو فروغ، عوام کو سہولیات کی فراہمی اور محکمانہ شفافیت یقینی بنائی جائے گی۔ان کا کہنا تھا کہ محکمہ ایکسائز و ٹیکسیشن میں عملے اور افسران کی جانب سے عوامی خدمت میں کسی قسم کی غفلت برداشت نہیں کی جائے گی۔ ہماری کوشش ہے کہ صوبے کو بانی چیئرمین عمران خان کے ویژن اور وزیراعلیٰ خیبرپختونخوا کی قیادت میں ترقی و خوشحالی کے سفر پر گامزن رکھا جائے۔
انہوں نے مزید کہا کہ اصلاحاتی اقدامات کے نتیجے میں غلط طرزِ عمل کا خاتمہ اور عوام کو زیادہ سے زیادہ آسانیاں فراہم کرنے کا عمل یقینی بنایا جائے گا۔