خیبر پختونخوا کے وزیر برائے ریلیف، بحالی و آباد کاری عاقب اللہ خان نے کہا ہے کہ صوبے کی ترقی و خوشحالی کے لیے عملی اقدامات اٹھا رہے ہیں، درپیش مسائل کے حل کے لیے مل کر کام کریں گے, جس کے لیے تمام صوبائی محکموں کی بھرپور ہم آہنگی ضروری ہے۔ ان خیالات کا اظہار انہوں نے پراونشل ڈیزاسٹر مینجمنٹ اتھارٹی کے پشاور میں پی ڈی ایم اے کی جانب سے اگلے پانچ سالوں کے لیے منصوبہ بندی سے متعلق منعقدہ اجلاس کی صدارت کرتے ہوئے کیا۔اجلاس میں سیکرٹری محکمہ ریلیف، ڈی جی پی ڈی ایم اے، ریسکیو 1122، کمیونیکیشن اینڈ ورکس ڈیپارٹمنٹ، ایری گیشن اور محکمہ جنگلات کے نمائندوں کے بشمول اکیڈیمیا اور دیگر افسران و اسٹیک ہولڈرز بھی شریک تھے۔ اس موقع پر صوبائی وزیر ریلیف کو پراونشل ڈیزاسٹر مینجمنٹ اتھارٹی کی مجوزہ پانچ سالا منصوبہ بندی کے حوالے سے تفصیلی بریفننگ دی گئی، اور انہیں مذکورہ منصوبہ بندی کے اغراض و مقاصد سمیت اس کی اہمیت کے بارے میں آگاہ کیا گیا۔ اجلاس میں نیشنل ڈیزاسٹر مینجمنٹ ایکٹ 2010، نیشنل ڈیزاسٹر، رسک ریڈکشن ایکٹ، سنڈائی فریم ورک چار ڈیزاسٹر رسک ریڈکشن 2015-2030، ایمرجنسی رسپانس میکنزم، رسک پروفائلنگ، اور امپلیمنٹیشن کمیٹی سے متعلق غور و خوض کیا گیا۔ بریفینگ میں بتایا گیا کہ صوبائی ڈیزاسٹر ریڈکشن پالیسی کو بھی مذکورہ پلان کا حصہ بنایا جا رہا ہے اور خیبر پختونخوا پورے ملک میں واحد صوبہ جو اس قسم کے منصوبے کو عملی شکل دے رہا ہے۔ ۔ صوبائی وزیر ریلیف نے پی ڈی ایم اے پر زور دیا کہ وہ نہ صرف صوبائی سطح پر بلکہ ضلعی اور تحصیل سطح پر بھی ارلی وارننگ سسٹم کو تیز تر کردیں تاکہ کسی افت کی صورت میں عوام کو محفوظ مقام تک پہنچانے کیلئے کافی وقت مل سکے ۔ انہوں نے کہا کہ خیبر پختونخوا میں قدرتی افات سے نمٹنے کیلئے عملی اقادامات کی ضرورت ہے تاکہ عوام کو افات کے اثرات سے بچایا جا سکے۔ ان کا کہنا تھا کہ کمیونٹی کو بروقت پیغام رسانی ، افات کے دوران عوام کو محفوظ مقامات پر پہنچانے اور افات کے بعد دوبارہ آبادکاری جیسے دیگر امور میں غفلت ناقابل برداشت ہوگا، اور اس صورت میں ضرور ایکشن بھی لیا جائے گا۔

خیبر پختونخوا کے وزیر برائے ابتدائی و ثانوی تعلیم ارشد ایوب خان نے گزشتہ روز گورنمنٹ ہائیر سیکنڈری سکول نمبر 1 ہری پور کا اچانک دورہ کیا۔اس موقع پر سکول کے پرنسپل ظفر عباسی اور وائس پرنسپل فواد حسین نے وزیر تعلیم کا پر جوش استقبال کیا اور انہیں ادارے کی تعلیمی سرگرمیوں سے آگاہ کیا۔ ارشد ایوب خان نے ہائر سیکنڈری سیکشن، امتحانی ہال، آئی ٹی لیب اور فلٹریشن پلانٹ کا معائنہ کیا اور طلبہ سے نصابی علوم پر گفتگو کی۔ انہوں نے کلاس روم میں بطور طالب علم بیٹھ کر اساتذہ سے لیکچر بھی سنا اور اساتذہ کی تدریسی صلاحیتوں کو سراہا۔ صوبائی وزیر نے دورے کے دوران ادارے کے پرنسپل کی جانب سے پیش کردہ مسائل کے حل کی یقینی دہانی کراتے ہوئے سکول میں سولر سسٹم، آئی ٹی لیب، امتحانی ہال کی تزئین و آرائش اور نئی پوسٹوں کے مطالبات کی فوری منظوری کا اعلان کیا۔ انہوں نے کہا کہ سکول بیسڈ فیسلیٹی کے تحت گورنمنٹ ہائیر سیکنڈری سکول نمبر 1 ہری پور کو سنٹر آف ایکسیلینس کا درجہ دیا جا چکا ہے جہاں جدید سہولیات اور بہترین اساتذہ فراہم کیے جائیں گے۔ صوبائی وزیر نے اس موقع پر تعلیمی اصلاحات کے ذریعے نظام میں انقلابی تبدیلیاں لانے کے عزم کا اظہار کرتے ہوئے بتایا کہ 11 ارب روپے کی فنڈنگ سے 16 ہزار تدریسی آسامیوں پر بھرتیاں کی جائیں گی اور سکولوں میں نئے کلاس رومز اور آئی ٹی لیبز بھی قائم کئے جائیں گے۔ انہوں نے کہا کہ 6 ہزار اساتذہ کنٹریکٹ پر بھرتی کیے جائیں گے جبکہ ریشنلائزیشن پالیسی پر عمل درآمد تیز کیا جا رہا ہے جبکہ تدریسی اور مینجمنٹ کیڈر کو علیحدہ کیا جا رہا ہے تاکہ اساتذہ سکولوں میں تدریسی فرائض انجام دیں اور محکمہ تعلیم سے سفارشی کلچر کا خاتمہ کیا جا سکے۔

خیبرپختونخوا کے وزیر ایکسائز و ٹیکسیشن اور نارکوٹکس کنٹرول سید فخرجہان نے بانی قوم قائدِاعظم محمد علی جناحؒ کے یومِ ولادت پر خراجِ عقیدت پیش کرتے ہوئے اپنے پیغام میں کہا ہے کہ25 دسمبر کیتاریخی یوم کی نسبت ہمیں اُس عظیم جدوجہد کی یاد دلاتا ہے جس کے نتیجے میں بابائے قوم کی قیادت میں برصغیر پاک و ہند کے مسلمانوں کو ایک آزاد اور خودمختار مملکت نصیب ہوئی۔ صوبائی وزیر نے کہا کہ یقیناً آزادی کی اس نعمت کی قدر وہی اقوام زیادہ محسوس کرتی ہیں جو آج بھی آزادی سے محروم ہیں۔صوبائی وزیر کا کہنا تھا کہ بابائے قوم کا یومِ ولادت ہمیں اس عظیم جدوجہد کے تسلسل میں اپنی ذمہ داریوں کا احساس دلاتا ہے کہ ہم اس ملک کو دنیا کے نقشے پر ایک عظیم، باوقار اور بااثر ریاست کے طور پر ابھاریں۔ آج کے حکمرانوں، عوامی نمائندوں اور اداروں پر بھاری ذمہ داری عائد ہوتی ہے کہ وہ ایمانداری، دیانت اور قانون کی بالادستی کے ساتھ قوم کی توقعات پر پورا اتریں، اور ملکی ترقی کیلئے اپنی حیثیت میں اپنی ذمہ داریاں اور فرائض ادا کریں۔انھوں نے کہا کہ ہمیں عہد کرنا ہے کہ ہم اس پاکستان کی تکمیل اور قاید کی امنگوں کے مطابق حقیقی آزادی کے لیے کام کریں گے جس کا خواب قائداعظمؒ نے دیکھا تھا،ایک ایسا پاکستان جو عدل، میرٹ، شفافیت اور عوامی خدمت کی بنیاد پر کھڑا ہو۔ صوبائی وزیر نے کہا کہ پاکستان تحریکِ انصاف اپنے بانی چیئرمین عمران خان کے ویژن کے تحت اسی حقیقی آزادی، خودداری اور آئین و قانون کی بالادستی کی جدوجہد کو آگے بڑھا رہی ہے۔انھوں نے کہا کہ اللہ تعالیٰ پاکستان کی حفاظت فرمائے اور ہمیں قائداعظمؒ کے سنہری اصولوں پر عمل کرنے کی توفیق عطا فرمائے۔ آمین

انڈسٹریل ہیمپ پلانٹ کے میڈیسنل اور تحقیقی استعمال کے حوالے سے قائم ریگولیٹری کمیٹی کا تیسرا اجلاس پیر کے روز صوبائی وزیر ایکسائز و ٹیکسیشن اور نارکوٹکس کنٹرول سید فخرجہان،وزیر صحت خلیق الرحمان اور وزیر قانون آفتاب عالم کی زیر صدارت محکمہ ایکسائز کے دفتر شامی روڈ پشاور میں منعقد ہوا۔اجلاس میں سیکرٹری ایکسائز و ٹیکسیشن اور نارکوٹکس کنٹرول خالد الیاس،سیکرٹری صحت شاہد اللہ خان،ڈی جی ایکسائز عبدالحلیم خان، محکمہ ایکسائز کے مختلف شعبوں کے متعلقہ افسران،کمیٹی میں شامل محکمہ زراعت،صحت،قانون و دیگر محکموں کے حکام،پی سی آئی آر لیبارٹریز،قرشی انڈسٹریز کے حکام اور دیگر متعلقہ محکموں اور اداروں کیافسران نے شرکت کی۔اجلاس کے دوران انڈسٹریل ہمپ کے امور کے حوالے سے ریگولیٹری کمیٹی کی جانب سے قائم کردہ سب کمیٹی کی مرتب کردہ سفارشات کا جائزہ لیا گیا اور اس سلسلے میں فورم کو کمیٹی کی جانب سے میڈیسنل پلانٹ ہمپ کے لائسنس اجرا اور ایکسائز ڈیوٹی وغیرہ کے امور کے حوالے سے دی گئی تجاویز پر روشنی ڈالی گئی۔اس سلسلے میں ریگولیٹری کمیٹی کے فورم نے فیصلہ کیا کہ میڈیسنل پلانٹ ہمپ کے لائسنس اجرا اور ایکسائز ڈیوٹی کے نرخوں کے تعین کی منظوری کیلئے کیس صوبائی کابینہ کوپیش کیا جائے گا۔اس طرح میڈیسنل پلانٹ ہمپ کیلئے انڈسٹری کیلئے درخواست لائسنس اور اس سے جڑے دیگر اسنادی لوازمات بھی منظوری کیلئے صوبائی کابینہ کے سامنے پیش کیئے جائیں گے اور حتمی منظوری کے بعد اسے متعلقہ انڈسٹری کیلئے لائسنس کے حصول کیلئے اوپن کیا جائے گا۔واضح رہے کہ میڈیسنل پلانٹ ہمپ صنعتی و تحقیقی اور طبی مقاصد کیلئے استعمال میں لایا جائے والا میڈیسنل پلانٹ ہے جس کا کوئی سائیڈ ایفیکٹ نہیں ہے اور ہر قسم کے نشے وغیرہ سے پاک ہے۔