خیبر پختونخوا کے وزیر بلدیات، الیکشنز و دیہی ترقی ارشد ایوب خان کی زیر صدارت محکمہ بلدیات

خیبر پختونخوا کے وزیر بلدیات، الیکشنز و دیہی ترقی ارشد ایوب خان کی زیر صدارت محکمہ بلدیات کے ڈیجیٹلائزیش کے حوالے سے ایک اعلیٰ سطحی اجلاس منعقد ہوا۔ اجلاس میں سیکرٹری بلدیات ڈاکٹر امبر علی خان، سیکرٹری لوکل کونسل بورڈ وحید الرحمن، پروجیکٹ ڈائریکٹر اربن ایریا ڈویلپمنٹ اتھارٹی کوہاٹ عبدالہادی اور دیگر اعلیٰ حکام نے شرکت کی۔اجلاس میں صوبائی وزیر بلدیات کو اربن ایریا ڈویلپمنٹ اتھارٹی کوہاٹ میں تنظیم نو کے حوالے سے جامع بریفنگ دی گئی۔ اس تنظیم نو کی وجہ سے ادارے کے گزشتہ چھ ماہ کی کارکردگی میں خاصی بہتری آئی ہے اور ریونیو میں بھی اضافہ ہوا ہے جس سے اربن ایریا ڈویلپمنٹ اتھارٹی کوہاٹ کے مالی معاملات میں بھی کافی بہتری آئی ہے۔ارشد ایوب خان نے کہا کہ محکمہ بلدیات کو آرٹیفیشل انٹیلیجنس کے بنیادوں پر ڈیجیٹلائزیشن کی طرف لے کر جانا ہے اور پہلے مرحلے میں تحصیل میونسپل ایڈمنسٹریشن کوہاٹ، ڈبلیو ایس ایس پی کوہاٹ اور اربن ایریا ڈویلپمنٹ اتھارٹیز ایبٹ آباد، مردان اور سوات پر کام کیا جائے گا۔ انہوں نے کہا کہ اس کام کے لیے ان اداروں کے متعلقہ ملازمین کو ٹریننگ دی جائے اور کوئی بھی ملازم باہر سے ملازمت پہ نہ رکھا جائے تاکہ کل کو یہی محکمے کے لوگ اس کو آگے لے کر جاسکیں۔صوبائی وزیر بلدیات نے کہا کہ محکمے کو جدید خطوط پر استوار کرنے سے ہمارے نظام میں شفافیت آئے گی اور میرٹ کی بنیاد پر کام ہوگا۔ انہوں نے کہا کہ ڈیجیٹلائزیشن کے اس عمل سے محکمہ بلدیات کے فنڈز کے مسائل پر بھی قابو پایا جائیگا، سروس ڈیلیوری بھی بہتر بنائی جائے گی، متعلقہ اداروں کے ریونیو بھی بڑھایا جائے گا اور اکاؤنٹس ریکارڈ کو بھی صحیح طریقے سے ریکارڈ کروایا جاسکے گا۔