ضلع کرم میں دائمی امن, سفر محفوظ بنانے اور قانون کی عملداری کے لئے اسلحہ کی حوالگی ناگزیر ہے،چیف سیکرٹری خیبرپختونخوا

چیف سیکرٹری خیبرپختونخوا ندیم اسلم چوہدری نے کہا ہے کہ ضلع کرم میں دائمی امن قائم کرنے اور سڑکوں کو سفر کے لیے محفوظ بنانے کے لیے تمام غیر قانونی اسلحہ حکومت کے حوالے کرنا ضروری ہے۔ ان خیالات کا اظہار چیف سیکرٹری نے منگل کی شام کمشنر ہاؤس کوہاٹ میں ضلع کرم کے گرینڈ جرگے کے ممبران اور اہل تشیع کے مشران سے خطاب کرتے ہوئے کیا۔ اس موقع پر جی او سی کوہاٹ ذوالفقار علی بھٹی، آئی جی پی خیبرپختونخوا اختر حیات خان، کمشنر کوہاٹ ڈویژن سید معتصم باللہ شاہ، آر پی او کوہاٹ عباس مجید مروت، ڈپٹی کمشنر کوہاٹ عبدالاکرم، اور ضلع کرم سے تعلق رکھنے والے موجودہ و سابق پارلیمنٹرینز موجود تھے۔ چیف سیکرٹری نے واضح کیا کہ ضلع کرم میں تنازعہ بظاہر دو فریقین کے درمیان ہے، لیکن بدقسمتی سے انتہا پسند عناصر ان کے درمیان نفرتیں بڑھانے کی کوشش کر رہے ہیں۔ انہوں نے دونوں فریقین پر زور دیا کہ وہ ان امن دشمن عناصر کی نشاندہی کریں اور انہیں اپنے مذموم عزائم میں کامیاب نہ ہونے دیں۔ ندیم اسلم چوہدری نے کہا کہ حکومت ہر صورت کوہاٹ معاہدے پر عملدرآمد یقینی بنائے گی اور اس مقصد کے حصول کے لیے تمام متعلقہ فریقین کا تعاون ضروری ہے۔ انہوں نے کہا کہ جیسے ہی فریقین مکمل تعاون کریں گے، معاہدے پر عملدرآمد ممکن ہوگا۔ انہوں نے خبردار کیا کہ موجودہ حالات کو معمولی نہ سمجھا جائے اور اپنے علاقوں اور لوگوں کی حفاظت کے لئے فہم اور بردباری سے کام لیا جائے۔چیف سیکرٹری نے کہا کہ حکومت قانون کی عملداری ہر صورت میں یقینی بنائے گی۔ جو بھی حکومتی احکامات یا قوانین کی خلاف ورزی کرے گا، اس کے خلاف سخت قانونی کارروائی کی جائے گی۔ انہوں نے کہا کہ جو ایف آئی آرز درج ہو رہی ہیں، یہ صرف کاغذی کارروائی نہیں ہیں بلکہ ان پر عملدرآمد ہوگا، اور مجرموں کو سخت سزائیں دی جائیں گی۔چیف سیکرٹری نے کہا کہ ہم سب پاکستانی ہیں، اور یہ ہماری اجتماعی ذمہ داری ہے کہ نفرتوں کو ختم کریں اور لوگوں کو ایک دوسرے کے قریب لائیں۔ انہوں نے دونوں فریقین پر زور دیا کہ وہ اپنے علاقوں میں نوجوانوں کو امن کے اس مشن میں شامل رکھیں اور علاقے میں امن و امان کی فضا برقرار رکھنے کے لیے حکومت کے ساتھ مکمل تعاون کریں۔ خطاب کے اختتام پر، چیف سیکرٹری نے حکومت کے عزم کا اعادہ کرتے ہوئے کہا کہ ہر قسم کے چیلنجز کے باوجود حکومت اپنے فیصلے نافذ کرے گی اور امن و امان قائم رکھنے کے لیے تمام وسائل بروئے کار لائے گی۔ کرم گرینڈ جرگہ سیشن سے پہلے چیف سیکرٹری خیبر پختونخوا ندیم اسلم چوہدری نے انسپکٹر جنرل پولیس اختر حیات خان کے ہمراہ ضلع ہنگو کا دورہ کیا اور کرم سے بعض دیہات کے انخلاء کے بعد خاندانوں کے لئے قائم عارضی امدادی کیمپ کا دورہ کیا، سہولیات کا جائزہ لیا، کیمپ میں رہائش پذیر افراد سے ملاقاتیں کیں۔ چیف سیکرٹری نے سہولیات اور انتظامات پر اطمینان کا اظہار کیا۔