خیبر پختونخوا کے وزیر پبلک ہیلتھ انجینئرنگ فضل شکور خان نے کہا ہے کہ لوگوں کو پینے کے صاف پانی کی فراہمی کے لیے محکمہ کے تمام افسران کو ایک ٹیم کی طرح کام کرنا ہوگا عوام کو صاف پانی مہیا کرنا ہم سب کی ذمہ داری بنتی ہے انہوں نے کہا کہ محکمے میں بہتر نظام اور اصلاحات لانے کے لیے ہر ممکن قدم اٹھائیں گے۔ صوبائی وزیر نے ان خیالات کا اظہار محکمہ کا چارج سنبھالنے کے بعد محکمے کے بارے میں منعقدہ اجلاس کی صدارت کرتے ہوئے کیا۔ اجلاس میں سیکرٹری پی ایچ ای داود خان، ایڈیشنل سیکرٹری سمیت چیف انجینئرز اور دیگر متعلقہ افسران نے شرکت کی اجلاس میں صوبائی وزیر کو محکمہ کے بارے میں تفصیلی بریفنگ دی گئی۔ بریفنگ میں جاری اور نئی منظور شدہ سکیموں کے بارے میں تفصیل سے بتایا گیا بریفنگ میں محکمہ کی صوبہ میں بندوبستی اور اور ضم اضلاع میں اے ڈی پی، اے آئی پی اور باہر ممالک کے مالی معاونت سے چلنے والے منصوبوں سے بھی صوبائی وزیر کو تفصیلی طور پر آگاہ کیا گیا۔ مزید بتایا گیا کہ خیبر پختونخوا کے بندوبستی اضلاع میں 8 جبکہ ضم اضلاع میں 3 واٹر کوالٹی مانیٹرنگ لیبارٹریاں قائم کی گئی ہیں اس کے ساتھ ساتھ موبائل واٹر کوالٹی یونٹس کی سہولت بھی فراہم کی گئی ہے ان واٹر کوالٹی مانیٹرنگ لیبارٹریوں کا بنیادی مقصد صوبے بھر میں موجود اور نئی تعمیر شدہ پانی کی فراہمی کی سکیموں کے علاوہ عوامی مقامات جیسے سکولوں، کالجوں، مساجد وغیرہ میں عالمی ادارہ صحت (WHO) کے معیار کے مطابق پانی کے معیار کو یقینی بنانا ہے صوبائی وزیر نے اس موقع پر ہدایت جاری کی کہ عوام کے بہتر مفاد میں شروع کئے گئے منصوبوں کو مقررہ وقت میں پایہ تکمیل کو پہنچائیں انہوں نے خبردار کیا کہ محکمہ میں کوئی پوسٹنگ/ ٹرانسفر پالیسی کے خلاف نہیں ہوگی کسی کے ساتھ ناانصافی نہیں ہوگی میرٹ کو پامال نہیں کیا جائیگا۔ انہوں نے یہ بھی ہدایت کی کہ محکمہ کی خالی آسامیوں پر بھرتی کے لئے ان امیدواروں کا جلدازجلد انٹرویو منعقد کیا جائے جنہوں تحریری امتحان پاس کیا ہے اور انٹرویو کے لیے اہل قرار دیا گیا ہے تاکہ ان خالی آسامیوں کو فوری پر کیا جاسکے۔
آر ٹی ایس کمیشن میں پانچ عوامی شکایات کی شنوائی، اسلحہ لائسنس کے اجراء کے لیے ہوم ڈیپارٹمنٹ کو احکامات جاری
رائٹ ٹو پبلک سروسز کمیشن میں پانچ عوامی شکایات کی شنوائی ہوئی۔ کمیشن نے شہریوں کی درخواستوں پر سماعت کی۔ پشاور سے فیصل خان نے فرد کے حصول کے لیے کمیشن کو درخواست دی تھی۔ مسلسل غیر حاضری پر کمیشن نے حلقہ پٹواری کی تنخواہ بند کروائی، حلقہ پٹواری اور شہری کمیشن کے سامنے پیش ہوئے۔ کمیشن نے دونوں کے بیانات ریکارڈ کروانے کے بعد جمعرات کو فیصلہ سنانے کا اعلان کیا۔ چارسدہ سے فضل دین نے زمین کے ریکارڈ کے حصول کے لیے کمیشن سے رجوع کیا ہے۔ شہری نے سنوائی کے دوران بتایا کہ اسے حد براری چاہیے۔ کمیشن نے شہری کو حد براری کے لیے درخواست دینے کی ہدایت کی۔ سہیل وحید نے ایبٹ آباد سے کچرا ہٹانے کے لیے درخواست دی تھی۔ کمیشن نے ٹی ایم او کو شہری کی شکایت دور کرنے کے احکامات دئیے ٹی ایم او نے کمیشن کو بتایا کہ مذکورہ جگہ پرائیویٹ پلاٹ ہے مالک کی مرضی کے بغیر کام نہیں کر سکتے۔ کمیشن نے ٹی ایم او کو شہری سے رابطہ کرنے کے احکامات دئیے اور ساتھ ہی شہریوں کو ہدایت کی کہ کچرا صحیح سرکاری مختص جگہ پر پھینکیں۔ مانسہرہ سے امجد نے ایف آئی آر کے اندراج کے لیے کمیشن کو درخواست دی تھی۔ کمیشن نے کیس عدالت میں زیر التوا ہونے کے باعث خارج کر دیا اور شہری کو ہدایت کی کہ اگر کوئی اور مسئلہ ہو تو کمیشن کو درخواست دے سکتا ہے۔ مختلف اضلاع سے شہریوں کے اسلحہ لائسنس کی درخواستوں پر کمیشن نے ہوم ڈیپارٹمنٹ کو احکامات جاری کیے۔ کمیشن نے سرکاری افسران کو عوام کی ضروریات کو مؤثر طریقے سے پورا کرنے اور خدمات کی فراہمی کے عمل کو بہتر بنانے پر زور دیا اور کہا کہ بنیادی خدمات کا حصول عوام کا حق ہے نا کہ ان پر حکومت کا احسان۔
خیبر پختونخوا کے وزیر صحت خلیق الرحمان سے پاکستان انسٹی ٹیوٹ آف پروستھیٹک اینڈ آرتھیٹکس پشاورکےممبران کی ملاقات
خیبر پختونخوا کے وزیر صحت خلیق الرحمان سے پاکستان انسٹی ٹیوٹ آف پروستھیٹک اینڈ آرتھیٹکس پشاورکے چیئرمین ڈاکٹر عارف، ایڈیشنل ڈائریکٹر جنرل ڈاکٹر عابد حسین اور ایڈمن آفیسر شعیب الرحمان اور دیگر ممبران نے ملاقات کی اور وزیر صحت کو بتایا کہ پاکستان انسٹی ٹیوٹ آف پروستھیٹک اینڈ آرتھیٹکس ایک خودمختار ادارہ ہے جو 1988 سے صوبے کے معذور افراد کے لئے اپنی خدمات پیش کر رہا ہے۔ ادارے کے چیئرمین نے صوبائی وزیر کو تفصیلی بریفنگ دیتے ہوئے درپیش تمام مشکلات کے حوالے سے بھی آگاہ کیا۔خلیق الرحمان نے اس موقع پر اظہار خیال کرتے ہوئے کہا کہ مذکورہ ادارہ معذور افراد کے لیئے ایک امید کی کرن ہے اور ہم سب نے مل کر اسے مشکلات سے نکلنا ہے۔ انہوں نے کہا کہ بحیثیت صوبائی وزیر صحت وہ یقین دلاتے ہیں کہ محکمہ صحت انشاء اللہ اس ادارے کے ساتھ بھرپور تعاون کریگا اور جو بھی مشکلات اور مسائل ہیں ان کو کم کرنے کے لئے ہر ممکن کوشش کی جائے گی۔ اس طرح ایک اچھے ماحول میں ادارے کے کام کو آگے بڑھایا جاگا۔ صوبائی وذیر نے کہا کہ عوام کو سہولیات اور خدمات کی روانی اور تسلسل میں کسی بھی قسم کی کوتاہی برداشت نہیں ہوگی اور تمام رکاوٹوں کو دور کرنے کے لئے خلوص نیت سے آگے بڑھیں گے۔ اس حوالے سے آئندہ ایک جامع منصوبے بندی کے تحت کام کرینگے۔
صوبائی وزیر تعلیم ارشد ایوب خان کے زیر صدارت محکمہ تعلیم جائزہ اجلاس
خیبرپختونخوا کے وزیر تعلیم ارشد ایوب خان نے ایجوکیشن حکام کو ہدایت جاری کی ہے کہ خیبرپختونخوا تعلیمی بورڈ کے پیپرز اور جائزہ آئی بی سی سی کے ذریعے کرنے کی سمری فوری طور پر واپس کی جائے۔ انہوں نے کہا کہ صوبائی تعلیمی بورڈز، طلباء و طالبات اور صوبائی حکومت پر کسی قسم کا کوئی اضافی بوجھ نہیں ڈالا جائے گا۔ اور پرچوں کی پرنٹنگ، ای مارکنگ اور انسر بکس کی تیاری سمیت دیگر تمام مٹیریل کا تفصیلی جائزہ لیا جائے گا۔ انہوں نے کہا کہ بھیجی گئی سمری صرف ایک پروپوزل تھی کوئی منظوری نہیں ہوئی اس لئے فوری طور پر واپس منگوائی۔ان خیالات کا اظہار انہوں نے محکمہ تعلیم جائزہ اجلاس کی صدارت کرتے ہوئے کیا۔ اجلاس میں سیکرٹری ایجوکیشن محمد خالد خان، سپیشل سیکرٹریز عبدالباسط، مسعود خان اور محکمہ تعلیم کے دیگر اعلیٰ حکام نے شرکت کی۔ وزیر تعلیم نے مزید کہا کہ بورڈز کے اختیارات اور امتحانی نظام ہر صورت صوبے کے پاس رہے گا اور ایسا کوئی فیصلہ نہیں ہوگا جس سے عوام اور طلباء و طالبات متاثر ہوں۔
خیبر پختونخوا کے وزیرِ پبلک ہیلتھ انجینئرنگ فضل شکور خان نے باضابطہ طور پر اپنے عہدے کا چارج سنبھال لیا
خیبر پختونخوا کے وزیرِ پبلک ہیلتھ انجینئرنگ فضل شکور خان نے باضابطہ طور پر اپنے عہدے کا چارج سنبھال لیا صوبائی وزیرِ پبلک ہیلتھ انجینئرنگ نے اس موقع پر کہا کہ وہ وزیرِاعلیٰ خیبر پختونخوا سہیل آفریدی کے وژن کے مطابق صوبے بھر میں صاف پانی کی فراہمی اور عوامی سہولیات کی بہتری کے لیے ہر ممکن اقدامات کریں گے۔ انہوں نے کہا کہ عوام کو بنیادی سہولیات کی فراہمی موجودہ صوبائی حکومت کی اولین ترجیح ہے اور محکمہ پبلک ہیلتھ انجینئرنگ اس سلسلے میں کلیدی کردار ادا کرے گا۔
سید فخر جہان نے بطور صوبائی وزیر ایکسائز، ٹیکسیشن و نارکوٹکس کنٹرول چارج سنبھال لیا
خیبرپختونخوا کے صوبائی وزیر سید فخر جہان نے پیر کے روز باضابطہ طور پر محکمہ ایکسائز، ٹیکسیشن و نارکوٹکس کنٹرول کی وزارت کا چارج سنبھال لیا۔چارج سنبھالنے کے موقع پر اظہارِ خیال کرتے ہوئے صوبائی وزیر نے پاکستان تحریک انصاف کے بانی چیئرمین عمران خان اور وزیرِاعلیٰ خیبرپختونخوا محمد سہیل آفریدی کا شکریہ ادا کیا اور کہا کہ کابینہ میں دوبارہ بطور وزیر شامل کیا جانا پارٹی کے کارکنان اور بونیر کے عوام کیلئے لیے باعثِ فخر ہے۔انہوں نے کہا کہ گزشتہ وزارت میں انہوں نے کھیل اور امورِ نوجوانان کے شعبے میں ایک جذبے اور عزم کے ساتھ کام کیا اور اپنی کارکردگی کے ذریعے عوام کا اعتماد حاصل کیا۔ اب وہ اکسائز و ٹیکسیشن اور نارکوٹکس کنٹرول کے اہم شعبے میں اسی جوش و جذبے کے ساتھ اپنی نئی وزارت کی ذمہ داریاں سرانجام دیں گے تاکہ عوامی خدمت کا تسلسل برقرار رہے اور یہ شعبہ ترقی کی جانب گامزن کیا جا سکے۔سید فخر جہان نے اپنے حلقے کے عوام اور پارٹی کارکنان کا خصوصی شکریہ ادا کیا جن کے تعاون اور ووٹ سے انہیں دوبارہ عوامی خدمت کا موقع میسر آیا۔انہوں نے کہا کہ بانی چیئرمین عمران خان اور وزیرِاعلیٰ محمد سہیل آفریدی کا ان پر اعتماد باعثِ اعزاز ہے اور وہ دعا گو ہیں کہ اللہ تعالیٰ انہیں نئی ذمہ داریوں کو احسن طریقے سے نبھانے کی توفیق عطا فرمائے۔
ایبٹ آباد () ڈپٹی کمشنر ایبٹ آبادد سرمد سلیم اکرم کی زیرِ صدارت ڈینگی کنٹرول کے حوالے سے اجلاس منعقد
ایبٹ آباد () ڈپٹی کمشنر ایبٹ آبادد سرمد سلیم اکرم کی زیرِ صدارت ڈینگی کنٹرول کے حوالے سے اجلاس منعقد ہوا، جس میں ڈپٹی کمشنر کو محکمہ صحت کی جانب سے انسدادی اقدامات پر تفصیلی بریفنگ دی گئی۔ اجلاس میں اے ڈی سی جنرل، ڈی ایچ او، ایم ایس ڈی ایچ کیو، ٹی ایم اوز، محکمہ تعلیم، زراعت، لوکل گورنمنٹ، پرائیویٹ سکول ایسوسی ایشن اور دیگر متعلقہ اداروں کے نمائندگان نے شرکت کی۔ضلعی محکمہ صحت ایبٹ آباد کی جانب سے ڈپٹی کمشنر کی ہدایات پر ڈینگی کی روک تھام کے لیے انسدادی کارروائیوں، سرویلنس اور آگاہی مہم میں مزید تیزی لائی گئی ہے۔ اعداد و شمار کے مطابق رواں سال اکتوبر 2025 تک ضلع بھر میں ڈینگی کے 136 کیسز رپورٹ ہوئے، جو گزشتہ سال 2024 کے 251 کیسز کے مقابلے میں نمایاں کمی کو ظاہر کرتے ہیں۔ڈینگی سے متاثرہ علاقوں میں سلہڈ، کھوکھر میرا، مسلم آباد، حویلیاں اربن، لنگرہ، کیہال اور ملکپورہ شامل ہیں، جہاں محکمہ صحت کی ٹیمیں ضلعی میڈیکل اینٹومالوجسٹ کی نگرانی میں متحرک ہیں۔ ڈپٹی کمشنر ایبٹ آباد کی ہدایات پر ہاٹ سپاٹ علاقوں میں مفت ڈینگی اسکریننگ کیمپس کا انعقاد کیا گیا، 6,834 مچھر دانیاں مستحق خاندانوں میں تقسیم کی گئیں، فومیگیشن اور انڈور اسپرے آپریشنز جاری ہیں، جبکہ ڈسٹرکٹ ہیلتھ آفس ایبٹ آباد میں مفت ڈینگی ٹیسٹنگ کی سہولت بھی فراہم کی گئی ہے۔ علاوہ ازیں اسکولز، مدارس، ریڈیو اور سوشل میڈیا پر آگاہی مہمات کا بھی تسلسل برقرار ہے۔ڈپٹی کمشنر ایبٹ آباد نے اجلاس سے خطاب کرتے ہوئے کہا کہ تمام ادارے اپنی استعداد کار میں اضافہ کریں اور ڈینگی کنٹرول کے لیے مربوط اقدامات کو یقینی بنائیں۔ انہوں نے ہدایت کی کہ اسکولوں، پبلک مقامات، پارکس، ٹائر شاپس، ورکشاپس اور دیگر جگہوں پر پانی کھڑا نہ ہونے دیا جائے اور فوگ اسپرے پر خصوصی توجہ دی جائے تاکہ ایبٹ آباد سے ڈینگی کا مکمل خاتمہ ممکن بنایا جا سکے۔آخر میں ڈپٹی کمشنر ایبٹ آباد نے شہریوں سے اپیل کی کہ وہ صفائی ستھرائی کا خاص خیال رکھیں، گھروں اور گلیوں میں پانی جمع نہ ہونے دیں، اور کسی بھی مشتبہ ڈینگی کیس کی فوری اطلاع قریبی ہیلتھ سینٹر کو دیں تاکہ بروقت اقدامات کیے جا سکیں
12 نومبر سے شروع ہونے والے ایف اے/ایف ایس سی امتحانات کی تیاریوں کو حتمی شکل دے دی گئی
12 نومبر سے شروع ہونے والے ایف اے/ایف ایس سی امتحانات کی تیاریوں کو حتمی شکل دے دی گئی ہے۔ اس سلسلے میں کمشنر مردان ڈویژن نثار احمد کی زیر صدارت ایک اعلیٰ سطحی اجلاس میں امتحانات کے انتظامات کا جائزہ لیا گیا۔ اجلاس میں ڈپٹی کمشنر مردان واصف رحمن، اے ڈی سی صوابی، ایس پی ہیڈکوارٹرز مردان، مختلف کالجوں کے پرنسپلز اور محکمہ تعلیم کے متعلقہ افسران نے شرکت کی۔ کمشنر مردان نے شرکاء پر زور دیا کہ امتحانی نظام کی شفافیت برقرار رکھنے اور امتحانات کے پُرامن انعقاد کو یقینی بنانے کے لیے اپنا مؤثر کردار ادا کریں۔
ثانوی و اعلیٰ ثانوی تعلیمی بورڈ (BISE) مردان کے چیئرمین پروفیسر جہانزیب نے امتحانات کے شفاف اور منصفانہ انعقاد کے لیے ضلعی انتظامیہ اور محکمہ تعلیم کے تعاون کو سراہا۔
انہوں نے کہا کہ ان کوششوں کی بدولت طلبہ اپنی محنت پر انحصار کریں گے اور غیر منصفانہ طریقوں سے گریز کریں گے۔
انہوں نے مزید بتایا کہ بی آئی ایس ای مردان نے حال ہی میں ایم ڈی کیٹ کے نتائج میں صوبہ بھر میں دوسری پوزیشن حاصل کیا ہے جو تعلیمی معیار میں بہتری کا مظہر ہے۔ بورڈ حکام کے مطابق، آنے والے امتحانات میں 40,600 سے زائد طلبہ و طالبات امتحان دیں گے۔
طلبہ کے لیے 106 امتحانی ہال جبکہ لڑکیوں کے لیے 68 ہال قائم کیے گئے ہیں۔
چیئرمین نے یقین دلایا کہ جن کالجوں میں فرنیچر کی کمی ہے، وہاں فوری طور پر فرنیچر فراہم کیا جائے گا جبکہ تمام امتحانی مراکز میں سی سی ٹی وی کیمرے نصب کیے جائیں گے تاکہ سخت نگرانی ممکن ہو سکے۔
کمشنر نثار احمد نے متعلقہ تمام محکموں اور افسران کو ہدایت کی کہ وہ امتحانات کے شفاف، منظم اور منصفانہ انعقاد کے لیے تعلیمی بورڈ کو مکمل تعاون فراہم کریں اور اس امر کو یقینی بنائیں کہ یہ امتحانات صوبائی حکومت کی پالیسی کے مطابق ہر قسم کے نقائص سے پاک ہوں۔
خیبر پختونخوا کے وزیر تعلیم ارشد ایوب خان نے کہا ہے کہ محکمہ تعلیم میں کوالٹی ایجوکیشن کی فراہمی یقینی بنانا اور سرکاری سکولوں کے نتائج میں بہتری لانے کیساتھ ساتھ سکولوں میں سہولیات کی فراہمی اور اساتذہ کو دور جدید کے تقاضوں سے ہم آہنگ تربیت کی فراہمی اور محکمہ تعلیم کے تمام نظام کو ڈیجیٹائز کرنا ان کی اولین ترجیح ہے
خیبر پختونخوا کے وزیر تعلیم ارشد ایوب خان نے کہا ہے کہ محکمہ تعلیم میں کوالٹی ایجوکیشن کی فراہمی یقینی بنانا اور سرکاری سکولوں کے نتائج میں بہتری لانے کیساتھ ساتھ سکولوں میں سہولیات کی فراہمی اور اساتذہ کو دور جدید کے تقاضوں سے ہم آہنگ تربیت کی فراہمی اور محکمہ تعلیم کے تمام نظام کو ڈیجیٹائز کرنا ان کی اولین ترجیح ہے۔ انہوں نے کہا کہ امتحانی نظام میں مزید اصلاحات متعارف کرکے رٹہ کلچر کا خاتمہ ہوگا اور ایس ایل او بیسڈ امتحانات کے انعقاد کے لیے اقدامات کیے جائیں گے۔ جس کیلئے پرائمری سے آٹھویں گریڈ تک کے طلباؤ طالبات کو تیار کیا جائے گا۔ اساتذہ کی تربیت پروگرام پر خصوصی توجہ دی جائے گی اور اس ضمن میں ڈی پی ڈی اور ڈی سی ٹی ای سے بھرپور استفادہ حاصل کیا جائے گا۔ ان خیالات کا اظہار انہوں نے محکمہ تعلیم اور اس کے ذیلی اداروں سے بریفنگ لیتے وقت کیا۔ اجلاس میں سیکرٹری ایجوکیشن محمد خالد خان، سپیشل سیکرٹریز عبدالباسط، مسعود خان، مینجنگ ڈائریکٹر مرجڈ ایریاز ایجوکیشن فاؤنڈیشن فریحہ پال، مینجنگ ڈائریکٹر ای ایس ایف قیصر عالم، ایم ڈی پی ایس آر اے افتخار مروت، چئیرمین ٹیکسٹ بک بورڈ عابداللہ کاکاحیل، تمام تعلیمی بورڈز سربراہان، ڈائریکٹر ایجوکیشن، ڈائریکٹر آئی ٹی اور محکمہ تعلیم کے دیگر اعلیٰ حکام نے شرکت کی۔ وزیر تعلیم ارشد ایوب خان نے مزید کہا کہ صوبے کے تمام سکولوں میں مفت درسی کتابوں، اور سکول بیگز کی فراہمی کے ساتھ ساتھ ساتھ صوبے کے ہر سکول میں فرنیچر کی فراہمی کے ساتھ موجودہ فرنیچر کو قابل استعمال بنانے کیلئے مرمت بھی کیا جائے گا۔ محکمہ تعلیم کے ڈائریکٹوریٹ اور سیکرٹریٹ بشمول تمام ذیلی اداروں کو مکمل طور پر ڈیجیٹائزڈ اور پیپرلیس بنایا جائے گا۔ ہوسٹنگ ٹرانسفرز پر پابندی برقرار رہے گی اور ملازمین کی آسانی اور میرٹ کو یقینی بنانے کے لیے ڈیجیٹائزڈ آن لائین سسٹم متعارف کیا جائے گا۔ وزیر تعلیم نے مزید کہا کہ آوٹ آف سکول بچوں کو سکولوں میں لانے کے لئے تمام وسائل بروئے کار لاکر لانگ، میڈیم اور شارٹ ٹرم پلانز تریب دیئے جا ئیں گے۔ نان فارمل ایجوکیشن کے تحت کمیونٹی سکولوں اور اے ایل پی سینٹرز قائم کئے جائیں گے۔ اور ان اداروں میں کوالٹی ایجوکیشن کی بہتری کے لیے اقدامات کیے جائیں گے۔ اور محکمہ تعلیم کے فاؤنڈیشن ورچوئل لرننگ پروگرام کو صوبے کے دیگر اضلاع تک توسیع دی جائے گی۔ تاکہ طلباؤ طالبات ان آن لائن کلاسز سے استفادہ لے سکیں۔ وزیر تعلیم نے بجٹ کے حوالے سے کہا کہ ترجیحی منصوبوں کی نشاندہی کریں اور ان منصوبوں کیلئے فوری طور پر بجٹ ریلیز کیلئے لائحہ عمل تیار کریں۔ انہوں نے کہا کہ گرلز ایجوکیشن کو حصوصی توجہ دی جائے گی اور طالبات کو اپنے ہی قریبی علاقوں میں بہترین تعلیمی سہولیات فراہم کرنے کیلئے اقدامات کئے جائیں گے۔ وزیر تعلیم نے یہ بھی ہدایت جاری کی کہ محکمہ تعلیم کمپلینٹ سیل کو فوری طور پر فعال کرنے کے ساتھ عوام کو آگاہی کی فراہمی کے لیے اقدامات کیے جائیں۔
رواں سال پہلے ہی جی ڈی پی کے تناسب سے ملکی تاریخ کا کم ترین ترقیاتی بجٹ تھا اب اس میں مزید 300 ارب کٹوتی کر کے 700 ارب کردیا گیا۔ مشیر خزانہ خیبرپختونخوا مزمل اسلم
مشیر خزانہ خیبرپختونخوا مزمل اسلم نے ملکی معشیت سے متعلق اہم بیان جاری کرتے ہوئے کہا ہے کہ رواں سال پہلے ہی جی ڈی پی کے تناسب سے ملکی تاریخ کا کم ترین ترقیاتی بجٹ تھا اب اس میں مزید 300 ارب کٹوتی کر کے 700 ارب کردیا گیا۔ مشیر خزانہ خیبرپختونخوا مزمل اسلم نے کہا کہ پاکستان کے مجموعی قرضے پچھلے چار سالوں میں 35000 ارب لئے گئے اس دوران وفاقی ترقیاتی اخراجات 4000 ارب سے بھی کم رہے عوام ملک کے قرض اور ترقی کا اندازاہ اس سے بخوبی لگا لیں اور ان حالات میں بھی دوسری جانب حکومت معیشت بہتری کے دعوے کر رہی ہے۔اس حکومت میں پاکستان کی ترقی اب ایک خواب بن کر رہ گئی ہے۔ ایک دوسرے بیان میں مشیر خزانہ خیبرپختونخوا مزمل اسلم نے بلاول بھٹو زرداری کے 27ویں آئینی ترمیم بارے ٹویٹ پر ردعمل دیتے ہوئے کہا ہے کہ دیانتداری سے ان ترامیم کے لیے قومی اتفاقِ رائے کی ضرورت ہے۔ ملک کی بہتری کے لیے اس پر وسیع مشاورت درکار ہے۔ مشیر خزانہ خیبرپختونخوا نے کہا کہ این ایف سی کی ازسرِنو تشکیل کے حوالے سے خیبرپختونخوا بالکل لاعلم ہے این ایف سی مشاورت کے لیے مجوزہ مسودہ درکار ہے۔