خیبرپختونخوا کے وزیر ایکسائز و ٹیکسیشن اور نارکوٹکس کنٹرول سید فخرجہان نے کہا ہے کہ صوبائی کابینہ نے سال 2025 میں آنے والی سیلابی آفت میں بونیر اور صوبے کے دیگر علاقوں میں لوگوں کے نقصانات کا ازلہ کرنے کیلئیدوکانات،رکشوں،پٹرول پمپس،گاڑیوں،اٹا کی آبی چکیوں (جرندہ) اور فیکٹریوں کے مالکان کے نقصانات پر مدد کیلئے مالی معاونت کی منظوری دی ہے۔صوبائی وزیر نے کہا کہ یہ اقدام بونیر کے متاثرین سیلاب اور اس آفت میں متاثرہ دیگر علاقوں کے متاثرین کیلئے صوبائی حکومت کی ایک اہم کاوش ہے جس سے متاثرہ خاندانوں کے نقصانات کا ازالہ ہو سکے گا۔واضح رہے کہ اگست 2025 میں آسمانی بجلی گرنے سے رونما ہونے والے ہولناک سیلاب سے ضلع بونیر میں کافی جانی و مالی نقصانات رونما ہوئے تھے اور صوبائی وزیر ایکسائز و ٹیکسیشن اور نارکوٹکس کنٹرول سید فخرجہان کی گذارش پر وزیر اعلی خیبرپختونخوا نے اپنے دورہ بونیر کے دوران خصوصی اعلان میں متاثرہ گھروں اور انسانی نقصانات کیلئے معاوضے کو بھی بڑھایا تھا۔اسی طرح سیلاب میں رکشہ و گاڑیوں کے نقصانات،پیٹرول پمپس، پن چکیوں،دوکانات اور ماربل فیکٹریز کے نقصانات معاوضے سے رہ گئے تھے۔اب صوبائی حکومت نے ان کی مالی معاوضے کی منظوری دی یے۔

خیبرپختونخوا کے وزیر برائے اعلیٰ تعلیم و بلدیات مینا خان آفریدی کی زیر صدارت ایک اعلیٰ سطحی اجلاس منعقد ہوا جس میں صوبے کی مختلف جامعات میں ملازمین کی بھرتی کے اجازت ناموں سے متعلق امور پر تفصیلی غور و خوض کیا گیا۔ اجلاس میں جامعہ گومل، جامعہ ملاکنڈ، جامعہ کوہاٹ سمیت دیگر جامعات کے وائس چانسلرز اور متعلقہ حکام نے شرکت کی۔اجلاس کے دوران اس بات پر تفصیلی گفتگو ہوئی کہ بعض جامعات میں ملازمین کی بھرتی کے عمل کو اجازت ناموں کے حوالے سے درپیش مسائل کا سامنا ہے۔ وزیر برائے اعلیٰ تعلیم مینا خان آفریدی نے واضح ہدایات جاری کرتے ہوئے کہا کہ جن جامعات کے پاس محکمہ اعلیٰ تعلیم اور محکمہ خزانہ سے ملازمین کی بھرتی کے لیے باضابطہ اجازت نامہ موجود ہے، وہ بلا تاخیر بھرتی کا عمل مکمل کریں تاکہ تعلیمی و انتظامی سرگرمیاں متاثر نہ ہوں۔انہوں نے مزید ہدایت کی کہ وہ جامعات جن کے پاس ابھی تک محکمہ اعلیٰ تعلیم اور محکمہ خزانہ کا اجازت نامہ موجود نہیں، وہ فوری طور پر متعلقہ محکموں کے ساتھ اجازت نامے کے حصول کا عمل مکمل کریں۔ وزیر برائے اعلیٰ تعلیم نے واضح کیا کہ اجازت ناموں کا مقصد جامعات کو غیر ضروری پابندیوں میں جکڑنا نہیں بلکہ انہیں انتظامی اور مالی امور میں بہتر رہنمائی فراہم کرنا ہے۔مینا خان آفریدی نے اس عزم کا اظہار کیا کہ جہاں جہاں جامعات کو رہنمائی اور معاونت درکار ہوگی، صوبائی حکومت انہیں ہر ممکن تعاون فراہم کرے گی۔ انہوں نے کہا کہ صوبے کی جامعات کو انتظامی، مالی اور تعلیمی لحاظ سے بااختیار بنانا حکومت کا مشن ہے تاکہ اعلیٰ تعلیم کے معیار کو بہتر بنایا جا سکے اور ادارے خودمختاری کے ساتھ مؤثر انداز میں اپنے فرائض انجام دے سکیں۔اجلاس کے اختتام پر وزیر برائے اعلیٰ تعلیم نے اس بات کا اعادہ کیا کہ حکومت خیبرپختونخوا صوبے کی جامعات کے مسائل کے حل اور انہیں مضبوط ادارے بنانے کے لیے تمام اسٹیک ہولڈرز کے ساتھ مل کر کام کرتی رہے گی۔

خواتین کے خلاف کام کی جگہ پر ہراسگی کے قانون میں ضروری ترامیم کے حوالے سے ایک اہم اجلاس صوبائی وزیر قانون، انسانی حقوق و پارلیمانی امور خیبر پختونخوا آفتاب عالم ایڈووکیٹ کی زیر صدارت منعقد ہوا۔ اجلاس میں خاتون محتسب رباب مہدی، سیکرٹری محکمہ قانون اختر سعید ترک، ایڈووکیٹ جنرل آفس کے حکام، محکمہ قانون کے افسران اور دیگر متعلقہ محکموں کے نمائندگان نے شرکت کی۔اجلاس کے دوران خواتین کی ہراسگی سے متعلق موجودہ قانون میں ضروری ترامیم کے ذریعے اسے مزید مؤثر بنانے پر تفصیلی غور و خوض کیا گیا۔ شرکاء نے اس امر پر اتفاق کیا کہ قانون میں واضح، جامع اور قابلِ عمل ترامیم وقت کی اہم ضرورت ہے تاکہ خواتین کو ہراسگی جیسے سنگین مسئلے سے مؤثر تحفظ فراہم کیا جا سکے۔اجلاس میں قانون کی تمام سیکشنز اور ذیلی سیکشنز کو فصیح، واضح اور مربوط انداز میں مرتب کرنے پر زور دیا گیا تاکہ قانونی ابہام کا خاتمہ ہو اور عملدرآمد میں آسانی پیدا ہو۔ اس موقع پر موجودہ ایکٹ اور مجوزہ ترامیم کا تقابلی جائزہ بھی پیش کیا گیا، جبکہ قانون میں مزید بہتری لانے کے لیے مختلف عملی تجاویز زیر غور آئیں۔وزیر قانون آفتاب عالم ایڈووکیٹ نے اجلاس سے خطاب کرتے ہوئے کہا کہ صوبائی حکومت خواتین کے حقوق کے تحفظ اور انہیں محفوظ ماحول فراہم کرنے کے لیے سنجیدہ اقدامات کر رہی ہے، اور ہراسگی کے قانون کو مزید مضبوط اور مؤثر بنانا حکومت کی ترجیحات میں شامل ہے۔ انہوں نے متعلقہ محکموں کو ہدایت کی کہ مجوزہ ترامیم کو جلد حتمی شکل دے کر عملی پیش رفت کو یقینی بنایا جائے۔

وزیراعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان نے اسپیکر پنجاب اسمبلی کی پریس کانفرنس پر سخت ردعمل دیتے ہوئے کہا ہے کہ جو شخص خود پنجاب اسمبلی کو“ماسی کا گھر”قرار دے چکا ہو وہ آج آئین، جمہوریت اور مہمانوں کے احترام پر لیکچر دے رہا ہے،انہوں نے کہا کہ وزیراعلیٰ خیبرپختونخوا سہیل آفریدی کا دورہ لاہور جعلی پنجاب حکومت کے ظلم و فسطائیت کا شکار کارکنوں اور ان کے اہل خانہ سے اظہار یکجہتی کے لیے تھا تاہم ہمیں اندازہ نہیں تھا کہ ایک منتخب وزیراعلیٰ کے دورے سے پوری پنجاب حکومت خوف اور گھبراہٹ کا شکار ہو جائے گی،شفیع جان کا کہنا تھا کہ منتخب وزیراعلیٰ کے دورے کو چھلانگیں قرار دینا دراصل اسپیکر پنجاب اسمبلی کی سیاسی گھبراہٹ اور بوکھلاہٹ کا واضح ثبوت ہے،اسپیکر جیسے آئینی عہدے پر فائز شخص کو شریف خاندان کا ذاتی ملازم بننے کے بجائے غیرجانبداری اور آئینی وقار برقرار رکھنا چاہیے،انہوں نے کہا کہ پاکستان تحریک انصاف کے قائد عمران خان سمیت پوری قیادت اور کارکنوں کے خلاف جعلی اور من گھڑت مقدمات قائم کیے گئے ہیں، مگر اسپیکر پنجاب اسمبلی پی ٹی آئی پر الزام تراشی سے قبل شریف خاندان کی اداروں پر چڑھائیوں اور کرپشن کے سنگین مقدمات پر نظر ڈالنے سے کیوں گریز کر رہے ہیں؟ 9 مئی کے واقعات کا واویلا دراصل ن لیگ کے سیاسی انتقام کو چھپانے کی ناکام کوشش ہے،معاون خصوصی نے کہا کہ آئین کا احترام صرف تقاریر سے نہیں بلکہ عملی اقدامات سے ثابت کیا جاتا ہے جبکہ ن لیگ کی حکومت نے آئین و قانون کا جنازہ نکال دیا ہے، انہوں نے سوال اٹھایا کہ پنجاب اسمبلی میں منتخب وزیراعلیٰ اور اراکین کو دھکے دینا اور روکنا کون سا آئین اجازت دیتا ہے؟ اسمبلی کسی ایک جماعت کی نہیں بلکہ تمام سیاسی جماعتوں کی ہوتی ہے،شفیع جان نے اسپیکر ملک احمد خان پر شدید تنقید کرتے ہوئے کہا کہ انہوں نے پنجاب اسمبلی کو ن لیگ کا ذیلی دفتر بنا دیا ہے اور پنجاب حکومت سیکیورٹی کے نام پر اپنے سیاسی خوف کو چھپا رہی ہے،منتخب عوامی نمائندوں کی تذلیل سے جمہوریت مضبوط نہیں بلکہ کمزور ہوتی ہے،پنجاب اسمبلی میں پیش آنے والا واقعہ ن لیگ کی سیاسی عدم برداشت کی واضح مثال ہے،انہوں نے مزید کہا کہ عظمیٰ بخاری کی جانب سے مسلسل نسلی تعصب پر مبنی بیانات اس بات کا ثبوت ہیں کہ جعلی پنجاب حکومت سیاسی انتقام میں بوکھلاہٹ کا شکار ہو چکی ہے،شفیع جان نے اسپیکر پنجاب اسمبلی کو خیبرپختونخوا اسمبلی آنے کی دعوت دیتے ہوئے کہا کہ ملک احمد خان کو اسپیکر خیبرپختونخوا اسمبلی سے جمہوری روایات اور پارلیمانی وقار کے حوالے سے بہت کچھ سیکھنے کو ملے گا، انہوں نے خبردار کیا کہ ن لیگ یہ بات یاد رکھے لاہور کا دورہ تو صرف اسٹریٹ موومنٹ کا آغاز تھا۔